Read Futuna-Aniwa Lukas 8 Bible Online

Lukas 8 - Futuna-Aniwa bible

Lukas 8

¹Malyi kuramwe ner aryi Er Yesus bisi teleb co yung sirya lubdeibmou ura, uki kum kubmai cok, Er Yesus biryi weik atei yibina mitik atei yibina kibkirikoka, “Er Imtamnyi bira ninyi leboka kalingna Weik Sienyi kurur,” eboka Teleb Uram eterebkirikmou. A yibinkirikmou talak ara Er miliramnyi nang amolbaryi nang ababyi tonkwa yibarkiringnamnyi.

²Ba, nerabwe mer ababyi tonkwa yibarkiringnamnyi. A nerabwe mer ara u yiramwe asi Er Yesus biryi kwetebmou nerabwe ab tonda, isa kanya wengdaramwe asi yakdonokmou nerabwe ab milibmai. A nerabwe sun si ara isa kanya tabaryi wekamwe asi yakdonokmou ner si Maria atei Magdala ner ab,

³Weik sienyi Herodes co bok deirinanyi si Khuza ner si Yohana ab, Susana ab, ton yuk nerabwe-yuk nerabwe ilinto ab aryi Ersi milibmai. A nerabwe mer sun bona boramnyi dinyi nirya ara Er Yesus ab Er miliramnyi nang ab ati nirya karebmai.

⁴Ninyi ilinto, atei yukdongoboka-yukdongoboka Er Yesus dam miliryanmai. Ura, Erci kemdeirina uram tentok doboka eterebmou.

⁵Ara ato, “Uki tentok tum aryi ninyi tentok er wa in dam yala kwengbinmou. Wa in dam bindoka yala kwengmou uca, ton dinyi ara bisik iririkna dam sakmou uca, tukwe kat aryi lak mabmou asi, ninyi yibanmai ci, yanisitabmai ba, maka mer aryi doyibsekmai.

⁶Ba, ton yala kwekmou ara keil kankan sakmou asi, tukwe mitik aryi abmou cok, yating me ton bolina kum aryi tumakoka koula danmou.

⁷Ba, ton yala kwekmou ara dola kankan sakmou ci, abmou bok, dola aryi kwiliya obsinibmou ba, lubmou.

⁸Ba, ton yala kwekmou ara tukwe teleb ai sakmou ba, diboka abmou ci, du yubwa-yubwa seratus baryi moubmou,” eboka kebdei eterebmou. Ato kebdeiboka sirya eterebmou ura, ato ebmou, “Unanyi biryi ninyi uram keken dinyi amol boanci ura, a ebman uram ara diboka kekeboka bikdobkwandur!” ebmou.

⁹Er Yesus biryi a sirya eterebmou ura, Er miliramnyi nang aryi Ersi ato eboka asibmai, “A kebdeiboka ebmarim ara unatoa ati ebmarim do?” eboka asibdenmai.

¹⁰Uca, Er Yesus biryi sunsi uram dengna ara ato ebkarebmou, “Sunsi ara, ‘Una kuboka Er Imtamnyi bira ninyi leboka kalingna Weik Sienyi kurur ci, iniboka Er mabwe-nermabwe kalingdur dinyi ara bikwandum,’ tenen kisal yuk karebsou. Bok, sun yuk nang ati Niryi kebdeiboka eterebmonwe ara, ‘Sunci asing dina ara dinmangiryok, eirina ara kum kubkwaming. Tonda, kekena ara kekenmangiryok, tenena ara kum kubkwaming,’ tenen kebdeiboka eterebmonwe,” ebmou. (Yesaya 6:9)

¹¹Ura kebdeiboka eterebmou dinyi ati lak ara ato ebmou, “Niryi kebdeiboka eterebmonwe ara ato ati eterebmonwe. Yala kiklibmonwe ara Er Imtamnyi Uram ati kiklibmonwe.

¹²Ba, ton yala bisik iririkna dam sakmou eboka kiklibmonwe. Ara, Er Imtamnyi Uram kekeronmangnyi nang asi isa sienyi Iblis biryi, ‘Er Imtamnyi Uram kekeboka diba tenebdobingnyi ba, lemna dinyi dobdobingnyei,’ tenen, Er Imtamnyi Uram sun kanya dam aryi dorkarongnande ati kiklibmonwe.

¹³Ba, ton yala ara keil kankan sakmou eboka kiklibmonwe. Ara, Er Imtamnyi Uram kanya kilkil asa dobdobmangiryok, diboka kanya tam wengbana kum uca, tiya ati dib tenebmangnyi ani, isa aryi dubdeci ura, ola tangloraming ati kiklibmonwe.

¹⁴Ba, ton yala ara dola kankan sakmou eboka kiklibmonwe. Ara, Er Imtamnyi Uram kekeroramingiryok asi, sun mining mambul tenen kanya boboka yinatam ati ingkiringna ab, bona ati ingkiringna ab, sun kanya teleb kimdeirin ati ingkiringna ab aryi, Er Imtamnyi Uram kekeroramingnyi dinyi ara sikliboka ouraming ba, du kum mourande ati kiklibmonwe.

¹⁵Ba, ton yala ara tukwe teleb ai sakmou eboka kiklibmonwe. Ara, Er Imtamnyi Uram kekeroramingiryi, sun kanya tam diboka kunuramingnyi nang ara busul kuboka Er Imtamnyi Uram tuba-tuba kekeroraming deyok aryi, du lak kibkwandur ati kiklibmonwe.” Ato eboka Yesus biryi Er miliramnyi nang dam lak kibdeiboka eterebmou.

¹⁶Er Yesus biryi Er Imtamnyi Uram deyok ati, ninyi eterenmou ci, ato ebmou, “Ninyi aryi uk ubna dinibdongobingnyi ura, tukwe aryi iniboka kikniraming moyok aryi ton kum siklirdongonung. Tonda dobtaleboka man sokon amwetam kum deirinung. Erda dinibdongobingnyi ura, dobtaleboka erebdob ai deibmangnyi ba, akai umbura wengbanmangnyi ninyi nirya a uk buk milil asing eiriraming.

¹⁷Ukuryok ara, ‘Una kuboka Er Imtamnyi bira iya weik sienyi kurur ci, Er mabwe-nermabwe leboka kalikwande,’ tenen dinyi nirya ara iniboka kuranci ababyi aminda ara lak kibkwande. Tonda ukuryok ara siklirdongordaramingnyi dinyi ababyi aminda ara lak kibdeibkwande ba, ninyi nirya bikwaming.

¹⁸A deyok ati sun kekenmarum dinyi ara diboka diblilibdendarur. Ara, ato deyok ati ebman, unanyi biryi Er Imtamnyi Lemna uram bingna dinyi kanya dam ton deibdanci ura, anyi dinyi ara ton tabakdongobkwande. Ba, unanyi biryi Er Imtamnyi Lemna uram bingna dinyi kanya dam ton kum deibdanci ura, er kanya dam aryi dobdobkwande,” eboka eterebmou.

¹⁹Er Yesus Er weityabwe ab sun kwin Maria ab Er Yesus dam yanmai bok, ninyi ilinto libmai deyok aryi, sunci Er Yesus dam kobdob kum binmai.

²⁰Ura, yuk nang aryi Er dam asi ebdongobmai, “Kan kwin ab Kan weityabwe ab ara, ‘Kan ab ebdatibyi,’ tenen ati baitam yandoka dibde tikmaking,” ebmai.

²¹Uca, Er Yesus biryi uram doboka ato ebmou, “Er Imtamnyi Uram asi Niryi etereran ba, kekeboka kunuramingnyi nang nirya ababyi, ‘Ni kwinyabwe Ni weityabwe ato kuraming,’ tenenun,” ebmou.

²²Uki tentok tum aryi Er Yesus ab Er miliramnyi nang ab co ngun-ngun dub welebindoka bukmai ci, Er Yesus biryi Er miliramnyi nang asi ato ebmou, “Ni kwityabwe, nun a mekwan koubkaboka otam binkwayeb,” ebmou. Ba, sunci a mekwan deici banmai.

²³Ba, banmai noutam ara Er Yesus bira wi mabmou. A talak aryi ibalya yandoka me kwatib-kwatib enmou ba, co ngun-ngun umbura me wekoka dangublobmanto kunmou.

²⁴Asi, Er miliramnyi nang aryi Er Yesus mabmoua dam yandoka kamubdeibmai ura, ato ebmai, “Se Nai nun eteresurumnyi, nun a obkwamasir anun e. Kanci lebdobsurum!” ebmai. Ura, Er Yesus bukalaboka, ibalya doboka me kwatib-kwatib enmou asi erekdobmou. Ba, ibalya doboka me kwatib-kwatib enmou dinyi kum danmou ci takmou.

²⁵Ura, Er miliramnyi nang asi, “Se,” tenebmou ci, ato ebmou. “Sunci Nisi dib tenenindarur dinyi ara dantam kubmasir do?” ebmou. Ba, sun kanya ilil kubmou ura, “Nai,” tenebmai ci, sun mamun asi ebdanin yibinmai, “Se naiyabwe, nun ilil e. Anyi bira unanyi bitonyi kurur aryi, ‘Ibalya ab me ab asi takdum!’ eboka erekdande akiryok Er ebmar to kunuboka kum danande?” ebdanmai.

²⁶Er Yesus ab Er miliramnyi nang ab Galilea mekwan koubkaboka yaletam kuboka doramnyi atei si Gerasa mutuk dararbinmai.

²⁷Dararbinmai ura, Er Yesus co ngun-ngun umbura aryi yurbindoka mekwan katum dam weletingbau ura, akateinyi tentok aryi Er dam yandoka u dakmou. Anyi bira isa kanya mer ilinto wekamnyi ba, ongon aling ongorona kum uca, iya ur kuramwe. Anyi bira atei ababyi ton kum yangarderamwe, erda din nang tukwe ungna dam akwe iya kuramwe.

²⁸Ani, Er Yesus banmou asi isa kanya wekamunyi biryi eibmou ci, bikmou ura, Er Yesus urasin dam luknubdongoboka uram weikto iboka dobmou. “Se Yesus, Er Imtamnyi Iya Weik Erebdobnyi Mi, Kanda nisi una kubkwamanirim ati yanganmarim do? Niryi Kansi molobdobkun ara Kanci nisi weiktoto wenebniminyei,” eboka uram dobmou.

²⁹Anyi biryi ato ebmou ara Er Yesus biryi isa kanya asi, “Bindobdum!” eboka yakdonokmou deyok ati ebmou. Anyi bisi wekamnyi isa kanya mer aryi kiliboka borkiringnamnyi deyok aryi, ninyi aryi, “Ato tubto ukubcei,” tenen taruk ab yan ab asi besi tabwe aryi debloboka kaliki buramnyi. Asi a demnamnyi tabwe besi ara nirya bulbulukaboka isa kanya mer aryi ninyi singsing iya mitika kum ai akwe yakdonokoka bobaramnyi.

³⁰Ura, Er Yesus biryi anyi bisi, “Kan si ara unanyi do?” eboka asibdenmou. Uca, anyi bira isa kanya yubwa-yubwa ilinto wekamnyi deyok aryi, isa kanya aryi ebkarebmou to ebmou ci, “Ni si ara Legion,” ebdanmou.

³¹Ura, isa kanya mer aryi, “Er Yesus biryi nunsi ukuca uk bisik yakwetebsicei,” tenen ati Er Yesus bisi molobdobmai.

³²Ura, bisam mer mutuk kon bukamwe amwetam mutuk mol yinmai asi, isa kanya mer aryi ato tenebmai ci, molobdobmai, “Er Yesus biryi o bisam mer asi, ‘Ur wengdorbindarur,’ ebkwansurur,” tenen ati molobdobmai. Ba, Er Yesus biryi isa kanya mer aryi molobdobmai to, “Ur wengdorbindarur,” ebmou.

³³Ura, isa kanya mer ara anyi umbura dam aryi anabkaboka-anabkaboka a bisam mer umbura dam wengbinsekmai. Ba, a bisam mer ara mol yinmai ai aryi sangkurukaboka-sangkurukaboka mekwan umbura wengdarbindoka me isin daksekmai.

³⁴Ato kubmou asi, a bisam kalingna nang aryi eibmai ura, cungbindoka dam-dam kuramnyi atei nang dam nirya ebde yibinmai.

³⁵Ba, akatei nang aryi, “A kubmou dinyi nun ton eibtibyi,” tenen aryi yanmai. Ura, a ninyi Er Yesus dam yandoka diramnyi uca, isa kanya mer wekamnyi ani, takloboka binmainyi bira kanya teleb tubto deibmou. Ba, ongon aling diboka ongobdobmou ci, Er Yesus dam bukoka uram enmou asi kekenmou bok, asing eibmai. Ura, a diryanganmai nang aryi, “Kwetebman kumnyi bok Er Yesus mikib aryi kwetebmar,” teneboka sun kanya ilil kubmou.

³⁶Asi, Er Yesus biryi isa kanya mer wekamnyi asi yakdonokmou. Ba, sun asing eibmai nang aryi atei tam aryi yanganmai nang ati, “Ato kuboka yakdonokmar,” eboka nukarebmai.

³⁷Ura, Gerasa mutuk kuramnyi nang nirya aryi Yesus mikib asi ilil mitik kum kubmou ura, sunci Ersi, “Kan a mutuk kun kum, bindobdum!” ebmai. Ba, Er Yesus ab Er miliramnyi nang ab aryi, “Tamuboka bindobkwayeb,” tenen co ngun-ngun dub burwelebanmai.

³⁸Asi, isa kanya mer wekamnyi ani, takloboka binmainyi biryi Er Yesus bisi, “Ni Kansi iya milinkwankin,” eboka molobmou. Bok, Er Yesus biryi anyi bisi bindobdum ebmou ci, ato ebmou.

³⁹“Kan ai ninyi asi biminyi ura, ato kubdum. Er Imtamnyi biryi kansi lebmakir ci, kan dam kubmakir dinyi nirya asi, kan ai ninyi dam nukde birum!” ebmou. Ba, anyi biryi a meruman doramnyi atei yibinkirikoka Er Yesus biryi ersi kubmou to nirya nukde yibinmou.

⁴⁰Ninyi ilinto aryi, “Er Yesus bira una tum aryi atam tamuryankwande do?” teneboka dibde buramnyi bok, Er Yesus Gerasa mutuk tam aryi tamuryanganmou ura, sun kanya kilkil asa aryi Er ab tonkwa ebdanmai.

⁴¹Ura, ninyi si tentok Yairus Er dam yanmou. Anyi bira Musa Uram eteren ai kalingnamunyi kuramwe. Anyi er nebnyi ara tentok a kunum deibdamwe bok, dibmanto kunmou deyok aryi, “Er Yesus ni ai yandoka ni nebnyi kwetebte,” tenen Er Yesus dam yandoka luknubdongoboka buryanmou ci, molobmou. A nebnyi er kwalina ara amolbaryi kwaliamwe asi u yiramwe ba, dibmanto kunmou ati moloryanmou. Ura, Er Yesus bira anyi atei banmou ci, bisik noutam banmou ura, ninyi ilinto aryi limdanmai.

⁴²

⁴³A banmou noutam aryi bunga ining kwalina amolbaryi iya yibarmururamwe ner tentok yanmou. A ner ara yuk nang asi er bona taleramwe dinyi nirya aryi dengnamwe ba, kweterderamnyi ababyi kwetebman kum kuramwe.

⁴⁴Asi, a ner aryi dongtam kuboka Er Yesus ongon aling asi bol libdenmou ba, a bol libdenmou talak akiryok bunga ining yibarmururamwa ara kum dandobmou.

⁴⁵Ura, Er Yesus biryi ato eboka asibdenmou, “Unanyi biryi Nisi bol libdenmanir do?” eboka asibdenmou. Uca, ninyi tentok aryi, “Niryi bol libdenmakin,” ton kum ebmai. Ura, Er Yesus miliramunyi si Petrus biryi, “Nai nun eteresurumnyi, ninyi ilinto aryi Kansi arubdongoboka limdongonmaking aryi ukubmakir,” ebmou.

⁴⁶Bok, Er Yesus biryi ato ebmou, “Kum, ninyi tentok aryi Ni nong asi ton bol libdenmaning ba, Ni nong umbura aryi ninyi kweten mikib ton anaboka yibinmar asi bikman ati asibdenmasin,” ebmou.

⁴⁷Ba, a ner aryi diramwe uca, er ukubmou dinyi, “Er Yesus biryi sirya bikmanir,” tenebmou ura, sirim asa yandoka Er Yesus urasin dam buryanmou. Ura, er ukubmou deyok ati, “Nira ato deyok aryi, Er Yesus bisi bol libdenman ba, ni yinurur u lobdobmanir,” eboka ninyi ilinto kekenmai asi nukmou.

⁴⁸Ura, Er Yesus biryi a ner asi, “Se Ni kwin, kan biramnyi aryi Nisi, ‘Diba, Er Imtamnyi biryi bokwetebunyi biryi kwetebkwamanir,’ teneboka kunurongna dinyi aryi lebmakin ati, kilkil kanya boboka teleb aryi ur bindobdum!” ebmou.

⁴⁹Er Yesus biryi a ner ati tuba uram erkarenmou talak aryi, Musa Uram eteren ai kalingnamunyi si Yairus er ainyi tentok yandoka ato ebmou, “Kan nebnyi sirya dibmar ati, ninyi Eterenanyi bisi a mambul kimsinin kum, binkwanim!” ebmou.

⁵⁰Ato enmou bok, Er Yesus biryi anyi enmou uram kekebmou ura, Yairus bisi ato ebmou. “Kan kanya aryi, ‘Nai kob se!’ tenen kum. Ukuryok ababyi kanci, Nisi, ‘Diba, Er Imtamnyi biryi bokwetebunyi biryi ni nebnyi ara kwetebkwamar,’ tenebniminyi ura, kan nebnyi ara lebdeibkwaman,” ebmou.

⁵¹Ura, barabyi ani, Yairus ai dam binmai ura, Er Yesus biryi ninyi nirya asi ato ebmou. “Sun yuk nang ara Nisi miliboka ai umbura wengbana mem! Erda, Petrus ab Yohanes ab Yakobus ab a nebnyi er nai ab er kwin ab akwe Nisi miliboka man ai wengbinkwayeb,” ebmou.

⁵²Ninyi nirya ara boukwe bobukmai ci, engenmai bok, Er Yesus biryi sunsi ato ebmou, “Sun engen mem takokdarur! A nebnyi ara kum dibmar, erda mabmar a,” ebmou.

⁵³Asi, sunci, “Se a nebnyi ara sirya dibmar bikmab bok, enmara,” tenebmai ura, Er Yesus ebmou uram ara akwi tubsinibokmai.

⁵⁴Bok, Er Yesus biryi a nebnyi mabdeibmai ai wengbinmou ura, taruk talebdongoboka ato ebmou, “Se a nebnyi, bukokdum!” ebmou.

⁵⁵Ato ebmou ba, a nebnyi er kanya tamuboka wengyanmou ura, akiryok bukalaboka tikokmou. Ura, Er Yesus biryi a wekmai ninyi asi ato ebmou, “A nebnyi kwaning ton karebdarur!” ebmou.

⁵⁶Ba, a nebnyi er nai er kwin ilil kubmou bok, Er Yesus biryi sunsi ato ebmou, “A kubmar dinyi ninyi urasin dam talyi ebde yibana mem!” ebmou.