Read Futuna-Aniwa Lukas 9 Bible Online

Lukas 9 - Futuna-Aniwa bible

Lukas 9

¹Ura, Er Yesus biryi Er miliramnyi nang amolbaryi nang asi nabmou ba, Er dam yanmai ura, Er ab tonkwa buluboka wekmai ci, isa kanya yubwa nirya yangdonongkwamnyi mikib ab u yin nang kwetenkwamnyi mikib ab sunsi karebmou.

²Ura, Erci sunsi ato eboka bokdonokmou, “‘Er Imtamnyi bira leboka kalingna Weik Sienyi kurur ci, lak kibkwamar talak dam kubmar,’ eboka eterebde baramun ci, ninyi u yiranci nang ara kwetebde bindarur,” eboka bokdonokmou.

³Er Yesus biryi bongdonongmou ura, sunsi ato ebmou, “Sunci bisik ai baramunyi ura, utotoa bona mem! Ara, kama dumuna mem! Tonda, ‘Bisik ai yibkwayeb,’ tenen kwaning bisik kona bona mem! Tonda, ‘Bisik ai aryi utotoa dekdobkwayeb,’ tenen co bok ababyi aling kiboka bona mem! Tonda, ongon aling ababyi, ‘Ton dinyi nining kubci ura, ton dinyi unuboka ongobdobkwan dinyi ton bobdobkwan,’ tenen bitinyi kiboka bona mem!

⁴Ani, tonda akatei dam aryi ninyi tentok aryi naboka er ai du dongobdobsici ura, a akai akwe kuramunyi ani, anaboka binkumunyi tum aryi binkwandarur.

⁵Akatei bamunyi ba, du kum dongobdobsingiryi, sunci, ‘Er Imtamnyi bira Weik Sienyi kurur ci, lak kibkwande,’ ebmamunyi uram kum kekebsingnyi ura, akatei yanibmamunyi mintal ara kilibkaboka bindobkwandarur. Ato kubmunyi uca, sunsi du kum dongoboka sun eterebmamunyi uram kum kekebmangnyi nang aryi ato tenebkwanung. ‘Nunci Er Imtamnyi Uram asi diboka kum kekeramibyi ura, aminda ara Er Imtamnyi biryi mintal kilirkarongnaming to kubkwansir,’ tenebkwanung,” ebkarebmou ci, bokdonokmou.

⁶Ato eboka bokdonokmou ura, Er Yesus miliramnyi nang amolbaryi nang anaboka eikatei okatei nirya yibinkirikoka Er Yesus biryi ebdeibmou Teleb Uram etereboka, u yiramwe nang kweteboka dantam-dantam nirya yibinkirikmai.

⁷Er Yesus biryi etereramwe dinyi ab ilil tenen dinyi kikniramwe ab asi Er miliramnyi nang aryi nukde yibaramnyi asi, Galilea mutuk weik sienyi si Herodes biryi kekebmou. Ura, “Yesus enung ara unatonyi biti enung do?” tenebmou. Asi, a talak aryok yuk nang aryi, “Yohanes ninyi me dongoramunyi kam bukoka yanmar,” ebmai

⁸Ura, ton nang aryi, “Er Imtamnyi Uram ebdeibmaca bobaramunyi Elia bira kam kibmaning imtam welebinamunyi bisi tubto yuryanmar,” ebmai. Ba, ton nang ara ato ebmai, “Er Imtamnyi Uram ebdeibmaci to lak etereramnyi nang diamnyi asi, ninyi tentok kam bukoka yanmar,” ebmai.

⁹Ato ebmai asi, Herodes biryi kekebmou ura, ato tenebmou, “A yanmar enmang Yohanes bira, ‘Niryi ya ngang sekoka obdarur,’ eanse ba, oamnyi. Ati, Anyi bira unanyi biryi yandoka ato dinyi kunmar ba, enmang do?” tenebmou deyok aryi, er kanya kankana kubmou. Ura, “Anyi bira ni ton eibtiniryi biktinyi,” tenebmou ci, Herodes biryi Er Yesus bisi ingkirikmou.

¹⁰Er Yesus miliramnyi nang aryi Teleb Uram deyok kouboka eterebde binamnyi ani, Er Yesus dam sirya tamuryanmai ura, sun wa ibde yibaramnyi dinyi asi Er Yesus dam, “Ato kunub ato kunub,” eboka nukmai. Sirya nukmai ura, Er Yesus biryi Er miliramnyi nang asi inibmou ura, mutuk Betsaida dam sun yuk binmai.

¹¹Ato kubmai bok, ninyi ilinto nirya aryi, “Er Yesus Betsaida mutuk banmar,” ena bikmai ura, Ersi milibmai. Milibmai bok, a ninyi ilinto asi Er Yesus biryi, “Ni li,” kum ebmou. Erda, Er Yesus biryi sunsi, “Er Imtamnyi bira leboka kalingna Weik Sienyi sirya kurur ci, lak kibdanmar ati dib tenebdarur!” eboka liliboka eterenmou ci, u yiramwe ba, “Kwetebsute,” tenen Er dam yandobmai nang ara kwetebmou.

¹²Ato kunmou uca, sirya inibkou ci, yiriblobwe ura, Er miliramnyi nang amolbaryi nang Er Yesus dam yandoka ato ebmai, “Nai, a kunmab ai ara ninyi atei kum mutuk aca sirya inibmar ati, a ninyi yubwa asi ‘Da bindobdarur!’ ebdum. Ba, a mutuk meruman mitik atei, weik atei donung atei asi yina yibde mabdobkwaming ati, ‘Bindobdarur!’ ebdum,” ebmai.

¹³Ato ebmai bok, Er Yesus biryi sunsi ato ebmou, “Sunci a ninyi asi yina karebkarebkwandarur!” ebmou. Uca, Er miliramnyi nang aryi ato ebmai, “Nunda roti kwaning ara weik tokol ara ton kum bobmab bok, erda mitik roti kwaning tokol asi sirik amubaryok bobmab. Ba, mekinaiya ara mitik mekinaiya asi sirik bitinyok bobmab. Ati, a ninyi nirya yibkarebkwamabyi ura, yina dengtabangyandoka karebtibyi uca, kikiman kubkwanmote,” ebmai.

¹⁴A bulubmai ninyi yubwa sal yoka akwe ara lima ribu baryi wekmai. Ura, Er Yesus biryi Er miliramnyi nang asi ato ebmou, “Sunci a wekmang nang nirya asi ebdarur, ‘Ninyi lima puluh baryi-lima puluh baryi kiboka deici yuk-yuk bukdarur!’ ebdarur!” ebmou.

¹⁵Ato ebmou ba, Er miliramnyi nang aryi Er ebmou to kunuboka, “Liliboka bukdarur!” eboka lilibdeibmai ura, a ninyi nirya liliboka bukmai.

¹⁶Sirya liliboka bukmai ura, Er Yesus biryi a roti kwaning amubaryi ab, a mekinaiya bitinyi ab dobtaleboka, imtam dibweleboka ato ebmou, “Nai, Kanci nunsi yina karebmasirim ati Niryi Kansi, ‘Ei Ni Nai,’ ebkin,” eboka Er Imtamnyi bisi kisal dakoka kibmou. Ura, Erci a roti kwaning ab mekinaiya ab toboka-toboka Er miliramnyi nang asi ato ebmou, “Sunci a yina ninyi nirya asi bokeibdarur,” eboka karebmou. Ba, a ninyi yubwa asi bokeibde yibanmai ababyi kum danana kum kunmou ani, a ninyi nirya asi bokeibmai.

¹⁷Sirya bokeibmai ba, a buluboka wekmai ninyi sun nirya yinmai uca, boubmou ura, kablobmai. Ba, a kablobmai roti kwaning ara tower aryi wiamnyi aling amolbaryi asi kiboka diribmai.

¹⁸Uki tentok tum aryi Er Yesus biryi Er Imtamnyi bisi Er yuk molonmou bok, Er miliramnyi nang Er dam yanmai. Ura, Er Yesus biryi ato eboka sunsi asibdenmou. “Yuk nang aryi Nira unanyi enunung do?” eboka sunsi asibdenmou.

¹⁹Ba, sunci ato ebmai, “Ton nang ara, ‘Yohanes Ninyi Me Dongonanyi,’ ekunung,” ebmai. “Ba, ton nang ara, ‘Elia,’ ekunung,” ebmai. “Ba, ton nang ara, ‘Er Imtamnyi biryi uram ebdeibmaca minob bobaramnyi nang dibyi asi ninyi tentok kam bukoka yauci kurur,’ ekunung,” ebmai.

²⁰Ato ebmai ura, Er Yesus biryi tubto sunsi asibdenmou, “Ba, sunci Nira unanyi tenenindarur do?” eboka asibdenmou. Uca, Petrus biryi ato ebmou, “Nai, Kanda Er Imtamnyi biryi ninyi lemna Weik Sienyi eboka bokwetebkounyi kurum,” ebmou.

²¹Petrus ato ebmou ura, Er Yesus biryi, “Yuk nang asi talyi ebde yibana mem!” eboka erekdobmou.

²²Er Yesus biryi sirya erekdobmou ura, ato ebmou, “Ni Ninyi Dasinyi bira Er Imtamnyi biryi Niti teleb teneanou to kuboka mambul dinyi mitik kum donmanyi bok, Yahudi nang sien nang ab Er Imtamnyi kan ninyi kan noutam kuboka antanirdeirin deyok nang ab Musa kerek sengna eterenung nang ab aryi, ‘Anyi bira ninyi lebkwansiranyi kuma, Anyi bira nun li,’ eboka dokdonokwaning ba, obkwaning. Obningnyi ura, uki bitinyi dibmanyi ani, winiryi tum ara Er Imtamnyi biryi Nisi kam bukeibkwanir,” ebmou.

²³Ura, sun nirya asi ton ato ebmou, “‘Unanyi-unaner aryi Er Yesus bisi milikwan,’ tenebci ura, sun dinyi ati teneramingnyi dinyi ara dongtam kibdeiboka, Er Imtamnyi kanya teleb kimdeirin dinyi asi udikum deirina teleb. Tonda, ‘Tanglona kum uca, a uki berengnande a nirya ara co lase bobkwan ara ikin dinyi takubdeibningnyi ababyi, tonda yuk nang aryi nisi obningnyi ababyi niryi kilkil asa aryi ni Du Yesus milibkwan,’ tenena teleb.

²⁴Ara, unanyi biryi kam kun dinyi ati, ‘Ninyi aryi ni obningnyei,’ tenen dungdaroranci ura, aminda ara kam kun dinyi kum dobdobkwande. Ba, unanyi biryi Ni deyok ati, ‘Malyi, yuk ninyi aryi da obningnyi ababyi, ni Du Yesus si lak ebkwan,’ tenerandinyi bira aminda ara iya kam kun dinyi dobdobkwande.

²⁵Unanyi-unaner aryi im dangna tukwe dangna mutuk atei nirya kurur bona taleranci bok, Er Imtamnyi biryi lemsin dinyi kum dororanci ura, anyi-aner ara iya teleb dinyi ara dororande do? Kum. Ato kuraminyi ner ab sal ab ara sun kanya waningdaramingnyi deyok aryi, lemna dinyi ara sun taleramingnyi bona aryi kum lebdeibkwande.

²⁶Tonda, Nisi unanyi biryi, yuk nang urasin dam asi, ‘Erda Ninyi Daunyi kurur kuma,’ teneboka, ‘Er eterena ara ni li,’ tenerandinyi bira aminda Ni Ninyi Dasinyi bibabyi Er Imtamnyi milil deici ab, Er Imtamnyi Uram eryuryangan nang Erci wibmaci nang kankan yuryankwan tum ara Er Imtamnyi urasin dam aryi anyi bira, ‘Ni kum bingnunyi,’ ebkwan.

²⁷Niryi sunsi iya dib kobdob ati ebkwinsin. Er Imtamnyi Iya Erebdobnyi kurur ci, ninyi ilinto Er amwetam kun nang kibdeibkwande tum ara a wekmarum nang kankan ara ninyi nirya kum dibmamunyi bok, ton nang sun asing eibmun cok dibkwandum,” ebmou.

²⁸Er Yesus biryi a eterena sirya eterebmou ani, uki tabaryi kum, uki inbaryi kum kunmai ani, Erci Petrus ab Yohanes ab Yakobus ab inibdobmou ura, mutuk kon dam welebinmai. A welebinmai ara Er Imtamnyi bisi molobkwamou ati welebinmai.

²⁹Er Imtamnyi bisi uram sisingmou talak aryi, Er Yesus urasin ara yuk urasin deibmou ci, Er Yesus ongon aling ara kait asi milil arabkarebmou.

³⁰Ura, sinarya imtam aryi kuboka arabkarebmou asi, ninyi bitinyi imtam aryi Er Yesus dam tingyandoka uram sisingmarei. A yandoka uram sisingmarei nang sun si ara Musa ab Elia ab aryi yandoka sisingmarei.

³¹A bitinyi yandoka uram sisingmarei ura, Er Imtamnyi milil deici aryi lak kibdanmarei ci, Er Yesus bisi uki kuna kum uca, Yerusalem atei dam bindoka, Er Imtamnyi biryi ebdeiamwe to kunuboka dibkwamou deyok ati uram sisikmai.

³²Ba, a talak ara Petrus ab Er kwityabwe ab wi mabmai ani, bukalaboka diramnyi uca, Er Yesus milil arabmou asi, ninyi bitinyi Er ab tonkwa tikoka uram sisingmai asi asing eibmai.

³³Uram sisingmai ani, a bitinyi nang ara, “Er Yesus taklobingkwinim do,” tenen kurei talak aryi Petrus biryi, “Musa ab Elia ab aryi nun taklo basina ara nun li,” tenebmou ura, Er Yesus bisi ato ebmou, “Nai, nun Eteresurumnyi, nun a yandoka kunmab ara iya teleb ati, ukuryok keis ol ai winiryi dobkub. Tonda, ‘Nai kanti,’ tenen dobkub, tonda, ‘Musa biti,’ tenen dobkub ba, tonda, ‘Elia biti,’ tenen dobkub,” ebmou. A ebmou ara Petrus bira, “Kanya teneibde ati enman,” kum tenenmou.

³⁴Petrus uram a tuba enmou talak aryi duwa bum tentok yandoka sun dam ibtambum ebmou ba, sunda a duwa umbura tikmai deyok aryi, sun kanya ilil kubmou.

³⁵Asi, a duwa umbura aryi Er Imtamnyi biryi sunsi ato ebmou. “Ara, Ni Mi Niryi wibdeibsinyi kurur ati, Ersi ebmaci uram ara diboka kekebkwandarur,” ebmou.

³⁶A sirya ebmou asi kekebmai ura, Er Yesus miliramnyi nang winiryi aryi diramnyi uca, Er Yesus Er yuk tikmou asi asing eibmai. Ura, sunci a nirya asing eibmai to ara a talak aryi yuk nang asi ninyi tentok dam ababyi ton ebdongobyibana kum kubmai, erda kilikokmai.

³⁷Er Imtamnyi biryi Er Mi Yesus deyok ati winiryi nang dam sirya lak ebmou ura, ambutum toa berekmou ura, Er Yesus ab Er miliramnyi nang winiryi nang ab a mutuk kon dam aryi yuryangaramnyi uca, ninyi ilinto aryi Er Yesus dam yanmai.

³⁸A ninyi ilinto yandoka wekmai nang kankan aryi ninyi tentok uram doboka ato ebmou, “Nun eteresurumnyi, niryi Kansi molobkwinkin ara Nai ni mi tentok a kunum deibdobse bok, isa kanya wekwe ati Kanci kwetebdum. Nai, ara ato ukurur, ni mi asi isa kanya aryi wengyaci ura, talyi bukman-bukman ani, ngolongdur ba, a wekwe isa kanya aryi a mi asi doboka kweblobci ura, a mi ara kwilim si maka yalurur. Ba, a isa kanya aryi a mi asi tuba-tuba obsinibmanto kurur ci, anaboka barona kum uca iya kurur.

³⁹

⁴⁰Ba, Kan miliranking nang Kan ab tonkwa mutuk kon dam kum welebinmandau nang asi, ‘Sunci isa kanya asi yakdonokwanung,’ tenen molobdenman. Uca, sunci a isa kanya asi kum yakdonokmang ati, ‘Kan ton dibdemin ci, kwetebdum!’ tenen Kansi yandoka molobdobman,” ebmou.

⁴¹Ato ebmou ura, Er Yesus biryi Er dam yanmai nang asi ato ebmou, “Sun diboka kum tenendarur cok, boboka waningminingdandarur ci, kundarur nang se. Nira sun dam ara uki unabaryi kubniryi eterebsinyi uca, Nisi, ‘Anyi bira diba Er Imtamnyi biryi Bokwetebunyi kurur,’ tenebkwanurum do? Niryi sunsi eteresunun ci, sun kundarur ati disununa ara Ni sirya boubnou,” ebkarebmou. Ura, uram doboka molobdobmounyi bisi, “Kan mi a boyarum!” ebmou.

⁴²Ba, a mi er nai biryi Er Yesus dam boyanmou ura, isa kanya aryi a mi asi doboka tukwe ai kwebloboka tomoublobmou. Bok, Er Yesus biryi a isa kanya asi yu asa aryi erekdobmou ba, a wekamwe isa kanya anabkaboka bindobmou ura, a mi sirya kwetebmou. A mi sirya kwetebmou ura, er nai bisi tamubkarebmou.

⁴³Ato kuboka isa kanya wekamwe mi asi Er Imtamnyi Erebdobnyi mikib aryi kwetebmou. Ba, Er Yesus dam yanmai nang sun asing eibmai deyok aryi, sun kanya ilil kubmou ba, “Nai kobe,” tenebmai. Er Yesus biryi kubmou dinyi ati, ninyi ilinto ara ilil tuba kunmou bok, Er Yesus biryi Er miliramnyi nang asi ato ebmou.

⁴⁴“Sunda a ebkun uram ara diboka kekeboka kanya tam bobdobkwandarur! Ni Ninyi Dasinyi bira yuk nang taruk dam dobkarebkwamaning,” ebmou.

⁴⁵Ato ebmou bok, Er miliramnyi nang aryi Er Yesus biryi enmou uram deyok ara sun iya mitika, “Ato ati ebmar,” ton kum tenebmai. Bok, Er Yesus biryi ebmou uram ara sun dam lak kum kibmou. Ba, sunci, Er Yesus bisi tubto tamuboka asirdena ara ilil kubmou ba, ton kum asibdenmai.

⁴⁶Er Yesus miliramnyi nang sun mamun aryi, “Unanyi bisi Erebdobnyi kurur,” eboka lulubdanmai.

⁴⁷Ato eboka lulubdanmai bok, Er Yesus biryi sun tenebmai kanya minob bikoka aburyi, mitik mi tentok tomoboka Er dam tingdeiryanmou.

⁴⁸Tingdeiryanmou ura, ato ebmou, “Unanyi biryi Nisi dib tenebniriryi a mitik mi asi dobdobci ura, anyi bira Ni sun Du a kunum dobdobmaniriryi. Ba, unanyi biryi Ni sun Du bisi dobdobmanirinyi bira Er Imtamnyi Ni bokwetebnounyi bisi a kunum dobdobmariryi. Ara, ato deyok ati ebmasin, sun kankan dam aryi sun kanya luknubdongoboka Er Imtamnyi wa mitik wa iranci ura, aminda ara Er Imtamnyi biryi erebdeibkwande,” ebmou.

⁴⁹Yohanes Er Yesus miliramunyi biryi Yesus bisi ato ebmou, “Nun Eteresurumnyi, ninyi tentok Kansi nun ab tonkwa kum milikunub cok, Kan si deici aryi isa kanya yakdonokmar ba, asing eibmab ci, anyi bira nunci mem ebmoubwe,” ebmou.

⁵⁰Ato ebmou uca, Yesus biryi sunsi ato ebmou, “Talyi mem ebmarum! Unanyi biryi sunsi bisik kum sengminingdansirinyi bira nun tamnyi kurandiryi sunsi wa ibmilibdobmasiriryi kubmarur. Ati, a kubmarum to ara malyi to kubmarum,” ebmou.

⁵¹Er Yesus imtam welebinkwamwe talak damtoto kubnin banmou ura, Er urasin ara Yerusalem atei tam deibmou ci banmou.

⁵²Banmou ura, Er miliramnyi nang ninyi wiboka ton nang minob bokeibmou. Ura, Samaria mutuk nang atei tentok asi bindoka Er Yesus mabkwamou ati utotoa kiknirminingbinmai.

⁵³Bok, Samaria nang aryi, “Er Yesus bira Yerusalem atei banmar cok yanganmar ati, nun atei wengyangasina nun li,” tenebmai. Ura, Er Yesus miliramnyi nang mikbaryi nang asi ato ebmou, “Sunda nun atei masina nun li,” ebmai. Samaria nang aryi ato ebmai ara minob ara sun Samaria nang ab Yahudi yala nang ab ara ninyi bun ton kum ururdaramnyi deyok aryi, ato ebmai.

⁵⁴Ato ebmai asi, Yakobus ab Yohanes ab aryi, “Er Yesus nun atei wengyangasina nun li,” ebmai uram kekebmarei ura, Er Yesus bisi ato ebmarei, “Nai, nunci, ‘Imtam aryi uk yuryandoka akatei nang nirya yaliboka yibdum!’ eboka nabkwinim. Ati, Kanci, ‘Ur’ ebkwamasirim do?,” eboka asibdenmarei.

⁵⁵Ato eboka asibdenmarei bok, Er Yesus biryi, “Samaria nang nirya kum danarsengna ara Ni li, ati sun tenebmaring to ara malyi to tenebmaring,” tenebmou ura, Er urasin Yakobus ab Yohanes ab tam dangubokmou ura, sunsi erekdobmou. Ura, Er Yesus ab Er miliramnyi nang ab Samaria mutuk atei asi yuk atei binmai.

⁵⁶

⁵⁷Er Yesus ab Er miliramnyi nang ab sun Yerusalem banmaci bisik noutam banmai bok, bisik noutam banmai uca, ninyi tentok aryi yandoka Er Yesus bisi ato ebmou, “Dantam-dantam yibaraminya nirya ara nira Kansi iya milinkwankin,” ebmou.

⁵⁸Ato ebmou uca, Er Yesus biryi anyi bisi ato ebmou, “Kanci Nisi talyi iya milinkwankin ebniminyei. Bai kam ara er man ai keil umbura dam marur. Ba, maka ababyi er man ai doboka kurur. Bok, Ni Ninyi Dasinyi bira atei tentok dam ababyi man ai ton dorona kum kubse ati, Ni ab tonkwa kunkwanim ara teleb akwe kum kunkwanunum,” ebmou.

⁵⁹Ba, ton yuknyi bisi, ara ato ebmou, “Kan, Ni milibnurum!” ebmou. Uca, anyi biryi, “Nai kansi molobkin a talak ara ni nai kalikoka kuranyi ani, dibci ba, tukwe sirya dongobniryok yandoka Kansi iya miliryankwankin,” ebmou.

⁶⁰Ato ebmou bok, Er Yesus biryi, “Diramingnyi nang ara Nisi kum miliraningnyi nang aryi tukwe dongobdankwaming. Ati, kanda, ‘Er Imtamnyi bira ninyi leboka kalingna Weik Sienyi sirya kurur ci, lak kibkwamar,’ en uram boboka dantam-dantam nirya eterebde binkwandim,” ebmou.

⁶¹Ura, ton yuknyi biryi ato ebmou, “Nai, nira Kansi iya milibkwankin. Bok, a talak ara ni ai ninyi asi bindoka ebdukeibniryok yandoka Kan miliryankwankin,” ebmou.

⁶²Ato ebmou bok, Er Yesus biryi ersi ato ebmou, “Unanyi biryi Nisi, ‘Nai Du o, iya milibkwankin,’ eanici ani, kanya danguboka yuk dinyi ati teneiboka udikum deiriraming nang ara Ni ab tonkwa kuboka yuk nang asi, ‘Er Imtamnyi bira ninyi leboka kalingna Weik Sienyi kurur ci, lak kibkwamar,’ eboka eterena ara kikiman kum,” ebmou.