Read Futuna-Aniwa Yohanes 1 Bible Online

Yohanes 1 - Futuna-Aniwa bible

Yohanes 1

¹Yuma kobdob talak ara Er Imtamnyi biryi im ton tukwe ton kum kikniamwe bok, Er Imtamnyi Uram Kobdob Kurutnyi a kuramwe. Ba, Er Imtamnyi Uram Kobdob Kurutnyi bibabyi Iya Erebdobnyi kurur ci, Er Imtamnyi ab tonkwa kurandei.

²Er Imtamnyi Uram Kobdob Kurutnyi bira yuma kobdob talak aryi kuboka Er Imtamnyi ab tonkwa kurandei.

³Er Imtamnyi biryi minob ura im ton tukwe ton kiknibmou ara Er Uram Kobdob Kurutnyi biriman aryi utotoa nirya kiknibmou. Minob kuramwe dinyi ab ukuryok kurur dinyi ab ababyi nun Nai biryi Er Uram Kobdob Kurutnyi biriman aryi kiknibmou. Er Imtamnyi Uram Kobdob Kurutnyi biriman aryi kiknina kum dinyi ton kum kurur. Erda, utotoa nirya ara Er Imtamnyi Uram Kobdob Kurutnyi biriman aryi kiknibmou dinyi akwe kurur.

⁴Er Imtamnyi Uram Kobdob Kurutnyi bira ninyi kam kurdeirin deyoknyi kusurur. Erda kam kurdeirin deyoknyi kurur aryi ninyi berengdeirisurutnyi kurur.

⁵Er Imtamnyi Uram Kobdob Kurutnyi berengna aryi kunuk dam dinyi asi berengdeirisurur bok, sun kunuk dam kuraming nang ara berengna dinyi kum dororaming.

⁶Ura, Er Imtamnyi biryi ninyi tentok bokdonokmou ara Erci Er Imtamnyi Uram enkwamwe ati yanmou. A bokdonokmounyi si ara Yohanes kuramwe.

⁷Anyi biryi a berengna ati, “Diboka berengdeirisurur,” eboka lak enkwamwe ati yanmou. Ara, Yohanes biryi, “Niryi lak ebkwan uram deib aryi ninyi nirya aryi Er Imtamnyi Uram Kobdob Kurutnyi bisi dib tenebting,” tenen yanmou.

⁸Yohanes bira ninyi berengdeirinanyi kum kuramwe. Erda, erci Er Imtamnyi Uram Kobdob Kurutnyi biti, “Erda berengdeirisurutnyi kurur,” eboka lak enkwamwe ati yanmou.

⁹Nun Du ninyi berengdeirinanyi biryi ninyi nirya asi berekeibkwansou ati tukwetam yuryanmou.

¹⁰Nun Du ninyi berengdeirisurutnyi bira tukwetam yuryandoka ninyi kankan kuramwe. Nun Du bira minob ura im dangna tukwe dangna nirya kiknibmou bok, sun im dangna tukwe dangna nang aryi Erti, “Nun kiknibmasounyi,” tenen kum bingdonung.

¹¹Erci kikniamwe nang kankan asi yuryanmou bok, a nang aryi Ersi kum dobdobmai.

¹²Ba, a nang kankan aryi ton nang asi Ersi dobdobmai ci, Er si dib tenebmai. Ba, a nang nirya asi Erci erebdeiboka Er Imtamnyi mabwe nermabwe kibdeibmou.

¹³A nang ara sal ner ab dobdandoka deirin mabwe nermabwe ato kum kunung. Tonda, tukwetam nang aryi “Mi deibkwanim,” tenen deirin mabwe nermabwe ato kum kunung. Erda, Er Imtamnyi biryi deibmou mabwe nermabwe kunung.

¹⁴Nun Du bira Er Imtamnyi Uram Kobdob kuramuryok, ninyi kibdanmou ura, nun tukwetam nang kankan kuramwe. Ba, nunci Er Iya Erebdobnyi iya mililanyi kuramwe bok, Ersi asing eiriramoubwe. Er Iya milil ilintonyi bira Er Imtamnyi Mi tentok kuramwe. A mililnyi bira Er Imtamnyi dam aryi kuboka yanmouci, ninyi langdeiboka kisal dangnanyi kuramuryi, dib en uram nirya langdeiboka bingnamunyi kuramwe.

¹⁵Yohanes biryi Anyi biti ato eboka lak etereramuryi, uram weik doboka erci ato ebmou. “Ni dongtam yankwandanyi bira nisi bisiboka Iya Erebdobnyi kurur. Ni deirinina kabul talak aryi Anyi minob kuramwe. A deyok aryi, Anyi bira nisi bisiboka Iya Erebdobnyi kurur ati ebman.” Niryi minob ura, “Ato-ato kunanyi yankwande,” ebmasise to, sirya yanmar ati ebman.

¹⁶Nun Du bira ninyi langdeiboka kisal dangsurutnyi biryi karebmou uca, nun nirya aryi kisal dangna dinyi ilinto dororamoubwe. A deyok aryi, niryi nun Du biti ato eranse. “Ni dongtam yankwandanyi bira nisi bisiboka Iya Erebdobnyi kurur,” eranse.

¹⁷Minob ura, Er Imtamnyi biryi, “Ukubdarur-Ukuna mem,” en uram ebdeibmasou ara nun aibwe Musa biriman aryi ebdeiansou. Ani, ukuryok ara nun Nai biryi kisal dangsina uram ton dib en uram ton karebsou ara nun Du Yesus Kristus biriman aryi karebsou.

¹⁸Ninyi tentok ababyi Er Imtamnyi bisi asing kum eirinub. Bok, nun Du Er Imtamnyi boukwe dam burutnyi bira Erbabyi Allah kurur deyok aryi, Er Imtamnyi bisi asing eirirur ci, nunsi lak kibdeibsou.

¹⁹Ura, sun Yerusalem atei aryi kuramnyi Yahudi yala nang kalingna nang aryi Yohanes deyok kekebmai ura, sunci erti ato tenebmai. “Anyi bira Er Imtamnyi biryi minob ebdeiansou lemsina Weik Sienyi si Kristus kurur darib?” Ato tenebmai ci, sunci Er Imtamnyi kan ninyi kan noutam kuboka antanirdeirin nang ab, sun Lewi yala nang ara Er Imtamnyi ai wa irmiliramnyi nang ab asi er dam bokdonokmai. Ura, ato eboka bokdonokmai, “‘Kanda unato anyi kurum do?’ eboka asibdenkwandarur,” eboka bokdonokmai.

²⁰A bokdonokmai ara Yohanes dam sirya yandoka asibdenmai uca, Yohanes biryi erdamnyi biti dib en uram akwe lak ebdanmou. Ara, erci erdamnyi biti ato ebdanmou. “Nira lemsina Weik Sienyi si Kristus kum kunun,” ebdanmou.

²¹Ato ebmou ura, sunci ersi tubto asibdenmai. “Ato ebmarim ura, kanda unato anyi kurum do? Kanda nabi Elia bitonyi kurum do?” Ato eboka asibdenmai bok, erci sunsi ato ebmou, “Nira Elia kuma,” ebdanmou. Ura, sunci, “Kanda Er Imtamnyi biryi ebdeibsounyi Er uram bobananyi kurum do?” eboka asibdenmai uca, erci, “Kuma,” ebmou.

²²Ura, sirya kobdob ara sunci ersi ato eboka asibdenmai. “Kanda unato anyi kurum do? Kanci kandamnyi biti una ebdankwandim do? Nun bokdonokmasei nang aryi, ‘Kan si asi biktibyi,’ tenen nunsi bokdonokmasei ati, nunci sunsi bindoka unanyi ebkwayeb do?” eboka asibdenmai.

²³Uca, Yohanes biryi sunsi ato eboka uram dekeibmou. “Nabi Yesaya biryi minob aryi ato eboka lak ebmou, ‘Nira ninyi kun kum mutuk kunun cok, uram lak enunyi kunun.’ (Yesaya 40:3) Ura, nabi Yesaya biryi minob talak aryi lak ebmou to, nira kunubdeibsinyi a kunum kunun. Ara, ‘Er Iya Erebdobnyi yankwamasir ati, sunci sun kanya asi kiknibminikdamun ci, bisik yaboka Ersi kibdobdarur’ enanyi kunun,” ebdanmou.

²⁴Ura, sun Yahudi yala nang aryi bokdonokmai nang ara Yohanes bisi asibdenmai nang kankan aryi Farisi nang ton kuramnyi. A nang ara Musa Uram dibliliboka kunubde baramnyi nang kuramnyi.

²⁵A nang aryi Yohanes bisi ato eboka asibdenmai. “Kanda ninyi lemsina Weik Sienyi Kristus kum kurum ura, kanda unato ati ninyi me dongorum do? Nabi Elia ton nabi yuknyi bibabyi kum kurum ati, unato ati ato kurum do?” eboka asibmai.

²⁶Ato eboka asibdenmai uca, Yohanes biryi sunsi ato ebmou. “Niryi ninyi me dongonun ara me dem aryi dongonun. Bok, sun a bulubmarum nang sun kankan ara sun kum bikmarumnyi tingyanmar ara Iya Erebdobnyi kurur.

²⁷Anyi bira ni dongtam yangananyi kurur bok, nira Er arungnanyi kunun. Erda Iya Erebdobnyi kurur bok, nira tukwetam bunanyi bitonyi kunun. A deyok aryi, niryi Er yan karuk tabwe lordeirina ababyi kikib kumnyi kunun.”

²⁸A dinyi nirya kunubmou ara Betania atei dam aryi kunubmou. Ara, sien atei Yerusalem dam doramnyi atei si Betania atei dam aryi kum kunubmou. Erda, yuk atei ara Yordan me kuboka otam kuboka doramnyi atei si Betania aryi a dinyi nirya kunubmou. Ara, Yohanes bira ninyi me dongoramwe ara akatei dam kuboka me dongoramwe.

²⁹Mabmai ani, berekwe ura, Yohanes biryi ninyi me dongonmou bok, Er Yesus Yohanes kunmoua dam yanmou. Yesus er dam yanmou asi Yohanes biryi asing eibmou ci, ato ebmou. “Asing dindarur. Er Imtamnyi biryi Bokwetebsounyi Domba Mi atonyi nun dam yanganmar. Erci nun malyi kun dinyi asi, ‘Kilibkwan,’ tenen nunda tukwetam nang aryi malyi kun dinyi nirya doboka bobinkwande,” ati yanganmar dibdendarur.

³⁰Niryi Anyi biti ato ebmasise. “Ni dongtam yankwandanyi bira nisi outam kibkweteboka Iya Erebdobnyi kurur. Ni deirinina kum bok, Anyi bira minob kuramwe. Asi, Anyi sirya yanmar ati ebman.

³¹Niryi Anyi bisi kum bingnansiryok, niryi Anyi deyok ati sun Israel yala nang urasintam asi lak ebkwansise ati yanman. Ara, niryi nun Du bisi lak kibdeibkwansin ati niryi ninyi me dongonun,” ebmou.

³²Ton ato ebmou cok, Yohanes biryi ato eboka lak ebmou. “Niryi asing dinmase uca, Er Imtamnyi Kanya Roh Kudus ara yuryandoka Anyi deici asi buryuryanmou. Ara, emnanyi ato kibdandoka, Roh Kudus aryi yuryandoka Anyi deici asi buryanmou.

³³Nibabyi yuma ara Anyi bira kum bingnanse bok, Er Imtamnyi biryi Anyi biti nisi lak kibdeibnou uca, niryi Ersi ukuryok bikman. Ara, ‘Ni bokdonoknounyi bira “Ninyi me dongobdum,”’ ebdeibmanounyi biryi Anyi biti nisi ato eboka lak kibdeibnou, ‘Roh Kudus aryi yuryandoka Ninyi deici aryi buryaci ura, kanci Anyi biti ato tenen bikwandim, “Ei, Anyi bira Roh Kudus aryi langdeiboka karebkwandanyi kurur,” tenebkwandum,’ eboka bokdonokanou.

³⁴Ati, niryi asing dinmase ba, Er Imtamnyi Kanya Roh Kudus aryi Anyi deici asi buryanmou asi eibmase deyok aryi, niryi Anyi biti ato eboka lak ebmasin. ‘Anyi bira Er Imtamnyi Mi diboka kurur,’ eboka lak enun,” Yohanes biryi ato ebmou.

³⁵Mabmai ani, berekwe ura, Yohanes ab er miliramnyi nang kankan aryi ninyi bitinyi tonkwa adikum tikmai.

³⁶Ura, Yesus yandoka sunsi bisiroryibanmou asi Yohanes biryi asing eibmou ci, ato ebmou. “Asing dibdendarur. Anyi bira Er Imtamnyi biryi Bokwetebsounyi Domba Mi atonyi kurur,” ebmou.

³⁷Ato ebmou asi er milirandei nang bitinyi aryi kekebmarei ura, sunci Yesus bisi milibmarei.

³⁸Ura, Yesus tikloboka dongtam tamuboka dibdenmou ura, sun Ersi milibmarei nang asi asing eibmou. Asing eibmou ci, Erci sunsi ato ebmou, “Unato ati sunci Nisi milibmanururum do?” eboka asibdenmou. Ato eboka asibdenmou uca, sunci Ersi ato ebmarei, “Nai Rabi, Kan marandim ai ara dantam kurur do?” eboka asibdenmarei. Sunci, “Nai Rabi,” ebmarei ara nun uram danguboka ena ara, “Nai, ninyi eterenanyi,” ebmarei.

³⁹Asibdenmarei uca, Erci sunsi ato ebmou, “Diryarurum,” ebmou. Ba, sunci Yesus bisi milibmarei ci, Er kuramwe ai asi asing eiboka bikmarei. Ura, a bitinyi nang ara sunda Er Yesus ab ebdanmai tum ara sintam kiting yakna dumbaryi kubmou ba, ebdanmai. Ani, sintam aryi kuboka sunda lukunda ababyi Yesus ab tonkwa kubmai.

⁴⁰Er Yesus bisi yuma kobdob milibmarei nang ara ninyi si Andreas ab yuknyi ab aryi milibmarei. Andreas bira Simon Petrus er weit ab, er kwit yuknyi ab aryi kekenmarei uca, Yohanes ninyi me dongoramunyi biryi Yesus deyok ati lak en uram lak ebmou. Asi, kekebmarei ura, sunci Yesus bisi milibmarei.

⁴¹Ura, Andreas biryi, “Ni du bisi ebkwan,” tenen erci ukurlona kum uca er du Simon Petrus bisi ingkiringbinmou. Ani, eibmou ura, erci er du bisi ato ebmou. “Ni ab ni kwit ab ara lemsina Weik Sienyi si Mesias ab ebdanmab,” eboka nukmou.

⁴²Ura, Andreas biryi Simon Petrus bisi, “Asing dirbinkwanim,” eboka Er Yesus dam bobinmou. Ba, Er Yesus ab sirya ebdanmai ura, Yesus biryi Petrus bisi asing eibmou ura, erci Petrus bisi ato ebmou. “Kanda Simon, Yohanes er mi kurum. Niryi kansi ukuryok si dobkwinkin ara Kefas eboka dobkwinkin,” ebmou. A ukuryok si ara danguboka Petrus bira, “Katabum keil atonyi,” kurur.

⁴³Mabmai ani, berekwe ura, Yesus biryi “Ni anaboka Galilea mutuk binkwan,” tenen anabdobmou. Ura, ninyi si Filipus bisi asing eibmou ura, Erci ersi ato ebmou, “Kanci Nisi milibnurum,” ebmou. Ba, Filipus biryi Yesus bisi milibmou.

⁴⁴Filipus bira Andreas ab Petrus sun neik atei nang kuramnyi. Er atei ara Galilea mutuk atei si Betsaidanyi kuramwe.

⁴⁵Ura, Filipus biryi er kwit si Natanael bisi bindoka erci ersi ato ebmou. “Minob aryi Musa biryi kerek sekeibmou ara, ‘Er Imtamnyi Uram ebdeibmaca bobananyi yankwande,’ ebmou to sirya kunubmar. Anyi bira sirya yanmar ati nun asing sirya eibmanim. Tonda, Er Imtamnyi Uram minob bikoka ermururamnyi nang aryi, ‘Lemsina Weik Sienyi yankwande,’ eboka kerek sengdeiriramnyi to sirya kunubmar. Anyi bira Yusuf Mi si Yesus Nazaret ateinyi kurur bisi eibdanmanim,” ebmou.

⁴⁶Ato ebmou bok, Natanael biryi ersi ato ebmou. “Nazaret atei ara mitik atei kurur ati akatei aryi kuboka Ninyi Lemsinanyi anabkwanmote do? Ato ukubman kum,” ebmou. Ato ebmou bok, Filipus biryi ersi ato ebmou. “Ni ab tonkwa bindoka dirbinkwanim,” eboka arukmou.

⁴⁷Ura, Natanael Yesus dam yanmou asi Yesus biryi asing eibmou ci, erti ato ebmou. “Anyi bisi dibdendarur! Anyi bira er kanya dam aryi tola uram en dinyi ara er kum tenerur ati, erda minob kuramunyi tola uram en kumnyi si Israel er deibdobanyi diboka kurur ati ebman,” ebmou.

⁴⁸Uca, Natanael biryi Er Yesus bisi ato ebmou. “Ni ab Kan ab minob ton kum ebdanumwe ati, Kanci nisi una kuboka bikmanirim do?” eboka asibdenmou. Uca, Yesus biryi ersi ato ebmou. “Kanda co kwarang deyok bukmomwe asi, kan kwit Filipus biryi kansi nambinmakou. Kum nambinmou ababyi, Niryi kansi asing eibmakise,” ebmou.

⁴⁹Ba, Natanael biryi Er Yesus bisi ato ebmou, “Nai, Kanda diba ati Er Imtamnyi Mi kurum. Kanda nun Israel yala nang asi kalingnansirim Weik Sienyi kurum,” ebmou.

⁵⁰Uca, Yesus biryi ersi ato ebmou. “Niryi kansi, ‘Co kwarang deyok bukmomwe asi asing eibmakunwe,’ ebmakin ati, kanci, ‘Naie,’ tenen Nisi dib tenebmanirim. Bok, kanci asing dinmaminyi bok, Niryi aminda aryi ilil tenen dinyi kiknibkwan ara ukuryok kiknibman dinyi bisirbindoka iya ilil tenen dinyi kiknibkwan asi eibkwandim,” ebmou.

⁵¹Ebmou cok, Yesus biryi ato ebtabakmou, “Niryi sunsi dib en uram ton ebkwinsin ati sunci diboka kekendarur. Sunci asing dinmamunyi ba, imtam bublan kuklobci asi, Er Imtamnyi Uram eryuryangan nang yubwa ilinto aryi welebina yuryibana kubkwaming. Ni Ninyi Dasinyi bira im kan tukwe kan kweitata atonyi kubkwan ba, sun Er Imtamnyi Uram eryuryangan nang ara Ni deici aryi welebina yuryangana kubkwaming asi eibkwandum,” ebmou.