Read Futuna-Aniwa Yohanes 10 Bible Online

Yohanes 10 - Futuna-Aniwa bible

Yohanes 10

¹“Niryi sunsi diboka ebkwinsin. Unanyi biryi domba kalingna ai wekingnyi ura, domba kalingna ai bublan bisik kum wekingnyi ura, erda domba kalingna lika asi iniboka likingnyi ura, sun ato nang ara domba kalingna nang kum kunung. Erda, a nang ara domba asi ukula don nang ato kunung. Tonda, ‘Yuk nang dinyi akaboka dobdobkwayeb,’ tenen nang ato kunung. ‘Domba asi ukula dobkwan,’ tenen nang ato kunung.

²Ba, domba kalingna ai bublan bis wengnandanyi bira diboka domba kalingnanyi kurandiryi.

³Anyi bira domba kalingna ai bublan dam yaci ura, bublan kalingnanyi biryi, ‘Ur wengyarum,’ eboka bublan kukeibkwande. Ura, domba kalingnanyi biryi uram ebmaci ara, domba aryi er uram bikwaming. Domba kalingnanyi biryi er domba nirya asi diboka bingdur ati, erci sun si yuk-yuk si siboka nabmaci ura, kalingna ai dam aryi kuboka baitam bobinkwande.

⁴Domba kalingnanyi biryi er domba nirya asi baitam bobinmou ura, erci menekoka bobinkwande. Ura, domba aryi er uram kekebmang uca, ersi milibkwaming.

⁵Bok, domba ara sun kalingnanyi bikwa milibkwaming. Yuknyi bisi kum milibkwaming. Erda, sunci yuknyi bisi takloboka bindobkwaming. Yuknyi biryi en uram kum bingnung ati, sunci er uram asi kum milibkwaming,” eboka eterebmou.

⁶Er Yesus biryi ato eboka Er Uram keken nang asi a kiklina uram aryi eterebmou. Eterebmou bok, sun a uram kekenmai nang ara a kiklina uram deyok kum bikmai.

⁷Ura, Yesus biryi sun Er Uram keken nang asi ato eboka eterebmou. “Niryi sunsi diboka ebkwinsin. Nira dib kobdob domba dongoboka kalingna ai bublan atonyi kunun.

⁸Ni yangana kabul talak aryi ninyi ilinto minob meneki yandoka domba kalingna ai wengnamnyi nang ara ukula don nang akwe kuramnyi. Tonda, ‘Domba asi iniboka oyibkwan,’ tenen nang akwe kuramnyi. A nang aryi domba asi namdamnyi bok, domba aryi sun uram kum kekeramiryi, sunsi kum miliramnyi.

⁹Nira domba kalingna ai bublan atonyi kunun. Domba ara Ni biriman aryi wengyamingnyi uca, lemna dinyi dobdobkwaming. Dobdobingnyi ura, sunci ai tam wengyandoka baitam anabindoka teleb maning yibde binkwaming.

¹⁰‘Domba ukula dobkwan,’ tenenanyi yaci ura, domba asi ukula oyibkwande ati yankwande. Bok, Nira domba kalingnanyi yanman ara iya kam kun dinyi karebkwan ati yanman. Ara, langdeiboka kubde binkwaming ati Ni yanman.

¹¹Nira domba kalingnanyi teleb kunun. Domba kalingnanyi teleb ara, ‘Ni domba kalikwan,’ tenen, ‘Nira da obkwaningnyi ababyi iya kalikwan,’ tenen er domba asi diboka kalingnande.

¹²Ba, dengna dorona ati domba kalingmilirandinyi bira domba kalingnanyi diboka kum kurandiryi, domba damnyi kuma aryi a domba ara diboka kum kalingnande. Kalikoka kunmaci asi, bai kam aryi, ‘Domba oyibkwan,’ tenen yangaci asi, domba kalingmilinanyi biryi asing eibci ura, er ilil aryi a domba mer deibloboka bindobkwande. Ba, a domba mer ara ur talyi deiblobmaci asi, bai kam aryi yandoka a domba asi oyibkwande. Ba, a domba mer ara daluboka dantam-dantam binsekwaming.

¹³Anyi bira er ilil aryi cung dorbinkwamaci ara domba damnyi kuma deyok aryi, domba asi bico tenena kum uca diboka kum kalikwande.

¹⁴Nira domba kalingnanyi teleb kunun. Niryi Ni domba asi diboka bingnun ba, Ni domba ara Nisi diboka bingnunung.

¹⁵Ni Nai Imtamnyi biryi Nira Er Mi asi bingnurur to, Nibabyi Ni Nai bisi bingnun. Ba, Niryi, ‘Ni domba asi kam kubkwaming,’ tenen ati Niryi Nidamnyi karebdankwan.

¹⁶Ura, yuk domba ababyi Ni domba kunung. Ara, domba kalingna ai yuk ai kunung domba ababyi Ni domba kunung. A domba ababyi Niryi boyankwan. Boyanyi ura, a domba mer ab o domba mer ab antaniboka Ni domba mer tentok asi kibdeibkwan. Ba, domba kalingnanyi bira tentok aryi a domba mer asi kalikwande.

¹⁷A deyok aryi, Ni Nai Imtamnyi biryi Nisi boukwe weik kunurur. Ara, Niryi, ‘Lebkwan,’ tenen Nidamnyi karebdankwan deyok aryi, Erci Nisi boukwe weik kunurur. Nidamnyi karebniryok dibmanyi ani, tubto kam bukokwan ati ebman.

¹⁸Ninyi tentok ababyi Ni isin asi kum dakabokwanir. Erda, Niryi Nidamnyi karebdandoka isin dakdobkwan. Niryi Nidamnyi karebdankwan mikib bonunyi kunun. Tonda, kam tubto bukokwan mikib bonunyi kunun. Ni Nai Imtamnyi biryi Nisi ebdeibnou to, kunubkwan ati ebman,” ebmou.

¹⁹Yesus biryi ato ebmou ba, sun Yahudi yala nang aryi kekebmai ura, sun mamun lulubdanmai. Sun Yahudi yala nang kankan aryi kuboka ninyi ilinto aryi Yesus biti ato ebmai.

²⁰“Isa aryi er kanya asi wekwe uca, luba kanya borur. Ati, sunda, unato ati Er uram tuba kekermurunkwandum do?” ebdanmai.

²¹Ba, yuk nang aryi ato ebmai. “Isa kanya wekanci nang ara ato uram ton kum eraming. Anyi bira asing kuamunyi bisi asing kwetebmar. Isa aryi asing kun nang asing kwetebte do? Ato ara ukubman kum,” ebdanmai.

²²Kunmai ani, Yerusalem atei aryi kuboka kwalina weik kwalibmai. Ara, “Bait Allah ai ara minob ura bisik bublan kukmai,” tenen kanya teneiboka kwalibmai. A kwalina ara muryi talak aryi kwaliramnyi.

²³Kwalina kwalibmai cok, Yesus bira Bait Allah ai dam doamnyi ai weik ai si Salomo biryi doamwe ai asi yibanmou. Akai ara abilinga imna kum uca, duma dem deibloamnyi ai asi yibanmou.

²⁴Yibanmou bok, sun Yahudi yala nang aryi bindoka aknabdongobmai ci, sunci Yesus bisi ato eboka asibdenmai. “Nun kanya ara kankana kusurur ati, unato ati Kanci Kandamnyi biti lak en uram tuba kum erdarandim do? Ati, Kanda diboka Er Imtamnyi biryi Bokwetebkounyi kurantum ura, Kanci, ‘Yo, diba,’ eboka nunsi lak ebsurum,” eboka asibdenmai.

²⁵Ato eboka asibdenmai uca, Yesus biryi sunsi ato ebmou. “Niryi sunsi lak ebmasin bok, sunci Ni uram asi dib kum tenerandum. Niryi Ni Nai si biriman aryi teleb dinyi kununun dinyi lak kibmar ati, sunci Ni kununun deici aryi, ‘Anyi bira ato anyi,’ sirya bikmana kurandum.

²⁶Sirya bikmana kurandum cok, sunci Nisi diboka dib kum tenerandum. Ara, sunda Ni domba kankan aryi kum kurandum ati, dib kum tenerandum.

²⁷Ni domba ara Ni uram sirya kekebmangnyi uca, Nisi miliraning. Niryi Ni domba asi bingnun ati ebman.

²⁸Niryi Ni domba asi iya kam kun dinyi karebkwan. Tonda, sunci kum dana iya kum kubkwaming. Niryi Ni domba asi taruk aryi talenun ati, yuk nang aryi ukula dobdobmana kum kubkwaming.

²⁹Ni Nai Imtamnyi biryi Nisi a domba karebmasise ati, Erda iya erebdoba mikibnyi kurur ati, ninyi tentok ababyi Ni domba asi ukula dobmana kum kubkwande.

³⁰Ni ab Ni Nai Imtamnyi ab tonkwa tentok kununum ati ebman,” ebmou.

³¹Yesus biryi ato ebmou ati, sun Yahudi yala nang aryi Erti, “Er Imtamnyi bisi ina ngilikmar,” tenen, “Keil aryi doboka obkwayeb,” tenen keil dobmai.

³²Keil dobmai bok, Er Yesus biryi sunsi ato ebmou. “Ni Nai Imtamnyi biryi teleb dinyi ilinto kiknibmou asi sunci asing eibmarum ati, unato ati sunci Niti, ‘Keil aryi doboka obkwayeb,’ teneranurum do? Niryi Er Imtamnyi wa in dinyi lak kibmasin ati, sunci Niti, ‘Obkwayeb,’ teneranurum do?” ebmou.

³³Yesus biryi ato ebmou uca, sun Yahudi yala nang aryi Ersi ato ebmai. “Teleb dinyi kununa deyok aryi, kum obkwankib. Erda, Kanci Er Imtamnyi bisi ina ngilikmarim deyok aryi, obkwankib. Ati, Kanda tukwetam nang kurandim cok, ‘Ni ab Er Imtamnyi ab tentoknyi kununum,’ ebdanmarim ati, Kanci Er Imtamnyi si ina ngilikmarim ati, ‘Obkwankib,’ tenen kunmakib,” ebmai.

³⁴Ato ebmai bok, Yesus biryi sunsi ato ebmou. “Er Imtamnyi arungna uram umbura aryi ato eboka kerek sekamwe. ‘Sun nirya ara iya erebdob nang Er Imtamnyi kurur to kun nang kurandum,’ eboka kerek sekamwe. (Mazmur 82:6)

³⁵Ati, a eboka kerek sekamwe uram ara tukwetam nang ati, ‘Er Imtamnyi kurur to kun nang,’ ebmou ara dib en uram kurur ati ebman. Er Imtamnyi Uram ara talyi uram kuma.

³⁶Ura, Nira Er Imtamnyi biryi Bokwetebnounyi kunun ati ato en uram ara, ‘Er Imtamnyi kurur to kurutnyi,’ en uram ara kikib en uram kurur. Ati, unato ati sunci Niti, ‘Er Imtamnyi bisi ina ngilikmar,’ ebmarum do? Niryi Nidamnyi biti, ‘Nira Er Imtamnyi Mi kunun,’ ebman ara dib en uram kurur ati ebdanman.

³⁷Ati, Niryi Ni Nai Imtamnyi wa irmilin dinyi kum kunurantinyi uca, sunci Nisi dib tenenin kum.

³⁸Bok, Niryi Er Imtamnyi wa irmilin dinyi diboka kununun ati, sunci Ni kununun dinyi deici aryi dib tenebdarur. Ati, sunci Niryi lak ebmanyi uram asi dib kum tenebtumnyi uca, Ni kunununyi to dib tenebdarur. Sunci ato kubmunyi ura, sunci Niti, ‘Ei, nun Nai Imtamnyi biryi Er dam wa irur,’ tenen bikwandurum. Tonda, ‘Ei, anyi bira Er Imtamnyi dam kunanyi kurur,’ tenen bikwandurum,” ebmou.

³⁹Yesus biryi ato ebmou uca, sun Yahudi yala nang aryi, “Obkwayeb” tenen Ersi talebdenmai. Talebdenmai bok, Yesus biryi kisibloboka sun kankan aryi kuboka anaboka bindobmou.

⁴⁰Anardorbinmou ura, Yesus biryi me si Yordan koubkaboka binmou ci, likoka Yordan me otam mutuk binmou. Ara, Erci Yohanes ninyi me dongoramunyi biryi minob me dongoramwe dam bina kubmou.

⁴¹Kubmou ani, ninyi ilinto Er dam yandoka Yesus biti ato eboka lak ebmai. “Yohanes biryi ilil tenen dinyi kum kiknibmou cok, erci Anyi biti lak ebmou uram nirya kunubmou ati dib en uram kubmou,” ebmai.

⁴²Ato ebmai cok, ninyi ilinto aryi Yesus bisi dib tenebmai.