Read Futuna-Aniwa Yohanes 11 Bible Online

Yohanes 11 - Futuna-Aniwa bible

Yohanes 11

¹Ninyi tentok si Lazarus bira yun taleramwe. Anyi bira Betania atei nerabwe Maria ab Marta ab sun malnyi si Lazarus bisi u yiramwe.

²Maria bira yun taleramunyi si Lazarus er malner kuramuryok, erci, “Ni Du Erebdobnyi,” tenen Yesus yan tam tong teleb co du yung asi bobindoka dikdongobkwamwe ner kuramwe. Dikdongobkwamwe ura, erci er kisok otong taleboka Er Yesus yan kilibkwamwe.

³Ba, Maria ab Marta ab sun malnyi Lazarus bira yun talebmou ura, a nerabwe bitinyi aryi yuk nang asi ato ebdeibmarei. “Yesus kunmara dam bimunyi ura, sunci Ersi ato ebdarur, ‘Nai Du, nun malnyi Kan boukwe kurandimnyi bira yun talebmar ba, u bukam donmar,’ ebdarur,” ebdeibmarei.

⁴Sirya erbinmai ura, Yesus biryi a ebdeibmarei uram kekebmou cok, Erci ato ebmou. “Ni kwit yun weik talebmar bok, er iya kum dibkwande. Nun kwit yun talebmar ara ninyi aryi Er Imtamnyi biti, ‘Erda Iya Erebdobnyi kurur,’ tenen bikwaming ati yun talebmar. Ara, ninyi aryi asing eiboka Nira Er Imtamnyi Mi biti, ‘Erda Iya Erebdobnyi biryi iya ilil tenen dinyi kiknibde barur,’ tenen bikwaning ati, a dinyi kubmar,” ebmou.

⁵Ura, Yesus bira Marta ab Maria ab sun malnyi Lazarus ab boukwe weik kuramwe.

⁶Boukwe weik kuramuryok, Erci, “Lazarus yun weik talebmar,” en uram kekebmou ura, sun atei anmalakoka kum binmou. Erda, Er kubmou atei uki bitinyi tuba kunmou.

⁷Uki bitinyi sirya dakbisibmou ura, Er Yesus biryi Er miliramnyi nang asi ato ebmou. “Anaboka Yudea mutuk aryi tubto tamurbibyi uca, nun kwit Lazarus kurande atei Betania binkwayeb,” ebmou.

⁸Ato ebmou bok, Er miliramnyi nang aryi Ersi ato ebmai. “Nai, ninyi Eteresinanyi. Unato ati Kanci, ‘Yudea mutuk tamurbinkwayeb,’ ebmasirim do? Sun Yudea mutuk kuraming Yahudi yala nang ara Kanti, ‘Keil yongoboka obkwayeb,’ tenen ingkiringmakei ati unato ati tamurbitibyi do?” eboka asibdenmai.

⁹Ura, Yesus biryi sunsi ato ebmou, “Uki tentok berekmaci tum ara kiting yakna amolbaryi berengdur. Ati, kum inibmariryi, kiting tuba berekmaci ura, ninyi bisik yibanmang ura, kikib tum kurande. Ba, sun berekmaci bok, bisik yibanmangnyi ura, keil yan dum dukoka kot kum sangnaming.

¹⁰Erda, lukunda deib aryi berengna kum kubmaci bok, yibanmang nang ara keil yan dum dukoka kot minola sangnaming. Ati, ukuryok kitingtam ato tuba kubmar ati, nunci Yudea mutuk ur tamurbinkwayeb,” ebmou.

¹¹Ato ebmou ura, Erci Er miliramnyi nang asi ato ebmou. “Nun kwit Lazarus bira wi mabmar asi Niryi bindoka wi mabmara kam bungdeirbinkun,” ebmou.

¹²Ato ebmou ba, Er miliramnyi nang aryi ato ebmai, “Nai, Lazarus bira wi mabmaci ura, er kwetebkwamar ca,” ebmai.

¹³Er Yesus biryi, “Lazarus sirya dibmar,” tenen bikmou ati Erci kikliboka, “Nun kwit wi mabmar,” ebmou bok, Er miliramnyi nang ara “Udikum wi sirik mabmar ati ebmar,” tenebmai.

¹⁴A deyok aryi, Yesus biryi sunsi lak ebmou. “Nun kwit Lazarus bira sirya dibmar ati ato ebman.

¹⁵Nira er dam kum kubman ati nun kwit sirya dibmar. Sunci Nisi dib tenebkwanurum ati nun kwit sirya dibmar. Sunci Nisi dib tenebkwanurum ara sunti teleb kubdeibkwansir deyok aryi, Ni kanya kilkil weik kubmanir. Ura, ukuryok anaboka Lazarus deibmang dam binkwayeb,” ebmou.

¹⁶Ura, Tomas bira uruma si Didimus eboka namnaminyi biryi sun Yesus miliramnyi nang yuk nang asi ato ebmou. “Nikwityabwe, nun Du ab tonkwa anabkwayeb. Sun Yahudi yala nang aryi nun Du bisi obmangnyi ura, nunbabyi Er ab tonkwa obde yibkwansing ati binkwayeb,” ebmou.

¹⁷Ura, Yesus bira Betania atei dam sirya binmou ura, kekebmou ba, ninyi aryi ato ebmai. “Lazarus sirya dibmou ura, keil umbura dam sirya deibmai ani, uki dumbaryi sirya dakbisibmou,” ebmai.

¹⁸Mitik atei Betania ara weik atei Yerusalem dam asi doramnyi atei. Ba, Betania atei aryi kuboka Yerusalem atei bisik bana ara kilometer winiryi yibaramnyi ati doramnyi.

¹⁹Tonda, Yahudi yala nang ilinto ara “Lazarus dibmar,” sirya kekebmai ura, sunci, “Marta ab Maria ab sun kanya katabum ebdeibkwayeb,” tenen yanmai.

²⁰Ura, Marta biryi, “Yesus yanganmar,” en uram kekebmou ba, erci, “Yesus ab ebdatinimnyi,” tenen er ai aryi anaboka binmou ci, bisik ai dirbinmou. Yesus bisi dirbinmou bok, er malner Maria bira ai dam tuba kubmou.

²¹Ura, Marta Yesus ab ebdanmarei ci, erci Ersi ato ebmou. “Nai Du o, Kan nun ab tonkwa kubmatibyi ba, Kanci kwetebdeibtum uca, nun malnyi kum dibte,” ebmou.

²²“‘Lazarus dibmar bok, Kanci ukuryok ababyi Kan Nai Imtamnyi bisi molobminyi tok, Erci Kansi karebkwankir,’ tenen ni bikman,” ebmou.

²³Ebmou ba, Yesus biryi ersi ato ebmou. “Kan malnyi bira tubto kam bukokwande,” ebmou.

²⁴Ebmou ba, Marta biryi ato ebmou. “Sirya kobdob uki tum berekci ura, ninyi nirya kam bukokwaming talak ara ni malnyi bibabyi kam bukokwande ati ni bikman,” ebmou.

²⁵Ura, Yesus biryi ersi ato ebmou. “Nira ninyi kam burdeirin deyoknyi kunun. Tonda, iya kam kun dinyi karenunyi kunun. Unanyi-unaner ara Nisi dib tenebningnyi nang ara dibmangnyi ababyi kam bukokwaming.

²⁶Tonda, unanyi-unaner ara kam kuramingiryok, Nisi dib tenebmangnyi nang ara din dinyi kum dobdobkwaming ati ebman. Kanci a ebmakin to dib tenebmarim do kum do?” ebmou.

²⁷Asibdenmou ba, Marta biryi ato ebmou. “Nai Du, diba. Kanda Er Imtamnyi biryi bokwetebkou lemsina Weik Sienyi kurum ati ni dib tenekunun. Kanda Er Imtamnyi Mi Er tukwetam yuryasumumunyi kurum,” ebmou.

²⁸Ato ebmou ura, Marta tamuboka er ai wengbinmou ura, er weitner Maria asi yuk naboka ato ebmou. “Nun Nai eteresinanyi sirya yanmar ati, Erci kanti, ‘Ni dam yarur,’ tenen inibmakir.”

²⁹Maria biryi ato en uram kekebmou ura, erci minola anaboka Er Yesus dam binmou.

³⁰Ura, Yesus bira bisik yibanmou ani, Betsaida atei kum wengbinmou ci, bisik ai dam ara Marta ab ebdanmarei tam tuba kubmou.

³¹Ba, sun Yahudi yala nang ara, “Er kanya katabum ebdeibkwayeb,” tenen Maria ab tonkwa Lazarus dibmou ai bukmilibmai nang aryi diramnyi uca, Maria minola anabdobmou. Ura, Maria minola anabdobmou asi sun Yahudi yala nang aryi ersi aminda milibmai. Ara, sunci, “Lazarus tukwi dongobmoubwe keil dam bindoka aryi engenkwamar ati banmar,” tenebmai ci, Maria bisi milibmai.

³²Ura, Maria biryi Yesus kubmou dam bindoka Yesus bisi asing eibmou ci, er kutam ikdongobmou. Yesus Er yan tam kutam ikdongobmou ci, erci ato ebmou. “Nai Du o, Kansi nun ab tonkwa kunmatibyi ura, ni malnyi bira Kanci kwetebdeibmatum ura, kum dibte,” ebmou.

³³Ura, Er Yesus biryi diramwe uca, Maria bira engena weik kubmou ba, sun ersi milibmai Yahudi yala nang ababyi engebmilibmai asi asing eibmou ci, Yesus biryi, “Se, a nang ara din nang kam kurdeirin dinyi ara dib kum tenebmang,” tenen Er kanya mambul weik kubmou.

³⁴Ura, Erci sunsi ato eboka asibdenmou. “Nun kwit bisi dantam aryi dongobmarurumwe do?” Asibdenmou ba, sunci Ersi ato ebmai. “Nai, a diryarum,” ebmai.

³⁵Ura, Yesus biryi engena weik engebmou.

³⁶Engena weik engebmou ba, sun Yahudi yala nang aryi ato ebdanmai. “Naie, sun ton dibdendarur a. Erci Lazarus bisi boukwe weik diboka kimnamwe,” ebdanmai.

³⁷Bok, yuk nang aryi ato ebdanmai. “Anyi bira asing kuamunyi kwetebmunyi kubmar ati, unato ati Erci, ‘Dibcei,’ tenen Lazarus bisi kwetena ati mikib kum kurur do?” ebdanmai.

³⁸Ura, Yesus biryi, “Se, a nang ara din nang asi kam burdeirin dinyi ara dib kum tenebmang,” tenen mambul tubto bobmou ci, Lazarus tukwe dongobmaia dam tingbinmou. Ara, Lazarus dongobmai ai ara keil umbura asi dongobdongobmai ci, bublan dam ara weik keil aryi ibdongobmai.

³⁹Ura, Erci ato ebdeibmou, “Bublan dam kubmar weik keil asi bongobkweteboka lingkwa dam kibdarur.” Ebmou bok, Marta biryi ato ebmou. “Nai Du, ukubmunyei. Nun malnyi dibmou ani, uki dumbaryi dakbisibmou ati, er nong ara sirya lubkalibmar uca, tong weik anabmar,” ebmou.

⁴⁰Ato ebmou bok, Er Yesus biryi ersi ato ebmou. “Kanci dib tenebniminyi uca, kanci asing eibmin ba, ‘Er Imtamnyi Iya Erebdobnyi biryi ilil tenen dinyi kiknibde barur,’ tenen asing eibkwandim. Niryi ato ebmakin bok, tuba kum teneibmarim do?” ebmou.

⁴¹Ura, Er Yesus biryi ebdeibmou to, bublan dam kubmou weik keil asi bongobkweteboka lingkwa dam kibmai. Sirya kibmai ura, Er Yesus biryi imtam dibweleboka Er Imtamnyi bisi ato ebmou. “Nai, Kanci Ni molobmakin dinyi kunubkwanirim ati Niryi Kansi, ‘Ei Ni nai,’ ebmakin.

⁴²Kanci Ni molona tuba-tuba kekeranirim ati Ni sirya bikmakin. Ba, a tikmang nang dib tenebkwaming ati ato ebmakin. Ara, a tikmang nang aryi Niti, ‘Anyi bira diba Er Imtamnyi Bokwetebunyi kurur,’ tenen dib tenebkwaning ati ato ebmakin,” eboka molobmou.

⁴³Ato ebmou ura, Er Yesus biryi uram weik doboka ato ebmou. “Lazarus, anaboka yarum,” ebmou.

⁴⁴Ebmou ba, “Naie,” dibmounyi bira kam bukokmou. Kam bukokmou ura, keil umbura dam aryi anaboka yanmou. Ara, er yan taruk nong nirya asi kait aling aryi limdongobmainyi anaboka yanmou. Er kisok ongon aling limdongobmainyi bira anaboka yanmou. Anaboka yanmou ura, Er Yesus biryi, “Din nang limdongoraming aling ongobdeibmandau kwiribdeibmunyi ba, Lazarus bira ur yibarorur,” ebmou.

⁴⁵Ura, Er Yesus biryi dibmounyi si Lazarus bisi kam bukeibmou deyok aryi, Yahudi yala nang ilinto aryi Er Yesus bisi dib tenebmai. Ara, “Maria er kanya katabum ebdeibkwayeb,” tenen Maria ai bulubmai nang aryi Er Yesus biryi kiknibmou iya ilil tenen dinyi asi asing eibmai ura, Ersi dib tenebmai.

⁴⁶Bok, Yahudi yala nang kankan aryi ton nang ara sun Farisi nang bindoka, “Er Yesus biryi Lazarus bisi kam bukeibmar,” eboka nungbinmai.

⁴⁷Nungbinmai ura, sun Er Imtamnyi kan ninyi kan noutam kuboka antanirdeirin deyok nang ab sun Farisi nang ab ara, “Uram sisikwayeb,” eboka sun Yahudi nang sien nang nirya asi nabmai. Uram sisingna ati bulubdeibmai ura, sunci ato ebdanmai. “Una kubkwayeb do? Anyi bira ilil tenen dinyi ilinto kiknibde barande. Ba, nunci, ‘Bisik sektibyi,’ tenen ingkirikde baramibiryok, talyi ati ingkirikde baramib.

⁴⁸Anyi bisi bisik kum sekibyi uca, ninyi nirya ara Ersi dib tenebingnyei se. Ura, sun Roma nang ara mikib deib aryi nunsi arungdeirisin nang aryi kekebingnyi uca, sunci, ‘Sun Yahudi yala nang aryi Yesus bisi milibingnyi uca, nun uram tuba kum kunubde bingnyei,’ tenebsingnyei. Ato tenebsiting ura, sunci yandoka Yerusalem atei aryi kuboka Er Imtamnyi bisi dama deirin ai kum daneibsingnyei. Tonda, nunda Yahudi yala nang nirya kum obkiribsingnyei,” eboka sisikmai.

⁴⁹Ura, Er Imtamnyi kan ninyi kan noutam kuboka antanirdeirin sienyi si Kayafas uram ton ebmar. A kwalina kubde banmai ba, anyi bira Er Imtamnyi bisi dama deirin sienyi kuramwe. Ura, erci sunsi ato ebmou. “Sun kum bingdarur.

⁵⁰Nun Yahudi yala nang nirya ati, ‘Malyi nang,’ eboka obkiribsingnyei. Erda, sunci, ninyi tentok ati, ‘Malinyi,’ eboka ur obkwanung. Ati, Anyi bisi obingnyi uca, nunda Yahudi yala nang yuk nang nirya aryi lebdandobkwanub,” ebmou.

⁵¹Ura, anyi bira er kanya dam yuk aryi a dinyi bikoka lak kum ebmou. Erda, Er Imtamnyi Kanya Roh Kudus aryi er kanya dam karebmou uca, erda a kwalina aryok Er Imtamnyi kan ninyi kan kuboka antanirdeirin sienyi kuramunyi biryi Er Imtamnyi kunubkwamwe dinyi lak ebmou. Ati, erci, “Sun Yahudi yala nang ara kisal dangna dinyi dobdobkwaming ati Yesus bisi dibkwande,” tenen bikmou ci, lak ebmou.

⁵²Ura, Er Yesus bira sun Yahudi yala nang ati dibkwamuryok, Erci sun yuk yala nang ababyi dibkwamwe. Ara, Er Imtamnyi mabwe nermabwe nirya ara yuk-yuk binsekmai nang asi antanibdeibkwamwe ati Er dibkwamwe.

⁵³Ura, a uki tum aryi kuboka sun Yahudi yala nang aryi, “Er Yesus bisi obtibyi,” tenen marmun yibkalibmai.

⁵⁴Marmun yibkalibmai asi Er Yesus biryi bikmou ati, Erci sun Yahudi yala nang kankan lak tuba kum yibaramwe. Erda, kisiboka ninyi kun kum mutuk dam bindobmou. Ara, mitik atei si Efraim bindoka Er miliramnyi nang ab tonkwa kubmai.

⁵⁵Ura, sun Yahudi yala nang weik kwalina si Paskah kwalibkwamai tum dam kubmou ba, sun yuk mutuk-yuk mutuk aryi kuramnyi nang ara anaboka Yerusalem atei binmai. Ara, “Musa biryi ebdeibsou to, nunci, ‘Er Imtamnyi bisi teleb kubdeibtibyi,’ tenen me ilikdabyi ura, Paskah kwalibkwayeb,” tenen binmai.

⁵⁶A bulubmai nang nirya ara, “Yesus bibabyi yankwamar do?” tenen ingkiringmai. Ara, Bait Allah ai dam tikmai cok, sunci, “Weik kwalina kwalibkwayeb ati, Erbabyi yankwamar do kum do?” eboka asibdanmai.

⁵⁷Ato kuboka dibde bukmai bok, sun Er Imtamnyi kan ninyi kan noutam kuboka antanirdeirin deyok nang ab sun Farisi nang ab ara ato eboka arukdeibmai. “Yesus bisi asing eibmunyi ura, nunsi eryandarur,” ebmai. Ara, Yesus biti, “Talebkwayeb,” tenebmai ci, ato eboka arukdeibmai.