Read Futuna-Aniwa Yohanes 12 Bible Online

Yohanes 12 - Futuna-Aniwa bible

Yohanes 12

¹Uki nabaryi kubkwamai cok, sun Yahudi yala nang weik kwalina si Paskah berekwamwe ba, Er Yesus Betania atei tambuboka binmou. Akatei asi Er kwit Lazarus kuramwe. Anyi Lazarus bira Er Yesus biryi kam bukeibmounyi kuramwe.

²Ura, Lazarus bira Er Yesus ab Er miliramnyi nang ab asi du dongobmou ura, yina tonkwa yibmai. Lazarus malner Marta bira yina yangaboka karebmou ba, Lazarus ab Yesus ab Er miliramnyi nang ab tonkwa yibmai.

³Ura, Maria biryi moyok doboka sil tong teleb dinyi dikdongobmou. A sil tong teleb dinyi si ara minyak narwastu kuboka dengna weik dinyi kubmou asi erci Yesus yan tam dikdongobmou. Sirya dikdongobmou ura, erci er kisok otong aryi Yesus yan tam kilibdeibmou. Uca, akai nirya umbura sil tong teleb dinyi kekebmai.

⁴Ura, Yesus miliramnyi nang kankan tentoknyi bira Yudas Iskariot biryi, “Mem se,” ebmou. Anyi Yudas bira Yesus kikibkwamunyi kuramwe.

⁵Ati, Yudas biryi ato ebmou, “A sil tong teleb dinyi ara dengna weik dinyi kubmar. Unato ati nun Du yan tam dikdongobmar do? Kwalina tentok wa ibde baraming dengna dinyi ato talyi dikdongobmar se. A sil tong teleb dinyi ara dekeibmate ura, erci dobdobmate co bok asi sun bona bon kum nang asi karebte se,” ebmou.

⁶Yudas biryi ato ebmou ara sun bona bon kum nang ati boukwe deyok aryi, kum ebmou. Erda, co bok ukula donanyi kuramwe deyok aryi, erci ato ebmou. Yesus ab Er amolbaryi nang dororamnyi co bok asi sunci Yudas bisi deiriramnyi. Deiriramnyi bok, Yudas biryi a co bok aryi kuboka ukula doramwe.

⁷Ura, Yudas biryi, “Mem se,” ebmou bok, Yesus biryi ersi, “Mem ebminyei se,” ebmou. “A sil tong teleb dinyi asi erci dikdongobmanou ara Nisi tukwe dongobkwaning uki tum kiknibminikmanou ati dikdongobmanou.

⁸Sun bona bon kum nang ara sun ab tonkwa iya kubkwaming ati sunci uki-uki nirya co bok karebdate. Ba, Nira sun ab tonkwa iya kum kubkwayeb,” ebmou.

⁹Ura, Yahudi yala nang ilinto ara, “Yesus bira Lazarus ai wengbinmar,” tenen bikdobmai uca, bulubmai. Ara, “Yesus bisi asing eibtibyi,” tenena akwe kum yanmai. Erda, “Lazarus bira Yesus biryi kam bukeibmounyi bibabyi asing eibtibyi,” tenena ababyi buluryanmai.

¹⁰Ara, Er Yesus biryi Lazarus bisi kam bukeibmou deyok aryi, Yahudi yala nang ilinto aryi Er Yesus dam yandoka Ersi dib tenebmai. A deyok aryi, sun Er Imtamnyi kan ninyi kan noutam kuboka antanirdeirin deyok nang aryi, “Lazarus bibabyi obkwayeb,” tenen marmun yibmai.

¹¹

¹²Mabmai ani, berekwe ura, sun “Kwalina si Paskah kwalibkwayeb,” tenen bulubmai nang ilinto aryi, “Yesus bibabyi Yerusalem atei yankwamar ci, bisik ai yanganmar,” en uram kekebmai.

¹³Ura, sunci, “Nun Du bisi kirbinkwayeb,” tenen atar ato co si Palem bok asi dobtaleboka kwakub-kwakub ebmai ci, Yesus bisi kirbinmai. Tonda, uram weik doboka sunci ato ebmai. “Hosana! Er Imtamnyi bira nun Arungdeirisurutnyi biryi Bokdonokmounyi bisi kisal dakwayeb. Anyi bira sun Israel yala nang asi arukdeiboka kalingsurur weik Sienyi kurur ci, yanganmar ati Er si weik ebkwayeb,” ebmai. (Mazmur 118:25-26)

¹⁴Ura, Er Yesus biryi bisam si keledai asing eibmou ci, keledai deici tam burbinmou. Ara, Er Imtamnyi Uram minob uram kunubkwamwe ati keledai deici burbinmou. Ara, Er Imtamnyi Uram umbura aryi a deyok ato eboka kerek sekamwe.

¹⁵“Sunda mutuk kon Sion aryi kurandum nang ara ilil kanya bobmunyei. Sun kalikwansir Weik Sienyi ara sun dam yankwande. Ara, keledai deici tam aryi bukoka yankwande,” eboka kerek sekdeiamwe. (Zakharia 9:9)

¹⁶Er Yesus keledai deici tam aryi bukoka Yerusalem atei wengbinmou ba, Er miliramnyi nang aryi, “Er Imtamnyi Uram umbura aryi minob kerek sekmou to kunubmar,” tenen anmalakoka kum bikdobmai. Ani, Er Imtamnyi biryi Yesus bisi sirya erebdeibmou ura, sunci, “Nun Du keledai deici aryi bukmounyi si weik ebmoubwe ara Er Imtamnyi Uram umbura aryi kerek sekeibmou to kunubmoubwe,” tenen bikwamnyi.

¹⁷Ura, sun bulubmai nang kankan aryi ninyi ilinto ato ebmai. “Anyi bira dibmounyi si Lazarus tukwe dongon dam mabmunyi bisi naboka kam bukeibmounyi yanganmar,” eboka lak ebdongobnin banmai. A nang ara asing eibmai ba, Yesus biryi Lazarus dibmou asi kam bukeibmou deyok aryi, a uram lak ebde binmai.

¹⁸Ati, ninyi ilinto ara, “Iya ilil tenen dinyi kiknibmou,” en uram kekebmai ati sunci Yesus biti, “Kibdobkwayeb,” tenen yanmai.

¹⁹Uca, sun Farisi nang aryi sun mamun ato ebdanmai. “Ninyi nirya ara Ersi milibmang se. Nunci, ‘Bisik sektibyi,’ tenen ingkiringnub cok, bisik diboka kum sektibyi se,” ebdanmai.

²⁰Ura, sun, “Kwalina si Paskah kwaliboka Er Imtamnyi si weik ebkwayeb,” tenen yangan nang kankan ara Yunani yala nang ton ababyi yanganmai.

²¹A nang ara Filipus bisi bindoka, “Nai, nunda sun Du Yesus ab ebdatibyi,” ebmai. Filipus bira Galilea mutuk atei si Betsaida anyi kuramunyi bisi ato eboka molobmai.

²²Ura, Filipus biryi er kwit Andreas bisi, “‘Yesus ab ebdatibyi,’ eboka molobmaning,” ebmou. Ura, Andreas ab Filipus ab aryi Yesus dam bindoka ebmarei.

²³Ura, Yesus biryi ato ebmou. “Ni Ninyi Dasinyi bisi co lase deiboka erebdeibkwaning talak dam kubmar.

²⁴Niryi sunsi dib en uram ton ebkwinsin ati diboka kekebdarur. Gandum yala ara tukwe umbura sakoka dibmou uca, betekoka abci ura, du mourirande. Ba, gandum yala er yuk kubte uca, dina kum kubte uca, betekoka kum abte uca, du kum moubte. Ati, ato kuboka Ni kum dibtinyi ura, lemsin dinyi kum boyansute.

²⁵Tonda, sundamnyi ererdeirdaramingnyi nang ara, ‘Dina kum uca, kam kubmurubtibyi,’ tenen nang ara kam kun dinyi wanikminikwande uca, dibkwaming. Ba, ‘Nisi obningnyi ababyi Er Imtamnyi bisi milibmurubkwayeb,’ tenen nang ara iya kam kun dinyi dobdobkwaming.

²⁶Sun Niti, ‘Wa irmilibkwayeb,’ tenebningnyi nang ara Nisi milina teleb. Ati, Ni kubnyi dam ara Ni wa irmilin nang ababyi kubkwaming. Sun Niti dirnilin nang asi Er Imtamnyi biryi erebdeibkwande.

²⁷Ura, ukuryok ara Ni kanya mambul weik kubmanir. Ati, Niryi una ebkwan do? Niryi, ‘Nai, mambul kubdeibsingnyi tum dam kubmar ati Kanci mambul kun dinyi bisik sekdum,’ ebtinyi do? Ato tenen kum. Niryi, ‘Mambul kun dinyi bobkwan,’ tenen yase ati, a mambul kimdeirinin talak yanmar ati ebman.

²⁸Nai, Kanci ilil tenen dinyi kikniboka Kan si weik erebdeibdandum tenen molobmakin,” ebmou. Er Yesus biryi ato ebmou ba, imtam aryi kuboka uram ara ato ebmou. “Niryi ilil tenen dinyi kikniboka Ni si sirya erebdeibdanman ani, ilil tenen dinyi tubto kikniboka Ni si erebdeibdankwan,” ebmou.

²⁹Ura, sun bulubmai nang kekebmai ba, ton nang ara, “Liman debmar,” ebmai. Ba, yuk nang aryi, “Er Imtamnyi Uram eryuryangananyi uram ebmurubmar,” ebmai.

³⁰Ebmai bok, Er Yesus biryi sunsi ato ebmou. “Imtam aryi kuboka uram dobmar ara sunci dib tenebkwanurum ati dobmasir. Imtam aryi kuboka dobmar uram ara Niryi, ‘Er Imtamnyi biryi Ni molona sirya kekebmanir,’ tenen bikwan ati kum dobmanir. Erda, sunci dib tenebkwamanurum ati dobmasir,” ebmou.

³¹Ukuryok ara ninyi aryi Nisi obkwaning ba, Er Imtamnyi biryi sun im dangna tukwe dangna nang aryi malyi kun dinyi lak kibkwande. Isa sienyi Iblis bira tukwetam nang talenanyi bisi tukwetam aryi kuboka yakdonokwamar ati ebman.

³²Ura, ninyi aryi Nisi tukwetam aryi kuboka co lase deib aryi erebdeibningnyi ura, Niryi karebnyi uca, sun im dangna tukwe dangna nang nirya ara Ni dam yankwaning.

³³Er Yesus biryi, “Ninyi aryi Nisi erebdeibkwaning,” ebmou ara, “Co lase deici erebdeiboka obkwaning,” tenen bikmou ati, ato ebmou.

³⁴Ato ebmou bok, sun bulubmai nang ara ato ebkateibmai. “Musa Uram ara, ‘Er Imtamnyi biryi bokdonokwande ninyi lemsina Weik Sienyi ara iya kubkwande,’ eteresur ati kekeramoubwe. Ati, Kanci unato ati, ‘Kanda Ninyi Daumunyi bisi erebdeiboka obkwaning,’ ebmasirim do? Ninyi Dasinyi bira unato anyi do?” Ato eboka asibdenmai.

³⁵Asibdenmai ba, Yesus biryi sunsi ato ebmou. “Nira berengdeirisinanyi kunun cok, uki mitik talak akwe sun ab tonkwa kubmurubkwayeb. Ati, sunci berengna dinyi asing tuba eiriramun cok, berengna tam yibandarur. Ara, berengna sun dam tuba kubsici ba, sunci, ‘Kunuk dakci uca, yibanman kum kubtibyi,’ tenen yibandarur. Kunuk dakci ura, sun bisik yibaramingnyi nang ara, ‘Dantam baramib do?’ tenen kum bingnaming uca, bisik wanikminikwaming.

³⁶Berengna asi asing tuba eibmarum ci, sunci, ‘Berengna asi nun kanya deibkwayeb,’ tenena teleb. Ara, sunda berengna tam kun nang kibkwandum ati ato tenena teleb.” Ura, Yesus biryi ato ebmou ura, Erci kisiboka bindobmou.

³⁷Ura, Yesus biryi sun Yahudi yala nang urasintam aryi ilil tenen dinyi ilinto kiknibmou bok, sunci, “Yesus bisi dib tenena nun li,” tenermururamnyi.

³⁸Er Imtamnyi biryi aminda kunubkwamwe dinyi ebdeibmaca bobaramunyi si Yesaya biryi, “Dib kum tenebkwaming,” eboka minob lak ebmou to kunubmou. Ati, Yesaya biryi a nang ati minob ato ebmou, “Nai Erebdobnyi, nunci Kan uram ermururamoubwe bok, unanyi-unaner ara nun uram dib teneranking do? Tonda, Kanda Imtamnyi biryi mikib kuboka lebdeibkwansirim ara unanyi-unaner aryi asing eibmang do?” eboka kerek sekeiamwe. (Yesaya 53:1)

³⁹A deyok aryi, “Sun Yahudi yala nang ara una deyok aryi dib tenebman kum kuraming do?” tenen Yesaya biryi yuk tam aryi ato eboka minob lak eboka kerek sekeiamwe.

⁴⁰“Er Imtamnyi biryi karebmou uca, a nang ara asing kun nang ato kibmai. Nun Nai biryi karebmou uca, a nang ara kat kanya boboka amol kum kekeraming. Er Imtamnyi biryi karebmou uca, a nang ara asing kum eiriraming. Tonda, sun kanya dam aryi dib en uram kum bingnaming. A nang ara Nira Imtamnyi dam tamuryanganingnyei. Niryi sunsi kum kwetebdeibkwan.” (Yesaya 6:10) Er Imtamnyi biryi a nang ati ato ebmou.

⁴¹Ara, Yesaya biryi minob ura Er Imtamnyi erebdob sokon asing eibmou cok, erci Yesus erebdob dinyi ababyi asing eibmou. Asing eibmou cok, erci, “Nun Du Iya Erebdobnyi karebmou uca, sun Yahudi yala nang kanya kat tuba kubmurubkwande,” tenen lak kibmou.

⁴²Ato ebmou bok, sun Yahudi yala nang sien nang kankan aryi ton nang ababyi Er Yesus bisi dib tenebmai. Ba, sunci, “Sun Farisi nang aryi biksingnyi uca, Musa Uram eteren ai aryi kuboka yakdonoksingnyei,” teneramnyi deyok aryi, sunci sun dib tenena lak kum ebmai.

⁴³A dib tenen nang aryi, “Ninyi aryi kisal dangsina teleb,” tenen dinyi udikum deiriramiryok, sunci, “Ninyi aryi nunsi yakdonoksingnyi ababyi Er Imtamnyi biryi kisal dakwansir,” tenen kum kuramnyi. A deyok aryi a nang aryi Yesus bisi dib teneramnyi bok, sunci, “Nunbabyi Yesus milin nang kunub,” lak kum eramnyi.

⁴⁴A sirya ebmou ura, Er Yesus biryi uram doboka ato ebmou. “Unanyi-unaner ara Nisi dib tenebningnyi nang ara Ni tikwa dib tenena kum kunung. Erda, a nang ara ni biriman aryi Ni Nai Imtamnyi Nisi bokwetebnounyi bibabyi dib tenenung.

⁴⁵Sun ato kun nang ara Nisi asing diningiryok, sunci Ni biriman aryi Ni Nai Nisi bokwetebnounyi bisi asing dinung.

⁴⁶Ni tukwetam yuryase ara ninyi berengdeirinanyi kuboka yuryase. Ara, Nisi dib tenebningnyi nang ara kunuk dam tuba kum kubkwaming ati, Ni yuryase.

⁴⁷Ura, sun Ni uram amol dem kekebingiryok kununa kum kuramingnyi asi Niryi tatab-tatab ena kum kubkwan. Niryi, ‘Tukwe tam nang wenebkwan,’ tenen kum yuryase. Erda, ‘Tukwe tam nang lebkwan,’ tenen yuryase.

⁴⁸Ato ebman bok, sun Nisi dokdonokoka Ni uram asi, ‘Nun li,’ eraningnyi nang ara wenen dinyi dobdobkwaming ati ebman. Ara, sirya kobdob uki tum berekci ura, sun Ni uram ati, ‘Dorona nun li,’ tenen nang ara Niryi ebmasin uram deici aryi wenen dinyi dobdobkwaming.

⁴⁹Niryi Ni mining kanya yuk aryi tenen dinyi lak kum ebde basunun. Erda, Ni Nai Imtamnyi bira Nisi bokwetebnounyi biryi, ‘A dinyi o dinyi eterebdum,’ ebdeibnou tok, Niryi a dinyi o dinyi eboka eterebde basunun. Tonda, Ni Nai biryi, ‘Ato-ato kuboka ebdum,’ ebdeibmou to Niryi ato kuboka lak eteresunun.

⁵⁰Ni Nai Imtamnyi biryi arungdeirisin uram kunubde bana ara iya kam kun dinyi boyangarande ati Ni bikman. Ati, Niryi sunsi lak etereransin uram ara Ni Nai biryi ebdeibnou tok lak etereransin ati ebman,” ebmou.