Read Futuna-Aniwa Yohanes 13 Bible Online

Yohanes 13 - Futuna-Aniwa bible

Yohanes 13

¹Weik kwalina tum si Paskah berekwamwe ba, Er Yesus biryi, “Ni dibkwan talak dam kubmar,” tenen bikdanmou. Ara, Erci, “Tukwetam aryi kuboka anabdobnyi ura, Ni Nai Imtamnyi dam welebinkwan,” tenen bikdanmou. Ura, Erci Er miliramnyi nang asi iya boukwe weik kimnamwe to, Erci Er boukwe tenen dinyi sunti diboka lak kibdeibmou.

²Lukunda yibkoi yina ara sirya yangabminikdobmai cok, kum yibmai. Bok, isa sienyi si Iblis biryi Yesus miliramunyi si Yudas Iskariot er kanya dam murmurdongobmou uca, erci, “Yesus bisi kikibnyi ba, ninyi aryi Ersi taruk taleboka obting,” tenen kubmou.

³Ura, Yesus biryi, “Er Imtamnyi biryi mikib dinyi utotoa nirya ara Ni taruk dam karebmanou,” tenen bikdanmou. Tonda, Erci Erdamnyi biti, “Er Imtamnyi bokwetebnounyi kunun ci, Er Imtamnyi dam tubto tamuboka welebinkwan,” tenen bikdanmou.

⁴A dinyi nirya asi bikdanmou ci, Yesus biryi tikokmou ura, Er alib ongon aling ara kwiriblobmou ci, me ilikoka kilin aling asi Er der ai arikoka labkwetebmou.

⁵Sirya arikdanmou ura, Erci me ilingna me asi kwebtaleboka weik me ilingna moyok umbura dikdongobmou. Sirya dikdongobmou ura, Erci Er miliramnyi nang yan me ilikde yibinmou. Me sirya ilikeibne ura, der ai arikoka labkwetebmou me kilina aryi sun yan kilibde yibanmou.

⁶Me ilikde yibanmou ani, Erci Simon Petrus yan me ilikeibkun tenen ku asi, Simon Petrus biryi ato ebmou. “Nai Du, Kanci ni yan me ilikwamanirim do? Ato kubniminyei se,” ebmou.

⁷Ato ebmou ba, Yesus biryi ersi ato ebmou. “Niryi kan yan me ilikeibwinkin deyok ara ukuryok diboka kum bikmarim bok, aminda ara diboka bikwandim,” ebmou.

⁸Ebmou bok, Petrus biryi, “Ato tenen kum,” ebmou. “Kanci ni yan me iliknimiyei.” Ato ebmou ura, Er Yesus biryi ersi ato ebmou. “Niryi kansi me kum ilikmakinyi uca, kanci Ni kisal dangsin dinyi kum dobdobkwandim.”

⁹Ura, Petrus biryi ato ebmou. “Nai Du, ato ura, Kanci ni yan ur me iliknurum. Tonda, ni taruk ab ni kisok ababyi me ilikdeibnurum.”

¹⁰Ura, Er Yesus biryi ersi ato ebmou. “Sun nirya ara me keksekdob nang ato kurandum ati yan akwe me ilikmasin. Sun nong kisok taruk nirya ara keksekdob dinyi akwe kurur. Sun nirya ara me keksekdob nang ato kurandum ati ebman. Ato ebman bok, sun kankan ara keksekdob kumnyi ton kubmar,” ebmou.

¹¹Ara, Er Yesus biryi, “Ni milin nang kankan ara tonyi biryi Nisi kikibkwanir,” tenen bikmou. A deyok aryi, Erci sunsi, “Sun kankan ara keksebdob kumnyi kurur,” ebmou.

¹²Ura, Er miliramnyi nang yan yuk-yuk me ilikeibde yibanmou ani, sirya ilikeibmou ura, Er Yesus biryi Er alib ongon aling tubto ongobdobmou ci co lamna dam bukamwe sokon tubto burbinmou. Ura, sunsi ato eboka asibdenmou, “Niryi sun yan me ilikeibmasin ara sunda unato ati me ilikmasir tenen sun ton bikmarum do?” eboka sunsi asibdenmou.

¹³Ura, ton ato ebmou, “Nira sun Nai sun eteresinanyi kunun ati, sunci Niti, ‘Nai ninyi eterenanyi,’ eboka, ‘Nun Du Erebdobnyi,’ enindarur. Nira sun eterenanyi ton Erebdobnyi ton diboka kunun ati sunci Niti ato eboka namnanurum ara kikib to eboka namnanurum.

¹⁴Ati, Nira sun arungdeirisinanyi ton sun eteresinanyi ton kunun cok, Niryi sunda Ni milinin nang asi yan me ilikeibmasin. Ati, sunda Ni wa irmilinin nang ababyi neiktoto sun mamun yan me ilingdana teleb.

¹⁵Niryi sun yan me ilikeibmasin ara sunti kiklibdeiboka me ilikeibmasin ati, sunbabyi neiktoto sundamnyi luknubdongobdandoka sun mamun diblilirdana teleb.

¹⁶Niryi sunsi dib en uram ebkwinsin ati diboka kekendarur. Er wa irmilinanyi bira er wa arungdeirinanyi bisibkaboka Erebdobnyi ton kum kurur. Tonda, yuk nang uram ermuruna bobananyi bira erci bokdonokmar uram damnyi bisibkaboka Erebdobnyi ton kum kurur.

¹⁷Ati, Niryi sunsi ato eboka lak eterebmasin ati sunci kunubdarur. Sirya kunubmunyi uca, Er Imtamnyi biryi sunsi kisal dakwansir,” ebmou.

¹⁸Ato ebmou bok, Er Yesus biryi Er miliramnyi nang asi ato ebmou. “Sun kankan ara me keksekdobman kumnyi ton kurur ati ebmasin. Ara, sun nirya ara keksekdobman kum nang kurandum ati kum ebmasin. Niryi sun kankan aryi wibdeibmasin nang asi diboka bingsunun ati ebman. Erda, sun kankan ara tonyi biryi keksekdobman kumnyi bitonyi kurur. Er Imtamnyi Uram ara minob kerek sekeibmou uram umbura aryi anyi biti ato ebmou. ‘Ni ab tonkwa roti yibmanimnyi bira Niti, “Obkwan,” teneninanyi kibmar.’ (Mazmur 41:8) Ati, anyi biryi Nisi kikibkwanir ara Er Imtamnyi Uram kunubkwande ati Nisi kikibkwanir.

¹⁹Kikibkwanir tum kum berekmar bok, Niryi sunsi a dinyi minob lak ebman. Ara, sirya kunubci ura, sunci Niti, ‘Iya kam kurutnyi,’ tenen bikwanirim ati Niryi a dinyi minob lak ebmasin.

²⁰Niryi sunsi dib en uram ton lak eterebkwinsin ati diboka kekebdarur. Unanyi-unaner ara Niryi bokdonoknisingnyi nang ati, ‘Ni kwityabwe,’ tenen dobdobsingnyi ura, a nang ara Nibabyi sintum dobdobkwaning. Tonda, unanyi-unaner ara Niti, ‘Nun Du,’ tenen dobdobningnyi ura, a nang ara Ni Nai Imtamnyi bibabyi sintum dobdobkwaming,” ebmou.

²¹Er Yesus biryi ato ebmou ura, Er kanya mambul weik kibmou ba, Erci ato eboka lak ebmou. “Niryi sunsi dib en uram ebkwinsin ati diboka kekebdarur. Sunda Ni milinin nang kankan ara tonyi biryi Nisi kikibkwanir.”

²²Ato ebmou ura, Er miliramnyi nang aryi, “Unanyi biti ato ebmasir do?” tenen kum bikmai cok, sun mamum asing dibdanmai.

²³Ura, Er miliramnyi nang kankan ara Yesus biryi iya boukwe weik kuramunyi ton kuramwe. Anyi bira Er Yesus sokon bukmou dam bukmou.

²⁴Bukmou asi er kwit Simon Petrus biryi er ngang dukum ebmou cok, anyi bisi ato ebmou. “‘Kanci ebmasirim deyok ara nun kum bikmab ati lak ebsurum,’ eboka nun Du bisi asibderum,” ebmou.

²⁵Uca, Yohanes bira Yesus dam liknibdongoboka erci Yesus bisi ato eboka asibdenmou. “Nai du. Kanci, ‘Ni kikibkwaniranyi bira anyi,’ eboka lak ebsurum,” ebmou.

²⁶Ura, Er Yesus biryi ersi ato ebmou. “Niryi a roti tobdoba talebman asi co du yung asi dongobkun ura, tonyi bisi karebkun. Roti tobdoba karebkunyi bira Ni kikibkwaniranyi kubmar.” Ebmou uca, Erci roti tobdoba talebmou asi co du yung asi dongobmou ura, Yudas Iskariot bisi karebmou. Ara, ninyi si Simon Iskariot er mi asi karebmou.

²⁷Roti tobdoba asi sirya karebmou ura, isa sienyi Iblis bira Yudas er kanya wekmou. Ura, Yesus biryi ersi ato ebmou. “Kanci tenebmumwe to minola kunubdum,” ebmou.

²⁸Ato ebmou bok, sun Er Yesus miliramnyi nang Er ab tonkwa yibmai nang yuk nang ara, “Kikibkwande ati tenebmou ati ato ebmou,” tenen kum bikmai.

²⁹Ton nang ara, “Weik kwalina Paskah kwalibkwayeb ati ton dinyi suklobmar ati kanci dekdum,” ebdeibmar ati tenebmai. Yudas bira co bok talenanyi kuramwe ati, ato tenebmai. Yuk nang ara, “Sun kwaning atan nang asi yina dekeiboka karebdum,” ebdeibmar ati tenebmai.

³⁰Ura, Yudas biryi roti sirya dobdobmou ura, erci anaboka bindobmou. Ara, lukunda kubmou ba, er bindobmou.

³¹Ura, Yudas sirya binmou ura, Er Yesus biryi ato ebmou. “Er Imtamnyi biryi Ni Ninyi Dasinyi biti, ‘Iya Erebdobnyi kurur,’ eboka lak kibdeibkwande ati ukuryok bikman. Tonda, Nira Ninyi Dasinyi biryi Er Imtamnyi biti, ‘Iya Erebdobnyi kurur,’ eboka lak kibdeibkwan.

³²Niryi Er Imtamnyi biti, ‘Iya Erebdobnyi kurur,’ tenen dinyi lak kibdeibnyi uca, Er Imtamnyi bibabyi neiktoto ukurlona kum uca Niti, ‘Iya Erebdobnyi kurur,’ tenen dinyi lak kibdeibkwanir.

³³Ni mabwe. Ni ab sun ab mitik talak tonkwa kubibyi ura, bokdankwayeb. Ni binmanyi ura, sunci Nisi ingkiriknumun cok, kum eibkwanurum. Niryi sun Yahudi yala nang asi eterebmase to sunbabyi eterebmasin. Ni binkwan dam ara sun binmana kum kubkwandum.

³⁴Niryi sunsi arungdeirisin uram ukuryok uram ebdeibkwinsin. Sun mamun boukwe weik kibdandarur ati ebman. Niryi sunsi boukwe kusunun to, sunbabyi neiktoto mamun boukwe weik kimdana teleb.

³⁵Sunci mamum boukwe kibdamunyi uca, ninyi nirya aryi sunti, ‘Yesus milin nang kunung,’ tenen bikwansing,” ebmou.

³⁶Ura, Simon Petrus biryi ato eboka asibdenmou. “Nai Du, Kan dantam binkwandim do?” Ura, Yesus biryi ersi ato ebmou. “Ni binkwan dam ara sun ukuryok binmana kum kubkwandum. Erda, aminda aryi kanci miliboka neik dam yankwandim,” ebmou.

³⁷Ebmou ba, Petrus biryi ato ebmou. “Nai Du, unato ati niryi Kansi ukuryok kum milibkitinyi do? Ninyi aryi nisi obningnyi ababyi, niryi Kansi miliboka libkwankin,” ebmou.

³⁸Ebmou bok, Yesus biryi ato ebmou, “Kanci Niti liboka kandamnyi karebdatum do? Ato tenen kum. Maka kirim ara ngalungna kum uca, kanci Niti, ‘Anyi biti ni walwal,’ ebkwanirim. Ara, ambutum kum berekur bok, kanci liki winiryi ebmin cok, ‘Anyi biti ni walwal,’ ebkwanirim.” Yesus biryi Petrus bisi ato ebmou.