Read Futuna-Aniwa Yohanes 14 Bible Online

Yohanes 14 - Futuna-Aniwa bible

Yohanes 14

¹Ebmou cok, Er Yesus biryi Er miliramnyi nang asi ato ebmou. “Sun kanya mambul kubsicei. Sunci sun kanya Er Imtamnyi bisi deirirandum to, Nibabyi sun kanya deibkwanindarur.

²Ni Nai kurur imtam ai umbura aryi sokon yuk-yuk ilinto kurur. Ato kum kubte ura, Niryi sunsi lak ebsitinyi. Ati, Niryi sunti, ‘Sokon kiknibminikwan,’ tenen Ni Nai Imtamnyi ai welebinkwan.

³Ura, Niryi bindoka sunti sokon sirya kiknibminiksinyi ura, Ni tamuryankwan. Sirya tamuryanyi ura, Niryi sunsi boryankwansin. Ara, Ni kubkwan ai asi sunbabyi kubkwandum ati Niryi sunsi boryankwansin.

⁴Niryi binkwan ai bisik ban tam ara sun sirya bikmarum ati ebman,” ebmou.

⁵Yesus biryi ato ebmou ba, Tomas biryi Ersi ato eboka asibdenmou. “Nai Du, Kan dantam binkwandim ati nun walwal. Ati, nunci una kuboka Kan binkwandim bisik biktibyi do?” ebmou.

⁶Ebmou ba, Er Yesus biryi ersi ato ebmou. “Nira bisik ban tam kunun. Tonda, dib en uram damnyi kunun. Tonda, kam kun dinyi deyoknyi kunun. Unanyi-unaner ara Er Imtamnyi dam baramingnyi nang ara Ni biriman aryok Er Imtamnyi dam baraming.

⁷Sunci Nisi diboka biknindate uca, sunci Ni Nai Imtamnyi bibabyi bikdate. Ura, ukuryok aryi kuboka sunci Ni Nai Imtamnyi bisi asing eiboka diboka bikwandum,” ebmou.

⁸Ato ebmou bok, Filipus biryi ato ebmou. “Nai Du, Kanci Kan Nai Imtamnyi bisi lak kibsiminyi uca, nun kanya teleb kubkwansir,” ebmou.

⁹Uca, Er Yesus biryi ersi ato ebmou. “Ni uki kuna kum uca sun ab tonkwa kuramoubwe ani, sunci Nisi diboka kum bikmanurum do? Unanyi-unaner ara Nisi asing eibningnyi ara sintum Ni Nai Imtamnyi bisi asing eibmang ati ebman. Ati, kanci unato ati, ‘Kan Nai Imtamnyi lak kibdeibsurum,’ ebmanirim do?

¹⁰Nira Ni Nai Imtamnyi dam kunanyi kunun ati kan kum bikmanirim do? Tonda, Er Imtamnyi bira Ni dam kunanyi kurur ati kum bikmarim do? Niryi sunsi etereransin uram ara ni uram kum kurur. Erda, Er Imtamnyi Uram kurur. Ni Nai Imtamnyi bira Ni dam kunanyi kurur cok, Nira Er Mi biriman aryi ilil tenen dinyi kiknibde barur.

¹¹Nira Er Imtamnyi dam kunanyi kunun ati sunci dib tenebnindarur. Tonda, Er Imtamnyi bira Ni dam kunanyi kurur ati dib tenebdarur. Ba, sunci Nisi tuba dib kum tenebnumunyi ba, sunci asing dinmun ci, Niryi kikniran ilil tenen dinyi deici aryi dib tenebnindarur.

¹²Niryi sunsi dib en uram ton ebkwinsin ati sunci diboka kekebdarur. Unanyi-unaner ara Nisi dib tenebningnyi nang ara Ni kikniranse to ilil tenen dinyi kiknibkwaming. Nira Ni Nai Imtamnyi bindoka mikib karebkwan deyok aryi, Ni milin nang ara ni minob kikniranse ilil tenen dinyi bisibkaboka iya ilil tenen dinyi kiknibkwaming.

¹³Ura, sunci Ni si deib aryi molobmanumunyi tok, Niryi kunubdeibkwansin. Ara, ‘Niryi, “Ni Nai Imtamnyi bira Iya Erebdobnyi kurur,” tenen dinyi lak kibdeibkwan,’ tenen Niryi sun molobmanumunyi tok kunubdeiboka karebkwansin.

¹⁴Ati, sunci Ni si deici aryi molobmanumunyi tok, Niryi kunubdeibkwansin,” ebmou.

¹⁵Ebmou cok, Er Yesus biryi sunsi ato ebmou. “Sunci Nisi boukwe weik kuramunyi uca, Ni arukdeibmasin uram asi kunubde binkwandum.

¹⁶Ura, Niryi Ni Nai Imtamnyi bisi molormilisinyi uca, Erci Ni sun dongtam tikoka miliransinanyi bisi unubdeibdiryok, sun dongtam tikoka milibkwansiranyi yuknyi bisi karebkwansir. Ara, Er Imtamnyi Kanya Roh Kudus ara sun dongtam tikoka milibkwansiranyi kuransiryi, sun ab tonkwa iya kubkwandum.

¹⁷Roh Kudus ara dib en uram bikoka eterebde basurutnyi kurur asi Er Imtamnyi biryi bokwetebkwansir. Sun malyi kurmurun nang ara Roh Kudus asi asing kum eibingiryok, kum bingnung ati sunci Ersi dobdobman kum kunung. Ba, sunda Roh Kudus asi bikmarum. Roh Kudus ara sun kanya dam kurur ati sunci Ersi bikmarum ati ebman. Ani, aminda ababyi Er sun kanya iya kubkwansir.

¹⁸Ni anaboka binkwan cok, Ni sunsi kum taklobkwansin. Ati, Niryi sunti, ‘Kwaknamwe mabwe ato kibdeibkwan,’ tenen kum kunun. Erda, niryi sun dam tubto yankwan.

¹⁹Uki mitikanun kubibyi ura, Ni binkwan ati, sun tukwetam nang ara Nisi asing tuba kum eibkwaning. Kum eibkwaning bok, sunda nisi milinin nang aryi Nisi asing eibkwanurum. Nira iya kam kununyi kunun deyok aryi, sunbabyi iya kam kun dinyi dobdobkwandum.

²⁰A uki tum berekci ura, sunci ato tenen bikwanurum. ‘Nun Du bira Er Imtamnyi dam kurutnyi kurur. Tonda, nunda nun Du dam kun nang kunub. Tonda, nun Du bira nun dam kusurutnyi kurur.’

²¹Unanyi-unaner ara Ni uram taleboka kunubde baramingnyi nang ara Nisi boukwe weik kun nang kuraming. Unanyi-unaner ara Nira sun Du si boukwe weik kuraningnyi nang asi Ni Nai Imtamnyi biryi boukwe weik kubkwande. Tonda, Nibabyi a nang asi boukwe weik kimnun cok, Nidamnyi sunsi lak kibdankwan,” ebmou.

²²Ebmou ba, Yudas bira Iskariotnyi kuma erda yuknyi biryi ato ebmou. “Nai Du, unato ati Kanci Kandamnyi nunsi lak kibdankwandim cok, malyi kun nang asi lak kum kibdankwandim do?” ebmou.

²³Ebmou ba, Yesus biryi ersi ato ebmou. “Unanyi-unaner ara Nisi boukwe weik kibningnyi nang ara Ni uram kunubde binkwaming. Ura, Ni Nai Imtamnyi biryi sun ato kun nang asi boukwe weik kibdiryok, Er ab Ni ab a nang dam yandoka sun kanya dam iya kubkwanim.

²⁴Ba, unanyi-unaner ara Nisi boukwe kum kubingnyi nang ara Ni uram kunubde kum kubkwaming. Niryi sunsi eterebmasin uram sunci kekerandum ara Ni uram kuma. Erda, Ni Nai Imtamnyi Nisi bokwetebnounyi uram akwe kurur.

²⁵Ni sun ab tonkwa tuba kunmabiryok, Niryi a uram nirya asi sunsi lak ebde baransise ani, ukuryok tuba lak ebde basunun.

²⁶Ura, Er Imtamnyi biryi Ni si deici aryi bokwetebci uca, Er Imtamnyi Kanya Roh Kudus ara sun dam yuryankwansir. Ara, Roh Kudus sun dongtam tikoka milibkwansiranyi kubdiryok, Erci sunsi utotoa nirya eterebkwansir. Tonda, Niryi sunsi minob etereranse tok, Roh Kudus aryi karebmaci uca, sunci tuba teneibkwandum.

²⁷Ni binkun cok, nun bokdankwayeb ati, Niryi sunsi antanirdeirin dinyi karebsin. Sun malyi dinyi kurmurun nang ara antanirdeirin dinyi diboka kum karebsiting. Erda, niryi sunsi antanirdeirisin dinyi diboka karebkwansin. Ati, sunci sun kanya dam mambul kubsicei. Tonda, ilil kanya bobmunyei.

²⁸Niryi sunsi ato ebmasin ati kekebmarum. Niryi anaboka bindobnyi ani, aminda aryi sun dam tubto tamuryankwansin. Sunci Nisi boukwe weik kuranurum ati, sunci Niti, ‘Nun Du bira Er Nai Imtamnyi dam binkwande,’ tenen kilkil kanya bobdarur. Nira Erebdobnyi kunun bok, Ni Nai bira Nisi bisibkaboka Iya Erebdobnyi kurur. A deyok aryi, sunci Niti, ‘Er Nai Imtamnyi dam binkwande,’ tenen kilkil kanya bobdarur.

²⁹A eterebmasin dinyi yuk-yuk ara aminda kunubkwande ba, Niryi sunsi ukuryok lak eterebmasin. Ara, niryi, ‘Sirya kunubci uca, Nisi dib tenebkwaning,’ tenen a dinyi minob lak eterebmasin.

³⁰Ni sun ab tonkwa uram tuba sisikwamib talak ara mitikanun akwe sisikwamib. Im dangna tukwe dangna malyi kun nang deyoknyi minola yankwamar. Anyi bira mikibnyi kurande bok, Niti kum taleranir.

³¹Bok, sun im dangna tukwe dangna nang ara ato dinyi tenen bikting. Nira Ni Nai Imtamnyi bisi boukwe weik kunun cok, Ni Nai biryi takubdeibnou tok diboka kunubde banun.” Ato ebmou ura, Er Yesus biryi, “A kunum sirya ebmasin ati, akai aryi kuboka anabdobkwayeb,” ebmou.