Read Futuna-Aniwa Yohanes 15 Bible Online

Yohanes 15 - Futuna-Aniwa bible

Yohanes 15

¹“Nira co anggur deyok atonyi diboka kunun. Ba, Ni Nai Imtamnyi bira anggur du co talenanyi kurur.

²Ura, du kum moubci co te nirya ara Ni Nai biryi sengkweterande. Ba, du moubci co te asi Erci kiribkabokwande. Ara, ‘Du moubtabakdur,’ tenen Erci a co te asi kiribkabokwande.

³Niryi sunsi dib en uram eterebmasise ati sun kanya ara kilibdob kanya borandum.

⁴Sunda Ni dam kun nang tuba kubmurubdarur. Kubmurubmamunyi uca, Niryi sun dam kubkwan. Anggur co du ara yuk kubte uca, du kum moubte. Ba, anggur du co deyok tam kubdiryok, du moubkwande. Ati, sunda Ni dam kum kubmunyi uca, du moubmasin kum kurandum.

⁵Nira anggur du co deyoknyi kunun. Ba, sun yuk-yuk ara anggur co te ato kurandum. Unanyi-unaner ara Ni dam kuramingnyi uca, anyi a ner ara du ilinto moubkwande. Ni ab tonkwa kum kurandum cok, utotoa kum kubmatum.

⁶Unanyi-unaner ara Ni dam kum kubmurubtingnyi uca, anyi-aner ara du moun kum co te ato kuraming. A co ara bai donokmangnyi ura, koula dandobkwande. A co te ara doboka uk dongoraming.

⁷Sunci Ni dam kuramun cok, Ni uram asi sun kanya dam borandum cok, sunci sun tenebmamunyi tok molobmunyi uca, dobdobkwandum.

⁸Sunda du moubsir ba, sunci Ni milin nang kuramingnyi tok kunuramunyi uca, ninyi aryi Ni Nai si weik ebkwaming,” ebmou.

⁹“Ni Nai biryi Nisi boukwe weik kunurur to, Niryi sunti boukwe weik kunun. Boukwe weik kusunun ati sunci Ni dam kubmurubdarur.

¹⁰Sunci Ni uram asi kunubmunyi uca, sun Ni boukwe weik dam kurandum. Ara, Niryi Ni Nai uram kununun uca, Ni Nai boukwe weik dam kunun ato, sunbabyi neiktoto Ni boukwe weik dam kurandum.

¹¹Ati, Niryi, ‘Ni kanya kilkil weik kunurur to, sun kanya ababyi kilkil weik kubdur,’ tenen a dinyi sunsi eterebmasin. Tonda, ‘Mambul dinyi mitik ababyi tenen kanya kum bobkwaming,’ tenen ato eboka eterebmasin.

¹²Ati, Niryi sunsi ato eboka arukdeibkwinsin. Sunci mamun boukwe kibdandarur. Ati, Niryi sunsi boukwe weik kunun ato, sunbabyi neiktoto boukwe weik kibdandarur.

¹³Iya boukwe weik kimna ara ato, ‘Ninyi aryi obnitingnyi ababyi Niryi Ni kwityabwe lebdobkwan,’ tenen dinyi ara iya boukwe weik kimna dinyi kurur.

¹⁴Sunda Ni kwityabwe kurandum. Ara, Ni uram kunubmunyi uca, sunda Ni kwityabwe kurandum.

¹⁵Niryi sunti, ‘Ni wa arungna nang,’ tenen tuba kum namsunun. Erda, ‘Ni kwityabwe,’ tenen namsunun. Wa arungna nang ara sun wa arungdeirinanyi tenebmaci tok kum bingnung bok, sun kwityabwe ara sun kwit tenebmaci tok bingnung. Ni Nai Imtamnyi biryi Nisi eterebnici tok nirya asi Niryi sunbabyi eterebmasin ati ato ebman. A deyok aryi Niryi sunsi, ‘Ni kwityabwe,’ esunun.

¹⁶Sunci Nisi kum wibdeibmanurum. Erda, Niryi sunsi wibdeibmasise. Wibdeibmasisiryok, Niryi sunti, ‘Du moubkwansir,’ tenen tikeibmasise. Ara, ‘Du moun dinyi iya kubmurubkwande dinyi moubkwansir,’ tenen tikeibmasise. Ato kuboka du moubsiri ba, Er Imtamnyi biryi sun Nisi deici aryi molobmamunyi tok kunubkwansir.

¹⁷Ati, Niryi sunsi arukdeibmasin uram ara ato eboka arukdeibmasin. Sun mamun boukwe weik kibdandarur,” ebmou.

¹⁸“Ura, sun malyi kun nang ara sunti, ‘Nun li,’ tenen dokdonoksingnyi ba, sunci ato tenen dinyi sun kanya dam bobdarur. ‘Sun malyi kun nang ara nun Du biti, “Nun li,” tenen yuma dokdonokmai.

¹⁹Sunda malyi kun nang kubtumunyi uca, sun malyi kun nang aryi sunti, ‘Nun kwityabwe,’ tenebmasiting. Bok, sunda malyi kun nang kum kurandum. Niryi sunsi wibdeibmasise ara, ‘Malyi nang kun dinyi asi takloboka Ni dam kun nang kubting,’ tenen wibdeibmasise. A deyok aryi, sun malyi kun nang aryi sunti, ‘Nun li,’ tenen dokdonokwansing.

²⁰Niryi sunsi eterebmasise uram asi kisok bobdarur. Er wa arungnanyi ara er wa arungdeirinanyi biti Erebdobnyi kum kurur. Ninyi aryi Nira sun arungdeirisinanyi biti, ‘Obtibyi,’ tenen ingkiringnunung to, sunda Ni wa arungna nang ababyi, ‘Obtibyi,’ tenen domkiringsunung. Ba, ninyi aryi Ni uram asi kekebingnyi to, sun uram ababyi kekebkwaming.

²¹Ninyi aryi sunsi malyi kibkwansing ara Ni si deyok aryi, malyi kibkwansing. Ara, Ni Nai bokwetebnounyi bisi kum bingnung ati, ninyi aryi sunsi malyi kibkwansing.

²²Niryi yuryandoka dib en uram lak ebman bok, dib kum tenebmang ati, sunci, ‘Bita kum bikamoubwe ati manmalibmoubwe,’ ebmana kum kuraming. Ba, Niryi yuryangana kum kubmatinyi uca, dib en uram lak kum ebmatinyi uca, a nang ara tatab-tatab ebmanto kum kubmating.

²³Unanyi-unaner ara Niti, ‘Ni li,’ tenebmangnyi uca, a nang ara Ni Nai Imtamnyi bibabyi, ‘Ni li,’ teneraming.

²⁴Niryi a nang kankan asi ilil tenen dinyi kum kiknibmatinyi uca, a nang ara, ‘Bita kum bikamoubwe ati manmalibmoubwe,’ ebmating. Ba, Niryi ilil tenen dinyi kikniranse asi asing eiriramiryok, Ni ab Ni Nai ab ati, ‘Nun li,’ tenen dokdonokmasing ati ebman.

²⁵Er Imtamnyi Uram umbura aryi ato erur, ‘Deyok kum kubmou asi a nang aryi Niti, “Nun li,” teneraning,’ ebmou. (Mazmur 35:19) Ara, Er Imtamnyi Uram umbura aryi minob kerek sekeiamwe to kunubkwande ati a nang aryi nunti, ‘Nun li,’ tenen Ni ab Ni Nai Imtamnyi ab dokdonokmasing.

²⁶Ura, Niryi Ni Nai tam welebindoka Er Imtamnyi Kanya Roh Kudus asi bokwetebkwansin. Roh Kudus ara sun dam tingdurnyi kurur cok, dib en uram eteresurur. Anyi biryi Niti dib en uram lak eboka sunsi eterebkwansir.

²⁷Tonda, sunbabyi Ni deyok ati dib en uram lak ebdarur. Sunda yuma talak aryi kuboka Ni ab tonkwa kurandau deyok aryi, sunci Ni deyok ati dib en uram lak ebdarur ati ebman,” Er Yesus biryi ebmou.