Read Futuna-Aniwa Yohanes 16 Bible Online

Yohanes 16 - Futuna-Aniwa bible

Yohanes 16

¹Ebmou cok, Er Yesus biryi Er miliramnyi nang asi ato ebmou. “Niryi sunti, ‘Dib en uram takloboka wanikminikingnyei,’ tenen a dib en uram nirya asi lak ebmasin.

²Ninyi ara sunda Ni milinin nang ati, ‘Nun li,’ tenen, ‘Musa Uram etererdan ai tubto wekmunyei,’ eboka yakdonokwansing. Ura, ton nang ara sunti, ‘Obkwayeb,’ tenebsingiryok, ‘Obibyi uca, Er Imtamnyi kanya teleb kubkwande,’ tenebkwaming. Ato tenen kunubkwaming talak ara dam kubmar ati ebmasin.

³A nang ara Ni Nai ab Ni ab kum bingsunung deyok aryi, sunda Ni milinin nang ati, ‘Obtibyi,’ tenen domkirikwansing.

⁴A dinyi kunubkwansir talak kum yanmar ba, Niryi sunsi minob ebmasin. Ara, sunci, ‘Ato-ato kuboka malyi kibdeibkwansing,’ tenen minob bikwandum ati lak ebmasin. Uca, ninyi aryi sunsi domkirikwansing talak sirya yaci ura, sunci, ‘Nun Du biryi minob sirya lak ebmasou,’ teneibkwandum. Yuma kobdob sun ab tonkwa kuramoubwe talak ara ato dinyi lak kum ebmasise ani, ukuryok lak ebmasin,” ebmou.

⁵Ebmou cok, Yesus biryi Er miliramnyi nang asi ato ebmou. “Ura, ukuryok ara Ni tamurbinkwan ara Ni Nai bokwetebnounyi dam tamuboka welebinkwan. Ato ebmasin bok, sun kankan aryi tentoknyi bibabyi, ‘Nai Du, dantam binkwandim do?’ eboka kum asibdenmanurum.

⁶Niryi, ‘Bokdankwayeb,’ ebmasin ati, sun kanya ara mambul weik kubmasir.

⁷Ba, Niryi sunsi dib en uram ton ebkwinsin ati diboka kekebdarur. Sun kanya mambul weik kubmasir bok, Ni ab sun ab bongdana ara teleb akwe kubkwande ati ebman. Ni binyi ura, Er Imtamnyi Kanya Roh Kudus asi bokwetebkwansin. Kum bitinyi uca, Roh Kudus ara sun dongtam tikoka milisurutnyi sun dam kum yasute.

⁸Ura, Roh Kudus yuryangaci ura, Erci sun tukwetam malyi kun nang asi tatab-tatab ebci uca, ‘Malyi dinyi kuramoubwe se,’ tenebkwaming. Tonda, Erci Niti, ‘Er Imtamnyi biryi teleb tenerur dinyi kunubde kunurutnyi,’ eboka lak eterebkwande. Tonda, Roh Kudus aryi, ‘Er Imtamnyi biryi malyi deyok liliboka wenebkwande,’ eboka lak eterebkwande.

⁹Sun tukwetam nang ara Nisi dib kum teneraning ati Roh Kudus aryi tatab-tatab eboka, ‘Malyi dinyi tenen kurandum se,’ ebkwande.

¹⁰Tonda, Nira Ni Nai Imtamnyi tamurbinkwan ati, sunci Nisi asing kum eibkwanurum. A deyok aryi Roh Kudus aryi sun tukwetam nang asi lak eterebci uca, a nang aryi, ‘Nunda Er Imtamnyi urasintam aryi teleb dinyi kunubde kum kunub se,’ tenen bikdankwaming.

¹¹Tonda, Roh Kudus ara, ‘Er Imtamnyi biryi malyi deyok liliboka wenebkwande,’ eboka eterebkwansir. Ara, Er Imtamnyi biryi isa sienyi Iblis bira malyi kurmurun nang deyoknyi biti, ‘Wenebkwan,’ tenebmou ati ato ebmasin.

¹²Niryi sunti, ‘Dib en uram yuk-yuk ilinto eterebtabaktinyi,’ tenebman bok, sunci a uram yuk-yuk bita kum bikdobkwandum ati, ukuryok kum eterebkwinsin.

¹³Ura, Er Imtamnyi Kanya Roh Kudus yuryangaci ura, Erda dib en uram eteresurutnyi biryi sunsi dib en uram nirya lak eterebkwansir. Erci Er kanya yuk aryi tenebmaci tok kum eterebkwansir. Erda, Er Imtamnyi biryi ebmaci uram kekebmaci ura, eterebmurubkwansir. Tonda, Roh Kudus aryi aminda kunubkwande dinyi nirya sunsi lak ebde binkwansir.

¹⁴Roh Kudus ara Nisi erebdeibkwanir ati ebman. Ara, Niryi ebnyi tok, Erci Ni uram ebmuruboka sun nirya asi eterebkwansir biriman aryi Nisi erebdeibkwanir.

¹⁵Er Imtamnyi taruk kubmaci dinyi nirya ara Erci Ni taruk dam karebmanou. Ara, Niryi Roh Kudus asi, ‘Ato-ato eboka eterebdum,’ ena mikib ababyi Nisi karebmanou. A deyok aryi, Niryi ato ebmasin. Niryi ebnyi tok, Roh Kudus aryi ebmuruboka sun nirya asi eterebkwansir.

¹⁶Uki mitikanun mabmabyi ani, sunci Nisi asing tuba kum eibkwanurum. Ura, uki mitik nun tubto mabmamunyi ani, sunci Nisi asing tubto eibkwanurum.” Yesus biryi ato ebmou.

¹⁷Ura, Yesus miliramnyi nang sun kanya ara kankana kubmou ati, sun kankan aryi ton nang ara ato eboka asibdanmai. “Unato ati Erci ato ebmasir, ‘Uki mitikanun mabmabyi ani, sunci Nisi asing tuba kum eibkwanurum. Ura, uki mitikanun tubto mabmamunyi ani, sunci Nisi asing tubto eibkwanurum.’ Tonda, unato ati Erci, ‘Ni Nai dam tamurbinkwan ati ato ebmasin,’ ebmasir do?”

¹⁸Asibmurubdanmai cok, sunci ato eboka asibdanmai. Erci, “‘Uki mitikanun mabmabyi ani,’ ebmasir ara unato ati ato ebmasir do? Nun Du biryi ebmasir uram deyok ati nun kum bikmab,” ebdanmai.

¹⁹Ura, Yesus biryi, “Asirdena asibdeniting,” tenen bikmou ati, Erci sunsi ato eboka asibdenmou. “Niryi sunsi ebmasin uram deyok ati sun kanya kankana kubmasir do? Ati, Niryi, ‘Uki mitikanun mabmabyi ani, sunci Nisi asing tuba kum eibkwanurum,’ ebmasin ati kankana kubmasir do? Tonda, ‘Ura, uki mitikanun tubto mabmamunyi ani, sunci Nisi asing tubto eibkwanurum,’ ebmasin ati kankana kubmasir do?

²⁰Niryi sunsi dib en uram ebkwinsin ati diboka kekebdarur. Ni binmanyi ura, sunci engena weik engebkwandum. Ba, sun malyi kurmurun nang kanya ara kilkil weik kubkwande. Ura, sunda Ni milinin nang kanya mambul weik kubsici ani, kilkil weik tubto kubkwansir.

²¹Mundu bon ner ara mi deibkwamaci uki tum berekde ba, mi deyok aryi, u weik yirande. Ura, mi sirya deibmaci ura, mi deyok aryi, u yin dinyi ton mambul dinyi ton erci tuba kum teneibkwande. Erda, erci, ‘Ni mi deibman,’ tenebmaci ba, er kanya kilkil weik kubkwande.

²²Ura, mi deirin ner kurande to sunda Ni milinin nang ababyi neiktoto kubkwandum. Ara, ukuryok aryi kubde baramun cok, mambul kanya borandum. Ani, aminda aryi Ni sun ab tubto ebdankwamib talak ara sun kanya kilkil weik kubkwansir. Kilkil weik kubkwansir ati, ninyi tentok ababyi sunsi mambul tubto kum kubdeibkwansir.

²³Ni ab sun ab tubto ebdankwayeb uki tum berekmaci ura, sunci Niti asirdena ton kum asibdenkwanurum. Niryi sunsi dib en uram ebkwinsin ati diboka kekebdarur. Sunci Ni si deici aryi molobmamunyi tok Ni Nai Imtamnyi biryi kunubkwansir.

²⁴Minob aryi kuboka ukuryok ababyi sunci Er Imtamnyi bisi molorandau cok, sunci Ni si deici aryi kum molorandau. Ani, ukuryok aryi kuboka Ni si deici aryi molobkwandarur. Ati, sunci Er Imtamnyi bisi molobmunyi uca, Erci sunsi karebkwansir. Sun molobmamunyi tok dobdobkwandum cok, sun kanya ara sunglona kum uca kilkil weik kubkwansir.

²⁵Niryi sunsi kiklina uram deici aryi eteransise ani, aminda aryi kiklina uram deici aryi tuba kum eterebkwansin. Ara, dib en uram anmalakoka lak eterebkwan talak sirya berekmar ati, Niryi Ni Nai deyok ati dib en uram anmalakoka lak eterebkwansin.

²⁶A kubkwayeb uki tum berekci ura, Niryi sunti molormilibkwansin ati kum ebman. Erda, sunci Ni si deici aryi Er Imtamnyi bisi anmalakoka molobkwandum.

²⁷Ni Nai Imtamnyi bira sunti boukwe weik kusurur ati, Erci sun molobmamunyi tok karebkwansir. Ara, sunci Nira sun Du biti boukwe weik kuranurum ati, Ni Nai biryi sunti boukwe weik kusurur. Tonda, sunci Niti, ‘Er Imtamnyi bokwetebnounyi,’ dib teneranurum ati Ni Nai biryi sunti boukwe weik kusurur.

²⁸Nira Er Imtamnyi dam kuranse ani, tukwetam yuryase. Ani, ukuryok ara tukwetam aryi anaboka Ni Nai Imtamnyi dam tubto tamurbinkwan,” ebmou.

²⁹Er Yesus biryi ato ebmou ba, Er miliramnyi nang aryi Ersi ato ebmai. “Ukuryok ara kiklina uram kum ebmarim cok, lak botoboka ena uram akwe eterebmasin.

³⁰Kanda nun Du biryi utotoa nirya bingdumnyi kurum ati nun ukuryok sirya bikdobmab. Ninyi aryi asirdena kum asibdingnyi ababyi, Kanci sun kanya aryi tenen dinyi sirya bikmarim. A deyok aryi, nunci Kanti, ‘Er Imtamnyi biryi bokdonokmounyi,’ tenen dib tenebmakib,” ebmai.

³¹Ato ebmai bok, Er Yesus biryi sunsi ato ebmou. “Uki ilinto ara katabum ena kum uca Nisi dib teneranindau ani, ukuryok ara katabum eboka dib tenebmasurum do?

³²Ba, sunda Nisi milinin nang nirya ara dantam-dantam binsekwandum talak berekwamar ati ebman. Ara, sun nirya aryi, ‘Nundamnyi lebdandobtibyi,’ tenen sun ai yuk-yuk binsekwandum bok, Ni yuk kubkwan. Ni yuk kubkwan asi ninyi aryi Nisi taleboka tabwe debkwaning. Ato ebman cok, Ni yuk kum kubkwan ati ebman. Ni Nai Imtamnyi bira Ni ab tonkwa kununumnyi bira a talak ababyi Ni ab tonkwa kubkwanim.

³³Niryi sunsi a dinyi nirya lak eterebmasin ara sunti, ‘Ni biriman aryi neik kanya boboka antaniboka kubkwanung,’ tenen eterebmasin. Sunda Ni miliranurum nang ara tukwetam tuba kurandum asi ninyi aryi mambul dinyi kibdeibkwansing. Mambul dinyi kibdeibsingnyi ababyi, sun kanya katabum ebdeibdandarur. Nira sun Du biryi sun malyi kurmurun nang dinyi nirya asi muna kibdongobman ati sun kanya katabum ebdeibdandarur.” Ato eboka Yesus biryi Er miliramnyi nang kanya asi katabum ebdeibmou.