Read Futuna-Aniwa Yohanes 17 Bible Online

Yohanes 17 - Futuna-Aniwa bible

Yohanes 17

¹Yesus biryi ato ebmou ura, Erci imtam dibweleboka ato eboka molobmou. “Nai Imtamnyi o, Kanci Nira Kan Mi bisi erebdeibkwanirim uki tum sirya yanmar ati, Kanci Nisi erebdeibnurum. Kanci Nira Kan Mi bisi erebdeibniminyi uca, Niryi Kanda Ni Nai si weik erebdeibkwankin ati ato eboka molobkin.

²Kanci Nisi mikib karebmanunumwe uca, Niryi weik sienyi kuboka sun im dangna tukwe dangna nang nirya asi arungdeirinun. Tonda, Kanci Ni taruk dam karebmanunumwe nang asi iya kam kun dinyi karebkwan ati tikeibmanunumwe. Ato deyok aryi, Niryi Kansi, ‘Nai, erebdeibnurum,’ eboka ati molobkin.

³Iya kam kun dinyi karebkwan ara ato kurur. Kanda Imtamnyi Iya Mikibnyi tentoknyi bisi diboka bikwanking ara iya kam kun dinyi deyok kurur. Tonda, Nira Yesus Kristus Kanci bokwetebnumunyi bisi diboka bikwaning ara iya kam kun dinyi deyok kurur.

⁴Kanci Nisi takubdeibnunumwe wa ara tukwetam kuboka iranse ani, sirya kunubman. A wa ibde kunuranse biriman aryi Niryi Kanti, ‘Iya Erebdobnyi kurur,’ tenen dinyi tukwetam nang urasintam aryi lak kimdeiriranse.

⁵Ura, ukuryok Kanci Nisi weik erebdeibnurum ati molobkin. Imtam tukwetam kum kikniamumwe talak ara Ni ab Kan ab tonkwa kuranumwe ba, iya erebdob si tonkwa boranumwe. Ati, Kanci Nisi ato kuboka Kan urasintam aryi iya erebdob si tamuboka karebnurum.

⁶Niryi Kan si ninyi urasintam aryi lak kimnanse. Ara, tukwetam nang kankan aryi Kanci Nisi karebmanumwe nang asi etereransiryok, Kan si lak kimnanse. A nang ara Kanci taleramumwe nang kuramnyi ani, Ni taruk dam karebmanumwe. Uca, a nang ara Kan Uram kunubde baramnyi ani, ukuryok ababyi kunubde baraming.

⁷A nang ara ukuryok aryi ato tenen bingnunung. Kanda Imtamnyi biryi Nisi mikib nirya karebmanumwe uca, Nira iya mikibnyi kunun. Ato tenen bingnunung.

⁸Kanda Imtamnyi biryi Nisi eterebmanumwe to, Niryi Kan Uram ebmuruboka a nang asi etereranse. A deyok aryi a nang aryi Niti, ‘Er Imtamnyi mikib dobdobmounyi kurur,’ tenen bingnunung. Niryi Kan Uram ebmuruboka etereranse uca, a nang aryi Kan Uram ati, ‘Dib en uram,’ tenen dororamnyi. Tonda, sunci Niti, ‘Er Imtamnyi biryi Bokwetebmounyi,’ teneraning.

⁹Kanci Nisi karebmanumwe nang ati Niryi molormilibman. Sun malyi kun dinyi kunurmurun nang ati Niryi kum molormilibman. Erda, Kanci Nisi karebmanumwe nang ati molormilibman. A nang ara Kanci talerandim nang kunung deyok aryi, Niryi sunsi molormilibman.

¹⁰Ni taruk dam kunurur dinyi nirya ara Kan dinyi kurur. Tonda, Kan taruk dam kukurur dinyi ara Ni dinyi kurur ati ebman. Nira Iya Erebdobnyi kunun lak kimdur ara a nang aryi Nisi dib teneraning biriman aryi lak kimdur ati ebman.

¹¹Nira anaboka tukwetam tuba kum kubmurubkwan bok, a nang ara tukwetam tuba kubkwaming. Nira Kanda Imtamnyi dam weleyankwan ati ato ebman. Ati, Nai Imtamnyi. Kanci a nang ati, ‘Ni mabwe,’ tenen miliboka kalikdum. Kan si mikib deici aryi Kanci sunsi miliboka kalikdum. Kanci Nisi mikib si karebmanumwe deici aryi Kanci sunsi kalikdum. Kanci kalikminyi uca, a nang ara neik kanya boboka antaniboka kubkwaming ati molobmilibmakin. Ara, Kan ab Ni ab neik kanya boboka antaniboka kununum to, a nang ababyi antaniboka kubting.

¹²Nira a nang ab tonkwa kuramoubwe ba, Niryi miliboka sunsi kalingnanse ani, ukuryok ababyi kalingnun. Ara, Kanci Nisi karebmanumwe si mikib deici aryi Niryi sunsi kalingnanse. Kalingnanse uca, Kanci Nisi karebmanumwe nang tentok ababyi kum wanikminiknou. Ba, Ni milin nang kankan aryi wanikminikwamunyi bitikwa wanikminikdau. Ara, Er Imtamnyi Uram minob ebmou to kunubkwamwe ati anyi wanikminikdau.

¹³Nai. Ni Kan dam weleyankwan. Ba, tukwetam tuba kuran cok, a uram nirya ebmakin. Ara, ‘Ni kanya kilkil weik kurande to, Ni milin nang kanya ababyi langdeiboka kilkil kubkwande,’ tenen Niryi Ni milin nang urasintam aryi ato ebmakin.

¹⁴Niryi Ni milinin nang asi Kan uram etereranse ba, sun malyi kunurmurun nang aryi sunti, ‘Nun li,’ tenen bimsa yaraming. A nang ara malyi kun nang ati milin nang kum kunung ati, sun malyi dinyi kunurmurun nang ara sunti, ‘Nun li,’ teneraming. Nira malyi kun nang milinanyi kum kunun to, Ni milin nang ababyi malyi kun nang milin nang kum kuraming ati ato ebman.

¹⁵Ati, Niryi Ni milin nang ati molormilibman cok, ‘Miliboka kalikdum,’ eboka molormilibman. Ara, ‘Ni milin nang ara tukwetam aryi kuboka imtam ai anmalakoka boyarum,’ eboka kum molobmakin. Erda, ‘Tukwetam tuba kubkwaming ba, isa sienyi Iblis biryi malyi kibcei,’ tenen Kanci kalikdum ati molobmakin.

¹⁶Ni milinin nang ara malyi kurmurun nang milin nang kum kuraming. Nira malyi kurmurun nang milinanyi kum kunun to, sunbabyi neiktoto malyi kurmurun nang milin nang kum kunung.

¹⁷Ati, Kanci dib en uram karebmumwe biriman aryi a nang asi Kan uram kunubde baraming nang asi kibdeibdum. Kan uram ara dib en uram kurur ati ebman.

¹⁸Kanci Nisi tukwetam bokwetebnumwe ara malyi kurmurun nang kankan asi bokwetebnumwe to, Niryi neiktoto Ni milin nang asi bokdonokman uca, malyi kurmurun nang kankan asi tuba kubkwaming.

¹⁹Niryi Nidamnyi Kanti karebdanmakin ara, ‘Ni milin nang ababyi Er Imtamnyi biti sundamnyi diboka karebdandoka Er Uram kunubkwanting,’ tenen karebdanmakin.

²⁰Nai, Niryi Kansi molormilibmakin ara Ni miliranei nang atikwe kum molormilibmakin. Erda, Ni miliraning nang aryi lak ebkwaming uram deici aryi Nisi dib tenebkwaningnyi nang nirya ababyi Ni molormilibman.

²¹‘A nang nirya neik kanya boboka antaniboka kubting,’ tenen Ni molobmilibman. Nai, Kan ab Ni ab ara tanglona kum uca antaniboka kununum to, sunbabyi neiktoto antaniboka kuna teleb. A nang ara Nun dam kun nang kubingnyi uca, sun tukwetam aryi kuboka malyi kun nang aryi Niti, ‘Er Imtamnyi bokwetebmunyi,’ tenen dib tenebniting.

²²Kanci karebnunumwe uca, Niryi Kan kiknirandim ilil tenen dinyi lak kimdeirinun to, Nibabyi neiktoto sunsi karebman uca, nun kikniranim ilil tenen dinyi lak kimdeirinung. Ara, ‘Antaniboka kubting,’ tenen Niryi a dinyi karebman.

²³Nira a nang dam kunanyi kunun ba, Kanda Imtamnyi bira Ni dam kunanyi kurum ati ebman. A nang ara diboka antaniboka kubting uca, sun tukwetam aryi kuboka malyi kun nang ara Niti, ‘Er Imtamnyi Bokwetebmounyi,’ tenen bikdobkwaning. Tonda, Kanda Imtamnyi biryi Nisi iya boukwe weik kunurum to, Nibabyi a nang asi iya boukwe weik kunun tenen bikwaning.

²⁴Nai, Kanci Nisi karebmanumwe nang ati Niryi ato eboka molobmilibkwinkin. Ni bina kubkwan dam ara a nang ababyi bina kubkwaming. Tonda, Kanci Ni si weik erebdeibkwandim asi asing eibting ati molobman. Im ton tukwe ton kum kiknibmumwe talak ara boukwe weik aryi Nisi iya erebdob si karebmanumwe. Ati, Kanci neiktoto tamuboka erebdob si karebkwanurum ati molobdobmakin.

²⁵Nai, Kanda dib dinyi deici aryok deyok lilirandimnyi bisi sun tukwetam nang kuramingnyi nang kum bingkunung bok, Niryi Kansi bingkunun. Tonda, Ni milin nang ara Niti, ‘Er Imtamnyi biryi Bokwetebmounyi,’ tenen bingnunung.

²⁶Niryi Kanda Imtamnyi biti, ‘Ato-ato kurutnyi kurur,’ eboka a nang asi lak kimdeiriranse ani, aminda ababyi lak kibdeibkwan. Ara, ‘Ni Nai Imtamnyi biryi Nisi iya boukwe kunurur to sunbabyi iya boukwe weik kubting,’ tenen Niryi Kansi lak kibdeibmurubkwan. Tonda, Niryi, ‘Sun kanya dam kubkwan,’ tenen Kanda Imtamnyi bisi a nang ara Nisi dib tenebningnyi nang asi lak kibdeibmurubde binkwan,” ebmou.