Read Futuna-Aniwa Yohanes 19 Bible Online

Yohanes 19 - Futuna-Aniwa bible

Yohanes 19

¹Sun Yahudi yala nang aryi, “Yesus bisi lobdeibsiminyei,” ebmai ura, Pilatus biryi Yesus bisi bobindoka er yin doun nang taruk dam karebmou ci, “Litukna aryi obdarur,” eboka arukdeibmou.

²Ura, sun yin doun nang aryi litukna aryi obmai cok, sunci Yesus bisi ina ngilikwamai ati tiling-tilinga doboka kisok kaluna ato dinyi kiknibmai ura, Yesus kisok kalubdeibmai. Tonda, Er Yesus bisi alib ongon aling bi dinyi asi ongobdeibmai.

³Ongobdeibmai ura, sunci ina ngilikwamai ati, Yesus dam bindoka ato ebde banmai. “Kanda Yahudi yala nang Weik Sienyi kurum asi teleb ebmakib” ebde baramnyi. Ebde baramiryok, sunci Er Yesus uw molokdongobde banmai.

⁴Obde banmai ura, Pilatus biryi baitam bindoka sun bulubmai Yahudi yala nang asi ato ebmou. “Dibdendarur. Niryi Anyi bisi sun taruk dam karebkwinsin. Ara, niryi Anyi biti, ‘Deyok kubmar,’ tenen kum eibman ati sunsi lak ebmasin,” ebmou.

⁵Ato ebmou ura, Er Yesus anaboka bobinmai. Ara, tiling-tiling kisok kaluna kalubmou cok, bi aling ongobmou cok, anabmou. Anabmou ba, Pilatus biryi ato ebmou. “Anyi bisi asing dibdendarur.”

⁶Ura, sun Er Imtamnyi kan ninyi kan noutam kuboka antanirdeirin deyok nang ab sun wa irmiliramnyi nang ab aryi Yesus bisi asing eibmai cok, sunci uram weik doboka, “Anyi bisi bing dakoka co lase deici deibmunyi ura, obdarur!” ebmai. “Co lase deici deibmunyi ura, obdarur!” tubto ebmai. Ato ebmai ura, Pilatus biryi sunsi ato ebmou. “Ato ura, sunci Anyi bisi doboka co lase deibdarur. Niryi anyi biti, ‘Deyok kubmar,’ tenen kum eibman ati ato ebmasin.”

⁷Ebmou bok, sun Yahudi yala nang aryi ato ebmai. “Musa biryi, ‘Ukubdarur-Ukuna mem,’ arukdeibmasou uram deici aryi Anyi deyok kubmar ati dibdur. Anyi biryi Erdamnyi biti, ‘Nira Er Imtamnyi Mi kunun,’ ebdanmar ati, Erci Er Imtamnyi bisi ina ngilikmar cok, Musa Uram yan yanibmar.”

⁸Ura, Pilatus biryi ato en uram kekebmou ci, erci, “Anyi bira Er Imtamnyi Mi kurur darib?” tenen er tabakoka ilil kanya bobmou.

⁹Ati, erci er ai wengbindoka Yesus bisi ato eboka asibdenmou. “Kan dantam aryi kuboka yanganmumunyi kurum do?” Asibdenmou bok, Er Yesus biryi ersi uram ton kum dekeibmou.

¹⁰Uram ton kum dekeibmou ati, Pilatus biryi Ersi ato ebmou. “Unato ati uram kum dekeibmanirim do? Nira mikibnyi kunun ati, niryi Kansi lobdeibman tonyi kunun. Tonda, niryi Kanti, ‘Co lase deiboka obdarur,’ ebman tonyi kunun. Kanci a dinyi kum bikmarim do?”

¹¹Ura, Yesus biryi ersi ato ebmou. “Er Imtamnyi biryi kansi mikib kum karebkite uca, kanci Niti ato dinyi kunubman kum kubmatum. Ura, Ni malyi deyok kum kubmanir bok, kanci Nisi wenebkwanirim. Ato kubkwanirim ara malyi dinyi kubkwandim. Ba, Nisi kikibmaniranyi bira iya malyi dinyi kunubmar. A dinyi ara kan malyi kubkwandim dinyi bisibkaboka iya malyi dinyi kubmar.”

¹²Yesus biryi ato ebmou ura, Pilatus biryi, “Deyok kum kubmar ati, niryi Anyi bisi diboka lobdeibtinyi,” tenebmou. Tenebmou bok, sun Yahudi yala nang aryi uram weik doboka ato ebmai. “Kanci Anyi bisi lobdeibminyi uca, nunci kanti, ‘Roma weik sienyi si Kaisar er kwit kuma,’ tenebkwankib. Unanyi-unaner ara erdamnyi biti, ‘Nira weik sienyi kunun,’ ebdanmangnyi nang ara sun Roma nang weik sienyi bisik sekmang ati ebmakib.”

¹³Ato ebmai ba, Pilatus biryi Er Yesus bisi baitam bobinmou. Bobinmou ura, erda ninyi deyok liliramunyi biryi, “A deyok sirya lilibman ati ni uram dodeibkwan asi lak ebkwan,” tenen Er deyok liliramunyi erebdob sokon burbinmou. A deyok liliramunyi erebdob sokon ara keta si Gabata dam kubmou. Ara, Ibrani uram aryi kuboka, “Gabata,” eramnyi ba, nun uram aryi, “Litostrotos ara keil du aryi yangabmai keta dam,” enub.

¹⁴Ura, kwalina si Paskah kunmou ba, wa in kum uki tum ati kiknirminingna uki tum kubmou ba, kiting dukduk ena aryi kubmou, Pilatus biryi er buramwe erebdob sokon deyok liliramunyi sokon burbinmou. Burbinmou ura, Pilatus biryi sun Yahudi yala nang asi ato ebmou. “Anyi bira sunda Yahudi yala nang asi weik sienyi kurur tenen dibdendarur.”

¹⁵Ebmou bok, sunci ersi ato ebmai. “Anyi bisi bobindarur. Anyi bisi bobindarur. Anyi bisi co lase deiboka obdarur.” Ato ebmai bok, Pilatus biryi sunsi ato eboka asibdenmou. “Anyi bira sun weik sienyi kubmar ati, niryi co lase deici aryi deiboka obkwan do?” Asibdenmou bok, sun Er Imtamnyi kan ninyi kan noutam kuboka antanirdeirin deyok nang aryi ato ebmai. “Nun arungdeiriransir weik sienyi bira Roma weik sienyi si Kaisar kurur. Yuknyi biryi erdamnyi weik sienyi kibdandoka nunsi arukdeibsicei,” ebmai.

¹⁶Ato ebmai ba, Pilatus biryi, “Co lase deici aryi deibdarur!” eboka arukdeibmou ci, sun Yahudi yala nang aryi teleb tenebmou to kunubmou. Pilatus biryi ato eboka arukdeibmou uca, sun yin doun nang aryi ersi bobinmai.

¹⁷Ara, Er Yesus bisi ingna co ab co lase ab takubdeibmai ura, sunci Ersi mutuk yim si Golgota bobinmai. Ara, Ibrani uram umbura aryi Golgota eramnyi ba, nun uram danguboka, “Ninyi Kisok Yangkol Yok Deirin Dam,” eramib.

¹⁸Mutuk yim si Golgota welebinmai ura, sunci Er Yesus bisi ingna co ab co lase deici aryi deiboka bing dakmai ura, ingna co ikwelebmai. Ingna co ikwelebmai ura, ninyi bitinyi yuk nang ababyi ingna co ab co lase deici aryi bing dakmai ura, ikwelebmai. Ara, Yesus bisi noutam aryi kuboka co lase deici aryi deiboka ikwelebmai ura, yuk nang bitinyi ara dina-dina deiboka ingna co ikwelebmai.

¹⁹Ura, Pilatus biryi, “Co abilinga kerek sengna dinyi doboka Anyi malyi kubmou deyok asi lak eboka kerek sekeibdarur,” eboka arukdeibmou. Arukdeibmou ba, sunci, “Yesus Nazaret ateinyi. Sun Yahudi yala nang kalingdur Weik Sienyi kurur deyok aryi, Ersi wenebmab,” eboka kerek sekmai. Kerek sekmai ura, sunci a kerek sengna asi erebdeiboka ingna co deici aryi bing dakmai.

²⁰A uram ara uram winiryi danguboka kerek sekmai. Ara, Ibrani uram ton, Latin uram ton, Yunani uram ton aryi danguboka sekmai ura, ingna co deici aryi bing dakmai. Ura, Er Yesus bisi ingna co ab co lase deici aryi bing dakmai dam ara Yerusalem atei dam kubmou ati, bisik yiban nang ilinto aryi a laken uram asi nukmai.

²¹Ura, sun Er Imtamnyi kan ninyi kan noutam kuboka antanirdeirin deyok nang ara a kerek sekmai uram asing eibmai ura, sunci, “Nun li,” tenen Pilatus dam bindoka ato ebmai. “Kanci Anyi biti, ‘Sun Yahudi yala nang Weik Sienyi,’ eboka kerek sekminyei. Erda, ‘Anyi biryi Erdamnyi biti, “Nira sun Yahudi yala nang Weik Sienyi kunun,” lak ebdanmar,’ eboka danguboka kerek sekeibdum.”

²²Ato eboka molobmai bok, Pilatus biryi, “Niryi kerek sekmanto danguboka kum sekeibkwan,” ebmou.

²³Ura, sun yin doun nang ara Yesus bisi bing dakmai cok, Er alib ongon aling asi dobmai. Ara, Yesus ongoramwe aling alib dinyi asi sekmai uca, ongon aling sekdoba dumbaryi sekmai ura, sun yuk-yuk aryi ongon aling sekdoba dinyi ton dobdobmai. Tonda, er ongon aling bol limdana aling ababyi dobmai. A ongon aling ara tabwe tentok aryi kuboka wiamnyi uca, sunci, “Kwilibcei,” tenen sengdongon kum kubmai. A ongon aling ara ngang dam aryi kuboka outam kuboka keil dam ababyi tabwe tentok aryi kuboka wiamnyi aling kubmou ati, sengdongon kum kubmai.

²⁴Ati, sunci sun mamun ato ebdanmai. “Ongon aling asi kwiriblobibyei,” tenen, “Unanyi biryi talebkwande do?” tenen nunci keil du im sukoka wibdeibkwayeb. Ato kuboka sunci Er Imtamnyi Uram umbura aryi minob kerek sekmou to kunubmai. Ara, Er Imtamnyi Uram umbura aryi ato esurur, “A nang ara Ni ongon aling asi bokeibmang. Tonda, ‘Er ongon aling ara unanyi talebkwande do?’ tenen sunci keil du im sukoka wibdeibmai.” (Mazmur 22:19) Ati, sun yin doun nang ara ato kubmai.

²⁵Ura, Yesus bisi ingna co ab co lase deici aryi bing dakmai ura, Er kwin si Maria ab, Er mumner ab, Kleopas ner Maria ab, Maria Magdalena ner ab dam tikmai. Tonda, Yesus bisi miliramunyi bira Erci boukwe weik kuramunyi bibabyi dam tikmou.

²⁶Ura, Yesus biryi Er kwin ab Er miliramunyi ab tikmarei asi asing eibmou ba, Erci Er kwin bisi, “Nong, Ni kwit bira kan ab tikmarurumnyi bisi, ‘Ni mi,’ tenen dobdobdum,” ebmou.

²⁷Tonda, Erci Er miliramunyi bisi ato ebmou, “Ni kwit, Ni kwin kan ab tikmarurum ner ati, ‘Nikwin,’ tenen dobdobdum.” Ura, a talak aryi kuboka Er Yesus miliramunyi biryi Yesus Er kwin bisi, “Nikwin bisi dibniliboka kalikwan,” tenen dobdobmou ura, er mabwe silib ab tonkwa kuramnyi.

²⁸Ura, Yesus biryi, “Er Imtamnyi biryi Nisi takubdeibnou to nirya asi sirya kunubman,” tenen bikdanmou cok, Erci, “Er Imtamnyi Uram umbura aryi Niti enurur to kunubkwan,” tenen, “Me atanmanir,” ebmou.

²⁹Ura, “Dinibdeibkwayeb,” tenen sunci nokom doboka sik co du yung moyok umbura dongobmai ura, co belkena urub deib aryi dobwelebmai ci, Yesus sibambul dam likdongobmai.

³⁰Yesus biryi sik co du yung ton sirya yibmou ura, Erci, “A kunum sirya,” ebmou. Ebmou cok, Erci Er kisok kanubdongoboka isin neb-neb ena dakdongobmou ci, dibmou.

³¹Ura, Er Yesus dibmou uki tum ara kiknirminingna uki tum kubmou ba, ambutum toa ara sun Yahudi yala nang aryi taruk louboka wa in kum uki tum weik uki tum berekou. Ura, sun Yahudi yala nang ara, “Wa in kum uki tum si Sabat ara co lase deici tuba kubmurubingnyei,” tenen sunci Pilatus bisi bindoka ato eboka molobmai. “Sun co lase deici aryi bing dakmarum nang minola dibkwaming ati sunci sun yan yuk-yuk bulakeibdarur. Sirya dibmangnyi ura, sun tukwe asi co lase deici aryi kuboka dobting.”

³²Ato eboka molobmai ura, Pilatus biryi, “Ur,” ebmou uca, sun yin doun nang aryi Er Yesus ab tonkwa co lase deici aryi labdeibmai nang bitinyi asi bindoka asing dirbinmai. Asing dinmai uca, sunci, “Kam tuba kubmaring,” tenen bikmai ura, sunci sun yan bitinyi bulakdeibmai uca, dibmarei.

³³Ura, Yesus dam bindoka asing dinmai uca, sunci, “Sirya dibmar,” tenen eibmai ati, sunci Yesus Er yan kum bulakdeibmai.

³⁴Erda, yin doun nang kankan aryi tentoknyi biryi tebalang doboka Yesus yacok dam lukmou. Lukmou uca, ining ab me ab dilaka aryi kuboka dikwetebmou.

³⁵Er a dinyi asing dibmasinyi bira, “Ato-ato diboka kubmou,” lak ebman. Ni lak ebmasin uram ara dib en uram kubmar ati ebman. Nira dib en uram bikman ati lak ebman. Ara, sunda a uram kekebkwandum nang ababyi dib tenebkwandum ati lak ebman.

³⁶A dinyi nirya kubmou ara Er Imtamnyi Uram umbura minob ebmou to kunubkwamwe ati kubmou. Er Imtamnyi Uram ara ato ebmou. “Er yok tentok ababyi kum bulakwaming.” [1]

³⁷Tonda, yuk tam ara ato ebmar. “Anabkwandanyi bira sunci minob lukmainyi bisi asing dinkwaming.” (Zakharia 12:10)

³⁸A sirya ura, ninyi si Yusuf Arimatea ateinyi biryi Pilatus dam bindoka, “Yesus bisi tukwe dongobkwayeb ati molobmakin,” eboka molorbinmou. Anyi Yusuf bira Yesus miliramunyi kuramuryok, erci minob, “Sun Yahudi yala nang aryi malyi kibningnyei,” tenen ilil kuramwe ati, “Nira Yesus milinanyi kunun,” lak kum eramwe. Ura, Pilatus biryi, “Ur tukwe dongobdum,” ebmou ura, Yusuf biryi co lase dam yandoka Yesus Er nong bobinmou.

³⁹Ara, Yusuf ab ninyi si Nikodemus ab Er Yesus nong tukwe dongon dam bobinmarei. Nikodemus bira minob ura lukunda kubmou ba, er Yesus ab ebdanmareinyi kuramwe. Ura, erci, “Yesus bisi tukwe dongobkwayeb,” tenen tong teleb dinyi dengna weik dinyi boyanmou. Ara, minyak mur ab minyak gaharu ab talbalibmou dinyi ikin ara tiga puluh kilo bobmou.

⁴⁰Ati, sunci Yesus Er nong asi doboka aling si lenan aryi libmarei. Aling si lenan aryi libmarei ci, sunci minyak tong teleb dinyi dikdongobmarei. Ara, sun Yahudi yala nang aryi din nang asi kiknibminikoka tukwe dongoramnyi to, sunci Yesus Er nong bisi kiknibminikoka tukwe dongobmarei.

⁴¹Yesus bisi co lase deici deibmai mutuk yim dam ara wa in dam ton kuramwe. A wa in dam ara tukwe dongon dam ukuryok dinyi kubmou. Ara, ninyi tentok ababyi a tukwe dongon dam kum dongoamnyi.

⁴²Ura, Er Yesus dibmou uki tum ara wa in kum uki tum kum berekmou ba, sun Yahudi yala nang aryi kiknirmining uki tum kubmou. Ati, sunci, “Wa in kum uki tum berekwamar ati, nunci taruk louboka bukmabyi ura, amcitum berekci ura, tukwe dongobkwayeb,” tenebmai. Ura, tukwe dongon dam damtoto kuramwe ati, sunci Yesus Er nong doboka tukwe dongon ai umbura tiya deibmarei.