Read Futuna-Aniwa Yohanes 2 Bible Online

Yohanes 2 - Futuna-Aniwa bible

Yohanes 2

¹Mabmai ani, uki winiryi tum berekmou ura, Galilea mutuk aryi kuboka atei si Kana aryi sal ner te murunmai. Yesus Er kwin bibabyi a te murunmaia a kubmou.

²Tonda, Yesus ab Er miliramnyi nang ababyi, “Ner te murubkwayeb ati sunbabyi yandarur,” eboka nabmai ba, binmai ura, du dongobmai.

³Ura, ner te murumna kwalibde yinmai bok, sun du dongonmai nang anggur du yung yinmai. Ani, anggur du yung nirya yibkiribmai. Nirya yibkiribmai ura, Yesus Er kwin biryi bikmou ci, Yesus bisi ato ebmou. “Sun anggur du yung me nirya yibkiribmang ba, kum danmar.”

⁴Uca, Yesus biryi Er kwin bisi ato ebmou. “Nong, unato ati ato ebmanirim do? Niryi ilil tenen dinyi kiknibkwan uki ara kabul kum yanmar,” ebmou.

⁵Uca, Yesus Er kwin biryi sun arungna nang asi ato ebmou. “Ni Mi aryi sunsi ebdeibmasici tok kunubkwandarur.”

⁶Ura, sun kunmaia dam ara keil aryi kiknin moyok ilila moyok nabaryi deiriramwe. A ilila moyok umbura me ara yina me kuma. Erda, a me ara sun Yahudi yala nang aryi kweboka sun damnyi me ilingdaramnyi. Ara, Musa Uram deici aryi sunci, “Me ilikdamibyi uca, Er Imtamnyi biryi nunsi dobdobsute,” tenen sundamnyi me ilingdaramnyi moyok burdaramnyi.

⁷Ura, Yesus biryi, “Ilil tenen dinyi kiknibkwan,” tenen sun arungna nang asi ato ebmou. “Me kweboka a yana moyok nirya asi langdeiboka dikdongobdarur,” ebmou. Ba, sunci me kweboka a ilila moyok umbura nirya asi kweboka dingdongonmai ba, langkarikmou.

⁸Sirya dikdongobmai ura, Yesus biryi, “A dikdongobmang me nirya ara anggur du yung me sirya kibmar,” tenen bikmou ci, Erci sunsi ato ebmou. “Ilila moyok dikdongobmarum me ton kweboka abmun ci, ner te murumna kwalina deyoknyi bisi bobmunyi ba, er ton yibderur,” ebmou. Ba, sunci a me kwebtaleboka ner te murumna kwalina deyoknyi bisi bobinmai.

⁹Ura, kwalina deyoknyi biryi a me sirik ara danguboka anggur du yung me kibmou me asi yibdenmou. Uca, erci, “A anggur du yung me ara iya minmin teleb dinyi kubmar,” tenebmou. Ara, erci, “A anggur me ara dantam aryi boyanmai do?” tenen kum bikmou. Tonda, erci, “Yesus biryi ilil tenen dinyi kikniboka a anggur me kibnibmou,” tenen kum bikmou. Bok, sun arungna nang ara, “Yesus biryi ilil tenen dinyi kikniboka me sirik asi dangubdeiboka anggur me kiknibmou,” tenen bikmai. Ura, kwalina deyoknyi biryi a deyok ati kum bikmou ci, erci ner donanyi bisi nabmou.

¹⁰Ner donanyi bisi nabmou ura, erci ato ebmou. “Naie. A anggur me ara bisibkaboka iya teleb dinyi kubmar. Yuk nang aryi kwalina kwaliraming ara anggur du yung me iya minmin teleb enmaci dinyi asi minob yirkarenmangnyi ba, boubci bok, anggur du yung mitika to teleb enmaci dinyi ara aminda aryi yirkareraming. Bok, kanci anggur du yung iya teleb dinyi ara minob kum aryi yibkarebmasirim ci, deibmarim ani, ukuryok aryi yibkarebmasirim,” ebmou.

¹¹A ilil tenen dinyi ara Yesus biryi yuma kobdob kiknibmou ara Galilea mutuk atei si Kana aryi kiknibmou. Ato kuboka Er Yesus biryi Erdamnyi biti, “Nira Erebdobnyi kunun,” tenen lak kibdanmou ba, Er miliramnyi nang aryi Ersi dib tenebmai.

¹²A sirya kiknibmou ura, Er Yesus ab Er kwin ab Er weityabwe kobdob ab Er miliramnyi nang ab tonkwa anaboka Kapernaum atei tonkwa binmai. Binmai ura, sun akatei asi uki mikbaryi kunmai.

¹³Ani, sun Yahudi yala nang ara kwalina si Paskah kwalibkwamai ati, Yesus ab Er miliramnyi nang ab ababyi, “Yerusalem atei kwalirbinkwayeb,” tenen Yerusalem atei tonkwa binmai.

¹⁴Yerusalem atei aryi Bait Allah ai ara Er Imtamnyi bisi ninyi dama deirin ai dam wengbindoka dinmai uca, ninyi aryi sapi totoa domba totoa emnanyi totoa boboka miningmai ci, dengdanmai asi asing eibmai. Tonda, yuk nang ara co lamna dam bukoka keil uang yuk-yuk dengdanmai asi eibmai.

¹⁵Ura, Yesus biryi, “Bait Allah ai dam tamurdengdana mem se,” tenen Erci tabwe litukna kiknibmou ura, a tamurdengdana nang nirya asi yakdonokmou. Tonda, domba ab sapi ababyi nirya yakdonokmou. Tonda, co bok tamubkarebdanmai nang co lamna nirya asi dangublobmou ba, dengna weik dinyi dengna keil ab dengna mitik dinyi dengna keil ab nirya ara tukwe ai yamyamuboka bukmou.

¹⁶Tonda, sun emnanyi dengna nang asi Yesus biryi ato ebmou. “Sun anaboka bindobdarur. Ni Nai Imtamnyi bisi ninyi dama deirin ai ara sun dengtamurdan ai kuma!” ebmou.

¹⁷Er Yesus biryi ato kuboka Bait Allah ai kilibmou asi, Er Yesus bisi miliramnyi nang aryi, “Er Imtamnyi Uram umbura aryi minob kerek sekmou to sirya kunubmar,” tenen bikmai. Ara, Er Imtamnyi Uram umbura aryi ato eboka kerek sekamwe, “Nira iya busul kuboka Kanda Imtamnyi ai asi kalingnun uca, Ni dibkwan,” eamwe uram asi kanya teneiboka bikmai. (Mazmur 69:10)

¹⁸Ura, sun Yahudi yala nang aryi Er Yesus bisi ato eboka asibdenmai. “Unato ati Kan ato kubmarim do? Unato ati ninyi ab bisam ab yakdonokmasirim do? Unanyi biryi Kansi, ‘Ninyi ab bisam ab yakdonokdum,’ eboka arukmakir ab kubmasirim do? Kanci nun urasintam aryi ilil tenen dinyi lak kiknibtum ura, nunci Kanti, ‘Er Imtamnyi mikib deici aryi ato kubmar,’ tenen bikitibiryi uca, Kansi dib tenebkitibyi,” ebmai.

¹⁹Ato ebmai ba, Er Yesus biryi sunsi ato ebmou, “Sunci akai Er Imtamnyi biti dama deirin ai dakdeibmamunyi ura, Niryi donmanyi ani, uki winiryi tum berekci ura, akai sirya tubto dobkwan,” ebmou.

²⁰Uca, sun Yahudi yala nang aryi Ersi ato ebmai, “Er Imtamnyi ai akai doramnyi talak kwalibde baramnyi ara kwalina empat puluh enam baryi kwaliamnyi. Bok, Kanci uki winiryi aryok akai asi tubto dobkwandim do? Ato ara ukubman kum,” ebmai.

²¹Ato ebmai bok, Er Yesus biryi ebmou ara Er Imtamnyi biti ninyi dama deirin ai kobdob ati kum ebmou. Erda, Er mining nong ati ato ebdanmou cok, kebdeiboka ebmou.

²²Ani, Er Yesus bira dibmou ani, kam bukokmou ura, Er miliramnyi nang aryi Er Yesus biryi eamwe uram ab Er Imtamnyi biryi minob erdeiriramwe uram ab asi kanya teneiboka bikmai ci, Yesus biryi minob ebmou to dib tenebmai.

²³Ura, Yesus Yerusalem atei kuramuryi, sun Yahudi yala nang kwalina si Paskah kwaliramnyi talak aryi Yesus biryi ilil tenen dinyi ilinto kikniramwe. Ba, ninyi ilinto aryi asing eibmai ura, sunci Yesus bisi dib tenebmai.

²⁴Bok, Yesus biryi a nang nirya ati, “Nisi diboka kum dib tenebmaning,” tenen Erci sunsi Er kanya kum deibmou.

²⁵Nun Du bira, “Ninyi kanya dam aryi tenen dinyi Ni kum bingnun ati lak ebniting,” tenena kum kuramwe. Erci ninyi kanya diboka bingnamwe deyok aryi, Erci a nang asi Er kanya kum deibmou.