Read Futuna-Aniwa Yohanes 20 Bible Online

Yohanes 20 - Futuna-Aniwa bible

Yohanes 20

¹Ura, Hari Minggu ara yuma kobdob uki tum berekou ba, kunuk tuba kubmou bok, Maria Magdalena ner ara Yesus bisi tukwe dongobmai dam binmou. Tukwe dongon dam sirya binmou ura, asing eibmou ba, “Naie,” bublan dam kubmou keil ara lingkwa tam kibmou.

²Bublan dam kubmou keil ara lingkwa tam kibmai ati asing eibmou ura, Maria biryi cukoka tamurbindoka Simon Petrus ab Er Yesus bisi miliramunyi yuknyi ab asi nungbinmou. Ara, Simon Petrus ab yuk miliramunyi Er Yesus biryi boukwe weik kuramunyi ab asi nukmou ci, erci sunsi ato ebmou. “Ninyi aryi nun Du Er tukwi asi doboka yuk dam deibmai se. Dantam aryi deibmai ati ni kum bikman,” ebmou.

³Ato ebmou uca, Petrus ab yuk miliramunyi ab anaboka Er Yesus bisi tukwe dongobmai dam binmarei.

⁴Cukoka binmarei ura, yuk miliramunyi bisibkaboka menekmou cok, tukwe dongon dam minob yanmou.

⁵Ura, sirya yanmou ura, erci bukoka tukwe dongon umbura dam asing dinmou uca, din nang demna aling ab din nang kisok kalurdein aling ababyi asing eibmou. A dinyi asing eibmou cok, Yesus Er tukwi asi er kum eibmou. Asing kum eibmou cok, erci tukwe dongon dam kum wengbinmou.

⁶Ura, Simon Petrus aminda aryi yanmou ura, tukwe dongon dam anmalakoka wengbinmou. Asing dinmou uca, erbabyi din nang demna aling ab kisok kalurdein aling ababyi asing eibmou cok, Yesus Er tukwi kum eibmou. Er Yesus kisok kalurdein aling ara liliboka kitibdeibmai cok, yuk deibmai ati asing eibmou.

⁸Ura, yuk miliramunyi yuma kobdob yanmunyi bira aminda aryi tukwe dongon dam wengbinmou. Tukwe dongon dam aryi Yesus Er tukwi asing kum eibmou ati erci, “Nun Du kam bukokmar,” tenen dib tenebmou.

⁹A talak ara sun Yesus bisi miliramnyi nang aryi Er Imtamnyi Uram deici aryi, “Yesus kam bukokwandur,” tenen bita kum bikmai. Bita kum bikmai cok, anyi Yohanes biryi, “Kam bukokmar,” tenen dib tenebmou.

¹⁰A sirya ura, Er Yesus bisi milirandei nang bitinyi ara sun ai yuk-yuk binmarei. Binmarei bok, Maria Magdalena ner tukwe dongon dam tikoka engena weik engebde tikmou. Engebmou cok, erci bukoka dinmou uca, tukwe dongon dam asi Er Imtamnyi Uram eryuryangan nang bitinyi ara kait aling ongon nang asi asing eibmou. A nang ara Er Yesus tukwi deiamnyi dam asi bukmarei. Tonyi bira Er Yesus kisok deiamnyi tam bukmou ba, yuknyi bira Er Yesus yan deiamnyi tam bukmou.

¹³Ura, sun uram eryuryangan nang aryi Maria bisi ato eboka asibdenmarei. “Nong, unato ati engenmarim do?” Asibdenmarei bok, erci sunsi ato ebmou. “Ninyi aryi ni Du Er tukwi asi doboka yuk dam deibmai bok, niryi, ‘Dantam deibmai do?’ tenen kum bikman.”

¹⁴Ebmou cok, Maria biryi dangubmou ura, ninyi tentok dam tikmou asi asing eibmou. Anyi bira Yesus kam bukokmunyi kuramwe bok, Maria biryi kum bikmou.

¹⁵Ura, anyi biryi Maria bisi ato eboka asibdenmou. “Nong, unato ati engenmarim do? Unanyi bisi ingkirikmarim do?” Ura, Maria biryi, “Anyi bira a wa dam kalingnanyi kubmar,” tenebmou ci, ato ebmou. “Nai, Kanci ni Du Er tukwi yuk tam bobinmumwe do? Yuk tam bobinmumwe ura, kanci nisi lak ebnurum. Ara, niryi Er tukwi tamuboka borbinkwan ati ato ebmakin.”

¹⁶Ebmou ba, Er Yesus biryi ersi, “Maria,” ebmou. Ebmou ba, Maria biryi tamubmou ci, Yesus bisi bikmou ura, erci Ibrani uram aryi, “Rabuni,” ebmou. Ara, nun uram danguboka, “Nai Eteresurumnyi,” ebmou.

¹⁷Ura, Yesus biryi ersi ato ebmou. “Kanci Nisi talebniminyei. Nira tukwetam tuba kubman cok, Ni Nai Imtamnyi kum welebinman ba, kanci Nisi talebniminyei. Erda, kanci Ni kwityabwe Ni milin nang asi ato eboka nukde birum. Niryi Nibabyi sunbabyi sun Nai Imtamnyi tamuboka welebinkwan. Tonda, Nibabyi sunbabyi molonunyi bisi tamuboka welebinkwan.”

¹⁸Ura, Maria Magdalena ner anaboka Yesus miliramnyi nang asi nukde binmou. Ati, erci, “Nun Du kam bukokmar asi asing eibman,” eboka nukmou. Nukmou cok, erci, “Nun Du biryi nisi, ‘Ato-ato lak ebdarur,’ ebmanir,” ebmou.

¹⁹Ura, a Hari Minggu tum lukunda kubmou ba, Er Yesus miliramnyi nang tonkwa bulubmai cok, sunci, “Yahudi yala nang aryi nunbabyi talebsingnyei,” tenen ilil kubmou deyok aryi, ai bublan dabum eboka tirikdongobmai. Dabum eboka tirikdongobmai bok, Yesus biryi lukdandoka sun kankan asi tingyanmou. Tingyanmou cok, Erci sunsi, “Antanirdeirisin dinyi sun ab tonkwa kuna teleb,” ebmou.

²⁰Ato ebmou ura, erci, “Nira Yesus kunun ati dib tenebting,” tenen Erci Er taruk ab Er barwe tam ab lak kibdeiboka amubmou. Ura, Er miliramnyi nang aryi dilaka asi asing eibmai cok, sunci, “Diba, anyi bira nun Du kurur,” tenen bikmai ba, sun kanya kilkil weik kubmou.

²¹Ura, Yesus biryi sunsi tamuboka ato ebmou. “Antanirdeirisin dinyi sun ab tonkwa kuna teleb. Ni Nai Imtamnyi biryi Nisi bokwetebnou to, Niryi sunbabyi neiktoto bokdonokmasin.”

²²Ato ebmou cok, Erci isin uw ebdeibmou ci, “Er Imtamnyi Kanya Roh Kudus dobdobdarur,” ebmou.

²³“Ura, sun Roh Kudus aryi dobdobmarum nang aryi malyi kun nang asi, ‘Er Imtamnyi biryi sun malyi kun dinyi kilibmasir,’ ebmunyi ura, Er Imtamnyi biryi a nang malyi kun dinyi diboka kilibkwande. Ba, sunci, ‘Er Imtamnyi biryi sun malyi kun dinyi kum kilibkwansir,’ ebmunyi ura, Er Imtamnyi biryi a nang malyi kun dinyi kum kilibkwande,” ebmou.

²⁴Ura, Er Yesus biryi Er miliramnyi nang ab ebdandoka Erdamnyi lak kibdanmou ba, Er miliramnyi nang amolbaryi kankan aryi tonyi si Tomas sun ab tonkwa kum kubmai. Anyi Tomas uruma si ara Didimus eboka namnamnyi.

²⁵Ura, sun miliramnyi nang yuk nang aryi Tomas bisi bindoka, “Nun Du kam bukokmar ati asing eiboka ebdanmab,” ebmai. Ebmai bok, Tomas biryi dib kum tenebmou ati ato ebmou. “Ni taruk du aryi Er taruk kubmou dilaka ara bing dakmai dilaka asi dongobdetinyi uca, dib tenebtinyi. Tonda, Er barwe tam kubmar dilaka asi ni taruk aryi dongobdetinyi uca, dib tenebmatinyi,” ebmou.

²⁶Ani, uki tabaryi mabmai ani, berekmou ura, Er Yesus biryi Erdamnyi tubto lak kibdanmou. Ara, lukunda kubmou ba, neik ai bulubmai cok, Tomas bibabyi sun ab tonkwa kubmai. Ura, ai bublan asi dabum eboka tirikdongobmai bok, Er Yesus lukdandoka sun kankan asi tingyanmou ci, “Antanirdeirisin dinyi sun ab tonkwa kuna teleb,” ebmou.

²⁷Sirya ebmou ura, Erci Tomas bisi ato ebmou. “Kan taruk du aryi ni taruk sakmanir dilaka asi dongobdenurum. Ni taruk asi asing dibdenurum. Tonda, kan taruk aryi Ni barwetam kubman dilaka asi dongobdenurum. Kan kanya aryi Nisi dib kum tenebmanirim ati kanci takdum. Erda, Nisi dib tenebnurum.”

²⁸Ato ebmou ba, Tomas biryi Er Yesus bisi, “Ni Du Erebdobnyi, ni molokununyi,” lak ebmou.

²⁹Ebmou ba, Er Yesus biryi ersi ato ebmou. “Kanci Nisi asing eibmanirim deyok aryi, dib tenebmanirim. Ba, yuk nang ara asing ara eirinina kum uca Nisi dib tenebkwaning. A nang ara kansi bisibkaboka Er Imtamnyi biryi kisal dangna nang kunung ati ebman.”

³⁰Ura, Yesus ab Er miliramnyi nang ab tonkwa kubmai cok, Erci sun urasintam aryi ilil tenen dinyi yuk dinyi ilinto kikniramwe. A ilil tenen dinyi ara yuk-yuk eboka a kerek sengna umbura aryi kum sekeibmoubwe.

³¹Ba, ni kerek sekeibman anyi biryi a dinyi kerek sekeibman ara sunti, “Dib tenebkwaming,” tenen kerek sekeibmasin. Ara, “Nun Du Yesus bira Er Imtamnyi biryi tikeibmou Weik Sienyi si Kristus kurur,” dib tenena teleb. Tonda, “Nun Du bira Er Imtamnyi Mi kobdob kurur,” dib tenena teleb. Ati, sunci nun Du biti ato dib tenebmunyi uca, Er si deici aryi iya kam kun dinyi dobdobkwandum.