Read Futuna-Aniwa Yohanes 3 Bible Online

Yohanes 3 - Futuna-Aniwa bible

Yohanes 3

¹Ura, sun busul kuboka Musa Uram kunubde baramnyi nang si Farisi nang kankan ara ninyi tentok si Nikodemus kuramwe. Anyi bira sun Yahudi yala nang kalingnamunyi kuramwe.

²Uki tentok tum, lukunda aryi, anyi bira Yesus dam binmou ura, ato ebmou. “Nai ninyi Eteresurumnyi, Kanda Er Imtamnyi biryi bokdonokmakounyi dib en uram eterenanyi kurum ara nun bingkunub. Kanda Er Imtamnyi biryi Kansi milikurur ba, iya ilil tenen dinyi kiknirandim ara ni bikmakin. Er Imtamnyi biryi Kansi kum milirankute ura, ilil tenen dinyi mikib dinyi kum kiknirantum,” ebmou.

³Ato ebmou ba, Yesus biryi ersi ato ebmou, “Niryi kansi dib en uram ebkwinkin ati kan diboka kekerum. Tukwetam nang ara tamuboka deirina kum kubingnyi ura, Er Imtamnyi Erebdob Sienyi amwetam kun nang kum kubkwanung,” ebmou.

⁴Uca, Nikodemus biryi Yesus bisi ato ebmou, “Ninyi wise danamingnyi nang ara ton tamuboka deiriraming do? Ninyi wise sirya danamingnyi nang ara tamuboka sun kwinyabwe aryi mundu tubto bobkwamating do? Ato ara ukubman kum,” ebmou.

⁵Ato ebmou bok, Er Yesus biryi ersi ato ebmou. “Niryi kansi dib en uram ton lak eterebkwinkin ati diboka kekerum. Tukwetam nang ara Er Imtamnyi Kanya Roh Kudus aryi kilirande kanya kam kubdeibci kanya kum bobingnyi ba, ukuryok deirin mabwe kanya ato kum kubingnyi nang ara Er Imtamnyi Iya Erebdobnyi kurur amwetam kun nang kum kibkwaming.

⁶Sun tukwetam nang aryi mi deiriraming ara malyi kanya bon nang akwe deiriraming. Ba, Roh Kudus aryi tamuboka deirin dinyi karerande ara Erci ukuryok kanya bon nang deirirande.

⁷Niryi kansi, ‘Roh Kudus aryi tamuboka deibkwansute,’ ebmakin ati, kanci, ‘Naie,’ tenen kum.

⁸Kumwe ara er teleb tenebmaci bisik yibarorande ba, kumwe lilim ara kekerandum bok, sunci, ‘Dantam mutuk aryi yanganmar do?’ tenen kum bingnandum. Tonda, ‘Dan mutuk barande do?’ tenen ababyi kum bingnandum. Ato kuboka sun Roh Kudus aryi tamuboka deibmaci nang ababyi neiktoto kunung. ‘Roh Kudus ara ato-ato kuboka ninyi kanya dam wa irur,’ tenen bita kum bingnandum bok, sunci Roh Kudus aryi du mourdeirin dinyi asi asing eirirandum,” ebmou.

⁹Yesus biryi ato ebmou uca, er Nikodemus biryi, “Dib ebmanirim do? Ato dinyi ara una kuboka kubkwante do?” ebmou.

¹⁰Ura, Yesus biryi ersi ato ebmou, “Kanda sun Israel yala nang asi eterenanyi kurum cok, kanci a dinyi nirya ara diboka kum bingdum do?

¹¹Niryi kansi dib en uram ton ebkwinsin ati diboka kekerum. Niryi dib en uram diboka bingnun asi lak eteresunun. Er Imtamnyi biryi lak enin dinyi asing eibmase to, Niryi, ‘Dib en uram aca,’ eboka lak eteresunun. Eteresunun bok, sunda Yahudi yala nang ara Ni uram asi dib kum teneranurum.

¹²Niryi sunsi tukwetam nang ababyi ola bikmanto uram lak etereransise bok, sunci Ni uram asi dib kum teneranurum. Ati, Niryi sunsi ola bikmanto kum uram imtam dinyi ikin kuboka bingna dinyi asi lak eterebsitinyi ura, sunci Ni uram una kuboka dib tenebkwanindate do? Ato tenen kum.

¹³Ninyi tentok ababyi imtam welebindoka tukwetam yuryanganmou ci, dib en uram lak ebmou do? Ato tenen kum. Ba, Ni Ninyi Dasinyi bira imtam ai aryi kuboka yuryanganmasinyi kunun cok, dib en uram diboka bingnun.

¹⁴Minob talak aryi nun aibweyabwe Israel yala nang ara ninyi kun kum ai kuramnyi ura, yu kwatima aryi yandoka si toramnyi ba, ninyi ilinto diramnyi. Diramnyi bok, nun aibwe Musa biryi, ‘Dibkirikibyei,’ tenen kwatima kikniboka ererdeirin co deici aryi erebdeiboka amubdeibmou. Ara, ‘Kwatima aryi si tobmasici nang ara nun Nai bisi dib tenebibiryi, a kwatima amuboka erebdeibman asi asing dibdebyi uca, Er Imtamnyi biryi nunsi kwetebkwansir,’ tenen erci kwatima kikniboka erebdeibmou. Ura, Musa biryi kwatima kikniboka co deici aryi erebdeibmou to, ninyi aryi Ni Ninyi Dasinyi bibabyi neiktoto co deici asi erebdeibkwaning.

¹⁵Ba, unanyi-unaner aryi Nisi dib tenebningnyi nang ara iya kam kun dinyi dobdobkwaming ati Nira co lase deici erebdeibkwaningnyi kubkwan ati ebman.

¹⁶Ara, nun Nai Imtamnyi bira sun im dangna tukwe dangna mutuk kurandum nang asi iya boukwe weik kibsou deyok aryi, Erci Er Mi tentoknyi sunti karebmasou. Ba, unanyi-unaner aryi Ersi dib tenebingnyi nang ara iya kum dibkwaming. Erda, iya kam kun dinyi dobdobkwaming. A deyok ati Er Imtamnyi biryi Er Mi sunti karebmasou.

¹⁷Nun Nai Imtamnyi biryi Er Mi kobdoba asi tukwetam bokwetebmou ara, ‘Erci sun tukwetam nang asi tatab-tatab ebte,’ tenen kum bokwetebmou. Erda, Erci, ‘Ni Mi biriman aryi sun tukwetam nang asi lebkwan,’ tenen Er Mi bokwetebmou.

¹⁸Unanyi-unaner aryi Er Imtamnyi Mi asi dib tenebingnyi nang ara Er Imtamnyi biryi tatab-tatab eboka kum wenerur. Bok, unanyi-unaner aryi dib kum tenebingnyi nang ara Er Imtamnyi biryi diboka tatab-tatab erur. Er Imtamnyi Mi tentoknyi bisi dib kum teneramingnyi ura, Er Imtamnyi biryi sunsi diboka tatab-tatab erur.

¹⁹Er Imtamnyi biryi sun dib tenena kum nang asi ato eboka tatab-tatab erur. Berengdeirinanyi bira tukwetam yuryanmou bok, sun tukwetam nang aryi, ‘Berengna dinyi ara nun li se,’ teneramingiryi, sunci sun kanya dam aryi, ‘Kunuk dinyi asi nunti teleb,’ teneraming. Ara, sunci malyi dinyi akwe kunubde baramingnyi deyok aryi, sunci, ‘Berengna asi nun li se,’ teneraming.

²⁰Unanyi-unaner ara malyi dinyi kunubde baramingnyi nang ara berengna ati, ‘Nun li,’ teneraming. Ara, ‘Nun malyi dinyi kunubde baramibyi dinyi lak kibsicei,’ tenen berengna ara, ‘Nun li,’ teneraming.

²¹Bok, unanyi-unaner aryi dib en uram talebnuruboka kunubde baramingnyi nang ara berengdeirinanyi dam yangaroraming. Ara, ‘Nunda teleb dinyi kunubde baramibyi tok ara Er Imtamnyi mikib biriman aryi kunuramib ati ur lak kibkwande,’ tenen berengna dam yangaroraming.” Ato eboka Er Yesus biryi Nikodemus bisi eterebmou.

²²A sirya ura, Er Yesus ab Er miliramnyi nang ab anaboka Yudea mutuk binmai. Yudea mutuk bindoka tonkwa kuramiryi, Yesus biryi ninyi me dongoramwe.

²³Ura, Yohanes bibabyi ninyi me dongoramwe. Ara, Salim atei dam kuramwe ba, ninyi ilinto er dam yanganmai asi me dongoramwe. Ara, akatei dam kuboka me si Ainon ara yiban me ilinto kuramwe ati, erci ninyi me dongoramwe.

²⁴A talak ara Yohanes bira ninyi wenen ai kum dongoamnyi ba, ur tuba kuramwe talak aryi ninyi me dongoramwe.

²⁵Ninyi me dongoramwe bok, Yohanes miliramnyi nang kankan aryi ton nang ara Yahudi yala nang tentok ab lulubdanmai. Ara, sunci, “Me ilikdabyi uca, Er Imtamnyi biryi nunsi dobkwamasute,” en deyok ati liliboka lulubdanmai.

²⁶Ura, Yohanes miliramnyi nang ara Yohanes dam yanganmai ura, sunci ersi ato ebmai. “Nai du etereransirimnyi, kekerum. Yordan me kouboka otam kuboka kan ab tonkwa kubmarurumci kanci, ‘Anyi bira ato-ato kurutnyi kurur,’ eboka lak kibmoumnyi bibabyi ninyi me dongorur ba, ninyi nirya ara Er dam akwe baroraming asi Erci me dongorur,” ebmai.

²⁷Ato ebmai bok, Yohanes biryi sunsi ato ebmou, “Er Imtamnyi biryi, ‘Ato-ato kubdum,’ kum ebdeibsute ura, Erbabyi nunbabyi ninyi me kum dongobtibyi.

²⁸Niryi sunsi ato eboka lak ebmasise ati sun sirya bingdarur. Nira Er Imtamnyi biryi wibdeibmounyi ninyi lemsina Weik Sienyi si Kristus kum kunun. Erda, nira Er Imtamnyi biryi nisi bokdonoknou uca, Kristus yankwamwe bisik menekoka yananyi kunun ati ebman.

²⁹Ner dobkwandanyi bira ner dobkwandinyi. Ba, ner dobkwandinyi er kwit bira ner dobkwandinyi bisi dibniliboka er uram kekerande. Ner dobkwandinyi uram ara kilkil uram asi kekerande ba, er kwit bibabyi kilkil kanya borande. Ato aryi, ukuryok nibabyi langdeiboka kilkil kanya bonun.

³⁰Er Imtamnyi biryi teleb tenerur to, Anyi bira tabakoka si weiknyi kubkwandur. Ba, nira tabakoka si mitiknyi kunkwanun.

³¹Ati, imtam aryi kuboka yuryaunyi bira iya weik Erebdobnyi kurur. Bok, nira tukwetam nang aryi deibmareinyi kunun ati tukwetamnyi kunun ci, tukwetam nang en uram ato asi lak enun. Ba, imtam aryi yuryaunyi bira ninyi nirya bisibkaboka iya weik Erebdobnyi kurur.

³²Anyi Erda imtam aryi kuboka yuryaunyi biryi imtam dinyi asing eiboka amol kekebmou dinyi asi lak eteresurur bok, ninyi aryi Er uram ati, ‘Tola uram aca,’ tenen kum dororaming.

³³Ba, unanyi-unaner aryi Er uram ati, ‘Dib en uram aca,’ tenen dobdobmangnyi nang ara Er Imtamnyi biti, ‘Er uram ara diba ati kunurutnyi kurur,’ eboka lak eraming.

³⁴Er Imtamnyi biryi Er Imtamnyi Kanya Roh Kudus langdeiboka karebnou deyok aryi Nira Er Imtamnyi biryi Bokwetebnounyi bira Er Imtamnyi Uram ebmuruboka lak eteresunun.

³⁵Er Imtamnyi biryi Er Mi asi boukwe weik kurur cok, Erci utotoa nirya ara Er Mi taruk dam karebmou.

³⁶Unanyi-unaner aryi Er Imtamnyi Mi asi dib tenebingnyi ura, iya kam kun dinyi sirya dobdobmangiryi. Ba, unanyi-unaner aryi Er Imtamnyi Mi asi, ‘Ni li,’ teneramingnyi ura, a nang ara kam kun dinyi kum doronkwaming. Erda, Er Imtamnyi biryi wenesin dinyi sun dam tuba kurur ati ebman,” ebmou.