Read Futuna-Aniwa Yohanes 4 Bible Online

Yohanes 4 - Futuna-Aniwa bible

Yohanes 4

¹Ura, ninyi aryi Yesus biti ato ebmai, “Yohanes me dongoramunyi biryi me dongobmar milin nang ara ilinto kuraming bok, sun Yesus biryi me dongorande milin nang ara bisibkaboka yana yubwa weik kuraming.” Ura, sun Farisi nang aryi ato en uram kekebmai uca, sunci Er Yesus biti, “Nun li,” tenebmai.

²Ato ebmai ara, Yesus bira ninyi me kum dongoramwe. Erda, Er miliramnyi nang aryi ninyi me dongoramnyi bok enmai kekebmai.

³Ura, Yesus biryi ninyi aryi ebmai uram ati kekebmou ci, Erci Yudea mutuk aryi kuboka Galilea mutuk tubto tamurbanmou.

⁴Tamurbanmou bok, Er Imtamnyi biryi, “Samaria bis kuboka baraminyi uca, Galilea mutuk tamurbinkwandim,” eboka lak eterebmou to, Erci Samaria mutuk yibanmou.

⁵Er miliramnyi nang milibmai ba, yibanmai ani, Samaria mutuk atei tentok asi akatei si Sikhar dam binmai. Akatei ara minob uca nun aibwe Yakub ab er mabwe silib ab kuramnyi. Akatei dam kuramwe mutuk ara nun aibwe Yakub taleramwe ani, erci er mi Yusuf bisi karebmou.

⁶Tonda, akatei dam ara kwebde yin me ton nun aibwe Yakub biryi minob lokamwe asi iya kwebde yiramnyi. Ura, Yesus bira mutuk weik banmou aryi mitang ati, a longna me kwen dam bindoka burbinmou. A talak ara, kiting dukduk enmou kubmou ba, Erci, “Dikdik sebkun,” tenen a longna mekwan dam burbinmou.

⁷Ura, Yesus miliramnyi nang ara Yesus ab tonkwa kum bukmai. Erda, sunci, “Yina dekdobwayeb,” tenen atei binmai. Ba, Yesus Er yuk bukmou bok, Samaria ner tentok, “Me kwerorbinkwan,” tenen anabdobmou ci, yandoka me kwenmou asi Er Yesus biryi a ner asi ato ebmou, “Ni me ton kwebkarebnurum,” eboka molobmou.

⁸

⁹Uca, a Samaria ner aryi Er Yesus bisi, “Naie,” tenen, “Unato ati, ‘Me ton karebnurum,’ eboka molobmanirim do?” eboka asibdenmou. “Kanda Yahudinyi biryi unato ati ni Samaria ner asi ‘Me ton kwebkarebnurum,’ eboka molobmanirim do?” ebmou. Ato ebmou ara sun Yahudi yala nang aryi sun Samaria nang ati, “Nun li,” teneramiryi, tonkwa ururdana ton kum kuramnyi.

¹⁰Ebmou uca, Er Yesus biryi ersi ato ebmou. “Kanci Er Imtamnyi biryi karebkwansir dinyi biktum uca, kanci Nisi, ‘Iya kam kurdeirin me ton karebnurum,’ eboka molobmanutum. Ato eboka molobmanutum uca, Niryi kansi iya teleb me karebmakitinyi.”

¹¹Ebmou uca, a ner aryi Yesus bisi ato eboka asibdenmou. “Nai, Kanda me kwen moyok ton kum bobmarim ati, Kanci una kuboka me ton karebnutum do? A longna me kwen dam kum uca um weik tukwe umbura me doukiryi anarur ati, Kanci a me asi una kuboka kweboka karebnutum do?

¹²Nun aibwe Yakub bira a longna me kwen dam lokamwe uca, me kwemnamwe ura, erbabyi me yiramwe. Tonda, er mabwe silib ab er kalingnamwe domba mer yana yubwa ababyi me yiramnyi. Nun aibwe Yakub bira sienyi kuramwe bok, Kanda ersi bisibkaboka Iya Erebdobnyi kurandim do?”

¹³Ebmou bok, Er Yesus biryi ersi ato ebmou. “A longna me kwen dam me asi yiramingnyi nang ara tiya akwa boubmaci ani, aminda tubto me atabkwande

¹⁴Bok, Niryi karesunun me iya teleb me asi yibmunyi nang ara sun me atan tubto kum kubkwande. A me ara iya teleb me asi sun kanya dam iya kusurur. Niryi sun kanya dam karebsinyi me ara me urambok aryi langdeiboka iya anarande me ato kubkwansir. Me urambok aryi iya anaransici uca, a me ara iya kam kun dinyi boyangankwansurur,” ebmou.

¹⁵Ebmou uca, a ner aryi Yesus bisi ato eboka molobmou. “Nai, ni atana kum kunkwanir ba, tuba kum kweryangankwan ati, Kan ebmarim me ara nibabyi karebnurum,” eboka molobmou.

¹⁶Ato eboka molobmou ba, Yesus biryi a ner asi, “Bindoka, kan akenyi namyangarum,” ebmou.

¹⁷Ato ebmou bok, erci ato ebmou. “Ni ninyi kum dobse,” ebmou. Uca, Yesus biryi a ner asi ato ebmou. “Kanci diboka, ‘Ninyi kum dobse,’ ebmarim.

¹⁸Kansi doankei nang ara ninyi amubaryi aryi kansi doankei bok, kanci a nang yuk-yuk ab tonkwa tuba kum kurandum. Ura, ukuryok kan ab tonkwa kurandurumnyi bira kan akenyi kobdoba kum kururum. Ati, kanci, ‘Ni ninyi kum dobse,’ ebmarim ara diboka ebmarim,” ebmou.

¹⁹Ura, a ner aryi Yesus bisi ato ebmou. “Nai, Kanci ni kuranto bikmanirim ati, Kanda Er Imtamnyi Uram ebdeibmaca bobananyi kurum ati asing eibmakin.

²⁰Ati, niryi Kansi asirdena ton asibdenkwinkin. Nunda Samaria nang nun aibweyabwe minob kuramnyi nang ara, ‘A mutuk kon dam yandoka Er Imtamnyi si weik eboka molobdarur,’ eboka arungnamnyi. Ba, sunda Yahudi yala nang ara, ‘Yerusalem atei dam yandoka Er Imtamnyi si weik eboka molobdarur,’ eboka arungnandum. Ati, nunci dantam bindoka Er Imtamnyi si weik eboka molobkwanub do?” eboka asibdenmou.

²¹Ato ebmou uca, Er Yesus biryi ersi ato ebmou. “Nisi diboka dib tenebnurum. Sunci Er Imtamnyi bisi molobkwandum ara a mutuk kon yandoka Er Imtamnyi si weik ebtibyi do, Yerusalem atei bindoka Er Imtamnyi si weik ebtibyi do?” tenen dinyi ara bikdob tenen dinyi kum kubkwande. Sun dib tenen nang ara dantam-dantam kuramingiryok, Er Imtamnyi si weik ur ebkwaming ati ebman. Ara, a mutuk kon dam kum kuramingiryok, Yerusalem atei ababyi kum kuramingiryok, erda yuk mutuk kuramingiryi, sunci Er Imtamnyi si weik eboka molobkwandum. A kunubkwande talak ara dam kubmar ati ebman.

²²Sun Samaria nang ababyi Er Imtamnyi si weik erandum bok, sunci nun Nai bisi bita kum bingnandum. Bok, nun Yahudi yala nang ara Er Imtamnyi bisi bingnub ci, Er si weik ebde banub. Nun Yahudi yala nang kankan asi Er Imtamnyi biryi ninyi lebkwansir dinyi minob lak kibkwansir.

²³Ani, ukuryok tum berekwamar. A talak ara sirya berekmar ati ebman. A kubde baramib talak ara sun Er Imtamnyi bisi moloramingnyi nang aryi diboka molobkwaming. A nang ara Er Imtamnyi Kanya Roh Kudus aryi eteresurur to dib en uram tenen bingnamingiryi, nun Nai bisi diboka molobkwaming. Sun ato kun nang asi Er Imtamnyi biryi kilkil kanya boboka ingkiringdur.

²⁴Nun Nai Imtamnyi bira Imtam Kurutnyi kurur. Ati, sun moloboka Ersi si weik eramingnyi nang ara Roh Kudus eteresurur to bikoka Ersi si weik ebkwanung. Tonda, sunci sun kanya asi Er Imtamnyi bisi diboka karebdandoka nun Nai si weik ebkwanung,” ebmou.

²⁵Ebmou ura, a ner aryi Yesus bisi ato ebmou. “Er Imtamnyi biryi bokwetebsici uca, Ninyi Lemsina Sienyi si Kristus nun dam yankwansir ara ni bingnun. Anyi bira nunsi dib en uram nirya asi liliboka eterebkwansir,” ebmou.

²⁶Ato ebmou uca, Yesus biryi a ner asi ato ebmou. “Ni kan ab uram sisikmanimnyi bira kan ebmarimnyi Ni a kunum kunun,” ebmou.

²⁷Yesus ab Samaria ner ab uram tuba sisingmarei bok, Yesus Er miliramnyi nang aryi yina sirya dengbinmai ura, tamuryanmai. Ura, sunci diramnyi uca, Samaria ner tentok ab uram sisingmarei ura, “Naie, unato ati Samaria ner ab uram sisingmaring do?” tenebmai cok, sunci uram doboka a ner asi, “Una tenebmarim ci, sisingmarurum do?” eboka kum asibdenmai. Tonda, sunci Yesus bisi, “Nai, Kan unato ati a ner ab uram sisingmarurum do?” ena ababyi kum asibdenmai.

²⁸Ura, a ner aryi er me kwen moyok deibloboka er atei wengbinmou ura, erci er atei nang asi ato ebmou.

²⁹“Sun ton dirderyandarur. Me kwen dam ara ni minob kuranse dinyi nirya bingnaniranyi ab ebdanmanim. Erci ni kuranse to nirya lak kibmaniranyi yandoka bukmar. Ati, Anyi bira ninyi lemsina Weik Sienyi si Kristus kurur darib?” ebmou.

³⁰Ato eboka lak ebmou uca, akatei nang nirya anaboka Yesus bukmou dam yanmai.

³¹Yanmai bok, a talak ara Er Yesus miliramnyi nang aryi Ersi ato ebmai. “Nai ninyi Eteresurumnyi, Kanda yina ton yibminyi ura, a nang ab uram sisikdarur,” ebmai.

³²Ato ebmai bok, Yesus biryi sunsi ato ebmou. “Niryi yibde banun yina ara sun kum bingnindarur,” ebmou.

³³Uca, Er miliramnyi nang kanya ara kankana kubmou ara, sunci sun mamun asi ato eboka asibdanmai. “Akatei nang aryi ninyi ton da yandoka Ersi yina karebmang ba, sirya yibmar darib?” ebdanmai.

³⁴Ato eboka asibdanmai bok, Er Yesus biryi sunsi ato ebmou. “Ni yibde banun yina ara tukwetam nang aryi yina dinyi kuma. Erda, Ni yibde banun yina ara Er Imtamnyi Uram kunubde banun dinyi a kunum. Ni bokwetebnounyi takubdeibnou wa asi kunubde banun ara Ni yibde banun yina ato kunurur.

³⁵Sun tukwetam nang wa iramingnyi nang ara ato erdaraming. ‘Wala dumbaryi mabmabyi ura, kwaning yongobkwayeb,’ eraming. Bok, Niryi sunsi ato ebkwinsin. Kwaning yongon tum dam kubmar. Ati, sunci diboka tenebmun ci, wa in dam asing dibkankanikdendarur. Kwaning wa ara nong sirya mabkwamar ati, kwaning yongon tum sirya dam yanmar. Ara, ninyi ilinto aryi dib kum teneramingiryok, aminda aryi dib tenebkwaming ati ato ebman.

³⁶Kwaning yongon nang ara kwaning sirya yongobkalibmang ati, kwaning yongon dengna dinyi yuma dinyi sirya dobdobmang. Ara, tukwetam kwaning kum yongoraming. Erda, Er Imtamnyi urasintam aryi du moun nang ara iya kam kun dinyi dobdobkwaming nang asi bulurdeiriraming. Ba, kwaning kouna nang babyi kwaning yongon nang babyi neik tum antaniboka kilkil kanya boraming.

³⁷Ura, sun tukwetam nang ara ato erandum. ‘Tonyi biryi kwaning yala kourande. Ba, kwaning nong mabci ura, yuknyi biryi kwaning yongorande,’ erandum. A erandum uram ara diboka erandum.

³⁸Yuk nang ara minob yandoka wa il weik kuramiryok, kwaning yala kouamnyi ani, kwaning kum yongoramnyi. Bok, sun Ni miliranurum nang aryi kwaning yala sunci minob kum kouandau bok, kwaning nong mabci asi yongobkwandum. Ati, sunci kwaning yala kouna ati wa il weik kum kurandau bok, sunci kwaning yongoboka kibdobkwandum,” ebmou.

³⁹Ura, a Samaria ner aryi Er Yesus biti, “Anyi biryi ni malyi kuranse dinyi nirya asi bikoka lak ebmanir,” eboka lak ebmou deyok aryi, Samaria nang aryi ninyi ilinto Er Yesus bisi dib tenebmai.

⁴⁰Ati, Samaria nang aryi Er Yesus dam yanmai ura, Er Yesus bisi ato eboka molobmai. “Nai, Kanda nun ab tonkwa kubkwayeb,” ebmai. Ba, Yesus ab Er miliramnyi nang ab sun Samaria nang ab tonkwa lukunda bitinyi mabmai ani, uki winiryi tum berekmou ura, anabdobmai.

⁴¹Ura, Er Yesus biryi sunsi dib en uram eterebmou deyok aryi, ninyi ilinto aryi Ersi dib tenebmai.

⁴²Ura, sun akatei nang aryi a Samaria ner asi ato ebmai. “Kanci nunsi Anyi biti, ‘Lemsina Sienyi,’ eboka lak ebmasirim aryok diboka ebmasirim tenen dib kum tenebmab. Erda, Erci eterebmasou uram asi nun amol kobdoba aryi kekebmab deyok aryi nunci dib tenebmab. ‘Anyi bira diboka im dangna tukwe dangna kuramingnyi nang ati Lemsina Sienyi kurur,’ tenebmab,” ebmai.

⁴³Uki bitinyi mabmai ani, uki winiryi tum berekmou ura, Er Yesus ab Er miliramnyi nang ab Samaria mutuk aryi anaboka Galilea mutuk binmai.

⁴⁴Bisik baramiryok, Er Yesus biryi Er miliramnyi nang asi ato eboka lak eterebmou. “Nun mining mutuk Galilea mutuk binkub bok, nun mining mutuk nang aryi Nisi dib kum tenebkwanunung. Sun mining atei nang ara sun kankan aryi kuboka Er Imtamnyi Uram ebdeibmaci to lak etereramnyi nang asi aryi, ‘Nun nai,’ tenena kum kuraming ati ato ebmasin,” ebmou.

⁴⁵Ura, Yesus ab Er miliramnyi nang ab Galilea mutuk binmai ura, sun Galilea nang aryi Yesus bisi, “Nun Nai,” eboka kibdobmai cok, Ersi dib kum tenebmai. Ara, weik kwalina si Paskah kwalinmai ci, sunbabyi Yerusalem atei binmai uca, sunci Yesus biryi kiknibmou ilil tenen dinyi yuk-yuk asing eibmai. A deyok aryi, sunci Yesus biti, “Nun Nai,” eboka kibmai.

⁴⁶Ura, Yesus bira Galilea mutuk kuramuryok, atei si Kana tamurbinmou. Yerusalem atei bana kum ura, Erci Kana atei asi ilil tenen dinyi yuma kobdob dinyi kiknibmou ci, me sirik asi danguboka anggur du yung me kibdeibmou atei tamurbinmou. Yesus bira Kana atei wengbana kum kuabwe bok, yuk atei si Kapernaum ara weik sienyi wa irmiliramunyi tentok kuramwe asi er mi ara yun weik yiramwe.

⁴⁷Ura, anyi biryi kekenmou uca, “Yesus bira Galilea mutuk dam sirya tamuryanmar,” en uram kekebmou ura, erci anaboka Yesus dam binmou. Yesus dam binmou ura, erci Ersi ato eboka molobmou. “Nai, ni mi u yirur ba, ai mabmar ara dibmanto kunmar ati, Kanci yandoka ersi kwetebdeibdum,” eboka molobmou.

⁴⁸Molobmou uca, Er Yesus biryi ersi ato ebmou. “Niryi ilil tenen dinyi kunubde banun asi asing eibmun cok, Nisi dib tenebkwanurum. Bok, ilil tenen dinyi kum kiknibtinyi ura, sunci Nisi dib kum tenebkwanindate,” ebmou.

⁴⁹Ato ebmou bok, er weik sienyi wa ermilinanyi biryi Yesus bisi ato ebmou. “Nai, minola diryarum. Minola kum kweteryaminyi ura, ni mi dibcei,” ebmou.

⁵⁰Uca, Yesus biryi ersi ato ebmou. “Ni kwit, ur birum. Kan mi ara kum dibkwamar, Niryi sirya kwetebman,” ebmou. Ura, er weik sienyi wa irmiliramunyi biryi ilil tenen dinyi asing eina kum cok, Er Yesus biryi ebmou to dib tenebmou ci, er atei tamurbanmou.

⁵¹Mabmou ani, berekmou ura, er atei tamurbanmou bok, bisik noutam aryi er arungna nang ara er atei aryi anaboka yanganmai ba, ebdanmai. Bisik noutam ebdanmai ura, sunci sun nai weik sienyi wa irmilinanyi bisi ato ebmai. “Kan mi ara uk aruma talerur ara sirya lobdobmar,” ebmai.

⁵²Ura, sun nai biryi sunsi, “Una talak aryi nakibdobmar do?” eboka asibdenmou. Uca, sunci ersi, “Ambutum kiting yakna tentok aryi uk aruma lobdobmo,” ebmai.

⁵³Ato ebmai asi, sun nai biryi kekebmou ura, “Ei, ambutum kiting yakna tentok aryi Er Yesus biryi nisi, ‘Kan mi ara kum dibkwamar,’ ebmo,” tenen bikmou. Ura, erci, “Yesus biryi ni mi asi sirya kwetebmo,” tenen bikmou. Uca, er weik sienyi wa irmilinanyi ab er mabwe silib ab ara Er Yesus bisi dib tenebmai.

⁵⁴Er Yesus biryi Yerusalem atei aryi Galilea mutuk yanganmou ci a mi asi kwetebmou ara ilil tenen dinyi bitinyi dinyi kiknibmou. Ara, Galilea mutuk aryi kuboka ilil tenen dinyi kiknibmou ci, a ilil tenen dinyi bitinyi dinyi kiknibmou.