Read Futuna-Aniwa Yohanes 5 Bible Online

Yohanes 5 - Futuna-Aniwa bible

Yohanes 5

¹Kunmai ani, sun Yahudi yala nang kwaliramnyi weik kwalina berekwamwe ati, Yahudi yala nang ilinto aryi, “Weik kwalina kwalibkwayeb,” tenen Yerusalem atei binmai. Banmai ura, Er Yesus bibabyi Galilea mutuk aryi anaboka Yerusalem atei tubto binmou.

²Ura, Yerusalem atei dam ara ninyi kweten mekwan ton a kuramwe. A mekwan si ara Ibrani uram deib aryi ena ara, “Betesda,” eboka si doramnyi. A ninyi kweten mekwan ara Yerusalem atei weik lika bublan bisik si, “Domba Boyiban Bublan Bisik,” dam kuramwe. A mekwan si Betesda dam ara weik serambi ai amubaryi doboka aknabdongoamnyi.

³A serambi amubaryi ai umbura ara sun nong malyi kun nang ilinto maramnyi. Asing kun nang ab, yan denen nang ab, sun nong malyi kun nang yuk nang ababyi a mekwan dam maramnyi. A nang nirya ara, “Ninyi kweten mekwan me lontik-lontik eci talak asi wengdoryuryibyi ba, Er Imtamnyi biryi nisi kwetebkwanir,” tenen dibde maramnyi.

⁴Uki tentok-tentok tum ara Er Imtamnyi biryi bokwetebmou uca, Er Uram eryuryangananyi ton lukdandoka yuryanmou. Yuryanmou ura, erci a mekwan me asi talbalibmou uca, lontik-lontik ebmou. Lontik-lontik ebmou uca, a mekwan me ara ninyi kweten me kibmou. Ura, lontik-lontik ena asing eibmai ba, sun nong malyi kun nang ara, “Kwetebdeibnute,” tenen ukurlona kum uca a mekwan me wekmai. A mekwan me wekmai nang nirya asi kum kweterdeiriramwe. Erda, yuma kobdob me wekmarinyi bisi Er Imtamnyi biryi lontik-lontik ena biriman aryi kweteramwe.

⁵Ura, a nong malyi kun nang kankan ara ninyi tentok yan nirya deneamunyi maramwe. Er yan deneamwe talak ara kwalina tiga puluh delapan kwaliamnyi.

⁶Ura, Yesus biryi anyi bisi asing eibmou ura, “Kwalina tiga puluh delapan baryi ato kuramwe,” bikmou deyok aryi, Erci yan deneamunyi bisi ato eboka asibdenmou. “Kanci, ‘Ni yan mikib yanute,’ tenerum do?” eboka asibdenmou.

⁷Uca, a yan deneamunyi biryi Ersi ato ebmou. “Yo Nai, mekwan me lontik-lontik eci ura, yuk nang aryi nisi taruk taleboka ton kum bobaraning aryi, ni yuk wengdorbinman kum kunurur. Tonda, ni yuk aryi ukurdenmanyi ababyi, yuk nang asi menekoka sunsi minob wengdorbingnyi ba, sunda kweterur. Bok nira banmanyi talak uca, kwetebman talak bisibci ura, ukurlonun,” ebmou.

⁸Ato ebmou ba, Er Yesus biryi ersi ato ebmou. “Kan tikokdum. Tikokminyi ura, kan marandim amsuna doboka ur yibarorum,” ebmou.

⁹Er Yesus biryi ato ebmou ba, a yan deneamunyi bira mikib yanmou ura, er yuk tikokmou. Tikokmou ura, erci er amsuna bobdobmou ci, yibanmou. Ato kubmou tum ara sun Yahudi yala nang aryi taruk louboka wa ina kum uki tum kubmou bok, Er Yesus biryi yan deneamunyi bisi kwetebmou.

¹⁰A deyok aryi, sun Yahudi yala nang aryi a kwetebmounyi bisi ato ebmai. “Arub ara taruk louboka wa ina kum uki tum kubmar ati, kan man amsuna taleboka bona mem se. Musa biryi mem en uram yan yanibmarim se,” ebmai.

¹¹Ato ebmai bok, a kwetebmounyi biryi sunsi ato ebmou. “Ni kwetebdeibmaniranyi biryi, ‘Tikokminyi ura, kan marum amsuna bobdobminyi ura, ur bindobdum,’ ebmanir ati, niryi ni maran amsuna taleboka bobde yanganman,” ebmou.

¹²Ebmou asi, sunci ersi ato eboka asibdenmai. “Unanyi biryi, ‘Kan amsuna boboka ur bindobdum,’ eboka arukmakir do?” eboka asibdenmai.

¹³Uca, a kwetebmounyi biryi sunsi ato ebmou, “Ni kwetebdeibmaniranyi bira Er si ara unanyi ni kum bikman,” ebmou. Ara, Yesus biryi ersi kwetebdeibmou ura, Erci Erdamnyi lak kum kibdanmou. Erda, ninyi yubwa-yubwa yibanmai bok, Erci anaboka a nang kankan yibanmou.

¹⁴Ura, a kwetebmounyi bira Bait Allah ai ara Er Imtamnyi dama deirin ai dam wengbin asi Er Yesus biryi ab ebdanmarei. Ura, Yesus biryi ersi ato ebmou. “Kan yan ara mikib yanmakir ba, kan yibana ara mikib kuboka yibarandim. Ati, kanci malyi dinyi taklobdum. Kan malyi dinyi kum taklobminyi ura, iya wenen dinyi dobdobminyei. Yan denen dinyi ara mambul kurdeirin dinyi kurande bok, sun malyi kun nang wenen dinyi ara bisibkaboka iya mambul weik kurdeirin dinyi kurur ati ebmakin,” ebmou.

¹⁵Ura, a kwetebmounyi biryi, “Ni kwetebdeibmaniranyi bira Yesus biryi kwetebmanir,” tenen bikdobmou ba, erci sun Yahudi yala nang dam bindoka, “Ni kwetebdeibmaniranyi bira Yesus a kunum,” eboka lak ebmou.

¹⁶Ura, sun Yahudi yala nang taruk louboka wa in kum uki tum kubmou bok, Yesus biryi yan deneamunyi bisi kwetebmou ati, sun Yahudi yala nang aryi yu kanya boboka, “Yesus bisi domkirikoka obtibyi,” tenen marmun yinmai.

¹⁷Uca, Yesus biryi sunsi ato ebmou, “Ni Nai Imtamnyi bira uki-uki berengdura nirya ara wa ibde barur ani, arub uki si Sabat tum ababyi wa inmar. Ati, uki si Sabat tum kubmar ababyi Nibabyi tanglona kum uca Erci takubdeibnou wa asi kunubde binkwanun,” ebmou.

¹⁸Er Yesus biryi Er Imtamnyi biti, “Ni Nai nong,” ebmou deyok aryi, sun Yahudi yala nang yu weik kubtabakoka Erti, “Obkwayeb,” tenen kuramnyi. Ati, sunci, “Nun Yahudi yala nang wa ina kum uki tum kubmar ba, ninyi kwetebmar ati Musa Uram yan yanibmar,” tenebmai. Tonda, Yesus biryi Er Imtamnyi biti, “Ni Nai nong,” ebmou ati, sunci, “Erci Erdamnyi erebdeibdandoka Er Imtamnyi bitonyi kibdanmar se!” tenebmai.

¹⁹Ato kunmai bok, Er Yesus biryi sunsi ato ebmou. “Niryi sunsi dib en uram ebkwinsin ati diboka kekendarur. Nira Er Imtamnyi Mi kunun aryi Ni yuk tenen dinyi aryi wa kunuboka kum ibde banun. Erda, Ni Nai Imtamnyi biryi kunubde barur to asing eirinun aryi, Ni Nai irur dinyi akwe kunubde banun. Ara, Ni Nai Imtamnyi biryi kunubde baranci to, Nira Er Mi ababyi neik dinyi akwe kunubde banun ati ato ebman.

²⁰Er Nai Imtamnyi bira Er Mi nong asi boukwe weik kurur ati, Erci Er Mi asi Er kunubde barur dinyi nirya lak kimdur. Niryi yan deneamunyi bisi kwetebdeibman ara ilil tenen dinyi kubman bok, mitik dinyi asi kiknibman. Ni Nai Imtamnyi biryi bisibkaboka iya weik ilil tenen dinyi lak kibnici ura, Niryi iya weik tenen dinyi kiknibde binkwan. Ba, sunci asing eiboka, ‘Naie,’ tenebkwandum.

²¹Ni Nai Imtamnyi biryi sun din nang asi kam burdeirirur to, Nira Er Mi ababyi kam kun dinyi karebde banun. Ara, Ni Nai Niryi teleb tenebnici ninyi ton nang asi kam kun dinyi karebde banun.

²²Tonda, Ni Nai Imtamnyi biryi ninyi malyi deyok kum lilisurur. Erda, Erci Ni Er Mi asi, ‘Ninyi malyi kun dinyi Kanci lilibdum,’ eboka takubdeibnou.

²³Ara, ‘Ninyi nirya aryi Ni Imtamnyi si weik ererdeiriraming to, Ni Mi si ababyi weik erebdeibting,’ tenen Erci Nisi, ‘Ninyi malyi kun dinyi ara Kanci lilibdum,’ eboka takubdeibnou. Sun Er Imtamnyi Mi asi si weik ererdeirina kum kuramingnyi nang ara Er Nai Imtamnyi biryi Er Mi Bokwetebmounyi si ababyi ererdeirina kum kukuramingiryi, ati ebman.

²⁴Niryi sunsi dib en uram ton ebkwinsin ati diboka kekebdarur. Unanyi-unaner aryi Ni uram kekeramingiryi, Ni Nai Ni bokwetebnounyi bisi dib teneramingnyi ura, a nang ara iya kam kun dinyi sirya dobdonung. A nang ara iya weik wenen dinyi kum dobdobkwaming. Erda, din nang ato kuamnyi asi kam bukeibmou nang ato kunung.

²⁵Niryi sunsi dib en uram ton ebkwinsin ati diboka kekendarur. Er Imtamnyi Mi bira uram weik dobkwande uki tum dam kubmar. Ati, Erci sun dib tenen kum nang ara din nang ato kuraming nang asi, ‘Kam bukokdarur,’ ebci uca, a nang ara kam kun dinyi dobdobkwaming. A uki tum ara sirya yanmar ati ebman.

²⁶Er Nai Imtamnyi yuk aryi iya kam kun dinyi deyoknyi kurur to, Erci Nira Er Mi ababyi karebnou uca, Nibabyi neiktoto iya kam kun dinyi deyoknyi kunun. A deyok aryi Ni kam kun dinyi karenunyi kunun ati ebman.

²⁷Ura, Ni Er Imtamnyi Mi ara Ninyi Dasinyi kunun ati, Ni Nai Imtamnyi biryi Ni Er Mi asi, ‘Im dangna tukwe dangna nang sun malyi kun dinyi lilibdum,’ eboka mikib karebnou.

²⁸Ati, Ni kam kun dinyi karena ati mikibnyi kunun ati, sunci, ‘Naie,’ tenebmunyei. Ni Er Imtamnyi Mi biryi uram weik dobkwan uki tum ara dam kubmar. Uram weik dobnyi uca, sun din nang ara kam bukoka abingiryi, sun tukwe dongon dam aryi anabkaboka yibinkwaming.

²⁹Ba, tukwe dongon dam aryi kuboka anabkaboka yibingnyi ura, sun teleb dinyi kuraming ani, diamingnyi nang ara iya kam kun dinyi dobdobkwaming. Bok, sun malyi dinyi kuramnyi ani, diamingnyi nang ara iya wenen dinyi dobdobkwaming.

³⁰Nira Ni yuk aryi ato dinyi kunubde kum banun. Erda, Er Imtamnyi mikib biriman aryi Niryi ato dinyi kunubde banun. Ni Nai Imtamnyi biryi Nisi eterebde banurur to, Niryi malyi kun dinyi lilibde banun. Malyi dinyi lilibde banun ara Niryi ninyi aryi kuramingnyi to diboka bingnun ci, lilibde banun. Ati, niryi, ‘Ni kanya teleb tenebnyi tok kunubde banun,’ kum tenenun. Erda, ‘Ni Nai Imtamnyi bokwetebnounyi kanya teleb kubdeibkwan,’ tenen Niryi Erci takubdeibnou wa asi kunubde banun,” ebmou.

³¹Ebmou cok, Er Yesus biryi sun Yahudi yala nang asi ton ato ebmou. “Niryi Nidamnyi ati, ‘Nira Er Imtamnyi Mi kunun,’ eboka lak ebdanman bok, yuk nang aryi, ‘Dib ebmar,’ kum ebnitingnyi ura, Ni lak ebdanmatingyi uram ara dib kum dinyi kubte.

³²Niryi, ‘Nira Er Imtamnyi Mi kunun,’ eboka lak erdanun bok, yuk nang ababyi ato eraning. Ni Nai Imtamnyi bibabyi Niti, ‘Ni Mi nong,’ eboka lak ebmanou ati ebman. ‘Er lak en uram ara dib en uram kurur,’ tenen Ni bingnun.

³³Tonda, sunda Yahudi yala nang sunci ninyi ton wiboka bokdonokmandau ba, sunci Yohanes ninyi me dongoramunyi dam bindoka asibdenmai. Asibdenmai uca, Yohanes biryi Niti dib en uram eboka lak eranou ati ebman.

³⁴Yohanes bira tukwetamnyi biryi Ni deyok ati lak eramwe dinyi asi Niryi erci laken uram dem deici aryi, ‘Nira Er Imtamnyi Mi kunun,’ kum tenerdanun. Erda, Niryi sunti, ‘Lemsina dinyi dobdobkwaming,’ tenen Yohanes biryi Niti lak ebmanou to tamuboka ebmasin.

³⁵Yohanes me dongoramunyi bira dib en uram ati lak etereramwe ati, erda uk ubna ato kuramwe. Uk ubna ato kuramwe asi sunci er berengna dinyi asi asing eiboka kilkil kanya borandau cok, er eramwe uram ara tiya atikwe dobdobmandau.

³⁶Yohanes biryi Niti, ‘Anyi bira Er Imtamnyi biryi Bokwetebmounyi,’ eboka lak eranou bok, erda tukwetamnyi kurande deyok aryi erci lak enina uram ara mikib kum kurur. Bok, Niti lak enin uram yuk uram ara bisibkaboka iya mikib uram kurur. Niryi kunubde banun wa asi asing eibmarum ci, sunci Niti, ‘Anyi bira Er Imtamnyi biryi Bokwetebmounyi kurur,’ tenen bikwanurum. A wa ina ati Ni Nai Imtamnyi biryi, ‘Tanglona kum uca kunubdum,’ eboka takubdeibnou ati, Niryi a wa nirya asi kunubde banun.

³⁷Tonda, Ni Nai Imtamnyi Nisi bokwetebnounyi bibabyi Niti, ‘Anyi bira Ni Mi kurur,’ eboka lak ebmanou bok, sunci Ni Nai uram diboka kum kekebmandau, tonda Er kurur to milil ababyi asing kum eirindarur.

³⁸Tonda, sunci Nira Erci bokwetebnounyi uram asi dib kum teneranurum deyok aryi Er Imtamnyi Uram ara sun kanya dam iya kum kusurur.

³⁹Sunci, ‘Iya kam kun dinyi dobdobtibyi,’ tenen Er Imtamnyi Uram nirya asi teneiboka lilirandum. Bok, Er Imtamnyi Uram nirya aryi Niti, ‘Anyi bira Er Imtamnyi Mi kurur,’ eboka eteresurur bok, sunci Nisi dib kum teneranurum.

⁴⁰Ati, sunci Ni dam kum yangaranurum ati, iya kam kun dinyi kum dobdobkwandum.

⁴¹Sunda tukwetam nang aryi Niti, ‘Anyi bira Er Imtamnyi Mi kurur,’ ebnindate ara diboka ebnindate bok, Niryi sun kisal dangnina uram kum dobdobtinyi.

⁴²Niryi sun kanya yuk-yuk asi diboka bingsunun. Ni Nai Imtamnyi bisi boukwe kimna ara sun kanya dam ton kum kusurur ara Ni bingsunun.

⁴³Niryi, ‘Ni Nai Imtamnyi biryi Nisi bokwetebnou,’ eboka lak ebmasin bok, sunci Nisi dib kum teneranurum. Bok, yuknyi biryi er mining si deici aryi yandoka, ‘Nira Er Imtamnyi biryi bokdonoknounyi kunun,’ ebsute ura, sunci anyi uram asi dib tenebkwamandate.

⁴⁴Sun Yahudi yala nang se, tukwetam nang aryi kisal dangsina dinyi asi dororandum ura, sunci Er Imtamnyi tentoknyi Iya Erebdobnyi biryi kisal dangsina dinyi kum dororandum. Ati, sunci una kuboka Ni Er Imtamnyi Mi bisi dib tenebnindate do?

⁴⁵Sunda Er Imtamnyi urasintam aryi tatab-tatab ebmanto nang diboka kurandum bok, Niryi sunsi tatab-tatab ena kum kubkwansin. Erda, sun aibwe Musa biryi sunsi tatab-tatab ebkwansir. Ara, sunci, ‘Musa Uram kunubtibyi uca, Er Imtamnyi biryi nunsi lebkwansir,’ tenen dibde burandum bok, Musa biryi sunsi tatab-tatab ebkwansir ati ebman.

⁴⁶Sunci Musa Uram diboka dib kum tenerandum ati ebman. Musa bira Ni deyok ati minob bikoka lak etereramwe bok, sunci Musa Uram diboka dib kum tenerandum ati ato ebman. Ati, sunci Musa Uram diboka dib kum tenerandum deyok aryi, sunci Nibabyi diboka dib kum teneranurum.

⁴⁷Bok, sunci sun aibwe Musa Uram diboka dib kum tenerandum ati, sunci Ni uram ababyi dib tenebkwanindate do? Ato tenen kum.” Ato eboka Er Yesus biryi ebmou.