Read Futuna-Aniwa Yohanes 6 Bible Online

Yohanes 6 - Futuna-Aniwa bible

Yohanes 6

¹Kunmai ani, Er Yesus ab Er miliramnyi nang ab anabkaboka co ngun-ngun dub aryi Galilea mekwan deici banmai ani, me kouboka otam katum dam dam kum mutuk asi binmai. Galilea mekwan ara yuk si sinung ara Tiberias mekwan enung.

²Binmai ura, yuk nang ilinto ababyi Yesus bisi milibmai. Ara, Yesus biryi ilil tenen dinyi kikniboka yun taleramwe nang asi kweteramwe ba, asing eibmai deyok aryi sunci Yesus bisi milibmai.

³Ura, Yesus ab Er miliramnyi nang ab mutuk kon welebindoka tonkwa bukmai.

⁴A talak ara sun Yahudi yala nang kwaliramnyi kwalina si Paskah dam kubmou. Ara, “Nun aibweyabwe Mesir mutuk kuramnyi asi Er Imtamnyi biryi lebdeiboka taruk taleboka boyangaramwe,” tenen kanya teneiboka kwaliramnyi kwalina dam kubmou.

⁵Ura, Yesus biryi asing dinmou uca, ninyi ilinto aryi Er dam weleyanganmai asi asing eibmou. Ura, Erci Filipus bisi ato ebmou. “Ninyi ilinto weleyanganmang ara yina kikiman yibkwamang ati nunci una kubkwayeb do? Atei dam kum ton kum donung ati, nunci dantam bindoka roti dekwayeb do?” eboka asibdenmou.

⁶Erci ato eboka asibdenmou ara “Filipus biryi Nisi dib tenebmanir do?” tenen ati asibdenmou. Er Yesus biryi, “Ilil tenen dinyi kikniboka roti yibkarebnyi uca, a nang nirya yina kikiman yibkwamang,” tenena ara Er sirya bikdanmou cok, Erci teneboka ato eboka asibdenmou.

⁷Asibdenmou uca, Filipus biryi ato ebmou. “A mitikanun kubmar keil uang bitinyok aryi yina dekoka a nang yubwa asi yibkarebtibyi ba, yibkwamang ara kikiman kum kubkwamar. Nunci co bok ilinto bobtibiryi, roti ilinto dekoka a nang yubwa nirya asi roti mitik-mitik teleboka-teleboka karebtibyi ababyi, karebmatibyi bok, yibting ababyi kikiman kum yibting,” ebmou.

⁸Uca, Er Yesus miliramnyi nang kankan aryi yuknyi tentok si Andreas biryi ato ebmou. “A tikmar mi ara roti tokol amubaryi ab mekinaiya bitinyi ab kuboka bobmar. Bok, a mitikto roti tokol ab mitikto mekinaiya ab bobmar dinyi akiryok, nunci una kuboka a bulubmang nang nirya asi kikiman yibkarebtibyi do?” Ara, Simon Petrus er weit si Andreas biryi ato ebmou.

⁹

¹⁰Ebmou ba, Yesus biryi ato ebmou. “Sunci sun buluryanmang nang asi, ‘Bukdarur,’ ebdarur,” ebmou. A kubmai dam ara maning ilinto kubmou dam asi sun buluryanganmai nang ara ninyi lima ribu baryi bukokmai.

¹¹Sirya bukmai ura, Er Yesus biryi a roti tokol amubaryi asi dobtalebmou ura, Erci Er Imtamnyi bisi, “Ei Ni Nai,” eboka kibmou ura, Erci a roti asi toboka-toboka bokeibmou. Toboka bokeibmou uca, a roti ara mitikanun kubmou asi ilinto kibmou ba, a bulubmai nang nirya kikiman yibmai. Ba, mekinaiya bitinyi ababyi neiktoto tub kwilikoka bokeibmou uca, ilinto kibmou ba, sun bulubmai nang nirya aryi kikiman yibmai.

¹²Ura, sun bulubmai nang nirya aryi kikiman yinmai ani, sirya boubmou ura, Er Yesus biryi Er miliramnyi nang asi ato ebmou. “Kablobmang yina ara ton talyi bai donokingnyei ati bulubdarur,” ebmou.

¹³Ura, bulubdeibmai ura, kablobmai yina ara ilinto kubmou ati eibmai. Ati, sunci kablobmai yina asi bulubdeiboka win aling amolbaryi langdeiboka dongobmai. Ara, ninyi yana yubwa aryi roti tokol amubaryi atikwe kikiman yibmai ani, sun kablobmai yina langdeiboka kubmou.

¹⁴Ura, sun bulubmai nang aryi Er Yesus biryi ilil tenen dinyi kiknibmou asi asing eibmai ura, sunci ato ebkalibdanmai. “Anyi bira Er Imtamnyi kunubkwande dinyi ebdeibmaca bobana deyoknyi kurur tenebmab. Musa biryi minob ebdeibmou to, Anyi bira ninyi kankan sirya yanmar ati nun dib tenebmab,” ebdanmai.

¹⁵Ura, sun bulubmai nang aryi, “Yesus bisi taleboka weik sienyi kibdeibkwayeb,” tenebmai. Bok, Yesus biryi sun tenen dinyi bikmou ura, Erci anaboka Er yuk bindoka mutuk kon dub ai welebindobmou.

¹⁶Sirya kunuk dakmou ura, Er Yesus miliramnyi nang mutuk kon aryi kuboka yurbindoka mekwan me katum dam tamurbinmai.

¹⁷Mekwan me katum dam binmai ura, sunci co ngun-ngun dub wekmai ura, mekwan me deici banmai. Ara, “Mekwan kouboka abibiryi, Kapernaum atei dam binkwayeb,” tenen banmai. Ura, sirya kunuk dakmou bok, Er Yesus bira sun dam kum yanmou bok, sun yuk banmai.

¹⁸Sun yuk banmai bok, ibalya mikib kuboka donmou uca, me kwatiboka lontik-lontik ebmou.

¹⁹Ura, sunci mekwan noutam banmai ba, Yesus sun dam yanmou. Ara, mekwan me deici aryi yibanmou cok, sunda co ngun-ngun kubmai nang dam yanmou. Yanmou ba, sun miliramnyi nang ara, “A yanganmaranyi bira Yesus kubmar,” tenen kum bikmai ati, sun kanya ara ilil weik kubmou.

²⁰Sun kanya ara ilil weik kubmou bok, Yesus biryi sunsi ato ebmou. “Ilil kubsicei. Nira sun Du a kunum yanganman,” ebmou.

²¹Ato ebmou ba, sunci, “Co ngun-ngun dub ur wengyarum,” ebmai. Co ngun-ngun umbura wengbinmou ura, barabyi ani, sunci, “Binkwamab,” tenebmai ci, banmai atei katum dam sirya dararbinmai.

²²Ura mabmai ani, berekmou ura, sun roti yibkarebmai nang ara mekwan katum dam otam tuba kunmai. Ati, sunci dinmai uca, yuk co ngun-ngun ara ton kum eibmai, erda Yesus miliramnyi nang wekoka anabdobmai co ngun-ngun kubmoua ab, Er Yesus sun ab tonkwa kum binmai ab aryi sunci ato tenebmai, “Yesus bira atam tuba kunmar,” tenebmai.

²³Bok, Tiberias atei aryi kuboka yuk nang ababyi co ngun-ngun mikbaryi deici aryi yanmai. A nang ara, “Nunbabyi ilil tenen dinyi asing eibtibyi,” tenen Yesus biryi ilil tenen dinyi kiknibmou ai yanmai. Ara, Er Yesus biryi Er Imtamnyi bisi, “Ei Ni Nai,” ebmou ci, sun bulubmai nang asi roti yibkarebmou ai yanmai.

²⁴Ura, sun bulubmai nang aryi dinmai uca, Er Yesus bisi kum eibmai ura, sunci, “Yesus bibabyi Er miliramnyi nang ababyi anaboka bindobmang,” tenebmai ura, sunci a yanmai co ngun-ngun wekoka mekwan deici kuboka Kapernaum atei binmai. Ara, “Yesus ab ebdatibyi,” tenen ingkirikmai ci, Kapernaum atei binmai.

²⁵Ura, Yesus bira Kapernaum atei dam kuboka mekwan katum dam kubmou ba, sun bulubmai nang aryi yandoka Ersi eibmai. Eibmai ura, sunci Ersi ato eboka asibdenmai. “Ninyi eterenanyi, Kan dan talak aryi atam yanmarim do?” eboka asibdenmai.

²⁶Ato eboka asibdenmai bok, Yesus biryi sunsi ato ebmou. “Niryi sunsi dib en uram lak ebkwinsin ati, sunci diboka kekendarur. Sunci Nisi ingkiringmanurum ara Niryi ilil tenen dinyi deici aryi dib en uram lak kibdeibmase ati Nisi kum ingkiringmanurum. Erda, Niryi sunsi roti karebmasise uca, sun mundu boubmasou deyok aryi, sunci Nisi ingkiringmanurum.

²⁷Ati, sunci, ‘Tukwetam roti yibkwayeb,’ tenen busul kuboka wa ibmunyei. A roti ara lubkwamariryok, tiya atikwe kurur. Erda, ‘Iya kam kurdeirin roti yibkwayeb,’ tenen busul kuboka wa ibdarur. Ni Ninyi Dasinyi biryi sunbabyi ato roti karebkwansin. Ni Nai Imtamnyi biryi Niti, ‘Dib en uram diboka etererandimnyi,’ eboka kisal dakmanou ati sunci Nisi dib tenebnindarur,” ebmou.

²⁸Ebmou ba, sunci Ersi ato eboka asibdenmai. “Ato ebmarim ura, nunci una kubtibyi uca, Er Imtamnyi biryi arungdeirisurur wa asi kunubtibyi do?” eboka asibdenmai.

²⁹Ato eboka asibdenmai ba, Yesus biryi sunsi ato ebmou. “Er Imtamnyi tenerur wa asi ibkwamunyi ara ato kuboka ibkwandarur. Ni Er Imtamnyi biryi bokwetebnounyi bisi sunci dib tenebnindarur. Nisi dib tenebnindate ara Er Imtamnyi biryi arungdeirisurur wa kunubdate,” ebmou.

³⁰Uca, sunci Ersi ato ebmai, “Kanci nun urasintam asi una kubdetum eibtibiryi Kansi dib tenebkitibyi do? Kanci ilil tenen dinyi kibnibsiminyi uca, nunci Kansi dib tenebkitibyi.

³¹Nun aibweyabwe minob kuramnyi nang ara ninyi kun kum mutuk kuramnyi ura, imtam aryi kuboka roti si Mana yiramnyi. Ara, Er Imtamnyi Uram umbura aryi a deyok ati ato eteresurur, ‘Erci sunsi imtam roti kareramwe ba, yiramnyi,’ eboka eteresurur,” ebmai. (Mazmur 78:24)

³²Ato ebmai ura, Yesus biryi sunsi ato ebmou, “Niryi sunsi dib en uram ton ebkwinsin ati diboka kekendarur. Sun aibweyabwe asi a roti kareramunyi bira Musa biryi kum kareramwe. Erda, Ni Nai Imtamnyi biryi sunsi a roti kareramwe ani, ukuryok ababyi imtam aryi kuboka roti dib dinyi karesurur.

³³Imtam aryi kuboka roti ara Nira Er Imtamnyi biryi Bokwetebnounyi kunun ati ebman. Nira imtam aryi kuboka roti kunun cok, sun im dangna tukwe dangna nang asi kam kurdeirin dinyi karenun.”

³⁴Ato ebmou ba, sunci Ersi ato eboka molobmai. “Nai, ukuryok aryi kuboka Kanci nunsi a roti iya karebsurum,” eboka molobmai.

³⁵Ebmai ba, Yesus biryi ato lak ebmou. “Nira ninyi kam kurdeirin roti kunun. Ati, sun Ni dam yandobingnyi nang ara kwaning tuba kum atabkwande. Ba, unanyi-unaner aryi Nisi dib tenebningnyi nang ara me tuba kum atabkwande.

³⁶Ba, sunci Nisi asing eibmanurum cok, Nisi dib kum teneranurum. Ara, sirya ebmasin to, tubto ebmasin.

³⁷Ati, Ni Nai Imtamnyi biryi Ni taruk dam karebmanou nang nirya ara Ni dam yankwaming. Ati, sun Ni dam yandobkwaming nang ara Niryi kum yakdonokwan.

³⁸Nira imtam aryi kuboka yuryanganmase ara, ‘Ni yuk aryi tenebmanyi tok kunubde binkwan,’ tenen kum yuryanganmase. Erda, ‘Ni bokwetebnounyi biryi teleb tenebmaci tok akwe kunubde binkwan,’ tenen yuryanganmase. A deyok aryi, Niryi Ni dam yankwaming nang asi kum bai donokwan ati ebman.

³⁹Ura, Ni bokwetebnounyi biryi teleb tenerur to ara ato. Erci Nisi karebmanou nang ati, ‘Ninyi tentok ababyi waningminingna kum uca kalikdum,’ ebdeibmanou. Ani, sirya kobdob uki tum berekci ura, Niryi a nang nirya asi kam bukeibkwan. Er Imtamnyi biryi a nang ati teleb tenerur to ara ato ebmasin.

⁴⁰Ni Nai Imtamnyi teleb tenerur to ara ato. Unanyi-unaner aryi Ni Er Imtamnyi Mi asing diboka eibningiryi dib tenebningnyi uca, iya kam kun dinyi dobdobkwaming. Ara, sirya kobdob uki tum berekci ura, Niryi a nang nirya asi kam bukeibkwan,” ebmou.

⁴¹Yesus biryi ato ebmou ura, sun Yahudi yala nang aryi, “A uram kekena ati nun li,” ebdanmai. Ara, Erci, “Nira imtam roti asi yuryanmasiryi kunun,” ebdanmou deyok aryi, sunci, “A uram kekena nun li,” ebdanmai.

⁴²Ebdanmai cok, sunci ato ebdanmai. “Anyi bira Yusuf er mi Yesus kurur cok, una deyok aryi Erci, ‘Nira imtam roti asi yuryanmasiryi kunun,’ ebdanmar do? Anyi Er nai ab Er kwin ab ara tukwetam nang bitinyi akwe kururung ara nun bingnub ati a uram dib kum tenebmab,” ebdanmai.

⁴³Ebdanmai bok, Yesus biryi sunsi ato ebmou. “Sunci sun mamun aryi, ‘A uram kekena ati nun li,’ erdanmarum ara takdarur.

⁴⁴Ninyi tentok ababyi er yuk aryi Ni dam kum yanute. Ara, Ni Nai Imtamnyi biryi taruk taleboka kum boyate ura, ninyi tentok ababyi Ni dam kum yanute. Ba, Er Imtamnyi biryi taruk taleboka Ni dam bobinmaci nang asi Niryi kam bukeibkwan. Ara, sirya kobdob uki tum berekmaci ura, Niryi sunsi kam bukeibkwan.

⁴⁵Er Imtamnyi kunubkwande dinyi ebdeibmaci to lak etereramnyi nang ara a deyok ati ato eboka minob eramnyi. ‘Ninyi nirya asi Er Imtamnyi biryi eterebkwande ba, dib en uram bingdon nang kubkwaming.’ (Yesaya 54:13) Ati, sun Er Imtamnyi Uram kekeramingnyi nang ara Ni dam yankwaning.

⁴⁶Nirya ato ebman ara ninyi tentok ababyi ara Ni Nai Imtamnyi bisi asing ton kum eirinung. Erda, Ni tentok asi Er Imtamnyi biryi bokwetebnounyi bisi Er Imtamnyi bisi asing eiririranse.

⁴⁷Niryi sunsi dib en uram ton ebkwinsin ati diboka kekendarur. Unanyi-unaner aryi Nisi dib tenebningnyi nang ara iya kam kun dinyi sirya doronung.

⁴⁸Nira ninyi kam kurdeirin roti kunun.

⁴⁹Sun aibweyabwe ara ninyi kun kum mutuk kuramiryi, roti si Mana yiramnyi nang ara roti si Mana yiramiryok, sirya diamnyi.

⁵⁰Bok, Nira imtam aryi kuboka yuryase roti a kunum. Ati, sun Nisi yiraningnyi nang ara iya kum dibkwaming.

⁵¹Nira imtam aryi kuboka yuryase roti a kunum. Sun a roti asi yiraningnyi nang ara iya kam kubkwaming. A ebmasin roti ara Ni nong a kunum. Ati, Niryi sun im dangna tukwe dangna nang asi kam kun dinyi karebkwan ati Niryi Nidamnyi karebdankwan,” ebmou.

⁵²Yesus biryi ato ebmou ba, sun Yahudi yala nang aryi sun mamun lulubdanmai ci, ato eboka asibdanmai. “Anyi Er nong yibkwamatibyi ati ara una kuboka karebsute ba, yibkwamatibyi do?”

⁵³Ato ebdanmai bok, Yesus biryi sunsi ato ebmou. “Niryi sunsi dib en uram ton ebkwinsin ati diboka kekendarur. Sunci Ni Ninyi Dasinyi tub ab ining ab kum yibmunyi ura, sunci kam kun dinyi kum dobdobkwandum.

⁵⁴Ni tub ara yin dinyi diboka kurur. Tonda, Ni ining ababyi yin dinyi diboka kurur. A deyok aryi unanyi-unaner aryi Ni tub ab Ni ining ab yiramingnyi nang ara iya kam kun dinyi sirya dobdobmangiryi. Tonda, sirya kobdob uki tum berekci ura, Niryi a nang asi kam bukeibkwan.

⁵⁵

⁵⁶Unanyi-unaner aryi Ni tub ab Ni ining ab yiramingnyi nang ara Ni dam kun nang diboka kunung ba, Nibabyi diboka a nang dam kunanyi kunun.

⁵⁷Ni Nai Imtamnyi biryi Nisi bokwetebnou ci, Nisi kam kurdeirin dinyi karenurur to, Nibabyi kam kurdeirin deyoknyi kunun. Ara, sun Ni tub ab ining ab yibmaningnyi nang asi neiktoto kam kurdeirin dinyi karebkwan.

⁵⁸Nira imtam roti asi yuryanmasiryi kunun. Ati, sun aibweyabwe ara ninyi kun kum mutuk kuramiryi, roti si Mana yiramnyi nang ara diamnyi. Bok, sun Ni imtam roti kunun asi yiramingnyi nang ara kum dibkwaming. Erda, iya kam kun dinyi dobdobkwaming,” ebmou.

⁵⁹Er Yesus biryi ato eboka eterebmou ara Kapernaum atei Musa Uram eteren ai aryi eterenmou ci, sun buluboka akai wekmai nang asi eterebmou.

⁶⁰Ura, Er Yesus biryi ato eboka eterebmou ati, ninyi ilinto aryi ato ebdanmai. “A eterenmasir uram ara ikin weik kubmasir. Ati, unanyi-unaner aryi ato en uram dobkdobkwamote do?” ebdanmai.

⁶¹Ura, Er Yesus bisi milibmai nang aryi ato ebdanmai ati Yesus biryi bikmou ati, Erci sunsi ato ebmou. “Niryi ato eterebmasin ati, sun yu kanya bobmarum do?

⁶²Ni Ninyi Dasinyi kunun cok, Ni minob kuranse ai tubto welebinkwan ati ebmasin. Ati, Ni welebinkwan asi asing eibnindate ura, sunci tabakoka yu kanya boboka Nisi dib kum tenebkwanindate.

⁶³Er Imtamnyi Kanya Roh Kudus aryi ninyi kam kurdeirin dinyi karesurur ati ebman. Bok, ninyi kanya aryi kam kurdeirin dinyi kum karerur ati ebman. Ati, Niryi sunsi eterebmasin uram ara Roh Kudus aryi eteren uram asi eteresusun. Tonda, ninyi kanya kam kurdeirin uram kurur.

⁶⁴Bok, sun kankan aryi ton nang ara Nisi dib kum teneranurum,” ebmou. Ato ebmou ara, Yesus biryi Er miliramnyi nang asi yuma kobdob aryi bingnamwe. “A nang ara Nisi dib tenebkwaning ba, o nang ara Nisi dib kum tenebkwaning,” tenena ara Er bingnamwe. Tonda, “Nisi kikibkwaniranyi bira onyi biryi kikibkwanir,” tenena ara Er bingnamwe.

⁶⁵Ura, Yesus biryi eterebmurubmou ci, Erci sunsi ato ebmou. “Sunci Nisi dib kum teneranurum deyok aryi, Niryi sunsi ato eboka eterebmasise. ‘Ninyi tentok ababyi Ni dam kum yanute. Ara, Er Imtamnyi biryi mikib kum karebte uca, ninyi tentok ababyi Ni dam kum yanute,’” ebmou.

⁶⁶Yesus biryi ato eboka eterebmou ba, ninyi ilinto ara Ersi miliramiryok, takloboka binsekdobmai ci, Er Yesus bisi tuba kum miliramnyi.

⁶⁷Ura, Yesus biryi Er miliramnyi nang amolbaryi asi ato eboka asibdenmou. “Ninyi ilinto ara Nisi taklobmaning ati sunbabyi Nisi taklobkwanurum do?” eboka asibdenmou.

⁶⁸Ato eboka asibdenmou uca, Simon Petrus biryi Ersi ato ebmou. “Nai Du o, nunci Kansi taklobkitibyi ura, nun unanyi bisi bitibyi do? Kanci etereransirim uram nirya ara iya kam kun dinyi akwe etereransirim ati ebman.

⁶⁹Ati, Kanda Er Imtamnyi biryi wibdeiboka bokwetebkounyi kurum ara nunci bikoka dib tenekunub,” ebmou.

⁷⁰Ebmou ba, Er Yesus biryi ato ebmou. “Niryi sunda amolbaryi nang asi wibdeibmasise. Wibdeibmasise bok, sun kankan aryi kuboka tentoknyi bira isa sienyi milinanyi kurur ati ebman,” ebmou.

⁷¹Er Yesus biryi ato ebmou ara, Yudas bira Simon Iskariot er mi ati ato ebmou. Anyi bira Yesus miliramnyi nang kankan kuramuryok, Er Yesus bisi aminda aryi kikibkwamunyi kuramwe.