Read Futuna-Aniwa Yohanes 7 Bible Online

Yohanes 7 - Futuna-Aniwa bible

Yohanes 7

¹Kunmai ani, Er Yesus Galilea mutuk yibinkiringnamwe. Ara, Erci, “Sun Yahudi yala nang aryi, ‘Obtibyi,’ tenen marmun yiraning,” tenen bikmou ati, Erci kisibdoboka Yudea mutuk kum binmou ura, Galilea mutuk binmou.

²Galilea mutuk yibinkiringnamwe ba, weik kwalina si, “Co Bok aryi Dururdeirin Ai umbura Tiya Kubkwayeb,” tenen kwalina dam kubmou. Ati, Yesus Er weityabwe kobdoba ara Yesus bisi dib kum tenebmai cok, sunci Ersi ato ebmai.

³“Kanci anaboka Yudea mutuk birum. Ara, Kan miliranking nang aryi Kansi asing eibkwanking ati, Kanci Yudea mutuk bindoka ilil tenen dinyi yuk-yuk kiknibdum,” ebmai.

⁴Ebmai cok, sunci Yesus bisi ato ebmai. “Kanci ilil tenen dinyi kiknirandim ati inibdeiboka kiknibminyei. Erda, ninyi nirya asing eibting ati, Kanci ilil tenen dinyi laktoto kiknibdum. Ninyi tentok ababyi ara, ‘Ni sienyi kibkwan,’ tenebdaci ura, erdamnyi kum inibdeibdankwante,” ebmai.

⁵Ninyi ilinto aryi Yesus bisi dib kum tenebmai cok, Yesus Er weityabwe kobdoba ababyi Ersi dib kum tenebmai ati sunci Ersi ato ebmai.

⁶Dib kum tenebmai deyok aryi, Er Yesus biryi sunsi ato ebmou. “Nira Yudea mutuk binkwan bok, Ni binkwan uki tum ara kum berekmar ati ebmasin. Sunbabyi Yerusalem atei binkwandum cok, ‘Bisik bana uki tum nirya ara kikiman kubsute,’ tenebmarum. Ba, Niryi Yudea mutuk binkwan uki tum kum berekmar ati ebman.

⁷Sun malyi dinyi kunurmurun nang ara sunti, ‘Nun li,’ tenen bimsa kum yaransing. Ba, a nang aryi Niti, ‘Nun li,’ tenen bimsa yaraning. Ati, Niryi sun malyi kurmurun nang asi, ‘Malyi dinyi kubmarum,’ lak enun ati, a nang aryi Niti, ‘Nun li,’ teneraning.

⁸Sunci, ‘Kwalina si, “Co Bok aryi Kalun Ai,” kwalibkwayeb,’ tenen Yerusalem atei minob ur bindarur. Niryi ukuryok kum binkun. Ni Yerusalem atei binkwan uki tum kum berekmar ati, Ni ukuryok kum binkwan,” ebmou.

⁹Yesus biryi ato ebmou ura, Er Galilea mutuk tuba kubmou.

¹⁰Ura, Yesus Er weityabwe kobdoba aryi, “Kwalirbinkwayeb,” tenen anaboka sirya binmai. Sirya binmai ura, Yesus bibabyi anaboka Yerusalem atei binmou. Ara, laktoto kum binmou. Erda, iniboka binmou.

¹¹Ura, kwalina tum sirya berekmou ura, sun Yahudi yala nang sien nang aryi Yesus biti, “Kwalina dam a yanmaci ura, obkwayeb,” tenen ingkiringmaci dibde bukmai. Dibde bukmai cok, sunci Erti, “Dantam kubmar do?” tenebmai.

¹²Tonda, sun bulubmai nang kankan ababyi ninyi ilinto aryi murmur eboka Er Yesus deyok ati uram mamun sisikdanmai. Ton nang ara Erti, “Anyi telebnyi kubmar,” ebmai. Ba, yuk nang aryi, “Ato kuma. Anyi bira ninyi waningminingnanyi kubmar,” ebmai.

¹³Ato ebdanmai ara laktoto kum ebdanmai. Ara, sunci, “Sun Yahudi yala nang sien nang aryi malyi kibsingnyei,” tenen ilil kanya bobmai ati, Er Yesus deyok ati laktoto kum ebmai.

¹⁴Ura, kwalina sirya kwalibkalibmai ba, Er Yesus Yerusalem atei aryi kuboka Bait Allah ai ara Er Imtamnyi bisi dama deirin ai weleyanmou. Sirya weleyanmou ura, Erci sun bulubmai nang asi eterebkalibmou.

¹⁵Ura, sun Yahudi yala nang aryi Er eterena uram kekebmai ba, sunci Er Yesus biti, “Naie,” tenebmai. Ati, sunci ato eboka si sisikdanmai, “Anyi bira Musa Uram lilibde eteren ai sien ai kum kerek sekamwe bok, Erci una kuboka bikdob uram bikoka nunsi eterebmasir do?” eboka asibdanmai.

¹⁶Ato eboka asibdanmai ba, Yesus biryi sunsi ato ebmou. “Niryi sunsi eterebmasin uram ara Ni yuk aryi tenebse uram kuma. Erda, Ni Nai Imtamnyi Ni bokwetebnounyi biryi Nisi, ‘Ato-ato eboka eterebdum,’ ebdeibmanir to Niryi eterebmasin.

¹⁷Unanyi-unaner aryi, ‘Er Imtamnyi Uram kunubde binkwayeb,’ tenen nang ara Niti, ‘Er Imtamnyi Uram ebmuruboka eterebmasir,’ tenen bikwaning. Ba, Niryi Ni kanya yuk aryi eterebtinyi uca, a nang ara Niti, ‘Er kanya yuk aryi tenebmaci tok etereransir,’ tenen bikniting.

¹⁸Sun mining tenen kanya aryi kuboka eteren nang ara, ‘Nundamnyi erebdeibdankwayeb,’ tenen etereraming. Ba, Niryi, ‘Ni Nai bokwetebnounyi si weik erebdeibkwan,’ tenen eterenun ati dib en uram eterenanyi kunun. Tola uram tentok ababyi Ni kum talenun.

¹⁹Musa biryi sunsi, ‘Ukubdarur-Ukuna mem,’ en uram ebdeibmasou. Ebdeibmasou bok, sunci Musa Uram yan yanirandum. Sunci Niti, ‘Obtibyi,’ tenen marmun yiranurum ati ato ebmasin. Unato ati sunci Niti, ‘Obtibyi,’ tenen ingkiringnanurum do?” ebmou.

²⁰Er Yesus biryi ato ebmou bok, sun bulubmai nang aryi Ersi ato ebmai. “Kanda isa kanya wekmakiranyi kurum se. Unanyi biryi Kanti, ‘Obtinyi,’ tenebmakir do?” ebmai.

²¹Ebmai bok, Er Yesus biryi sunsi ato ebmou. “Niryi ilil tenen dinyi kiknibmase ba, sun nirya ara, ‘Naie,’ tenebmanindau.

²²Ilil tenen dinyi kiknibmase ati, ‘Naie,’ tenebmanindau cok, sunci Niti tatab-tatab ebmanindau. Ara, ‘Nunda Yahudi yala nang taruk louboka wa in kum uki tum kubmou ba, ninyi kwetebmou se,’ eboka tatab-tatab ebmanindau. Ni deyok kum kubmanir ati, sunci unato ati Nisi tatab-tatab ebmanindau do? Ura, Musa biryi, ‘Sun mabwe den bama sekdarur,’ eboka arukdeibmou uca, sunci a uram kunubde barandum. Kunubde baramun cok, wa in kum uki tum si Sabat tum berekci uca, den bama kum sengnandum do? Ato tenen kum. Erda, sunci, ‘Musa Uram yan yanibibyei,’ tenen wa in kum uki tum kurande ababyi, den bama sengnandum. Ura, Niryi uki si Sabat tum ninyi kwetebmase ara Musa Uram yan yanibmase do? Ato tenen kum. Ati, sunci unato ati Niti yu kanya bobmanurum do? Ura, Niryi, ‘Musa biryi, “Sun mabwe den bama sekdarur,”’ eboka arukdeibsou ebman bok, Musa biryi deyok kouboka ato kum ebdeibmasou. Erda, nun aibweyabwe Musa kum deibmai talak aryi minob kuramnyi nang aryi, ‘Sun mabwe den bama sekdarur,’ ebdeibmasei.

²³

²⁴Sunci alib dinyi deici aryok talyi ati, ‘Malinyi,’ teneranurum ati takdarur. Erda, deyok diboka lilibmunyi uca, ‘Ato-ato dinyi ara dib dinyi kubmar,’ tenen bikwandum,” ebmou.

²⁵Er Yesus biryi ato ebmou ba, sun Yerusalem atei nang kankan aryi ton nang ato ebdanmai. “A uram eterebmasiranyi bira nun sien nang aryi, ‘Obtibyi,’ tenen marmun yiramingnyi kubmar darib?

²⁶Ba, sun ton dibdendarur e. Anyi biryi uram lak eterenmar bok, nun sien nang aryi bisik sengna uram ton kum ebmang. Ati, nun sien nang aryi Anyi biti, ‘Er Imtamnyi biryi ebdeibmou lemsina weik sienyi kubmar,’ teneraming darib?

²⁷Nunci Anyi biti, ‘A mutuk aryi kuboka, akatei aryi kuboka yanganmunyi kurur,’ tenen bikmab ati nunci Anyi biti, ‘Er Imtamnyi biryi lemsina Weik Sienyi kum kurur,’ tenen bikmab. Lemsina weik sienyi nun dam yasici ba, ninyi aryi Erti, ‘Dantam aryi yanmar do?’ tenen kum bikwamib ati ato ebmab,” ebdanmai.

²⁸Ura, Yesus biryi Er Imtamnyi dama deirin ai dam tuba kubmou ci, eterebmou cok, Erci uram doboka ato ebmou, “Diba, sunci Ni ab Ni kuranse atei ab bingnanurum bok, sunci Ni Nai bisi diboka kum bingnandum. Niryi Ni kanya yuk aryi, ‘Tukwetam yuryibinkwan,’ tenena deici aryi sun dam kum yanmasise. Erda, Ni Nai Imtamnyi Nisi bokwetebnounyi biryi Nisi ebdeibnou deici aryi Niryi sun dam yanmasise. Ni bokwetebnounyi bira dib en uram erutnyi kurur ati ebman. Ba, sunci Ni Nai bokwetebnounyi bisi kum bingdarur.

²⁹Ba, Niryi Ni Nai Imtamnyi bisi bingnun. Ni Er ab tonkwa kuranumwe ani, yuryanganmasise ati, Niryi Ersi bingnun. Tonda, Erci Nisi bokwetebnou ati, Niryi Ersi bingnun,” ebmou.

³⁰Er Yesus biryi ato ebmou ba, sun Yahudi yala nang aryi, “Talebkwayeb,” tenebmai cok, Er Yesus bisi kum talebmai. Ara, Er Imtamnyi biryi teleb tenebmou to, Yesus bisi talebkwamnyi uki tum kum berekmou ati, sunci Ersi kum talebmai.

³¹Sun bulubmai nang kankan aryi ton nang ara, “Talebtibyi,” tenebmai bok, yuk nang ara Er Yesus bisi dib tenebmai. Ati, sunci Er Yesus deyok ati ato ebdanmai, “Ilil tenen dinyi ilinto kiknirande ati, Erda Er Imtamnyi biryi ebdeibsou ninyi lemsina ati Weik Sienyi kubmar ati tenebmab. Yuknyi bira lemsina weik sienyi kubte ura, erci Yesus bisi bisibkaboka ilil tenen dinyi tabakoka kiknibte do? Ato kum ukubte,” ebdanmai.

³²Ato eboka sun akai buluboka wekmai nang aryi Er Yesus deyok murmururdongonmaci, “Lemsina weik sienyi kurur do?” ebdanmai asi sun Farisi nang kekebmai. Ato en uram kekebmai uca, sun Er Imtamnyi kan ninyi kan noutam kuboka antanirdeirin deyok nang ab sun Farisi nang ab aryi sun Er Imtamnyi ai kalingna nang asi ato eboka arukdeibmai. “Anyi bisi taleboka tabwe debdarur.” Ato eboka arukdeibmai uca, sunci Er Yesus bisi talerbinmai cok, Ersi kum talebmai.

³³Ura, Yesus biryi ato ebmou. “Uki mitik sun ab tonkwa kubmurubmabyi ani, Niryi anaboka Ni Nai Imtamnyi Nisi bokwetebnounyi dam tamuboka binkwan.

³⁴Sirya binmanyi asi sunci Niti, ‘Dantam binmar do?’ tenen ingkiriknumun cok, asing kum eibkwanurum. Niryi binkwan ai ara sunci binman kum kubkwandum.”

³⁵Ato ebmou ba, sun Yahudi yala nang aryi ato ebdanmai. “Anyi bira dantam binkwande asi nun kum eibkwayeb ati, ‘Ingkiringmanumunyi ababyi, sunci Nisi asing kum eibkwanurum,’ ebmasir do? Erci sun dantam-dantam binsekmai Yahudi yala nang ara sun Yunani yala nang mutuk kankan aryi kuramingnyi nang asi etererbinkwande ati ebdanmar do?” ebdanmai.

³⁶Ebmai cok, sunci ton ato ebdanmai. “Unato ati Erci nunsi ato ebmasir? ‘Sunci Nisi ingkiriknumunyi ababyi, Nisi asing kum eibkwanurum,’ ebmasir. Tonda, ‘Niryi binkwan ai ara sunda binman kum kubkwandum,’ ebmasir,” ebdandoka sun kanya kankana kubmou.

³⁷Ura, kwalina si, “Co Bok aryi Kalun Ai Tiya Kubkwayeb,” kwalibmai cok, a kwalina uki sirya kobdob berekmou. A uki tum ara a kwalina uki tum iya erebdob uki tum berekmou ura, Er Yesus biryi tikokmou ci, uram weik doboka ato ebmou. “Unanyi-unaner ara me ataransici nang ara Ni dam yandoka me yibdarur.

³⁸Unanyi-unaner aryi Nisi dib tenebningnyi nang ara Niryi Er Imtamnyi Kanya Roh Kudus asi karebkwan. Ura, Roh Kudus karebci uca, sun kanya ara kam kurdeirin me u deyok tam ato kibsici uca, sun kankan aryi kuboka weik yiban me yuk-yuk langdeiboka anabkwaming. Ara, Er Imtamnyi Uram biryi minob ebmou to kunubkwande ati ebman.”

³⁹Ato ebmou cok, Erci Roh Kudus ati ato ebmou. Ara, “Sun Nisi dib tenebningnyi nang ara aminda aryi Roh Kudus langdeiboka dobdobkwaming,” tenen Erci ato ebmou. A talak ara Er Imtamnyi biryi Yesus bisi kum erebdeibmou ati, Erci Roh Kudus asi langdeiboka kum karebmou.

⁴⁰Er Yesus biryi ato ebmou ba, sun Er Uram keken nang kankan aryi ton nang ara ato ebdanmai. “Anyi bira Er Imtamnyi kunubkwande dinyi ebdeibmaca bobananyi diboka kurur,” ebmai.

⁴¹Ba, yuk nang aryi ato ebmai. “Anyi bira Er Imtamnyi biryi ebdeibmunyi ninyi lemsina ati Weik Sienyi diboka kurur,” ebmai. Ba, yuk nang aryi ato ebmai. “Anyi bira Galilea mutuknyi kurur ati, Er una kuboka ninyi lemsina Weik Sienyi kubte do?” ebmai.

⁴²Ebmai cok, sunci ato ebmai. “Er Imtamnyi Uram umbura aryi Anyi deyok ati ato eboka eteresurur. ‘Ninyi lemsina ati Weik Sienyi bira nun aibwe Daud yalanyi kubdiryok, nun aibwe Daud kuramwe atei Betlehem atei aryi kuboka yankwande,’ eboka eteresurur,” ebdanmai.

⁴³Ato erdanmai uca, sun bulubmai nang ara Er Yesus deyok ati yuk dinyi-yuk dinyi teneibmai ci, sun mamun lulubdanmai.

⁴⁴Ura, sun kankan aryi ton nang aryi Yesus bisi, “Talebkwayeb,” tenebmai cok, ninyi tentok ababyi ersi kum talebmou.

⁴⁵A sirya ura, sun Er Imtamnyi ai kalingna nang aryi Yesus bisi kum talebmai cok, sunci sun Er Imtamnyi kan ninyi kan noutam kuboka antanirdeirin deyok nang ab Farisi nang ab asi tamurbinmai. Tamurbinmai ura, sunci sunsi ato eboka asibdenmai. “Sunda Anyi bira unatoa ati kum taleboka boyanmarum do?” eboka asibmai.

⁴⁶Asibdenmai uca, sunci ato ebmai. “Anyi bira diboka eterebmar ati nunci Ersi kum talebmab. Anyi biryi diboka etererur to, yuk nang aryi kum etereramnyi,” ebmai.

⁴⁷Ebmai bok, sun Farisi nang aryi sunsi ato ebkateibmai. “Anyi bira ninyi bowaningminingnande ati, sunbabyi bowanikminikmasir do?

⁴⁸Nunda Yahudi yala nang sien nang kankan aryi ninyi tentok ababyi Anyi bisi dib tenebmar do? Ato tenen kum. Tonda, nun Farisi nang kankan aryi ninyi tentok ababyi Anyi bisi dib tenebmar do?

⁴⁹Ato tenen kum. A bulubmang nang ara Musa Uram kum bingnung ati Anyi bisi dib tenebmang. A bulubmang nang ara sumna aryi tabwe debwe nang kunung ati ebmab,” ebmai.

⁵⁰Ato ebmai bok, sun kankan aryi tonyi si Nikodemus biryi asirdena ton asibdenmou. Anyi bira lukunda aryi Er Yesus dam minob binmounyi biryi ato eboka asibdenmou.

⁵¹“Musa Uram arungdeirisurur deici aryi nunci ninyi asi talyi tam tatab-tatab ebtibyi do? Tonda, nunci, ‘Una kubmumwe do?’ eboka kum asibdetibyi uca, Anyi biryi, ‘Ato-ato kuranse,’ kum ebmote bok, nunci yuk nang asi, ‘Anyi bira malyi dinyi kubmou,’ ebtibyi do? Musa Uram aryi ato eboka arungdeirisurur do?” eboka asibdenmou.

⁵²Ato ebmou bok, sun Farisi nang aryi ato ebmai. “Kanbabyi Galilea mutuknyi kurum do? Kanci Musa Uram asi diboka lilibderum. Lilinmaminyi uca, ‘Galilea mutuk aryi kuboka Er Imtamnyi Uram ebdeibmaci to lak etereramnyi nang kum anaraming,’ tenen bikwandim. A deyok aryi Anyi bira Er Imtamnyi Uram ebdeibmaci to lak etererandanyi kum kubmote,” ebmai.

⁵³A sirya ura, sun Yahudi yala nang ara anaboka sun atei yuk-yuk binsekmai.