Read Futuna-Aniwa Yohanes 8 Bible Online

Yohanes 8 - Futuna-Aniwa bible

Yohanes 8

¹Sun atei yuk-yuk barsengdonmai bok, Er Yesus bira anaboka mutuk kon si Zaitun welebinmou.

²Mabmou ani, belekuna kobdob ara Erci anaboka Bait Allah ai ara Er Imtamnyi dama deirin ai dam tamuboka yanmou. Yanmou ura, ninyi nirya buluboka Er dam kekerbinmai ba, Erci bukoka eterebmou.

³Ura, sun Musa Uram eteren nang ab sun Farisi nang ab yandoka ner tentok asi boyanmai. A ner ara talyi yobmou asi sunci eiboka talebmai ci, sun bulubmai nang urasintam boyanmai.

⁴Boyanmai ura, sunci Yesus bisi ato ebmai, “Nai ninyi Eterenanyi, a ner ara talyi yobmou ba, ninyi aryi eiboka talebmang ati boyanmab.

⁵Ati, ‘Ukubdarur-Ukuna mem,’ arukdeibmasou uram umbura aryi Musa biryi ato eboka ebdeiansou, ‘Talyi yon nerabwe ati keil yongoboka obdarur.’ Musa biryi ato eboka ebdeiansou ati, Kanci a ner ati una kubkwayeb ati ebdeibkwansirim do?” ebmai.

⁶Ato eboka asibdenmai cok, sunci Er Yesus biti, “Sakeibtibyi,” tenen asibdenmai. Ara, “‘Musa biryi arukdeibmasou uram kunubmunyei,’ ebsute uca, nunci Ersi tatab-tatab ebtibyi,” tenen asibdenmai. Ato tenen asibdenmai bok, Yesus biryi uram ton kum dekeibmou. Erda, Erci ngang dakdongoboka Er taruk du aryi tukwetam asi kerek sengdongonmou.

⁷Ura, sun Musa Uram eteren nang ab sun Farisi nang ab ara tanglona kum uca tuba-tuba asinmai ura, Er Yesus biryi Er nong ninikoka tikmou ura, ato ebmou. “Sun kankan aryi, ‘Ner ukula yobtinyi,’ iya ton kum tenerandinyi biryi erci yuma keil doboka a ner asi yongobci ba, sunci ur obdarur,” ebmou.

⁸Ato ebmou ura, Er Yesus bira tubto ngang dakdongoboka Er taruk du aryi tukwetam tamuboka kerek sengdongonmou.

⁹Ato ebmou uca, sun kekebmai nang aryi, “Nunbabyi ato kuboka malyi kubmoubwe se,” tenen bikdanmai ci, anaboka yuk-yuk binsekmai. Sun wise nang ara yuma kobdob binsekmai ani, sun kam nang ara aminda aryi barsengdonmai. A bulubmai nang nirya binsekdobmai ura, Yesus ab talyi yon ner ab akwe tonkwa bukmarei.

¹⁰Ura, Yesus biryi Er nong ninikoka tikokmou ura, Erci a ner asi ato eboka asibdenmou. “Nong, kansi boyanmakungwe nang ara dantam binsekdaming do? Ninyi tentok ababyi kansi ton kum wenebkwamakungwe do?” eboka asibdenmou.

¹¹Ato ebmou uca, a ner aryi Yesus bisi ato ebmou. “Ninyi tentok ababyi nisi ton kum wenebmanir,” ebmou. Ura, Er Yesus biryi ersi ato ebmou. “Ato ura, Nibabyi kansi kum wenebkwamakin. Ati, kanci ur anaboka bindobminyi ura, arub aryi kuboka malyi kun dinyi tamuboka dobdobminyei,” ebmou.

¹²Ura, ninyi buluboka wekmai nang asi Er Yesus tubto eterebmou ci, Erci sunsi ato ebmou. “Nira sun im dangna tukwe dangna nang ati berengdeirisununyi kunun. Ati, unanyi-unaner ara Nisi miliraningnyi nang ara kunuk dam kum yibinkwaming. Erda, berengna dinyi asing eibingnyi uca, iya kam kun dinyi dobdobkwaming,” ebmou.

¹³Ato ebmou ba, sun Farisi nang ara Ersi ato ebmai. “Kanci Kandamnyi biti, ‘Nira berengdeirisurununyi kunun,’ ebdanmarim ati, Kan lak en dinyi ara ninyi aryi, ‘Diba,’ tenebmakin kum uram asi ebdanmarim,” ebmai.

¹⁴Ato ebmai bok, Er Yesus biryi uram dekeiboka ato ebmou. “Nira Nidamnyi biti, ‘Imtam aryi kuboka yuryase,’ tenen diboka bingdanun. Tonda, ‘Imtam tubto welebinkwan,’ tenena ababyi Ni diboka bingdanun. A deyok aryi Niryi Nidamnyi biti uram lak ebdanman bok, Ni lak erdanin uram ara diba ati ebdanman. Bok, sunci Niti, ‘Dantam aryi yanganmou do?’ tenen diboka kum bingnanurum. Tonda, ‘Dantam binkwande do?’ tenen diboka kum bingnanurum.

¹⁵Sunci tukwetam tenen dinyi deici aryi, ‘A dinyi dib dinyi, o dinyi tola dinyi,’ tenerandum cok, talyi ati tatab-tatab erandum. Ba, Niryi ninyi tentok ababyi talyi ati tatab-tatab ena kum kunun.

¹⁶Niryi ninyi deyok lilibde banun cok, Niryi, ‘A dinyi dib dinyi, o dinyi tola dinyi,’ tenen lilibde banun ara manmalina kum uca lilibde banun. Ni tikwe ato kum esunun. Erda, Ni Nai Imtamnyi bira Nisi bokwetebnounyi bira Ni dongtam tikoka neik uram akwe erur. A deyok aryi, Niryi deyok lilibde banun ara dib dinyi deici aryi lilibde banun.

¹⁷Sunda Yahudi yala nang aryi talerandum uram ara, “Ato-ato kubdarur,” en uram umbura aryi ato esurur. Ninyi bitinyi ara neik dinyi asing eibingiryok, ‘Ato-ato dib kubmar,’ lak erandingnyi uca, a lak ena uram ara diboka kubkwande.

¹⁸Niryi Nidamnyi biti dib en uram lak erdanun ba, Ni Nai Nisi bokwetebnounyi bibabyi Niti dib en uram lak enurur. Ati, Ni Nai ab Ni ab ara ninyi bitinyi aryi neik uram lak eranim ati, a lak en uram ara diboka kurur ati ebman,” ebmou.

¹⁹Ato ebmou ba, sunci Ersi ato eboka asibdenmai. “Kan nai ara dantam kubmar do?” eboka asibdenmai. Uca, Yesus biryi sunsi ato ebmou. “Sunci Ni ab Ni Nai ababyi diboka kum bingnandum. Sunci Nisi diboka kum bingnanurum ati, Ni Nai ababyi diboka kum bingnandum,” ebmou.

²⁰Er Yesus biryi ato eboka eterebmou ara Bait Allah ai dam aryi kuboka co bok deirin co sangkol dam tikmou ci, eterebmou. Ato eboka eterebmou asi sun Yahudi yala nang aryi, “Nun li,” tenebmai bok, ninyi tentok ababyi Ersi kum talebmou. Ara, Er Imtamnyi biryi teleb tenebmou talak ara ninyi aryi Ersi talebkwamai talak kum berekmou ati, sunci Ersi kum talebmai.

²¹Ura, Er Yesus biryi sunsi tubto ebmou. “Niryi anaboka bindobkwan asi sunci, ‘Dantam binmar do?’ tenen ingkirikwanurum cok, sunci Nisi asing kum eibkwanurum. Sunci Niti, ‘Nun li,’ tenebmurubde binmamunyi ani, dibkwandum. Ni binkwan ai ara sunda wengyangana kum kubkwandum,” ebmou.

²²Erci ato ebmou ba, sun Yahudi yala nang aryi ato eboka sisikdanmai. “Erdamnyi obdankwamar ati, ‘Ni binkwan ai ara sunci wengyangana kum kubkwandum,’ ebmasir do?” eboka sisikdanmai.

²³Ato eboka sisikdanmai bok, Er Yesus biryi sunsi ato ebmou. “Niryi Nidamnyi kum obdankwan se. Sunda tukwetam nang kurandum ati tukwetam dinyi akwe tenerandum ati ebman. Ba, Niryi imtam aryi kuboka yuryangasinyi kunun. Sunda tukwetam dinyi tenen nang kurandum. Nira tukwetam tenen dinyi tenenanyi kum kunun.

²⁴A deyok aryi Niryi sunsi sirya eabsunwe. Sunci malyi kun dinyi kunubmurubde baramunyi ani, dibkwandum ati sirya eabsunwe. Ati, sunci Ni lak erdana uram asi dib kum tenebnumunyi uca, sunci malyi kun dinyi kunubmurubde baramunyi cok, dibkwandum,” ebmou.

²⁵Ato ebmou ura, sunci Ersi ato eboka asibdenmai. “Kanda unatonyi kurum do?” eboka asibdenmai. Uca, Erci sunsi ato ebmou. “Niryi Nidamnyi biti lak ebdanmasisiryok, ‘Nira atonyi kunun,’ eboka sirya ebmase ati, Ni sunsi tubto uram ena ara unatoa ati kubkwamasitinyi? Ni sunsi uram ena ara kum kubtinyi.

²⁶Ba, sunda malyi kun nang kurandum ati Niryi tatab-tatab eboka sunti uram weik lak ebsitinyi. Sunci Nisi dib kum teneranurum bok, Ni Nai Nisi bokwetebnounyi bira dib en uram erutnyi kurur. Ni Nai biryi Nisi lak eterebmanou to, Niryi sun im dangna tukwe dangna nang asi lak eteresunun,” ebmou.

²⁷Er Yesus biryi, “Ni Nai biryi Nisi bokwetebnou,” eboka eterebmou bok, sun Yahudi yala nang ara Erci ebmou to diboka kum bikmai.

²⁸Sunci diboka kum bikmai ati, Er Yesus biryi sunsi ato ebmou. “Sunci Nisi taleboka co lase deici aryi erebdeibmaningnyi ura, sunci Niti, ‘Anyi bira Ninyi Daunyi kurur,’ tenen diboka bikwandum. Tonda, Niryi Nidamnyi biti lak ebdanman uram ati dib kurur ati bikwandum. Tonda, Ni kanya yuk aryi a dinyi kum eterenun. Erda, Ni Nai biryi eterebmanou to eterenun ati bikwanurum.

²⁹Nisi bokwetebnounyi bira Nisi milinurur ba, Ni ab tonkwa kununumnyi kurur ci, Erci Nisi kum taklobmanir ati ebman. Niryi Er kanya teleb tenerur dinyi nirya kunubde banun ati, Erci Nisi kum taklobmanir ati ebman,” ebmou.

³⁰Er Yesus biryi ato eboka eterebmou ba, ninyi ilinto aryi Ersi dib tenebmai.

³¹Ura, Er Yesus biryi sun Yahudi yala nang kankan aryi Ersi dib tenebmai nang asi ato ebmou. “Sunci Ni eterebmasin uram asi diboka talebnurubdobmunyi nang ara Nisi milinina nang asi diboka kuramunci.

³²Ara, sunci Nisi milinina nang kuramun ci, dib dinyi bikwandum. Dib dinyi bikmamunyi ura, sunda dib dinyi bikwandum biriman aryi tabwe lobdeibdob nang ato kubkwandum,” ebmou.

³³Ura, sun Yahudi yala nang aryi Ersi ato ebmai. “Nunda nun aibwe Abraham yala nang kunub ati, tabwe demna nang kum kuramoubwe se. Nunci yuk nang ati wa arungna nang kum kuramoubwe. Ati, Kanci unato ati, ‘Tabwe lobdeibmou nang ato kubkwandum,’ ebmasirim do?” ebmai.

³⁴Ura, Yesus biryi sunsi ato ebmou. “Niryi sunsi dib en uram ebkwinsin ati sunci diboka kekebdarur. Unanyi-unaner ara malyi dinyi kunuramingnyi nang nirya ara malyi dinyi aryi tabwe demna nang ato kunung.

³⁵Ura, wa arungna nang ara sun nai ai umbura aryi sokon iya kum kunung. Ba, sun mabwe kobdoba ara sun nai ai umbura aryi sokon iya kunung.

³⁶Ati, Er Imtamnyi Mi sunsi tabwe lobdeibsici uca, sunci tabwe lobdeibsou nang ato diboka kubkwandum.

³⁷Sunda nun aibwe Abraham yala nang kurandum ara Ni bingsunun. Bok, sunci Niti Ni eterena uram ati, ‘Nun li,’ tenerandum deyok aryi, ‘Obkwayeb,’ tenebmanurum.

³⁸Nira Ni Nai Imtamnyi urasintam aryi kuboka asing eiriranse tok sunsi eteresunun. Ba, sun nai bira ninyi orminingnanyi kurur ati, sunci er uram ebdeibmasou tok kunurandum ati ebman,” ebmou.

³⁹Ba, sunci Ersi ato ebmai, “Abraham bira nun aibwe kisok kuramwe ati nunda er deibdoba nang kunub,” ebmai. Ura, Erci sunsi ato ebmou, “Nun aibwe Abraham bira Er Imtamnyi urasintam aryi teleb dinyi akwe kuramunyi kuramwe. Ati, sunda Abraham er mabwe diboka kurandate ura, sunci Abraham kuramwe to teleb dinyi kunurandate.

⁴⁰Nira Ni Nai bira ebmaci dib en uram kekeboka sunsi dib en uram eterebmasinyi bok, sunci Niti, ‘Obkwayeb,’ teneranurum. Nun aibwe Abraham bira ato dinyi kum kunuramwe ati ebman.

⁴¹Sun nai bira ninyi malyi kiminingnanyi kurur ati, sunbabyi neiktoto neik dinyi kurandum,” ebmou. Ato ebmou bok, sun Yahudi yala nang aryi Ersi ato ebmai. “Nunda Abraham er mabwe kobdob kunub. Nun aibwe ab tabangdongon ner ab aryi deibmarei mabwe kum kunub ati ebmab. Tonda, nun Nai Imtamnyi bikwa nun nai kurur,” ebmai.

⁴²Ura, Er Yesus biryi sun Yahudi yala nang asi ato ebmou. “Sunda Er Imtamnyi mabwe diboka kurandate ura, sunci Niti boukwe weik kuranindate. Nira Er Imtamnyi dam aryi kuboka yuryase ura, sun kankan kuran anyi kunun ati ato ebman. Ni kanya yuk aryi, ‘Tukwe tam yuryibinkwan,’ tenena kum kuranse. Erda, Er Imtamnyi biryi bokwetebnou uca, tukwetam yuryase.

⁴³Niryi sunsi dib en uram lak eteresunun bok, unato ati sunci Ni uram asi bita kum bingnandum do? Sunci Ni uram deyok diboka kekebman kum kurandum ati bita kum bingnandum ati ebman.

⁴⁴Isa sienyi si Iblis bira sun nai kurur ati, sunda er milin nang kurandum. Ati, sunci, ‘Nun nai biryi teleb tenebmaci tok kunubde binkwayeb,’ tenerandum. Iblis bira yuma kobdob talak aryi kuboka ninyi orminingnanyi kuramwe. Tonda, dib en uram talermuruna kum kuramunyi kurur. Iblis bira dib en uram ebman kumnyi kurur ati ebman. Erda tola uram enanyi ton, tola en uram deyoknyi kurur. Erci teleb tenebci tok ara tola uram en dinyi erur.

⁴⁵Ura, Niryi sunsi dib en uram eteresunun bok, sunci Ni uram ati dib kum teneranurum se.

⁴⁶Niryi malyi dinyi utotoa kum kunubde banun. Unanyi biryi Nisi, ‘Malyi kubumwe,’ eboka tatab-tatab ebnute do? Ba, Niryi sunsi dib en uram eteresunun bok, unato ati sunci Nisi dib kum teneranurum do?

⁴⁷Ura, sun Er Imtamnyi mabwe nermabwe ara Er Imtamnyi biryi Ni biriman aryi eteresurur uram diboka kekeraming. Ba, sunda Er Imtamnyi mabwe kum kurandum deyok aryi, sunci Ni uram kum kekeranurum,” ebmou.

⁴⁸Ura, sun Yahudi yala nang aryi Er Yesus bisi ato ebmai. “Nunci kuboka Kanda malinyi ati Samaria ateinyi bitonyi kurum ebkitibyi ara diboka do? Kanda isa kanya wekounyi kurum ebmakib ati diboka ebmakib,” eboka asibmai.

⁴⁹Ura, Er Yesus biryi sunsi ato ebmou. “Nira isa kanya wekounyi kum kunun. Erda, Niryi Ni Nai Imtamnyi si ati, ‘Erebdeibkwan,’ tenen kunun. Bok, sunci Nisi boukwe kum kimdanurum ci, talyi tam, ‘Malinyi,’ eranurum.

⁵⁰Bok, Niryi Nidamnyi biti, ‘Ni si weik erebdeibdankwan,’ tenena kum kunun. Bok, Ni Nai Imtamnyi biryi Niti, ‘Ninyi aryi Er si weik erebdeibkwanung,’ tenenurur. Ni Nai Imtamnyi bira ninyi deyok lilina deyoknyi biti ato ebman.

⁵¹Niryi sunsi dib en uram ton ebkwinsin ati diboka kekebdarur. Unanyi-unaner ara Ni eterena uram taleboka kunubde baramingnyi ura, a nang ara iya din dinyi kum dobdobkwaming,” ebmou.

⁵²Ato ebmou ba, sun Yahudi yala nang aryi ato ebmai. “Kanda isa kanya wekankounyi kurum ati ukuryok lak kibdanmarim sirya bikmakib. Nun aibwe Abraham bira sirya dibmou ani, Er Imtamnyi Uram ebdeibmaci to lak etereramnyi nang ababyi diamnyi. Ati, Kanci unato ati, ‘Ni eterena uram kunubde baramingnyi nang ara din dinyi kum dobdobkwaming,’ ebmasirim do? Tola ati ebmasirim se.

⁵³Nun aibwe Abraham bira weik sienyi kuramwe asi Kanci bisibkaboka iya erebdob sienyi kibdanmarim do? Nun aibwe sirya dibmou. Tonda, Er Imtamnyi Uram ebdeibmaci to lak etereramnyi nang ababyi diamnyi. Kanci Kandamnyi erebdeibdanmarim se,” ebmai.

⁵⁴Ato ebmai ba, Er Yesus biryi sunsi ato ebmou. “Niryi Nidamnyi kum erebdeibdanman. Niryi Nidamnyi erebdeibdanmatinyi uca, talyi ati akwe erebdeibdanmatinyi. Bok, Ni Nai Imtamnyi biryi Nisi erebdeibmanir ati ebman. Ni Nai Imtamnyi bira sunci, ‘Nun moloramibnyi,’ erandumnyi biti ato ebman.

⁵⁵Sunci Ni Nai Imtamnyi bisi diboka kum bingnandum bok, Niryi Ersi diboka bingnun. Niryi Er Imtamnyi biti, ‘Ni walwal,’ ebmatinyi uca, Nibabyi suntonyi kiboka tola enanyi kibdatinyi. Nira Er Imtamnyi bisi diboka bingnun cok, Niryi Er Uram asi diboka taleboka kunubde banun.

⁵⁶Ura, sun aibwe Abraham bira Ni yuryankuse tum dibde buranou ba, kilkil weik kanya boramwe. Ati, Erci, ‘Imtam aryi kuboka yuryankwande,’ tenen minob asing eibmanou ba, kilkil kanya boramwe,” ebmou.

⁵⁷Er Yesus biryi ato ebmou ba, sun Yahudi yala nang aryi Ersi ato ebmai. “Kanda kwalina lima puluh baryi kum kwalibmamin cok, Kanci una kuboka nun aibwe Abraham minob kuboka diamunyi bisi asing eiboka biktum do?” ebmai.

⁵⁸Ato ebmai ba, Er Yesus biryi sunsi ato ebmou, “Niryi sunsi dib en uram ebkwinsin ati diboka kekebdarur. Sun aibwe Abraham deina kum talak ababyi, Ni minob kuranse ani, ukuryok tuba kunun,” ebmou.

⁵⁹Ato ebmou ba, sun Yahudi yala nang aryi, “Keil yongoboka obkwayeb,” tenen keil dobmai. Keil dobmai ba, Er Yesus biryi Bait Allah ai aryi kuboka anabdobmou ci, inirdarorbinmou.