Read Futuna-Aniwa Kisah Para Rasul 1 Bible Online

Kisah Para Rasul 1 - Futuna-Aniwa bible

Kisah Para Rasul 1

¹Yo ni kwit Teofilus. Ni kerek sengna uram yuma dinyi asi kerek sekeiankise ani, ukuryok kerek sengna ton tabakoka kerek sekeibkwinkin. Ni yuma kerek sekeiankise uram deyok ara nun Du Yesus biryi kikniramwe dinyi ab Erci etereransou dinyi ab asi nukoka nirya kerek sekeiankise. Ara, nun Du Yesus biryi Er wa ibkalibmou tum aryi kuboka kuramwe ani, Er wibmou nang asi, “Ato-ato kubdarur,” eboka takubdeibmou. Ara, Erci Er Imtamnyi Kanya Roh Kudus biriman aryi sun Teleb Uram deyok kouboka eteren nang asi, “Ato-ato kubdarur,” eboka takubdeibmou ura, nun Du Yesus bisi Er Imtamnyi biryi imtam bowelebinmou. A dinyi nirya nukoka kerek sekeibmakise ati ebman.

³Imtam bowelebana kabul talak ara, nun Du Yesus bira dibmou ani, Erda kam bukokmounyi biryi Erci wibmou Teleb Uram eteren deyok nang asi ebdandoka, “Ni kwityabwe, Ni kam bukokman,” eboka Erbaramnyi lak kimdaramwe. Ara, uki empat puluh baryi asi Erci Erbaramnyi sunsi diboka lak kibdanmou cok, Erci Er Imtamnyi biryi ninyi nirya asi kalikwansir deyok ati sunsi etereramwe.

⁴Ura, sun ab tonkwa tuba kuramiryok, nun Du Yesus biryi sunsi ato eboka takubdeibmou. “Sunci Yerusalem atei taklobimunyei. Erda, Yerusalem atei tuba kuramun ci, Er Imtamnyi biryi ebdeibmou to kununa asi dibde bunkwandarur. Ara, Ni ebmurubmasin to dibde bunkwandarur,” ebmou.

⁵Ebmou cok, Er Yesus biryi sunsi ato ebmou. “Yohanes biryi sunsi me dem dongobsou bok, uki mitikanun mabmamunyi ba, Er Imtamnyi biryi Er Kanya Roh Kudus asi sun dam dongobkwansir,” ebmou.

⁶Ura, sun Er Yesus ab tonkwa bulubmai nang ara Teleb Uram eteren deyok nang aryi Ersi ato eboka asibdenmai. “Nai Du, nun Israel yala nang asi yuk atei nang aryi tuba kalingsunung bok, Kanci ukuryok Weik Sienyi kiboka nunsi kalikwansirim do?” asibdenmai.

⁷Asibdenmai bok, Er Yesus biryi sunsi ato ebmou, “Ni Nai biryok ato dinyi kubkwanci uki tum ab talak ab asi bikoka kubdeibkwandanyi kurur. Ati, a uki tum ab talak ab asi sunsi bingna kikib kum kusurur.

⁸Ba, Er Imtamnyi biryi Er Kanya Roh Kudus mikib asi sun dam karebkwansir. Karebsici ura, sunci Ni deyok asi lak eterenina nang kubkwandum ati ebman. Ara, Yerusalem atei aryi kuboka Ni deyok etereboka, Yudea mutuk ab Samaria mutuk ab bindoka eterebmunyi ura, sunci sun im dangna tukwe dangna nang nirya asi Ni deyok ati eterebkwandum,” ebmou.

⁹Er Yesus biryi ato ebmou ba, Er ab tonkwa kubmai nang aryi asing dinmai bok, nun Du Yesus bisi bowelebinmou. Dinmai bok, duwa ton libdongobmou uca, sunci sun Du Yesus bisi asing eibman kum kubmai.

¹⁰Asing eibman kum kubmou ba, imtam asi tuba dinmai bok, “Naie,” ninyi bitinyi ara kait aling ongobmarei nang asi sun dam lukdandoka yantikmarei.

¹¹Yantikmarei cok, sunci, “Nun kwityabwe Galilea mutuk nang o. Unato ati, sunda imtam dibwelebmarum do? Sun kanya mambul kuna mem se. Anyi Yesus bira sunsi takloboka imtam bowelebmar bok, aminda aryi tamuboka yuryankwande. Ara, imtam welebinmar asi asing eibmarum to, aminda ababyi ato kuboka yuryankwande,” ebmarei.

¹²Ato ebmarei ura, sun Teleb Uram eteren deyok nang aryi mutuk kon si Zaitun aryi anaboka Yerusalem atei tamurbinmai. A Zaitun kon ara Yerusalem atei dam bukamwe mutuk kon. Ara, wa in kum uki tum kubna ura, weik bisik bina yana kimna ara ukuna kum dinyi kuramwe bok, Yerusalem atei aryi kuboka Zaitun kon asi bina yana ara mem kum kuramwe.

¹³Ura, Yerusalem atei binmai ura, sunci sun kuramnyi alib ai asi wekmai. Ara, Petrus ab Yohanes ab, Yakobus ab Andreas ab, Filipus ab Tomas ab, Bartolomeus ab Matius ab, Alfeus mi Yakobus ab, Zelotnyi si Simon ab, Yakobus mi Yudas ab wekoka tonkwa kuramnyi.

¹⁴A nang nirya ara Er Yesus bisi miliramnyi nerabwe ab, Yesus Er kwin si Maria ab er weityabwe ab tonkwa buluramiryok, sunci antaniboka Er Imtamnyi bisi tanglona kum uca moloramnyi.

¹⁵Kuramnyi ani, moloramiryok, ninyi seratus dua puluh baryi sun dam bulubmai ura, er Petrus biryi er kwityabwe kankan tikoka sun bulubmai nang asi ato ebmou.

¹⁶“Ni kwityabwe nun ab tonkwa bulubmarum nang o. Nun Du Yesus bisi kikibmounyi Yudas biti uram ton ebkwinsin ati, kekendarur. Anyi bira nun Du Yesus bisi talebmai nang asi etereboka bobinmunyi bisi kubmou to, ara bisik sekman kum kubmou. Er Imtamnyi Kanya Roh Kudus aryi Er uram ermururamunyi Daud biriman aryi minob ebmou to kunubkwamwe ati, ato kubmou.

¹⁷Anyi Yudas bira nun ab tonkwa kuramubunyi kuramwe ba, nun Du Yesus biryi erbabyi wiboka nun ab tonkwa Teleb Uram eterebkwamoubwe ati, tikeiamwe.

¹⁸Tikeiamwe bok, Yudas bira er kikina co bok asi dobdobmou ura, wa ton dekmou ani, er dibmou. Ara, er wa dam binmou ura, er kot sakmou. Sakmou uca, er su nirya yokoka bukmou ba, dibmou.

¹⁹Ato kuboka dibmou ura, sun Yerusalem atei nang nirya aryi kekebmai cok, sunci Yudas dibmou wa asi si siboka, ‘Hakal-Dama,’ ara nun uram aryi, ‘Ninyi on kira kareboka dekmou wa dam,’ eramnyi.

²⁰A dinyi ara er Daud biryi Er Imtamnyi si weik en mot umbura aryi kerek sekmou. Ara, er Yudas biti eboka erci ato kerek sekmou. ‘Er ai ara ninyi nirya aryi deiblobkwanung, Ninyi tentok ababyi akai aryi kum kubkwandur.’ (Mazmur 69:26) Tonda, ‘Yuknyi biryi ersi unuboka ninyi kalingnanyi kibdur,’ kerek sekmou. (Mazmur 109:8)

²¹Ati, ni kwityabwe o, nunci er Yudas bisi unubkwandanyi ton ingkiringkwanub o. Ati, nun ab tonkwa nun Du Yesus biti, ‘Diboka kam bukokmar,’ ebkwamibnyi bisi ingkiringkwanub. Anyi bira nun Du Yesus ab nun ab tonkwa tuba-tuba buluramubunyi kubdur. Ara, er Yohanes me dongoramwe talak aryi kuboka Er Imtamnyi biryi nun Du Yesus bisi imtam bowelebmou uki tum ababyi nun ab tonkwa buluramubunyi bisi wibkwanub,” eboka Petrus biryi ebmou.

²³Er Petrus biryi ato ebmou ura, sun bulubmai nang aryi ninyi bitinyi wibmai. Ton wibmainyi si ara Yusuf uruma si Barsabas ton Yustus doaminyi kuramwe. Ba, yuk wibmainyi si Matias kuramwe.

²⁴Sirya wibmai ura, sun bulubmai nang aryi Er Imtamnyi bisi ato molobmai. “Nun Nai Imtamnyi, Kanda ninyi kanya nirya bingsurumnyi kurum. Ati, Kanci nunsi eterebsimin ci, ‘A nang bitinyi aryi kuboka anyi bisi wibkwan,’ eboka lak kibsurum. Ara, Yudas bisi unubkwandanyi Teleb Uram deyok kouboka eterebde bananyi bisi Kanci wibdum. A sokon ara er Yudas biryi ersi kikib kurande dam binmou ba, deiblobmou ati, Kanci unubdum,” eboka molobmai.

²⁶Ato eboka molobmai ura, sunci keil asi im sukoka diblilibmai ura, “Er Imtamnyi biryi Matias bisi wibdeibmar,” tenen bikmai. Ura, sun dib tenen nang aryi er Matias biti, “Anyi bira sun koklombaryi nang ab tonkwa Teleb Uram deyok kouboka eteren nang kubkwaming,” tenen ersi tikeibmai.