Read Futuna-Aniwa Kisah Para Rasul 13 Bible Online

Kisah Para Rasul 13 - Futuna-Aniwa bible

Kisah Para Rasul 13

¹A talak ara sun Antiokhia atei kuboka Er Yesus bisi dib tenen nang kankan aryi Er Imtamnyi Uram ebdeibmaca etereramnyi nang ton kuramnyi. A nang si ara Barnabas ab, Simeon uruma si Bol Mirinyi ab, Lukius Kirene ateinyi ab, Menahem bira Herodes ab neik susuk nebmareinyi ab, Saulus ab kuramnyi.

²Kuramnyi ani, uki tentok tum neika buluboka yina si teboka Er Imtamnyi si weik enmai bok, Er Imtamnyi Kanya Roh Kudus aryi sunsi ato ebmou, “Niryi er Barnabas ab er Saulus ab ati, ‘Ni wa ibkwanding,’ tenen nabmase ati, sunci tikeibdarur,” ebmou.

³Ebmou ura, yina si teboka Er Imtamnyi bisi molobmai cok, sunci Barnabas ab Saulus ab asi taruk erebdeiboka tikeibmai ura, “Ur birurum,” eboka bokdonokmai.

⁴Ura, Er Imtamnyi Kanya Roh Kudus aryi arukmou ba, Barnabas ab Saulus ab Seleukia mutuk bindoka, “Siprus mutuk binkwayeb,” tenen weik co ngun-ngun bukoka mekwan deici banmai.

⁵Banmai ani, Siprus mutuk kuboka Salamis atei binmai. Binmai ura, sunci sun Yahudi yala nang buluboka Musa Uram kekeramnyi ai yuk-yuk asi wekoka Er Imtamnyi Uram eterebde binmarei. Eterebde binmarei ura, er Yohanes bira sunsi miliramwe.

⁶Eterebde barandei cok, Siprus mutuk doramnyi atei yuk-yuk yibinmai ani, Pafos atei yanmai. Yanmai ura, Yudea mutuknyi si Baryesus a kuramwe. Anyi bira kwemdina deib aryi ninyi kweteramunyi kuramuryok, Er Imtamnyi si deib aryi tola uram eramunyi kuramwe.

⁷Kuramuryok, anyi Baryesus bira akatei sienyi si Sergius Paulus er kwit kuramwe. Er Sergius Paulus bira utotoa dinyi diboka bingnanyi kuramwe. Kuramuryok, erci, “Er Imtamnyi Uram kekebtinyi,” tenen er Barnabas ab Saulus ab asi, “Yatiring,” eboka nabmou.

⁸Yanmarei bok, er kwemdina si deib aryi kweteramunyi si Baryesus bira Yunani uram deib aryi Elimas eboka namnaminyi biryi, “Bisik sekminikwan,” tenebmou. Ara, erci, “Sienyi bisi Er Imtamnyi Uram dib tenebcei,” tenen ukubdenmou.

⁹Ukubdenmou bok, er Saulus bira uruma si Paulus eboka namnaminyi bira Er Imtamnyi Kanya Roh Kudus langkibmounyi biryi er Elimas tam er urasin deibmou.

¹⁰Deibmou ci, erci ersi ato ebmou. “Se, kanda isa sienyi si Iblis milinanyi kurum. Kanda teleb dinyi nirya ati bimsa yarinanyi kurum. Kanci, ‘Tola eboka malyi kubdeibtinyi,’ tenen kanya akwe borandim. Kanci tanglona kum Er Imtamnyi dib en uram asi tola uram kimnandim.

¹¹Ati, ukuryok Er Imtamnyi biryi wenebkici uca, kan asing kubkwamakir ba, kiting sinarya asi asing kum einkwandim,” ebmou. Er Paulus biryi ato ebmou ba, er Elimas asing oba lilibdongobmou ba, er taleblilibmou cok, er boyibankwamnyi nang asi ingkiringmou.

¹²Ura, akatei sienyi biryi a kubmou dinyi asing eibmou ura, erci, “Naie,” teneboka Er Imtamnyi Uram asi dib tenebmou.

¹³Ura, er Paulus ab er kwityabwe ab Pafos atei aryi anaboka co ngun-ngun bukoka mekwan deici banmai ani, Pamfilia mutuk doramnyi atei si Perga binmai. Binmai ura, er Yohanes bira sunsi takloboka Yerusalem atei tamurbinmou.

¹⁴Tamurbinmou bok, er Paulus ab Barnabas ab Perga atei aryi kuboka Pisidia mutuk doramnyi atei si Antiokhia yanmai. Yanmai ura, uki ta tum ara wa in kum uki si Sabat tum berekwe ura, sunci sun Yahudi yala nang buluboka Musa Uram eteren ai wengbindoka bukmarei.

¹⁵Er Musa kerek sekamwe uram ab sun Er Imtamnyi Uram ebdeibmaci to lak etereramnyi nang ab aryi kerek sekamnyi uram asi nukmai ura, sun Musa Uram eteren ai deyok nang aryi ato eboka sunsi molobmai. Ara, “Ni kwityabwe, sun a kekenmang nang kanya asi teleb kurdeirin uram eterebkwandanyi sun kankan aryi kubci ura, ur eterebdur,” ebmai.

¹⁶Ato eboka molobmai ba, er Paulus tikoka er taruk mobmob ebmou cok, uram ebkarebmou. Ara, erci, “Ni kwityabwe Israel yala nang ab, ‘Er Imtamnyi bisi milibtibyi,’ tenen nang ab, ni ebkun uram kekenindarur.

¹⁷Minob ura, nun Israel yala nang aryi molonubnyi Imtamnyi biryi nun aibweyabwe asi wibdeibmou. Wibdeibmou ura, yuk mutuk Mesir mutuk kuramnyi bok, Er Imtamnyi biryi kisal dangnamwe uca, nun yala nang ara mi yal dangdamnyi. Ura, mikib kuboka Er Imtamnyi biryi leboka sunsi mutuk Mesir aryi bobinmou.

¹⁸Bobinmou ura, nun yala nang ara ninyi kun kum mutuk asi kwalina empat puluh baryi kuramnyi ba, Erci sun malyi dinyi asi eiriramwe bok, anmalakoka kum weneramwe.

¹⁹Ura, Erci arukmou uca, weik sien nang tabaryi aryi taleramnyi mutuk nang nirya asi obkiribmai ura, Er Imtamnyi biryi Kanaan mutuk sunsi karebmou.

²⁰Karebmou ura, Kanaan mutuk kuramnyi ba, kwalina empat ratus lima puluh baryi bisibmou. Bisibmou ura, Erci malyi deyok lilin nang yuk-yuk karebmou ani, Erci Er uram ebdeibmaca bobaramunyi Samuel bisi karebmou.

²¹A sirya ura, sun Israel yala nang aryi Er Imtamnyi bisi, ‘Weik sienyi ara nun kalikwansiranyi karebsurum,’ eboka moloramnyi. Moloramnyi uca, Er Imtamnyi biryi Benyamin yalanyi si Kish mi Saul bisi sunti tikeibmou. Anyi bira kwalina empat puluh baryi sunsi kalingnamwe.

²²Kalingnamwe bok, Er Imtamnyi biryi er Saul bisi kisibdonokoka er Daud bisi sunti unuboka tikdeibmou. Anyi Daud biti Er Imtamnyi biryi ato lak ebmou. Ara, Erci, ‘Isai mi Daud bira Ni kanya teleb kurdeiriraniranyi bisi niryi wibman. Erci Ni kanya teleb kubkwanir dinyi ukubkwande,’ ebmou.

²³Ura, Er Imtamnyi biryi, ‘Er Daud yala nang aryi ninyi tentok Ninyi Lemsinanyi sun Israel yala nang asi erebdeibkwan,’ eboka ebdeibmou to, Erci kunubmou. A tikeibmounyi ninyi Lemsinanyi bira Er si ara Yesus kurur.

²⁴Er Yesus biryi ninyi lemna kabul talak ara, er Yohanes biryi sun Israel yala nang asi, ‘Sun malyi kun dinyi taklobmunyi ura, Er Imtamnyi kanya teleb kurdeirin dinyi kunubmunyi ba, niryi sunsi me dongobkwansin,’ eboka uram doramwe.

²⁵Doramuryok, er sirya eterebkou tum ara er Yohanes biryi sun Israel yala nang asi, ‘Sunci nira unanyi tenebmanurum do? Nira ninyi Lemnanyi kum kunun. Ninyi Lemnanyi bira ni dongtam yankwandanyi Iya Erebdobnyi kurur ati, niryi Er yan karuk tabwe asi lobman kumnyi kunun,’ ebmou.

²⁶Ati, ni kwityabwe nun aibwe Abraham yala nang ab, tonda sun yuk yala nang aryi, ‘Er Imtamnyi bisi milibtibyi,’ tenerandum nang ab kekendarur. Er Imtamnyi biryi ninyi lebkwansir en uram Erci nunsi eterebmurubsou.

²⁷Sun Yerusalem atei nang ab sun menekoka, ‘Ato kubkwayeb,’ en nang ab aryi Er Yesus bisi dib kum teneboka Ersi obmai. Obmai bok, sunci ato kuboka sun Er Imtamnyi Uram ebdeibmaci to lak etereramnyi nang aryi kerek sekamnyi to kunubmai. Ara, wa in kum uki si Sabat tum tuba-tuba kekeraming uram kunubmai.

²⁸Ati, sunci, ‘Er Yesus bisi obtibyi,’ tenebmai bok, Erci malyi kubmou deyok ton kum eibmai ati, sunci er Pilatus bisi bindoka, ‘Er Yesus bisi obdeibsurum,’ eboka molobmai.

²⁹Ura, sunci sun Er Imtamnyi Uram ermururamnyi nang aryi kerek sekeiamnyi to nirya kunubmai ura, sunci Er Yesus bisi co lase deici aryi loboka tukwe dongobmai.

³⁰Dongobmai bok, Er Imtamnyi biryi Ersi kam bukeibmou.

³¹Kam bukeibmou ura, Er Yesus biryi sun Galilea mutuk kuboka Er ab tonkwa Yerusalem atei binmai nang asi bindoka, ‘Ni sirya kam bukokman,’ eboka lak kimbinmou. A nang ara kam bukokmounyi ab ebdanmai nang aryi sun Israel yala nang asi, ‘Kam bukokmou,’ eboka etereransing.

³²Ati, ukuryok nunci sunsi Teleb Uram eteresunub. Ara, Er Imtamnyi biryi nun aibweyabwe asi minob ebdeibmou uram ati ebman.

³³A ebdeibmou uram ara Er Imtamnyi biryi Er Yesus bisi kam bukeibmou cok, nun aibweyabwe yala nang asi kunubdeibsou. Ara, Mazmur bitinyi dinyi aryi mot libmounyi biryi Er Yesus biti kerek sekamwe to, kunubmou. Ara, Er Imtamnyi biryi Er Yesus bisi ebmou to kerek sekmou ara. ‘Kanda Ni Mi kurum. Arub aryi Niryi Kansi si doboka Ni Mi ebkwinkin,’ sekmou. (Mazmur 2:7)

³⁴Er Imtamnyi biryi Er Yesus bisi ato ebmou to, dib kunubmou. Ara, Er Imtamnyi biryi Er Yesus bisi kam bukeibwe ura, tubto kum dibkwande. A deyok aryi, Er Imtamnyi biryi Erti ato ebmou. ‘Niryi er Daud bisi diboka kisal dangnanse ato, kanbabyi diboka kisal dakwankin,’ ebmou. (Yesaya 55:3)

³⁵A deyok ati, yuk Mazmur mot umbura aryi ato ebmou. ‘Nira Kan wibmanumunyi kunun ati Kanda Imtamnyi biryi, “Er nong lubcei,” tenen iya kam bukeibkwanirim,’ ebmou. (Mazmur 16:10)

³⁶Er Daud kuramwe talak aryi erci Er Imtamnyi teleb teneramwe to kunuramwe ani, sirya dibmou ura, er aibweyabwe tukwe dongoramnyi ai asi tukwe dongobmai. Dongobmai ura, er Daud nong asi lubmou ati ebman.

³⁷Er Daud nong lubmou bok, Er Imtamnyi biryi kam bukeibmounyi Yesus bira Er nong ara kum lubmou.

³⁸Ati, ni kwityabwe, a deyok aryi, sunci bikdarur ara Er Yesus biriman aryi Er Imtamnyi biryi sun malyi kun dinyi ati, ‘Kilibkwansin,’ eboka eteresurur. Sunda er Musa kerek sekamwe uram deib aryi kilibman kum dinyi ababyi Er Imtamnyi biryi, ‘Nirya kilibkwansin,’ eboka eteresurur.

³⁹Ara, unanyi-unaner aryi Er Yesus bisi dib tenebingnyi nang nirya asi Er Imtamnyi biryi sun malyi kun dinyi kilibkwansir.

⁴⁰Ati, sunci Er Imtamnyi Uram dib tenebmunyi ba, sun Er Imtamnyi Uram ebdeibmaci to lak etereramnyi nang aryi kerek sekamnyi to sunti kunubsicei. Ara,

⁴¹‘Sunda ina ngilingnanurum nang se, sunci asing eibmamun cok, “Naie,” tenebmunyi ura, ur dibdarur. Sun kam tuba kuramun ba, niryi ilil tenen dinyi kiknibkwan. A kiknibkwan dinyi ara ninyi aryi sunsi liliboka lak eterebsingnyi bok, sunci dib kum tenebkwanurum.’” (Habakuk 1:5) Ato eboka Paulus biryi eterebmou.

⁴²Er Paulus biryi ato eboka eterebmou ura, er ab Barnabas ab anabmarei ba, sun kekebmai nang aryi sunsi, “Wa in kum tum tubto kubci ura, neik deyok eboka eterebsururum,” eboka molobmai.

⁴³Ura, Er Imtamnyi eterena uram sirya kekebmai ura, Yahudi yala nang ilinto ab yuk yala nang ab aryi, “Er Imtamnyi bisi milibtibyi,” tenen nang ab er Paulus ab Barnabas ab asi milibmai. A nang ara sun ab uram sisingmai ura, er Paulus ab Barnabas ab aryi sunsi, “Er Imtamnyi biryi sunsi kisal dangsurur ati, sunci Ersi tuba-tuba milibdarur,” eboka ebdeibmarei.

⁴⁴Kunmai ani, o wa in kum tum berekwe ura, akatei nang nirya Er Imtamnyi Uram kekeryanmai.

⁴⁵Ninyi yubwa-yubwa kekeryanmai asi sun Yahudi yala nang aryi asing eibmai ci, sunci yu kanya boboka er Paulus ab Barnabas ab aryi ebmarei to ati, “Malyi uram aca,” eboka kerebmai. Kerebmai cok, sunci Er Imtamnyi si yan yanibmai.

⁴⁶Yan yanibmai bok, sun Paulus ab Barnabas ab aryi ilil kum asa aryi ato ebmarei. “Er Imtamnyi uram Teleb Uram ara sunda Yahudi yala nang asi yuma eterebsitinimyi bok, sunci, ‘Iya kam kun dinyi nun li,’ tenen bai donokmarum ati, sun yuk yala nang asi bindoka eterenunum.

⁴⁷Ara, Er Imtamnyi biryi nunsi ato eboka aruksou, ‘Niryi kansi sun yuk yala nang asi berengdeirinanyi tikeibmakin. Ara, kanci sun im dangna tukwe dangna nang asi lebkwandim ati, tikeibmakin,’” ebmarei. (Yesaya 49:6)

⁴⁸Ura, sun yuk yala nang aryi a ebmarei uram kekebmai ura, sun kanya kilkil kuboka Er Imtamnyi si weik ebmai. Ebmai cok, sun kankan aryi Er Imtamnyi biryi minob wiamwe nang aryi Er Imtamnyi Uram dib tenebmai.

⁴⁹Dib tenebmai ura, Er Imtamnyi Uram ebde baramnyi uca, a mutuk nang nirya kekebmai.

⁵⁰Kekenmai bok, sun Yahudi yala nang aryi yu kuboka sun akatei kuboka, “Er Imtamnyi bisi milibtibyi,” tenen sien nang nerabwe ab, sun akatei nang sien nang ab asi bindoka er Paulus ab Barnabas ab ati, “Malyi kun nang,” eboka talakdobmai. Talakdobmai ura, sun akatei nang aryi, “Obtibyi,” tenen sunsi a mutuk aryi bai yakdonokmai.

⁵¹Yakdonokmai ba, er Paulus ab Barnabas ab aryi sun yan akatei yanibmarei tukwe kilibloboka atei si Ikonium bindobmarei.

⁵²Bindobmarei bok, sun Antiokhia atei dib tenen nang ara sun kanya kilkil kuramwe ba, Er Imtamnyi Kanya Roh Kudus sunsi tuba-tuba langkiramwe.