Read Futuna-Aniwa Kisah Para Rasul 16 Bible Online

Kisah Para Rasul 16 - Futuna-Aniwa bible

Kisah Para Rasul 16

¹Ura, er Paulus ab Silas ab banmarei ani, Derbe atei ab Listra atei ab binmarei. Akatei ara ninyi tentok si Timotius kuramwe. Anyi bira nun Du Yesus bisi miliramunyi kuramwe. Ba, er kwin bira Yahudi ner kuramuryok, erbabyi nun Du Yesus bisi dib teneramwe. Timotius er kwin bira Yahudi ner kuramwe bok, er nai bira Yunani yalanyi kuramwe.

²Anyi Timotius biti sun Listra atei ab Ikonium atei ab kuramnyi dib tenen nang aryi, “Anyi bira telebnyi kurur,” ebmai.

³Ura, er Paulus biryi er Timotius ab ebdanmarei ura, erci erti, “Nisi milibnute,” tenebmou. Er Timotius bira Yunani yalanyi mi kuramwe ati, er den bama minob kum sekamnyi. Den bama kum sekamnyi ati, er Paulus biryi er den bama sekmou. Ara, “Den bama kum seknyi obura, sun Yahudi yala nang aryi nunsi kerebsingnyei,” tenen erci Timotius den bama sekmou. Timotius er nai bira Yunani yalanyi kuramwe asi sun a mutuk kuramnyi Yahudi yala nang nirya aryi bingnamnyi. A deyok aryi, er Paulus biryi, “Kerebsingnyei,” tenen er den bama sekmou.

⁴Den bama sirya sekmou ura, er Paulus ab er kwityabwe Timotius ab Silas ab yuk atei-yuk atei nirya yibinkirikmai cok, sunci ato eboka lak eterebde binmai. “Nun naiyabwe Yerusalem atei kuramnyi aryi kuboka bulubmai nang aryi sekwetebmai uram asi kunubdarur.” A uram boboka sunci sun Teleb Uram deyok kouboka eteren nang ab sun dib tenen nang asi kalingna nang ab aryi ebdeibmai to eterebde banmai. Ara, “Sun yuk yala nang asi, ‘Den bama sekdarur,’ ebibyei,” eboka “Takubmanto dinyi akwe takubdeibkwayeb,” eboka eterebde banmai.

⁵A uram bobde banmai bok, sun dib tenen nang kanya katabum ebtabakmou ba, dib tenebmai. Tenebmai bok, yuk nang ababyi dib tenebkalibmai ba, sun dib tenen nang tuba-tuba weik kimnamnyi.

⁶Ura, er Paulus ab er kwityabwe Silas ab Timotius ab anaboka banmai cok, “Asia mutuk bindoka Teleb Uram eterebkwayeb,” tenebmai. Tenebmai bok, Er Imtamnyi Kanya Roh Kudus aryi, “Asia mutuk bana mem,” eboka sunsi bisik sekmou. Bisik sekmou ura, sunci Frigia mutuk ton Galatia mutuk ton etererkiringnamiryi, yibinmai.

⁷Ura, sunci Misia mutuk deibloboka, “Bitinia mutuk binkub,” tenebmai uca, nun Du Yesus Er Kanya Roh Kudus aryi sunsi, “A mutuk ababyi bana mem,” ebmou.

⁸Ura, sunci Misia mutuk deibloboka Troas atei asi anmalakoka binmai.

⁹Troas atei binmai ura, inibmou ura, lukunda talak aryi Er Imtamnyi Kanya Roh Kudus aryi lak kiboka karebmou uca, er Paulus biryi tek deib aryi asing eibmou. Ara, asing dinmou ci, Makedonia mutuknyi tentok asing eibmou. Anyi bira tikoka nabmunyi biryi er Paulus bisi ato eboka molobmou, “Kanci siksik kun kum Makedonia mutuk yamin ci, etereryasurum,” eboka molobmou.

¹⁰Ura, er Paulus biryi a dib dinyi asi asing eibmou ura, erci nun er kwityabwe asi, “Dib dinyi asing eibmonwe ara ato-ato eibmonwe,” ebmou. Ebmou ba, nunci, “Dib dinyi deici Er Imtamnyi Kanya Roh Kudus aryi nunsi eterebmasir,” tenen bikmoubwe. Ara, nunci, “Er Imtamnyi biryi nunsi nabmasir ara sun Makedonia mutuk nang asi Teleb Uram eterebkwamib ati, nabmasir,” tenen bikmoubwe. Uca, nunci “Makedonia mutuk anmalakoka binkub,” ebdanmoubwe ura, anabdobmoubwe.

¹¹Ura, Troas atei takdongoboka weik co ngun-ngun wekoka ilila mekwan deici banmoubwe. Banmoubwe ani, weik me dumdum si Samotrake binmoubwe. Bindoka mabmoubwe ani, berekwe ura, co ngun-ngun asi tubto wekoka ilila mekwan deici banmoubwe. Banmoubwe ani, co ngun-ngun dararyangan atei si Neapolis dam binmoubwe.

¹²Neapolis atei aryi kuboka tukwe bis bindoka Filipi atei binmoubwe. Akatei ara sun weik sienyi si Kaisar arungna nang aryi ukuryok deboka doryanmai atei kuramwe. Kuramuryok, Makedonia mutuk asi sien atei kuramwe. Filipi atei binmoubwe ura, uki mikbaryi kubmoubwe.

¹³Mabmoubwe ani, wa in kum uki si Sabat tum berekwe ura, nunci, “Sun Yahudi yala nang aryi Er Imtamnyi bisi moloramnyi dam bindoka Teleb Uram eterebtibyi,” tenebmoubwe. Ato tenebmaburyok, nunci atei aryi anaboka baitam binmoubwe. Ura, me katum dam binmoubwe ura, sun Yahudi yala nang aryi Er Imtamnyi bisi moloramnyi dam asi eibmoubwe. Eiboka binmoubwe ura, sun bulubmai nang ara nerabwe akwe bulubmai asi eibmoubwe ura, nun ab sun ab tonkwa bukoka uram sisikmoubwe.

¹⁴A buluboka wekmai nerabwe kankan ara atei si Tiatira aryi deiamnyi ner tentok bukmou. A ner si ara Lidia. A ner ara Tiatira atei asi deiamnyi ner kuramuryok, teleb aling ara im bila ato aling dengnamwe ner kuramwe. A ner ara aling teleb im bila bol aling dengnamwe ner asi bukmou. A ner ara Filipi atei yanmou ura, erci, “Er Imtamnyi bisi milibtinyi,” tenen sun Yahudi yala nang kunuramnyi to erbabyi kunuramwe. Ura, er Paulus biryi Teleb Uram eterebmou ba, Er Imtamnyi biryi Lidia kanya dangubdeibmou ura, erci er Paulus biryi ebmou to dib tenebmou.

¹⁵Dib tenebmou ura, Lidia ab er mabwe silib ab asi me dongobmoubwe. Ura, Lidia biryi nunsi naboka du dongobmasou. Ara, erci nunsi, “Sunci niti, ‘A ner ara Er Yesus bisi dib tenebmar,’ tenebnumunyi ura, ni ai asi tonkwa kubkwayeb,” ebmasou. Ura, erci nunsi arung-arung ebmasou ati, nunda er ai bina kubmoubwe.

¹⁶Lukunda mikbaryi mabmoubwe ani, nunda, “Sun Yahudi yala nang aryi Er Imtamnyi bisi moloraming dam binkub,” tenen banmoubwe. Banmoubwe bok, ner tentok ara isa wekamwe ner asi nun ab ebdanmoubwe. A ner ara ninyi aryi dekmai ura, sun wa irmilin ner kuramwe. A ner asi isa aryi amangnamwe akiryi aminda kubkwamwe dinyi bikoka lak eramwe. Ninyi ilinto aryi, “Nun aminda kubkwansir dinyi biktibyi,” tenen a ner asi, “‘Una kubkwansir do?’ eboka lak ebsurum,” eramnyi. Eramiryok, sunci, “A ner aryi, ‘Ato-ato kubkwansir,’ ebsute,” tenen, sunci a ner kalingna nang asi co bok ilinto kareramnyi.

¹⁷A ner ara er Paulus ab nun ab asi miliboka uram weik doboka ato ebde baramwe. “Sun Filipi atei nang o! A nang ara Er Imtamnyi Iya Mikibnyi biryi arungna nang kunung. A nang aryi sunsi, ‘Ato-ato kubmunyi ura, Er Imtamnyi biryi sunsi lebsute,’ eboka eterebkwamasing ati yanganmang,” ebmou.

¹⁸Ura, uki mikbaryi bisibmou bok, a ner ara tanglona kum nunsi miliboka neik uram akwe ebde baramwe. Ebde baramwe bok, er Paulus bira, “Se, a ner uram kilikte,” tenebmou. Tenebmou ati, bisik noutam banmou cok, erci lukdandoka tikoka dangubmou cok, a ner amangnamwe isa asi ato ebmou. “A ner amangdum asi anaboka bindobdum. Er Yesus Kristus si deib aryi niryi kansi ato ebmakin.” Er Paulus biryi ato ebmou ba, isa ara anaboka bindobmou.

¹⁹Ura, a ner kalingna nang aryi a kubmou to kekebmai ba, sunci, “A ner amangnamwe isa ara bindobmar akiryi a ner ara aminda kubkwande dinyi tubto kum lak ebkwande ati, co bok wanikminikwansir se,” ebdanmai. Ebdanmai cok, sunci yu weik kuboka er Paulus ab Silas ab asi talebmai ura, sunci sunsi taruk taleboka akatei keta dam kiliboka sun sien nang dam bobinmai.

²⁰Kiliboka bobinmai ura, sunci sun akatei sien nang asi ato ebmai, “Naiyabwe o, a nang ara Yahudi yala nang kunung cok, malyi dinyi bobdongobmasinto kubmasiring uca, nun atei nang nirya ara, ‘Buluboka obdatibyi,’ tenebmang.

²¹A nang ara malyi uram eterebmasiring. Nunda Kaisar bisi arungna nang asi dib tenebibyei tenen dinyi ton ukubman kum dinyi ton asi eterebmasiring,” ebmai.

²²Sunci ato eboka tatab-tatab ebmai bok, sun akatei nang nirya ara er Paulus ab Silas ab asi yu weik kubmai. Yu weik kubmai bok, sun akatei sien nang aryi sun Paulus Silas ab ati ato eboka arukmai. “Sun ongon aling asi kwiriboka tabwe aryi litukdarur,” eboka arukmai.

²³Ilinto sirya litukmai ura, sunci er Paulus ab Silas ab asi ninyi wenen ai asi dongobmai. Dongobmai ura, sunci akai kalingnanyi bisi, “A nang asi diboka kalikdum,” eboka arukmai.

²⁴Arukmai ura, akai kalingnanyi biryi er Paulus ab Silas ab asi bobindoka um kobdob wiliboka ai asi anaboka yibinman kum ai umbura dongorbinmou. Dongorbinmou ura, erci sun yan asi co umbong bisik dongoboka tabwe debmou.

²⁵Ura, a lukunda aryi er Paulus ab Silas ab ara wi kum mabmarei. Erda, sunci Er Imtamnyi bisi molobmarei ci, Er Imtamnyi si weik en mot sebmarei. Mot sebmarei bok, sun yuk tabwe deboka dongobmai nang aryi kekebmai.

²⁶Ura, lukdandoka mutuk eimna weik dobmou. Dobmou uca, akai eremna nirya lontongmou uca, akai bisik bublan nirya kukmou. Tonda, mutuk eimna lulungna aryi sun debmai nang nirya asi besi tabwe yokeibmou.

²⁷Ura, er akai kalingnanyi bira lukdandoka bukokmou ci, dinmou ba, bisik bublan nirya kukmou asi asing eibmou. Eibmou cok, erci ilil weik kuboka, “Nonge se, sun tabwe debmoubwe nang asi nirya binsekdobmang,” tenebmou. Tenebmou cok, erci, “Nidamyi lukoka obdandobkun,” tenen er ninyi on yale ya ubtalebmou.

²⁸Erdamnyi obdandobkou bok, er Paulus biryi uram weik doboka ersi ato ebmou, “Kandamnyi obdaminyei. Nun nirya atam kubmab,” ebmou.

²⁹Ebmou ba, akai kalingnanyi biryi, “Uk ubna ubdeibnindarur,” eboka molobmou ura, uk ubna ubdeibmai ura, er cung yanmou. Yanmou ura, ilil asa aryi sirim talebmou bok, er ai kalingnanyi bira, “Ni naiyabwe,” teneboka er kutam ikdongoboka er Paulus ab Silas ab urasintam burbinmou.

³⁰Burbinmou ura, erci sunsi baitam bobinmou ci, “Ni naiyabwe, ni una kubtinyi uca, Er Imtamnyi biryi nisi lebnute do?” eboka asibmou.

³¹Ato eboka asibmou uca, er Paulus Silas ab aryi ersi ato ebmarei. “Kanci Er Yesus bira Iya Erebdobnyi bisi dib tenebminyi ura, Er Imtamnyi biryi kansi lebkute. Kan ab kan mabwe silib ab aryi ato kubmunyi ura, Er Imtamnyi biryi lebsute,” ebmarei.

³²Ato ebmarei ura, er Paulus ab Silas ab aryi er akai kalingnanyi ab er mabwe silib asi Er Yesus uram Teleb Uram lak eterebmarei.

³³Ura, a lukunda tum aryi er akai kalingnanyi biryi sun dilaka asi me ilikoka dibde bukmou. Dilaka ilikmou ura, er ab er mabwe silib ab ara dib tenebkalibmai ura, er Paulus ab Silas ab aryi sunsi me dongobmarei.

³⁴Ura, erci er Paulus ab Silas ab asi er ai dam iniboka bobinmou ura, erci sunsi yina karebmou. Karebmou cok, er ab er mabwe silib nirya ab Er Imtamnyi bisi dib tenebkalibmai ati, sun kanya kilkil weik kubmou.

³⁵Mabmai ani, berekwe ura, sun akatei sien nang aryi arukoka sun miliramnyi nang asi bokdonokmai. Ara, sunci er Paulus ab Silas ab ati, “A nang asi lobdeibdarur,” eboka arukmai ci, bokdonokmai.

³⁶Sun er ninyi wenen ai kalingnanyi biryi a uram deyok kekebmou ba, erci er Paulus bisi ato ebmou. “Nai, kan ab kan kwit ab ur birurum. Sun akatei sien nang aryi sunti, ‘Lobdeibdarur,’ eboka uram ebdeibmaning ati. Sun teleb ur birurum,” ebmou.

³⁷Ato ebmou bok, er Paulus biryi sun uram ebdeibmai nang asi ato ebmou. “Ato tenen kum. Nunda malyi dinyi kum kubnumwe uca, deyok kum lilibmandau cok, sunci nunsi ninyi urasintam asi molong-molong ebmandau se. Nun Kaisar biryi kalingsurur nang kununum bok, sunci nunsi ninyi wenen ai dongobmasei se. Ura, ukuryok sun akatei sien nang aryi nunsi iniboka lobdeibkwansurum do? Iniboka bongdonongsina kum. Erda, ninyi nirya aryi nunti, ‘Malyi dinyi kum kubmaring,’ tenen bikwaming ati, sun akatei sien nang aryi dam diryandoka, ‘Da birurum,’ eboka nunsi bongdeirisina teleb,” ebmou.

³⁸Ato ebmou uram kekebmai ura, sun bokdonokmai nang aryi sun akatei sien nang dam bindoka lak ebmai. Lak ebmai cok, sunci, “Sun Paulus ab Silas ab ara Kaisar biryi kalingdur nang kururung,” ebmai. Ebmai uca, sun akatei sien nang kanya ilil weik kubmou.

³⁹Ura, sunci yandoka er Paulus ab Silas ab asi, “Nun naiyabwe, ur birurum. Nun manmalibmasib dinyi asi tuba tenein kum,” ebmai. Ebmai ura, sunci sunsi, “Yuk atei bana teleb,” eboka bongdeirirbinmai.

⁴⁰Bongdeirirbinmai ura, er Paulus ab Silas ab ninyi wenen ai takloboka er Lidia ai binmarei. Ura, sun akatei kuramnyi dib tenen nang yuk nang wekmai ura, er Paulus ab Silas ab aryi sun kanya katabum ebdeibmarei. Sirya ebdeibmarei ura, Filipi atei aryi anaboka bindobmarei.