Read Futuna-Aniwa Kisah Para Rasul 2 Bible Online

Kisah Para Rasul 2 - Futuna-Aniwa bible

Kisah Para Rasul 2

¹Kuramnyi ani, weik kwalina si Pentakosta uki tum berekwe ura, sun dib tenen nang nirya aryi buluboka neik ai wekmai.

²Neik ai umbura kunmai bok, lukdandoka imtam aryi kuboka ibalya dorande to lilim weik ebmou. Lilim weik ebmou bok, sun akai bukmai nang nirya aryi kekebmai.

³Kekebmai cok, sunci uk buk ato dinyi asing eibmai. Ara, sun bulubmai nang kisok yuk-yuk deici uk buk ato dinyi asi asing eibdanmai.

⁴Eibdanmai bok, Er Imtamnyi Kanya Roh Kudus aryi sun dam yuryandoka sun tenen kanya nirya asi langkibmou. Langkibmou bok, sun bulubmai dib tenen nang aryi sun minob kum bingnamnyi uram yuk-yuk ebkalibmai. Ara, Er Imtamnyi Kanya Roh Kudus aryi sunsi eterebkarebmou to, ebkalibmai.

⁵Ura, a talak ara Yerusalem atei asi Er Imtamnyi bisi moloramnyi Yahudi yala nang a kuramnyi. A nang ara im dangna tukwe dangna mutuk aryi kuboka tingyanamnyi nang ara Yerusalem atei asi kuramnyi.

⁶Kuramnyi ani, a lilim weik uram ebmou bok, ninyi nirya aryi, “Dirbinkub,” tenen bulubmai cok, sunci, “Naie, a nang aryi enmang uram yuk-yuk ara nun deiansei mutuk nang aryi eraming uram yuk-yuk bikoka enmang,” tenebmai.

⁷Kekebmai cok, sunci, “Naie,” tenen ato eboka asibdanmai, “A uram enmang nang nirya ara Galilea mutuk nang kuraming asi, sunci nun deiansei mutuk nang enub uram yuk-yuk enmang ati una kuboka bikmang do?

⁸

⁹Nun yuk-yuk enub uram ara nun Partia mutuk nang eramib to, nun Media mutuk nang eramib to, nun Elam mutuk nang eramib to, ukuboka enmang. Tonda, nun Mesopotamia mutuk nang eramib to, nun Yudea mutuk nang eramib to, nun Kapadokia mutuk nang eramib to enmang cok, nun Pontus mutuk nang eramib to, nun Asia mutuk nang eramib to, ukuboka enmang.

¹⁰Tonda, nun Frigia mutuk nang eramib to, nun Pamfilia mutuk nang eramib to, nun Mesir mutuk nang aryi eramib to enmang cok, Libia mutuk ara Kirene atei dam-dam mutuk nang eramib to, tonda, nun Roma atei aryi yandoka tingyanamoubwe nang eramib to, ukuboka enmang.

¹¹Nunda Yahudi yala nang ab ton, Er Imtamnyi Uram walwal kuramoubwe ani, sun Yahudi yala nang asi miliraming nang ababyi, Kreta mutuk nang ton, Arab mutuk nang ababyi nun deiansei mutuk nang enub uram yuk-yuk asi kekenmab. Ara, nun uram yuk-yuk eboka sunci Er Imtamnyi biryi kiknibmou ilil tenen dinyi asi lak enmasing asi kekenmab,” eboka asibdanmai.

¹²Kekebmai cok, ninyi nirya aryi, “Naie talinyi,” teneboka, “A dinyi unatoa aryi kubmar do?” eboka sun mamun asibdanmai.

¹³Asibdanmai bok, yuk nang aryi kekebmai cok, sunci lakana uram eboka, “A nang aryi anggur me yibmang uca, luba talebmar aryi, sun walwal uram enmang,” ebmai.

¹⁴Ton nang aryi ato enmang bok, er Petrus ab er kwityabwe Teleb Uram eteren deyok nang yuk nang koklombaryi ab tikokmai cok, er Petrus biryi uram weik doboka sun bulubmai nang asi ato ebmou. “Ni kwityabwe Yahudi yala nang ab, ton sun Yerusalem atei kundarur nang o. Ni a kubmar deyok ati ebkwinsin uram asi sunci diboka kekebmun cok, bikdobdarur o.

¹⁵Sunci a nang ati, ‘Anggur me yibmang uca, luba talebmar nang aca,’ tenebmarum bok, anggur me kum yibmang ati ebman. Kiting tuba ururuk enmar ati, anggur me kum yiraming talak ati ebman.

¹⁶Sun asing eibmarum dinyi ara luba talen dinyi kuma. Erda, Er Imtamnyi Uram ebdeibmaca bobaramunyi si Yoel biriman aryi ebmou to kunubmar ati, asing eibmarum. Ara, nabi Yoel biryi minob ura ato ebmou,

¹⁷‘Im dangna tukwe dangna asi sirya kobdob talak berekci ura, Nira Imtamnyi biryi ninyi nirya asi Ni Kanya Roh Kudus dongoboka karebkwan. Ni Kanya asi sirya dongoboka karebnyi ura, sun mabwe nermabwe ara Ni uram bikoka lak eterebkwaming. Sun kam nang ara Niryi lak kibkwan dinyi asing eibkwaming ba, sun wise nang asi lengdera biriman aryi Niryi Ni dib en uram lak kibkwan.

¹⁸A sirya kobdob talak berekci ura, Niryi Ni arungna nang ara sal babyi nerbabyi Ni Kanya Roh Kudus aryi dongoboka karebnyi ura, Ni uram bikoka lak eterebkwaming.

¹⁹A talak ara Niryi karebnyi ba, imtam aryi kuboka ilil tenen dinyi eibmun cok, tukwetam ababyi minob kum eirirandau dinyi eibkwandum. Ara, ining ab, uk ab, uk tulum ab asing eibkwandum.

²⁰Kiting ara lukunda ato kubkwande. Wala ara ining bol ato dinyi kubkwande. Er Imtamnyi biryi Er mikib lak kibkwande uki tum kum berekabde bok, ato kubkwande.

²¹Ura, unanyi-unaner aryi Er Imtamnyi si nabkwanci ura, anyi-aner asi Er Imtamnyi biryi lebkwansir.’ (Yoel 2:28-32) Ato eboka nabi Yoel biryi minob ebmou.

²²Ati, ni kwityabwe Israel nang, sunci ni ebtabakwinsin uram kekebdarur. Er Nazaret ateinyi si Yesus bira Er Imtamnyi biryi Bokwetebmounyi kuramwe ati, Er Imtamnyi biryi sunsi lak kibmou ati ebman. Ara, Er Imtamnyi biryi Er Yesus deib aryi sun kankan aryi ilil tenen dinyi ab, asing kum eirirandau dinyi ab, ‘Naie,’ tenen dinyi ab kikniramwe ara sun bikmarum.

²³Er Yesus bisi sunci sun malyi kun nang biriman aryi co lase likniboka obmandau. Er Imtamnyi biryi minob bikoka, ‘Ato-ato kubkwandur,’ teneiramwe to kunuboka sunci ato kubmandau.

²⁴Dibmou ura, Er Imtamnyi biryi Ersi kam bukeibmou. Ara, Er Yesus dibmanto aryi mambul weik kubmou bok, Er Imtamnyi biryi Ersi lebmou. Er Yesus bira iya dibman kumnyi kurur aryi, Er Imtamnyi biryi Ersi kam bukeibmou.

²⁵Nun aibwe Daud biryi Er Yesus biti ato ebmou. ‘Niryi tanglona kum uca Er Imtamnyi ni taram tam kunurutnyi bisi asing eiriranse. “Ninyi aryi ersi kum dubkwaming,” tenen Erci ni siriktam asi tingdur.

²⁶A deyok aryi, ni kanya kilkil kunurur bok, niryi Teleb Uram akwe enun. Nira dinanyi kuran asi, Kansi dibde bukunun.

²⁷Ni sirya dibnyi ura, sun din nang dam wengbinyi ura, Kanci ni kanya asi tanglona kum kubkwanirim. Nira Kan wibmanumnyi biti Kanci, “Lubcei,” tenen lebkwanirim.

²⁸Kanci nisi etereboka, “Ato kubminyi ura, diboka kam kubkwandim,” ebmanumwe. Kan ab ni ab tonkwa kununum bok, ni kanya kilkil weik kunurur.’ (Mazmur 16:8-11) Ato eboka nun aibwe Daud biryi minob eterebmou.

²⁹Ati, ni kwityabwe o. Nun aibwe Daud biryi ato ebmou asi, er sirya dibmou ati, niryi sunsi lak ena ara kikib. Dibmou ura, keil umbura dam deibmai ani, er tukwe deibmai dam ukuryok tuba kurur.

³⁰Nun aibwe Daud bira Er Imtamnyi biryi aminda kunubkwamwe dinyi ebdeibmaca bobaramunyi biryi erdamnyi biti ato kum ebdanmou. Erda, erci Er Yesus bira Er Imtamnyi biryi wibmunyi Ninyi Lemsurutnyi biti ato ebmou. Er Daud biryi Er Imtamnyi dib en uram teneiboka ato ebmou. Ara, Er Imtamnyi biryi Er uram ebdarabmou ci, er Daud bisi diboka ebdeiboka, ‘Kan yala nang aryi sienyi tikeibnyi ura, anyi bira aminda aryi sun Israel yala nang asi kalikwande,’ ebmou. (Mazmur 132:11)

³¹Ara, er Daud biryi aminda kunubkwamwe dinyi bikoka erci Er Yesus Kristus kam bukokwamunyi deyok ati ato ebmou. Ara, erci Er Imtamnyi biryi wibmou Ninyi Lemsinanyi biti ebmou ara sirya dibci ura, sun din nang dam wengbici ura, Er kanya asi Er Imtamnyi biryi tanglona kum kubte. Tonda, Er bol otong luna kum kubte.

³²Anyi Yesus bisi Er Imtamnyi biryi kam bukeibmou. Nun nirya aryi asing eibmoubwe ati, ato eboka lak enmasib.

³³Sirya bukeibmou ura, Er Imtamnyi biryi Ersi erebdeiboka, ‘Ni siriktam bukokmin ci, im dangna tukwe dangna nang nirya asi kalikwanim,’ ebmou. Sirya erebdeibmou ura, Er Imtamnyi biryi ebmou to, Er Yesus bisi Er Kanya Roh Kudus karebmou. Sirya karebmou ura, Er Yesus biryi sun ukuryok asing eibmarum dinyi ab sun kekebmarum dinyi ab karebmasir. Ara, Er Imtamnyi Kanya Roh Kudus nun dam yuryanmar ara Erci nunsi karebmasir.

³⁴Nun aibwe Daud bira imtam bowelena kumnyi kuramwe bok, ato ebmou, ‘Er Imtamnyi bira ni Nai Arungdeirinurutnyi bisi ato ebmou, Kanci Nira Imtamnyi siriktam buryarum. Burum ba, Niryi Kan mar ordana nang asi muna kibdongobnyi uca, Kanci yanisitabkwandim nang kibdeibkwan,’ ebmou. (Mazmur 110:1) Ato eboka nun aibwe Daud biryi Er Yesus imtam bowelebkwamwe ati minob bikoka lak ebmou.

³⁵

³⁶A deyok aryi, sunda Israel yala nang aryi, ‘Er Imtamnyi biryi Er Yesus bisi Erebdobnyi ab Ninyi Lemsinanyi ab tikeibmou,’ tenen diboka bikwandarur. Anyi Er Imtamnyi biryi tikeibmunyi bisi sunci co lase deici likniboka obmandau,” eboka Petrus biryi ebmou.

³⁷Er Petrus biryi ato ebmou ba, sun kekebmai nang sun kanya asi lukmou aryi mambul weik kubmou. Mambul weik kubmou bok, sunci er Petrus ab sun yuk Teleb Uram deyok kouboka eteren nang asi ato ebmai, “Nun kwityabwe, nun una kubkwayeb do?”

³⁸Ebmai ba, er Petrus biryi sunsi ato ebmou. “Sunda sun malyi tenendarur dinyi asi takloboka Er Imtamnyi kanya teleb kurdeirin dinyi akwe kubkwandarur. Kubmun cok, sun yuk-yuk aryi, ‘Er Imtamnyi biryi ni malyi dinyi kilibnute,’ tenen, ‘Er Yesus Kristus si deib aryi me dongobnurum,’ ebkwandarur. Me dongobsibyi ura, Er Imtamnyi biryi karebsici ba, Er Imtamnyi Kanya Roh Kudus sun dam yuryankwansir.

³⁹Er Imtamnyi biryi, ‘Ni Kanya Roh Kudus asi karebkwan,’ ebdeibmou uram ara Erci sun ab sun mabwe ab asi ebdeibsou cok, sun im dangna tukwe dangna mutuk aryi kuboka nabkwanci nang nirya ababyi Erci ato ebdeibmou,” ebmou.

⁴⁰Ebmou ura, er Petrus biryi yuk uram ebtabakmou ci, erci sunsi, “Sunci sun ukuryok kuraming nang ara malyi kuraming to takloboka sunbaramnyi lebdandobdarur,” eboka arukmou.

⁴¹Sirya ebmou ura, sunci er Petrus biryi ebmurubmou uram dib tenebmai nang asi me dongobmai. A uki tum ara ninyi tiga ribu baryi dib tenebkalibmai ura, sun dib tenen nang ab tonkwa buluramnyi.

⁴²Ara, tanglona kum uca sunci sun Teleb Uram deyok kouboka eteren nang aryi etereramnyi uram kekeramiryok, sunda tonkwa buluboka, yina tonkwa yiboka, Er Imtamnyi bisi moloboka kuramnyi.

⁴³Sun Teleb Uram deyok kouboka eteren nang aryi ilil tenen dinyi ilinto kikniramnyi uca, sun ninyi nirya aryi, “Naie,” teneboka ilil kubmou.

⁴⁴Ilil kubmou bok, sun dib tenen nang ara neik dam buluboka kuramiryok, sun yuk-yuk kubmaci dinyi sun kwityabwe asi ur kareramnyi.

⁴⁵Ara, sun bona bon nang aryi sun kubmaci dinyi dekoka abiryi, co bok dobdobmai ura, sunci bokeiboka sun kwityabwe asi karebmai. Ara, sun yuk-yuk atanmou to kuboka karerdaramnyi.

⁴⁶Karerdaramiryok, uki nirya aryi Bait Allah ai ara Er Imtamnyi ninyi dama deirin ai dam buluboka neik kanya boramiryok, sun yuk-yuk ai bindoka yina tonkwa yiramnyi. Ara, sun kanya kilkil kuboka luknubdob kanya boboka sunda yina tonkwa yiramnyi.

⁴⁷Yiramiryok, sunci Er Imtamnyi si weik eramnyi ba, ninyi nirya aryi sunti, “A nang ara teleb nang,” teneramnyi. Teneramnyi bok, Er Imtamnyi biryi dib tenebkalibmai nang yuk nang asi tuba-tuba tabangdongoramwe.