Read Futuna-Aniwa Kisah Para Rasul 20 Bible Online

Kisah Para Rasul 20 - Futuna-Aniwa bible

Kisah Para Rasul 20

¹Kunmai ani, sun Efesus atei nang aryi uram weik enmai ara takmai ura, er Paulus biryi sun Efesus atei kuramnyi dib tenen nang asi nabmou. Nabmou ba, bulubmai ura, er Paulus biryi sun kanya katabum ebdeibmou. Sirya katabum ebdeibmou ura, erci sunsi, “Bokdankub ati, da kubdarur,” ebmou. Sirya bokdanmai ura, er Paulus anabdobmou. Ura, erci weik co ngun-ngun wekoka aburyi, ilila mekwan deici banmou ani, Makedonia mutuk binmou.

²Binmou ura, er Paulus bira Makedonia mutuk nirya yibinkirikoka erci uram weikanun eboka sun dib tenen nang sun kanya asi katabum ebdeibde yibaramwe. Yibinkirikoka baramwe ani, Yunani mutuk dam binmou.

³Binmou ura, Yunani mutuk kuramwe ara, wala winiryi mabisibmou. Ura, er Paulus biryi, “Weik co ngun-ngun wengbindoka Siria mutuk binkwan,” tenebmou. Ato tenebmou ura, er Paulus biryi Siria mutuk binkwamou ci, kunmou asi sun Yahudi yala nang aryi erti, “Obtibyi,” tenen ukubdenmai. Ukubdenmai ati, er Paulus biryi, “Sun Yahudi yala nang aryi nisi obningnyei,” tenen Siria mutuk kum binmou. Erda, erci uram dobdeiboka Makedonia bisik bindoka tamurbinmou.

⁴Tamurbanmou bok, ninyi mikbaryi sunbabyi Makedonia mutuk banmai. A nang ara er Paulus ab tonkwa banmai nang sun si yuk-yuk ara: Sopater ab, Aristarkhus ab, Sekundus ab, Gayus ab, Timotius ab, Tikhikus ab, Trofimus ab. Er Sopater bira Berea atei deiaminyi kuboka Pirus er mi kuramwe. Tonda, Aristarkhus ab Sekundus ab ara Tesalonika atei nang kurandei. Tonda, Gayus bira Derbe ateinyi kuramwe. Tonda, Timotius ab, Tikhikus ab, Trofimus ab ara Asia mutuk nang kuramnyi. A nang nirya ara nun ab tonkwa banmoubwe.

⁵Banmoubwe ura, sunda minob menengbindoka abiryi, Troas atei bindoka dibde kunmasei bok, Paulus ab ni Lukas ab ara aminda binkwanumwe.

⁶Dibde bukmasei bok, weik kwalina si Bung-bung En Kum Roti Yina tum bisibmou ura, er Paulus ab ni Lukas ab anabdobmanumwe. Ara, Filipi atei aryi anaboka weik co ngun-ngun wengbindoka abnumuryi, ilila mekwan deici banmanumwe. Banmanumwe ura, uki amubaryi mabmanumwe ani, nunbabyi Troas atei binmanumwe. Binmanumwe ura, nunci nun kwityabwe menekoka binmai nang ab ebdanmoubwe. Ura, Troas atei ara uki tabaryi kubmoubwe.

⁷Ura, nunda Hari Minggu eramib uki tum berekmou ura, nun ab sun Troas atei kuramnyi dib tenen nang ab tonkwa bulubmoubwe. Ara, “Roti toboka tonkwa yibkwayeb,” tenen bulubmoubwe. Sirya inibwe ura, roti kum yiabuburyok, er Paulus biryi, “Ambutum anabdobkwayeb,” tenebmou ci, erci sun a wekmai nang asi uram weikanun ebmou. Uram weikanun enmou uca, sirya inibmou ci, lukunda dukduk ena kibmou.

⁸Nun buluboka wekmoubwe ai ara eikai uk ubna ilinto abdeibmai asi wekmoubwe.

⁹Abmou bok, kamnyi tentok er si ara Eutikhus bira eikai bisi botorkwetena ai bukmou uca, wi mablukmou. Ara, er Paulus biryi tanglona kum uca uram tuba sisingmurunmou ba, Eutikhus wi mablukmou. Wi mabmou ani, lukdandoka eikai bisik botorkwetena aryi sakoka baitam tukwe ai maryurbinmou. Eikai ara yuk eikai deici doamnyi ati, iya erebdob ai aryi kuboka sakmou. Sakmou asi, ninyi nirya cung yurbindoka dortaleroi uca, diba dibmou.

¹⁰Ura, er Paulus bibabyi yuryibindoka aburyi, a kamnyi deici asi er nong liknibdongoboka aburyi, iribdobmou. Ara, erci, “Er Imtamnyi biryi a kamnyi bisi kam bukeibte,” tenen ato kubmou. Iribdobmou cok, erci sun a tikmai nang asi, “Mambul kanya bona mem. A anyi bira diba dibmar bok, kam bukokmar ati ebman,” ebmou.

¹¹Ato ebmou ura, er Paulus biryi tubto eikai welebindoka aburyi, roti toboka bokmou ura, nun roti tonkwa yibmoubwe. Tonkwa sirya yibmoubwe ura, er Paulus biryi uram cang eboka sisingmurunmou bok, berekmou. Sirya berekwe ura, er Paulus biryi, “Nun binkub ati, da kubdarur,” ebmou. Ebmou ura, sunci, “Teleb nun nai, da birum,” ebmai ba, bokdanmoubwe ura, nun anabdobmoubwe.

¹²Ura, sun Troas atei nang sun kanya kilkil weik kubmou. Ara, er kamnyi si Eutikhus sakmou uca, dibmou asi kam bukeibmou deyok aryi, sun kanya ara kilkil mitik kum kubmou.

¹³Ura, er Paulus bira tukwe bis banmou bok, nun er kwityabwe ara weik co ngun-ngun wekoka aburyi, ilila mekwan deici kuboka minob menengbinmoubwe. Banmoubwe ani, atei si Asos asi binmoubwe ura, nunci er Paulus bisi dibde bukmoubwe. Ara, er Paulus biryi, “Nira tukwe bisik yanganmanyi ani, Asos atei yanmanyi ba, ebdankwayeb,” eboka ebdeiansou. Ato ebdeiansou ati, nunda Asos atei bindoka kunmaburyi, erti dibde bukmoubwe.

¹⁴Ura, er Paulus sirya yanmou ura, nun nirya ara weik co ngun-ngun asi tonkwa wengbinmoubwe. Sirya wengbinmoubwe ura, mekwan deici banmoubwe ani, Metilene atei binmoubwe.

¹⁵Metilene atei aryi anaboka ilila mekwan deici tubto banmoubwe. Banmoubwe ani, berekwe ura, Khios mutuk asi otam mutuk binmoubwe. Ura, mabmoubwe ani, berekwe ura, anaboka mekwan deici tubto banmoubwe. Tubto banmoubwe ani, weik me dumdum si Samos binmoubwe. Ura, tubto a bindoka mabmoubwe ani, berekwe ura, Miletus atei binmoubwe.

¹⁶Banmoubwe ura, nunci Efesus atei ara bisibkaboka Miletus atei anmalakoka binmoubwe. Ara, er Paulus biryi, “Weik kwalina si Pentakosta asi Yerusalem atei kwalibtinyi,” tenen, “Asia mutuk nang asi dirbinyi uca, uki bisibnicei,” tenen deyok aryi, nunci Efesus atei ara kum binmoubwe.

¹⁷Ura, Miletus atei asi kunmaburyi, er Paulus biryi, “Sun Efesus atei kuramnyi dib tenen nang kalingna nang ab tonkwa ebdankwayeb,” tenebmou. Tenebmou ura, erci ninyi deici aryi uram ebdeiboka aburyi, sun Efesus atei kuramnyi dib tenen nang kalingna nang asi nabmou.

¹⁸Nabmou ba, sun akatei dib tenen nang kalingna nang ara Miletus atei yanmai. Ura, sun ab nun ab tonkwa ebdanmoubwe ura, er Paulus biryi sunsi ato ebmou, “Ni kwityabwe e, nira yuma Asia mutuk a yanmase akiryi kuboka ni ab sun ab tonkwa kuramoubwe. A tonkwa iya kuramoubwe talak aryi ni kuranse to ara sun nirya bingnindarur.

¹⁹Ara, luknubdob kanya boransiryi, nun Du Yesus biryi nisi takubdeibnou wa asi kunuranse. Tonda, mambul kurdeirinin dinyi deyok aryi, engen kanya boransiryok, Teleb Uram etereransise. Ara, sun yuk Yahudi yala nang aryi marmun yiboka, ‘Obtibyi,’ tenen ukurderanei uca, ni mambul weik kurdeiriranei bok, niryi tanglona kum uca nun Du Yesus biryi takubdeibnou wa kunuranse.

²⁰Etereransisiryok, niryi bikdob uram tentok ababyi kum singirdongoranse. Erda, niryi sun kanya teleb kimdeirin uram akwe eboka etereransise. Ara, ninyi nirya bulun ai asi etereransise ababyi, ninyi ai yuk-yuk asi etereransise ababyi, niryi sun kanya teleb kimdeirin uram tentok ababyi kum singirdongoranse.

²¹Sun Yahudi yala nang ababyi sun yuk yala nang ababyi niryi etereransise. Etereransise ura, niryi sunsi ato eransise, ‘Ni kwityabwe, sunci sun malyi tenen dinyi takloboka Er Imtamnyi teleb tenesurur dinyi akwe kunubde bindarur. Ato kubmun ci, sunci nun Du Yesus bisi dib tenebdarur.’ Ato eboka niryi uram ebdaraboka lak etereransise.

²²Ura, ukuryok ni ab sun ab bokdabyi ura, ni Yerusalem atei binkun. Ara, Er Imtamnyi Kanya Roh Kudus aryi mikib kuboka nisi arukmanir ati nira sien atei Yerusalem binkun. Binkun bok, niryi Yerusalem atei binyi ura, nisi kubkwanir dinyi ara ni kum bikdanman.

²³Kum bikdanman bok, nira atei yuk-yuk yibaranse ba, Er Imtamnyi Kanya Roh Kudus aryi ebdaraboka nisi ato eterebnin baranou. ‘Paulus, kan Yerusalem atei biminyi ura, ninyi aryi kansi taleboka ninyi wenen ai dongobkwanking. Tonda, ninyi aryi kansi mambul weik kubdeibkwanking,’ eboka Er Imtamnyi Kanya Roh Kudus aryi ebdaraboka etereranou.

²⁴Ato kubkwanir bok, niryi, ‘Kam kuna babyi, dimna babyi nisin malyi,’ tenenun. Ato tenenun ati, mambul kurdeirin dinyi asi ni kum lebe sekwan. Ara, niryi, ‘Obningnyei,’ tenen, ‘Ni lebdandobtinyi,’ kum tenenun. Nira kilkil kanya boboka nun Du Yesus biryi nisi takubdeibnou wa nirya kunubkwan ati, nisi mambul kurdeirin dinyi asi kum lebe sekwan. Erci nisi takubdeibnou wa ara Teleb Uram eterena ati, takubdeibnou. Ati, niryi a dinyi nirya kunubde banun ci, ‘Er Imtamnyi bira sunsi teleb kurdeirisurutnyi kurur,’ eboka Teleb Uram eterenun. Niryi, ‘A Teleb Uram asi ebdaraboka eterebkwan,’ tenen nisi mambul kurdeirin dinyi asi kum lebe sekwan.

²⁵Ura, niryi atei yuk-yuk yibindoka, ‘Er Imtamnyi bira Weik Sienyi kuboka ninyi ilinto lebdeiboka Er amwetam kun nang kimdeirirur ati sunbabyi Ersi milibdarur,’ eboka etereransise. Ura, ukuryok ni ab sun ni eterena uram asi kekebmanindau nang ab ara tubto ton kum ebdankwamib ara ni bikman.

²⁶A deyok aryi, arub aryi niryi uram ebdarabdeiboka sunsi uram ton ebkwinsin. Niryi Teleb Uram etereransise ura, ni uram tentok ababyi kum singibdongobmase. Erda, Er Imtamnyi biryi teleb tenesurur dinyi nirya asi lak kimnansisiryi, niryi sunsi etereransise. Ati, sunci Teleb Uram walwal kubsute ara, nira deyok kum bobtinyi. Walwal kubsute ura, sundamnyi deyok bobdaute. Niryi sunsi Teleb Uram lak etereransise ati ato ebmasin.

²⁷

²⁸Ura, sun dib tenen nang kalingna nang ara sundamnyi kalikdandarur. Sundamnyi kalikdamun cok, sunci sun dib tenen nang yuk nang asi, ‘Nun Du bisi milibmurubdarur,’ eboka kalikdarur. Ara, sunci, ‘Er Imtamnyi Kanya Roh Kudus aryi nunsi tikeibsou,’ tenen sunci sun nirya asi kalikdarur. Sun domba kalingna nang ara sun domba asi busul kuboka kalingnaming to, sunbabyi busul kuboka sun dib tenen nang asi kalikdarur. Nun Du Yesus dibmou deyok aryi, Er Imtamnyi biryi sun dib tenen nang asi er mabwe kibdeibmou. Ati, sunci a dinyi teneibmun cok, sun dib tenen nang asi diboka kalikdarur.

²⁹Ni Paulus sirya binmanyi ura, tola uram eteren nang ara sun kankan dam asi yankwaming. A nang ara tola uram eterebingnyi uca, sun dib tenen nang kanya asi kankana kubkwansir. A nang ara, ‘Sun dib tenen nang aryi Teleb Uram dokdonokting,’ tenen tola uram akwe eterebkwaming. A nang kuraming to ara bai kam kurande to kurur. Bai kam ara yu weik kuboka domba asi oyiboka malyi kurdeirirande to, sun tola uram eteren nang neiktoto sun dib tenen nang asi malyi kurdeiriraming.

³⁰Ton tola uram eteren nang ara sun ab tonkwa bulurandum dib tenen nang kankan aryi anabkwaming. A nang ara sun dib tenen nang ati, ‘Dib en uram dokdonoktingiryi, nunsi milibsiting,’ tenen tola uram akwe eterebkwaming.

³¹A deyok aryi, sunda kalingna nang ara diboka kalikdarur. Kwalina winiryi ara ni Paulus biryi sunsi tanglona kum uca tuba-tuba Teleb Uram etereranse asi sunci kanya teneibkwandarur. Ara, ni kanya mambul weik aryi engeranou bok, niryi ninyi yuk-yuk nirya asi, ‘Ato-ato kubdarur,’ eboka etereransise. Niryi kitingtam lukunda nirya asi ato kuranse ati, sunci luba kibmunyei. Ati, sunda kalingna nang aryi ni kuranse to teneiboka, sunbabyi neiktoto kubdarur.

³²Ura, ukuryok ni binkwan ati, niryi sunsi, ‘Er Imtamnyi biryi sunsi kalingsina teleb,’ ebkwinsin. Tonda, ‘Nun Nai Imtamnyi biryi, “Teleb kubdeibkwan,” ebdeibmasou to, erci sunsi kunubsute,’ tenen niryi sunsi, ‘Da kubdarur,’ ebkwinsin. Er Imtamnyi bira mikibnyi kurur ati, erci sun dib tenen nang kanya asi katabum erdeirisina teleb. Tonda, nun Nai Imtamnyi biryi sun dib tenen nang nirya asi, ‘Ni mabwe,’ tenen iya teleb kurdeirisurur to, Erci sunbabyi neiktoto tanglona kum uca iya teleb kurdeirisina teleb.

³³Ura, ni Paulus bira sun ab tonkwa kuramoubwe ura, niryi sunsi, ‘Dengna weik keil si emas ton perak ton karebniting,’ tenen wa ina kum kuranse. Tonda, ‘Ongon aling ton karebniting,’ tenen wa ina kum kuranse. Ninyi tentok ababyi niryi ato eboka ton kum moloransise.

³⁴Erda, niryi ni taruk aryi tukwetam nang wa tabakoka iranse uca, ninyi aryi dengna kareranei. Dengna dororanse ura, yina totoa ab yuk dinyi ab asi niryi dengdoranse. Ato kuboka niryi ni ab ni ab tonkwa kuramoubwe nang ab ataransou to dirniliranse. Sun nirya ara a dinyi bikmarum.

³⁵‘Ni kuran to milibniting,’ tenen niryi a dinyi nirya asi ukuransise. Ara, nunci busul kuboka nun taruk biriman aryi tukwetam nang wa iboka abibiryi, sun u yin nang atabmanto kareramoubwe to, sunbabyi neiktoto kubdarur. Nun Du Yesus biryi ebmou uram asi sunci luba kibmunyei. Ara, erci ato ebmou, ‘Ninyi aryi sunsi ur karesingnyi ura, Er Imtamnyi biryi sunsi kisal dakwansir. Ba, sunci yuk nang asi ur karemunyi ura, Er Imtamnyi biryi tabakdongoboka iya kisal dakwansir,’ ebmou. Ati, sunci a uram teneibde ukubdarur,” ebmou.

³⁶Ura, er Paulus biryi ato sirya ebmou ura, er ab sun Efesus atei kuramnyi dib tenen nang kalingna nang ab sun kutam ikdongoboka Er Imtamnyi bisi molobmai.

³⁷Sirya molobmai ura, sun nirya aryi, “Bokdankub,” tenen engebdanmai. Engebmai ura, sunci er Paulus bisi iriboka, “Nai o, da birum,” ebmai.

³⁸Ara, er Paulus biryi, “Aminda aryi ton kum ebdankwayeb,” ebmou ati, sun kanya ara mambul weik kubmou. Ura, er Paulus anaboka weik co ngun-ngun wengbinmou ba, sun Efesus atei aryi yanmai ninyi kalingna nang aryi ersi bongdeirirbinmai.