Read Futuna-Aniwa Kisah Para Rasul 22 Bible Online

Kisah Para Rasul 22 - Futuna-Aniwa bible

Kisah Para Rasul 22

¹Ara, er Paulus biryi uram doboka sun a bulubmai Yahudi yala nang asi ato ebmou. “Ni naiyabwe ab, ni kwityabwe ab, nira nidamnyi libdankun ati, ni ebkun uram asi sunci kekendarur,” ebmou.

²Ebmou ba, sun a bulubmai nang aryi, “Ei, anyi bira nunda Yahudi yala nang uram aryi ebmar,” tenen sun uram nirya diboka kilikmai. Kilikmai ura, er Paulus biryi ebmurubmou.

³“Nira Yahudi yala nang kunun. Nira Kilikia mutuk weik atei si Tarsis aryi deianei ba, nebse ura, nira Yerusalem atei yananse. Yerusalem atei asi yanmase ura, ninyi eterenanyi si Gamaliel biryi nisi etereranou. Ara, er Musa biryi nun aibweyabwe asi takubdeiamwe uram asi er Gamaliel biryi liliboka etereranou. Tonda, nira busul weik kuransiryi, ‘Er Imtamnyi biryi arukdeibsou uram asi diboka kunubtinyi,’ tuba-tuba teneranse. Ara, sunbabyi ukuryok busul kurandum ci, ‘Er Imtamnyi Uram diboka kunubtibyi,’ tenerandum to, nibabyi neiktoto ato teneranse.

⁴Ato kuransiryi, niryi sun ukuryok eterena uram asi miliramnyi nang ati, ‘Obtinyi,’ tenen domkiringnanse. Ara, sun Er Yesus bisi dib tenen nang nirya asi domkiringnansiryi, sal babyi nerabwe babyi tabwe deboka absiryi, ninyi wenen ai umbura dongobmase.

⁵Er Imtamnyi kan ninyi kan noutam kuboka antanirdeirin sienyi ab, ton nun Israel yala nang ab asi kalikoka uram sengkwetena nang ab aryi ni kuranse to nirya bingnunung. Nira tola uram kum ebman ati, a nang aryi bingnunung. Ura, a sien nang aryi kerek sengna ton kerek sekeiboka sun Damsyik atei kuramnyi Yahudi yala nang asi deibmai. A kerek sengna umbura aryi Er Imtamnyi ai wa in nang sienyi biryi ato eboka kerek sekeibmou. ‘Anyi Paulus biryi sun Damsyik atei kuboka Er Yesus bisi dib tenen nang asi ur talebkwandur. Sirya talebci ura, erci a nang asi Yerusalem atei boyankwandur. Ara, nunda Yahudi yala nang asi kalikoka uram sengkwetena nang aryi a nang asi wenebkwamib ati, er nun wa irmilinanyi Paulus biryi a nang asi taleboka nun dam boyankwandur,’ eboka Er Imtamnyi kan ninyi kan antanirdeirin sienyi biryi kerek sekmou.

⁶Ura, niryi a kerek sengna boboka Yerusalem atei aryi anaboka banmase. Banmase ani, Damsyik atei damtoto banmase ura, kiting dukduk ena kibmou. Kiting dukduk ena kubmou asi, imtam aryi kuboka berengna weikanun ni dam lukdandoka ling ebwe uca, ni kanya dangtuninim ebmanou.

⁷Dang ebmanou ura, nira sakoka tukwe ai maryurbindoka kekeranse uca, uram lilim kekebmase. Ara, kekese uca, ‘Saulus, Saulus! Unato ati, kanci nisi domkiringnurum do?’ ebmanou.

⁸Ato ebmanou ba, niryi ilil asa aryi, ‘Nai o, Kanda unanyi do?’ ebmase uca, er uram ebmunyi biryi, ‘Nira Nazaret ateinyi si Yesus kunun. Nira kan Paulus biryi domkiringnurumnyi kunun,’ ebmou.

⁹Ato ebmou bok, sun ni ab tonkwa banmoubwe nang ara sinarya berengna ara asing eibmai cok, nisi ebmanou uram ara sun kum kekebmai.

¹⁰Ura, niryi ni uram ebmanounyi bisi asibdenmase, ‘Nai Du, nira una kubkwan do?’ ebmase uca, Erci nisi ato ebmanou, ‘Tikokminyi ura, Damsyik atei wengbirum. Wengbiminyi ura, ninyi aryi eterebkingnyi uca, Er Imtamnyi biryi takubdeibkwankir dinyi nirya asi bikwandim,’ ebmou.

¹¹Ebmou ura, ni asing ara sinarya milil aryi kubmanou tok iya kubmurubmanou. Ba, sun ni ab tonkwa banmoubwe nang aryi nisi taruk talebmanei ura, Damsyik atei bobinmanei.

¹²Ura, Damsyik atei ara ninyi tentok si Ananias kuramwe. Anyi bira Er Imtamnyi bisi miliramunyi kuramuryi, er Musa biryi ebdeiamwe uram asi kunuramunyi kuramwe. Sun Damsyik atei kuramnyi Yahudi yala nang nirya aryi erti, ‘Anyi bira telebnyi kurur,’ eramnyi.

¹³Anyi Ananias biryi yandoka ni dam tikmou ci, ‘Saulus, ni kwit, kan asing eibkatana teleb,’ ebnou. Ebnou ura, ‘Naie,’ tenen diranse uca, ni asing eibkatabsiryi, niryi ersi diboka eibmase.

¹⁴Ura, er Ananias biryi nisi ato ebmanou, ‘Er Imtamnyi bira nun aibweyabwe aryi moloraminyi biryi kansi wibdobmakou. Ara, nun Nai Imtamnyi biryi Paulus kanda, “Ni teleb tenenun dinyi asi bikwandur,” tenen wibdobmakou. Tonda, “Er Yesus bira iya telebnyi bisi asing eibdiryi, er uram kekebkwandur,” tenen Er Imtamnyi biryi kansi wibdobmakou.

¹⁵Ati, kan asing eibmumwe dinyi ton kan amol kekebmumwe uram ton asi kanci aminda aryi boboka sun yuk nang asi lak, “Dib en uram akwe,” ebmin ci, eterebkwandim. Ara, ninyi nirya aryi Er Yesus bisi dib tenebkwaming ati, kanci Teleb Uram boboka lak eterebdum.

¹⁶Ati, ukuryok kan ukurlona kuma. Erda, kan tikokminyi ura, niryi kansi me dongobkwinkin. Tonda, kanci nun Du Yesus si weik ebmin ci, nabminyi ura, Er Imtamnyi biryi kan malyi kun dinyi asi kilibkwamakir,’ eboka Ananias biryi nisi ato ebmanou,” ebmou.

¹⁷Ato ebmou cok, Paulus biryi uram ebmurubmou ci, ato ebmou, “Ura, nira Damsyik atei aryi anaboka ani, Yerusalem atei tamuryanmase. Tamuryanmase ura, nira Er Imtamnyi biti ninyi dama deirin ai Bait Allah ai dam wengbindoka absiryi, Er Imtamnyi bisi molobmase. Molobmase uca, Er Imtamnyi Kanya Roh Kudus aryi nisi karebmanou ba, dib asi asing eibmase.

¹⁸Dinmase uca, nun Du Yesus biryi nisi ato eboka arukmanou. ‘Paulus, kanda Yerusalem atei aryi anaboka cungbirum. Kanci Ni Yesus deyok ati dib en uram lak erum bok, sun Yerusalem atei nang aryi dib kum tenebkwaming ati, kan anaboka birum,’ eboka nun Du Yesus biryi nisi arukmanou.

¹⁹Arukmanou bok, niryi nun Du Yesus bisi ato ebmase. ‘Nai Du, ni Yerusalem atei asi tuba kubtinyi. Sun Yerusalem atei nang aryi ni minob kuranse to nirya bingnunung. Ara, niryi sun Kansi dib tenen nang ati, “Diboka talebtinyi,” teneransiryi, sun Musa Uram eteren ai yuk-yuk asi wengbindoka absiryi, niryi sunsi taleransiryi, bongnanse.

²⁰Tonda, sun Yerusalem atei nang aryi Kan dib en uram asi lak etereramunyi si Stefanus bisi onmai ara, nibabyi a tikmasiryi, ni ab tonkwa obmoubwe. Ara, sunci er Stefanus bisi obmai bok, niryi, “Er Stefanus bisi ona teleb,” tenebmasiryok, sun ersi obmai nang alib ongon aling asi kalikde tikmase. Ura, ukuryok niryi, “Nun Du deyok ati dib en uram asi lak ebtinyi,” tenen Yerusalem atei tuba kubtinyi,’ ebmase.

²¹Niryi ato ebmase bok, Er Iya Mikibnyi biryi nisi ato ebmanou. ‘Kan anaboka birum. Kanci sun yana mutuk kuraming nang yuk yala nang asi Teleb Uram eterebde binkwandim ati, arukmakin,’ eboka Er Iya Mikibnyi biryi nisi arukmanou,” ebmou.

²²Er Paulus biryi ato ebmou ba, sun bulubmai nang ara erci ebmou uram tuba kum kekebmai. Erda, yu wekmou ura, sun uram weikanun ngolokoka dobkanikmai. Ara, “Anyi bisi boboka obkwayeb,” ebmai. “Atonyi bira kam tuba kubcei,” ebmai.

²³“Atonyi bira kam tuba kubcei,” ebmai ci, sunci, “Anyi biryi Er Imtamnyi si yan yanibmar se,” tenen sun alib ongon aling kwilikdandoka tukwe borbosa dobtaleboka im sukmai.

²⁴Ura, sun Yahudi yala nang aryi uram weikanun doboka ngolokmai bok, sun yin doun nang sienyi biryi sun yin doun nang asi arukoka, “Anyi Paulus bisi nun yin doun nang atei bowengbindarur,” ebmou. Ebmou cok, erci, “Anyi Paulus biryi er malyi kubmaci to lak ebkwandura,” tenen sunci ersi tabwe aryi lituk-lituk ebmun cok, asibdendarur. Ara, “‘Sun Yahudi yala nang aryi ersi tatab-tatab ebmangnyi deyok asi bikwayeb,’ tenen ato kubdarur,” eboka er sienyi biryi sun yin doun nang asi arukmou.

²⁵Arukmou ura, sun yin doun nang aryi er Paulus bisi tabwe debmai ura, “Tabwe aryi lituk-lituk ebkub,” tenebmai. Lituk-lituk ebkoi ba, er Paulus biryi yin doun nang seratus baryi nang kalingnamunyi bisi uram ton asibdenmou. Ara, erci, “Nira Kaisar biryi kalingnaniranyi kunun ati, sunci nisi lituk-lituk ena teleb do malyi do? Tonda, sun malyi deyok lilin nang aryi niti, ‘Malyi kubmar,’ kum ebmaning bok, sunci nira Kaisar biryi kalingnaniranyi bisi lituk-lituk ena teleb do mem do?” eboka asibdenmou.

²⁶Ato eboka asibdenmou ba, a kalingnamunyi biryi sun yin doun nang sienyi bisi bindoka, “Nai o. Nun una kubkwayeb do? Nun talebmabnyi biryi, ‘Nira Kaisar biryi kalingnurutnyi kunun,’ ebmar. Ati, nunci ersi tabwe aryi lituk-lituk ebibyi asi, ukubman kum dinyi dobibyei,” ebmou.

²⁷Sun yin doun nang seratus baryi nang asi kalingnamunyi biryi ato ebmou ba, sun yin doun nang sienyi biryi er Paulus bisi yandoka aburyi, ato eboka asibmou. “Kanda dib Kaisar biryi kalingkurutnyi kurum do?” eboka asibmou. Asibmou uca, er Paulus biryi, “Diba, nira Kaisar biryi kalingnurutnyi kunun,” ebmou.

²⁸Ebmou uca, sun yin doun nang sienyi biryi er Paulus bisi ato ebmou. “Nibabyi Kaisar biryi kalingnurutnyi kunun bok, co bok ilinto deksiryi, Kaisar kalingnanyi kibdobmase,” ebmou. Ebmou uca, er Paulus biryi ersi, “Ni nai ab ni kwin ab ara Kaisar kalingna nang bitinyi kurandei ci, nisi deianirei ati, nibabyi Kaisar kalingnurutnyi kunun,” ebmou.

²⁹Ebmou ba, sun er Paulus deyok asi lilibkoi nang aryi kekebmai ci, sunci, “Anyi bira Kaisar biryi kalingdurnyi bisi lituk-lituk ebibyei,” tenen akiryok kisibdakoka er Paulus deyok asi lilina kum kubmai. Tonda, sun yin doun nang sienyi bibabyi ilil kubmou. Ara, “Se, niryi arukman ba, Kaisar biryi kalingdurnyi bisi tabwe debmanga,” tenebmou ura, er ilil kubmou.

³⁰Mabmai ani, berekwe ura, sun yin doun nang sienyi biryi, “Sun Yahudi yala nang aryi Paulus bisi tatab-tatab ebmang deyok ati ni biktinyi,” tenebmou. Ato tenebmou ura, erci sun Er Imtamnyi kan ninyi kan noutam kuboka antanirdeirin deyok nang ab sun Yahudi yala nang asi kalikoka uram sengkwetena nang yuk nang ab asi arukoka, “Bulubdarur,” ebmou. Ebmou ba, sirya bulubmai ura, sun yin doun nang sienyi biryi er Paulus bisi sun bulubmai nang urasintam bobinmou. Ara, erci sirya arukmou to, er Paulus bisi tabwe deamnyi asi lobdeibmai ura, erci er Paulus bisi sun Yahudi yala nang kalingna nang dam bobinmou.