Read Futuna-Aniwa Kisah Para Rasul 23 Bible Online

Kisah Para Rasul 23 - Futuna-Aniwa bible

Kisah Para Rasul 23

¹Bobinmou ura, er Paulus biryi sun uram sengkwetena nang asi diboka dinmou cok, erci sunsi ato ebmou. “Ni kwityabwe e, minob aryi kuboka arub ababyi nira Er Imtamnyi biryi arungsurur to nirya kununun. Ara, ni kanya dam aryi, ‘Malyi kun dinyi nirya bai donokman,’ tenen bikdandoka kununun ati ebman,” ebmou.

²Er Paulus biryi ato ebmou ba, Er Imtamnyi kan ninyi kan noutam kuboka antanirdeirin sienyi si Ananias biryi arukmou ba, ninyi tentok ara er Paulus dam tikmunyi biryi er Paulus sibambol asi taruk inin aryi si moubdongobmou.

³Si moubdongobmou ba, er Paulus biryi yu asa aryi Er Imtamnyi kan ninyi kan noutam kuboka antanirdeirin sienyi Imam Besar bisi ato ebmou. “Er Imtamnyi biryi kanda malinyi bisi wenena teleb se. Kanci niti, ‘Er Musa takubdeiansou uram asi yan yanibmar do?’ tenen ni deyok ati lilibde bukmarim bok, er Musa biryi takubdeiamwe uram asi kanci yan yanibmarim. Ati, kanci anyi bisi, ‘Er Paulus bisi si moubdongobdum,’ ebmarim ci, kanci er Musa Uram asi yan yanibmarim ci,” ebmou.

⁴Er Paulus biryi ato ebmou ba, sun er dam tikmai nang aryi, “Se,” ebmai cok, “Kanda Imam Besar bisi ‘Malinyi,’ ebmarim do? Er Imtamnyi biryi tikeibmunyi bisi kanci wenena mem,” ebmai.

⁵Ebmai uca, er Paulus biryi uram lelekoka, “Ni kwityabwe, ni malyi to ebman. Anyi bira Imam Besar kurur ara ni kum bikmonwe aryi ato ebman. Er Imtamnyi Uram aryi ato eboka eteresurur, ‘Sun kalingnansingnyi sien nang asi, “Malinyi,” ebmunyei,’ ebmou. (Keluaran 22:28b) Ato ebmasou bok, ni malyi to ebman,” ebmou.

⁶Ura, er Paulus biryi sun bulubmai uram sengkwetena nang asi dinmou uca, ton wekmai nang ara Saduki nang ton wekmai. Ura tonda, yuk wekmai nang ara Farisi nang ton wekmai asi eibmou. Eibmou ura, er Paulus biryi, “Sun Farisi nang aryi nisi libniting,” tenen erci sun bulubmai nang asi ato ebmou. “Ni kwityabwe, nira Farisi nang deibdobanyi kunun. Ni nai bira Farisi nang kuramwe to, nibabyi Farisinyi kunun. Farisinyi kunun cok, niryi, ‘Sun din nang ara kam bukokwaming,’ tenen dibde bunun. Niryi kam burdeirina deyok ati dib tenenun ati, sun bulubmarum nang aryi niti, ‘Er malyi deyok lilibkwayeb,’ teneranurum ati ebman,” ebmou.

⁷Er Paulus biryi ato ebmou ba, sun a buluboka wekmai Farisi nang ab sun Saduki nang ab aryi sun mamun lulubdanmai. Lulubdanmai ci, sunci bokoka sisikdanmai. Ara, sun Farisi nang aryi er Paulus bisi libdobmai bok, sun Saduki nang aryi er Paulus deyok ati tuba tatab-tatab ebmai.

⁸Sun Saduki nang ara sun din nang ati, “Kam tubto kum bukokwaming,” teneramnyi. Tonda sunci, “Imtam aryi kuboka Er Imtamnyi Uram yuryangan nang ara ton kum kunung,” teneramnyi. Tonda, “Isa kanya ababyi ton kum kurur,” teneramnyi. Bok, sun Farisi nang ara, “Imtam aryi kuboka uram eryuryangan nang ab isa kanya ababyi diba kurur,” tenen lak eramnyi. Tonda, sun din nang deyok ati sun Farisi nang aryi, “Kam tubto bukokwaming,” tenen lak eramnyi.

⁹Ura, er Paulus biryi, “Nira Farisinyi kunun,” ebmou ba, sun bulubmai nang aryi uram weikanun ngolokoka lulubdanmai. Ura, ton Farisi nang ara er Musa ebdeiamwe uram eteren nang kuramnyi nang aryi tikoka abiryi, “Anyi Paulus bira malyi dinyi utotoa ton dobmar asi kum bikmab. Ati, anyi bira Er Imtamnyi Uram eryuryangananyi ab ebdanmarei kum? Isa kanya aryi ersi eterebmou kum? Ati, nunci anyi deyok lilina ara, takwayeb,” eboka Farisi nang mikbaryi aryi sun Saduki nang ab tonkwa lulubdanmai.

¹⁰Ebmai uca, sun a bulubmai nang nirya aryi sun mamun lulurdana uram tabakdongo weik kibmai. Lulurdana uram weik kibmai ba, sun yin doun nang sienyi biryi, “Er Paulus bisi libtaleboka obingnyei,” tenen ilil kubmou. Ura, erci sun yin doun nang asi arukoka, “Er Paulus bira a lulurdanmang nang dam tikmaranyi bisi leboka bobindarur,” ebmou. Ato eboka arukmou ba, sun yin doun nang aryi er Paulus bisi lembindoka sun yin doun nang atei tamuboka bobinmai.

¹¹Sirya bobinmai ura, lukunda kubmou ura, nun Du Yesus anaboka er Paulus dam tikmou ci, ersi ato ebmou. “Kan kanya katabum ekina teleb. Kanda sun Yerusalem atei nang asi Ni Yesus uram dib en uram eboka lak ebmarim to, aminda aryi sun sien atei si Roma kunung nang ababyi neiktoto lak ebkwandim,” eboka nun Du Yesus biryi er Paulus bisi ebmou.

¹²Mabmai ani, berekwe ura, Yahudi yala nang ninyi mikbaryi aryi, “Er Paulus bisi obtibyi,” tenen marmun yibmai. Ara, sunci, “Er Paulus bisi kum obibyi ura, Er Imtamnyi biryi nunsi wenesina teleb,” ebdanmai. Ebdanmai cok, sunci, “Er Paulus bisi ona kum ura, kwaning me utotoa kum yibkwayeb,” eboka si tebmai.

¹³Sun ato ebdanmai nang ara ninyi empat puluh baryi nang aryi kubmai asi, yuk nang ababyi tabakoka er Paulus bisi marmun yibmai.

¹⁴Ura, sunci sun Er Imtamnyi kan ninyi kan noutam kuboka antanirdeirin deyok nang ab sun Yahudi yala nang kalingna nang ab asi bindoka ato ebmai. “Naiyabwe o, nunci er Paulus bisi obkwamib. Ati, ‘Nunci Paulus bisi kum obibyi ura, Er Imtamnyi biryi nunsi wenesina teleb,’ ebmabibiryi, ‘Anyi bisi ona kum ura, kwaning me utotoa si tebkwayeb,’ ebdanmoubwe,” ebmai.

¹⁵Ebmai cok, sun marmun yibmai nang aryi ato ebmai, “Ati, ukuryok sunda uram sengkwetena nang aryi sun yin doun nang sienyi bisi ato eboka molobdarur. ‘Nunda er Paulus deyok ati tubto lilibkwayeb ati, “Kanci er Paulus bisi nun dam tubto boyarum,” tenen molobmakib,’ ebdarur. Ba, sun yin doun nang sienyi biryi er Paulus bisi sun uram sengkwetena nang dam boyangaci asi, bisik noutam aryi nunci anaboka abibiryi, lukdandoka er Paulus bisi taleboka obkwayeb ati, sunci yin doun nang sienyi bisi ebdeibdarur.” Sun marmun yibmai nang aryi sun Israel yala nang kalikoka uram sengkweten nang asi ato ebmai.

¹⁶Ato eboka marmun yinmai asi Paulus er malner mi aryi kekebmou ura, erci akiryok sun yin doun nang atei binmou ura, erci Paulus bisi erbinmou. Ara, “Nai mam o, kanti, ‘Obkwamakib,’ tenen marmun yinmaking,” erbinmou.

¹⁷Asi, Paulus biryi kekebmou ura, erci yin doun nang seratus baryi kalingnamunyi bisi naboka, “A mi ara uram ton eryanmar ati, sun yin doun nang sienyi bisi ebkwandur,” eboka molobmou.

¹⁸Molobmou ba, er yin doun nang seratus baryi nang kalingnamunyi biryi a mi asi sun yin doun nang sienyi bisi bobinmou. Bobinmou ura, erci sienyi bisi ato ebmou. “Nai, nun talebmabubunyi si Paulus biryi nisi nabmanir ura, erci nisi ato eboka molobmanir, ‘A mi ara uram kareryanmar ati er sienyi bisi uram ton ebkwandur ati, a mi boboka sienyi dam bobirum,’ ebmar ati boyanman,” ebmou.

¹⁹Ebmou ba, sun yin doun nang sienyi biryi a mi asi taruk talebmou cok, ai lumun tam bobinmou. Talebindoka aburyi, erci a mi asi, “A mi, kanci nisi una ebkarebtinyi tenebmarim do?” eboka asibmou.

²⁰Asibmou uca, a mi aryi uram lelekoka, “Nai o, sun Yahudi yala nang aryi, ‘Er Paulus bisi obtibyi,’ tenen marmun yinmang. ‘Obtibyi,’ tenebmang ci, sunci sienyi kansi eboka ato molobkwamaking, ‘Nunda uram sengkwetena nang aryi er Paulus deyok ati tubto lilibtibyi tenebmab. A deyok aryi, sienyi kanci ambutum aryi er Paulus bisi nun dam boyarum,’ eboka molobkingiryi, sunci er Paulus deyok tubto kum lilibkwamang. Erda, sunci er Paulus biti, ‘Obkwayeb,’ tenebmang.

²¹Ati nai o, kanci sun Yahudi yala nang aryi ebkingnyi uram asi diba tenebminyei. Ninyi empat puluh baryi nang kum lima puluh baryi nang kum aryi, ‘Er Paulus bisi obtibyi,’ tenen bisik noutam aryi duknuboka wekmanyi ani, Paulus bisi bisik noutam aryi taleboka obkwamang. A nang nirya ara, ‘Er Paulus bisi kum obibyi ura, Er Imtamnyi biryi nunsi wenebsicei,’ ebmang. Tonda, sunci, ‘Anyi bisi ona kum ura, kwaning me si tebkwayeb,’ ebmang. Ati, sienyi kanci, ‘Er Paulus bisi boyankwansin,’ en uram asi dibde bukmang ci, sunci, ‘Ato-ato kuboka obkwayeb,’ tenen sun sirya kiknibminikdanmang,” eboka Paulus er malner mi aryi sun yin doun nang sienyi bisi lak ebmou.

²²Lak ebmou ura, er sienyi biryi ersi, “Kanci nisi lak ebmanirim uram asi ninyi tentok ababyi lak ebminyei,” ebmou ura, a mi asi, “Ur bindobdum,” ebmou.

²³Ura, sun yin doun nang sienyi biryi yin doun nang kalingna nang bitinyi asi naboka erci sunsi ato eboka arukmou. “Yin doun nang ninyi dua ratus baryi asi, ‘Sundamnyi kiknibminikdandarur,’ eboka arukdurum. Tonda, kuda deici bukoka mar ibaraming yin doun nang ara ninyi tujuh puluh baryi ababyi neiktoto sundamnyi kiknibminikdating. Tonda, co balang doun nang ara dua ratus baryi ababyi sundamnyi kiknibminikdating. A lukunda aryok, a yin doun nang nirya aryi antaniboka kalikdamingiryok, sunci er Paulus bisi Kaisarea atei bobindarur.

²⁴Kuda ababyi kiknibminikdeiboka er Paulus bibabyi kuda deici bukeiboka er Paulus bisi lebingiryok, nun nai Feliks bira Kaisar amwetam bunanyi dam bobinkwanung,” ebmou.

²⁵Sun yin doun nang sienyi biryi ato eboka arukmou ura, erci er Feliks bisi kerek sengna ton kerek sekeibmou. Ara, erci ato eboka kerek sekmou,

²⁶“Nira Klaudius Lisias biryi nun nai Feliks Kaisar amwetam bunanyi kanti, ‘Teleb,’ ebmakin.

²⁷Sun Yahudi yala nang aryi, ‘Anyi Paulus bisi taleboka obkwayeb,’ tenen taleboka abiryi, obkoi bok, ni ab ni yin doun nang ab tonkwa yandoka lebmoubwe. ‘Anyi bira Kaisar biryi kalingdurnyi kurur,’ en uram asi kekebmase ati, nunda ersi lembinmoubwe.

²⁸Ura, niryi, ‘Sun Yahudi yala nang aryi ersi tatab-tatab ena uram biktinyi,’ tenen niryi ersi sun Yahudi yala nang asi uram sengkwetena nang bulun ai dam bobinmase.

²⁹Bobinmase ura, anyi dam asi malyi dinyi ton kum eibmase. Sun Yahudi yala nang aryi ersi tatab-tatab ebmang deyok ara sun Musa biryi, ‘Ukubdarur-Ukuna mem,’ en uram kununa deyok ati tatab-tatab ebmang. Anyi biryi, ‘Wenebkwayeb,’ tenen dinyi ton kum kubmar. Ara, ‘Weneboka obkwayeb,’ tenen dinyi erci ton kum kubmar. Tonda, ‘Ninyi wenen ai asi dongobkwayeb,’ tenen dinyi ababyi erci ton kum kubmar.

³⁰Ura, ninyi aryi nisi eterebmanei ci, ‘Sun Yahudi yala nang aryi anyi biti, “Obtibyi,” tenen marmun yibmang,’ ebmai. Ebmanei uca, niryi arukmonwe ba, anyi bisi nun nai kan dam anmalakoka boyanmang. Ura, sun anyi bisi tatab-tatab ebmang nang asi niryi ato ebman, ‘Nun nai Feliks Kaisar amwetam bunanyi dam bimunyi ura, sun tatab-tatab ena uram ur lak ebdarur,’ eboka arukmase. Yo, ni nai, nira Klaudius Lisias biryi kansi a kunum sirya kerek sekeibmakin,” eboka sekeibmou.

³¹Ura, er sienyi Klaudius Lisias biryi arukmou to, sun yin doun nang aryi kunubmai. Kunubmai ci, sunci a tum lukunda aryok Yerusalem atei aryi Paulus boboka anabmai ci, Antipatris atei bobinmai.

³²Ura, a bindoka mabmai ani, berekwe ura, sun kuda deici bukoka mar ibaramnyi yin doun nang aryi er Paulus bisi Kaisarea atei bobinmai. Bobinmai bok, sun tukwe bis banmai yin doun nang ab sun co balang doun nang ab tamurbindoka sun Yerusalem atei sun yin doun nang kuramnyi atei tubto bindobmai.

³³Ura, sun kuda deici bukoka banmai yin doun nang aryi Kaisarea atei binmai ura, sunci sun sienyi biryi kerek sekeibmou kerek sengna asi boboka weik sienyi Kaisar amwetam bunanyi bisi karebmai. A kerek sengna asi karebmai ci, sunci er Paulus bisi Kaisar amwetam bunanyi si Feliks dam bobinmai.

³⁴Ura, Kaisar amwetam bunanyi biryi a kerek sengna asi sirya nukmou ura, Paulus bisi, “Kanda dan mutuk nang kurum do?” eboka asibdenmou. Ato eboka asibmou uca, er Paulus biryi, “Nira Kilikia mutuknyi kunun,” ebmou. Ebmou uca, Kaisar amwetam bunanyi biryi er Paulus bisi ato ebmou, “Teleb, sun kansi tatab-tatab ekunung nang atam sirya yanmangnyi ura, niryi kan deyok ati lilibdenkwankin,” eboka Kaisar amwetam bunanyi biryi ato ebmou. Ura, erci er arungna nang asi ato ebmou, “Anyi Paulus bisi er Herodes biryi doamwe sien ai asi bobindongobmunyi ura, ersi kaliki kubdarur,” eboka er Kaisar amwetam bunanyi si Feliks biryi arukmou.