Read Futuna-Aniwa Kisah Para Rasul 25 Bible Online

Kisah Para Rasul 25 - Futuna-Aniwa bible

Kisah Para Rasul 25

¹Ura, er ukuryok amwetam bunanyi si Festus bira Yahudi mutuk yanmou ura, er sokon kubkwamwe atei Kaisarea minob binmou. Binmou ura, uki bitinyi mabmou ura, uki winiryi tum ara Yerusalem atei binmou.

²Yerusalem atei binmou ura, sun Er Imtamnyi kan ninyi kan noutam kuboka antanirdeirin deyok nang ab ton sun Yahudi yala nang yuk kalingna nang ab er ab tonkwa ebdanmai. Ebdanmai ci, sunci er Paulus bisi tatab-tatab ena asi er Festus bisi lak eterebmai. Sun uram ebdarabmai cok, sunci er Festus bisi ato eboka molobmai.

³“Nai, kanci nunti, ‘Ni kwityabwe,’ tenebsiminyi ura, anyi Paulus bisi, ‘Yerusalem atei boyandarur,’ eboka arukdum,” ebmai. Ati, sunci marmun yibmai ura, “Er Paulus bisi bobangnyi ba, nunci bisik noutam aryi sekoka nunci ersi obkwayeb,” tenen ato eboka molobmai.

⁴Molobmai bok, er Festus biryi, “Anyi Paulus bisi Kaisarea atei asi kalingna teleb. Nira uki kuna kum kubkwaman Kaisarea atei tamurbinkwan ati, er Paulus bira Kaisarea atei asi iya kuna teleb.

⁵Anyi Paulus biryi malyi kubmaci ura, sun sien nang ab ni ab tonkwa Kaisarea atei binkwayeb. Sirya binmabyi ura, sunci anyi Paulus bisi tatab-tatab ena teleb.” Ato eboka Kaisar amwetam bunanyi si Festus biryi sun Yahudi yala nang asi ebmou.

⁶Ura, er Festus bira uki inbaryi kum takubaryi kum Yerusalem atei kunmou ani, Kaisarea atei tubto tamurbinmou. Ura, mabmou ani, berekwe ura, erci ninyi malyi kun deyok lilin ai bukmou ura, “Er Paulus boboka a boyandarur,” eboka arukmou.

⁷Er Paulus boboka sirya er dam boyanmai ura, sun Yerusalem atei aryi kuboka yanmai Yahudi yala nang aryi er dam aknabdongoboka abiryi, “Iya malyi kubumwe,” eboka abiryi, er Paulus bisi tatab-tatab ebdongobmai. Tatab-tatab enmai bok, sunci er malyi kun deyok asi lak kimdeirin dinyi ton kum ebmai.

⁸Ura, er Paulus biryi erdamnyi libdanmou ci, erci sunsi ato ebmou. “Er Musa biryi nunda Yahudi yala nang asi ebdeiansou uram asi niryi yan kum yanibmase. Tonda, Bait Allah ai asi niryi malyi ai kum kibdeibmase. Tonda, weik sienyi si Kaisar biryi ebdeiansou to ababyi neiktoto yan ton kum yanibmase,” ebmou.

⁹Er Paulus biryi erdamnyi libdandoka ato ebmou ura, er sienyi Festus biryi, “Sun Yahudi yala nang aryi niti, ‘Telebnyi,’ tenebniting,” tenen er Paulus bisi ato eboka asibdenmou. “Yerusalem atei bana ara kan teleb kubmakir do? Yerusalem atei asi biminyi ura, niryi kan deyok asi lilibkitinyi ara kan teleb do?” eboka asibdenmou.

¹⁰Ato eboka asibdenmou uca, er Paulus biryi ersi ato ebmou, “Kaisar biryi kalingdur malyi deyok lilin ai asi boyanmaning ati, Kaisar biryi kalingdur deyok lilin ai akiryi ni deyok lilina teleb. Kanda Kaisar amwetam bunanyi biryi bikmarim to, niryi sun Yahudi yala nang asi malyi kum kubmase.

¹¹Niryi Kaisar biryi takubdeibsou uram asi yan yanibmatinyi ura, ‘Weneboka obkwayeb,’ tenebmaniting ababyi, niryi, ‘Weneboka obmunyei,’ kum ebtinyi. Erda, a nang aryi tatab-tatab ebmaningiryi, ni malyi deyok asi lak kum kibdeibningnyi ura, ninyi tentok ababyi nisi sun taruk dam karebnicei. Ati, nira weik sienyi si Kaisar biryi ni deyok ati lilina teleb,” ebmou.

¹²Er Paulus biryi ato eboka molobmou ura, er sienyi Festus biryi er bikdob uram erkaren nang ab tonkwa uram sisikmai. Uram sisikmai ura, er Festus biryi uram dodeibmou ura, erci er Paulus bisi ato ebmou, “Kanci, ‘Kaisar biryi ni deyok lilibkwanurur,’ eboka molobmanirim ati, kanda Kaisar dam birum. Sirya biminyi ura, Kaisar biryi kan deyok asi lilibkwankir,” ebmou.

¹³Uki mikbaryi kunmai ani, weik sienyi si Agripa ab sien ner si Bernike ab aryi, “Er Festus bisi dirbinkwanim,” tenen Kaisarea atei yanmarei.

¹⁴Ura, uki ilinto Kaisarea atei kubmarei ani, er Festus biryi er Agripa ab tonkwa uram sisingmarei ci, er Paulus deyok ati liliboka nukmou. Ara, Kaisar amwetam bunanyi Feliks biryi er weik sienyi Agripa bisi ato ebmou, “Herodes doamwe sien ai asi ninyi tentok taleboka tabwe dongoaminyi bisi tuba kurur. Nun kwit Feliks Kaisar amwetam bunanyi tuba kuramwe uca, erci arukamwe ba, anyi bisi kalingdamnyi. Kalikde kuramnyi talak uca, er Feliks biryi anyi biti, ‘Ur lobdeibdarur,’ kum ebmou.

¹⁵Ura, nira Yerusalem atei binmase ura, sun Er Imtamnyi kan ninyi kan noutam kuboka antanirdeirin deyok nang ab sun Yahudi yala nang yuk kalingna nang ab aryi ni dam yanmai ura, anyi bisi tatab-tatab ebmai. Tatab-tatab ebmai ci, sunci nisi, ‘Kanci uram sekwetebmin ci, kanci anyi biti, “Malyi kubmou ati wenebkwan,” ebdum,’ eboka sun Yahudi yala nang aryi ato eboka molobmanei.

¹⁶Molobmanei bok, niryi sunsi ato ebmase, ‘Nunda Kaisar milin nang ara ato kum kuramib. Erda, nun kuramib to ara sun tatab-tatab enmangnyi nang ara sun tatab-tatab enmanginyi ab ebdanmangiryok, er malyi deyok asi lak kimdeirinung. A sirya ura, er tatab-tatab enmanginyi biryi erdamnyi limdana teleb. Limdana uram kum kekebmabibiryok, nunci er tatab-tatab enmanginyi bisi sun ersi tatab-tatab enmangnyi nang taruk dam asi karena kum kunub,’ ebmase.

¹⁷Ura, sun Yahudi yala nang sien nang aryi ni dam yanmai ura, niryi uki kum kublobmase. Erda, mabmoubwe ani, berekwe ura, niryi malyi deyok lilin ai asi bukmasiryi, ‘Er Paulus bisi a boyandarur,’ eboka arukmase.

¹⁸Ba, boyanmai ura, sun tatab-tatab ena ati yanmai nang aryi anyi bisi tatab-tatab ebmai bok, er malyi kun dinyi ton kum eibmai. Ara, niryi, ‘Anyi biryi iya malyi kubmou ati lak kibkwaming,’ teneanse bok, sunci er malyi kun dinyi ton kum lak kibmai.

¹⁹Erda, sun Yahudi yala nang ab aryi anyi Paulus biti, ‘Nun Yahudi yala nang aryi dib tenen uram ati yan yanibmou,’ eboka lulubdanmai. Lulubdanmai cok, sunci ninyi si Yesus bira sirya dibmounyi biti lulubdanmai. Anyi bira sirya dibmou bok, anyi Paulus biryi erti, ‘Kam bukokwe,’ eboka lak erur.

²⁰Ura, ni kanya kankana kubnou aryi niryi, ‘Sun Yahudi yala nang dib tenena ati lulurdana deyok asi ni una kuboka lilibtinyi do?’ tenen er Paulus bisi ato eboka asibdenmase. Ara, ‘Yerusalem atei bana ara kanda teleb kubmakir do?’ eboka asibdenmase. Tonda, ‘Yerusalem atei aryi kan deyok lilibdenkwankib do?’ eboka asibdenmase.

²¹Ato eboka asibdenmase uca, er Paulus biryi, ‘Weik sienyi si Kaisar biryi ni deyok lilibniriryok, uram sekwetebkwanute,’ eboka molobmou. Molobmou uca, niryi, ‘Teleb,’ eboka, ‘Kaisar biryi kan deyok asi lilina teleb,’ ebmase. Ebmasiryok, niryi er Paulus biti ato eboka arukmase, ‘Anyi bisi Kaisar dam bobana kum cok, ersi diboka kalikdarur,’ eboka arukmase,” ebmou.

²²Ura, er Festus biryi a uram sirya ebmou ura, er weik sienyi Agripa biryi ersi, “Nibabyi anyi Paulus ab tonkwa ebdatinimnyi,” ebmou. Ebmou ba, er Festus biryi ersi, “Ambutum berekci ura, er ab tonkwa ebdankwandurum,” ebmou.

²³Ura, mabmai ani, berekwe ura, er weik sienyi Agripa ab sien ner si Bernike ab yanmarei bok, ninyi nirya aryi sun si erebdeiboka kibdobmai. Kibdobmai ura, sunci malyi deyok lilin ai yandoka abdeici, sun yin doun nang sien nang ab, ton sun Kaisarea atei sien nang ab tonkwa bukmai. Ura, Kaisar amwetam bunanyi Festus bira sun ab tonkwa bukmai ura, erci arukmou ba, er Paulus boyanmai.

²⁴Boyanmai ura, er Festus biryi sun bulubmai nang asi ato ebmou, “Weik sienyi Agripa kan ab, sun a wekmarum nang nirya asi niryi, ‘Ni kwityabwe teleb,’ ebmasin. Anyi Paulus bisi dibdendarur. Anyi bisi sun Yahudi yala nang nirya aryi tatab-tatab enung. Ara, sun Yerusalem atei kuraming Yahudi yala nang ababyi, tonda sun akatei Kaisarea atei kurandum Yahudi yala nang ababyi ara uram weikanun ngolokoka, ‘Anyi bisi obdarur. Anyi bira kam tuba kubcei,’ eboka molonunung.

²⁵Molonunung bok, niryi anyi deyok lilibdenmase uca, er malyi deyok ton kum eibmase. Ara, ‘Weneboka obkwayeb,’ tenen dinyi erci ton kum kubmou. Ura, anyi biryi, ‘Kaisar biryi ni deyok lilibnute,’ eboka molobmanou. Molobmanou ba, niryi uram dodeibmasiryok, ato ebmase, ‘Anyi bisi Kaisar dam bobinung. Sirya bobinmangnyi ura, Kaisar bira iya weik Erebdobnyi biryi er deyok ati lilibdiryok, uram sengkwetena teleb,’ eboka dobdeibse.

²⁶Ato eboka uram dodeibmasiryok, niryi, ‘Kaisar bisi kerek sekniryi, niryi anyi biti una eboka kerek sekwan do?’ tenen ni bita kum bikman. A deyok aryi, niryi anyi bisi weik sienyi Agripa kan urasintam ab sun yuk wekmarum sien nang urasintam ab boyanman. Ara, nun tonkwa er deyok asi lilibibyi ura, niryi, ‘Kaisar bisi ato-ato eboka kerek sekeibkwan,’ tenen bikwan ati, niryi anyi bisi sun urasintam asi a boyanman.

²⁷Tabwe debmainyi bisi tatab-tatab ena uram asi kum kerek sekmatinyi ura, niryi anyi bisi unato ati, Kaisar dam bokeibtinyi do? Ato kuna ara kikib kum kubte.” Er Kaisar amwetam bunanyi Festus biryi er weik sienyi Agripa ab sun yuk wekmai sien nang ab asi ato ebmou.