Read Futuna-Aniwa Kisah Para Rasul 27 Bible Online

Kisah Para Rasul 27 - Futuna-Aniwa bible

Kisah Para Rasul 27

¹Ura, Kaisar amwetam bunanyi biryi er Paulus biti, “Kaisar kurande mutuk si Italea birur,” eboka uram dodeibmou ura, sun yin doun nang sien nang aryi er Paulus bisi ninyi si Yulius taruk dam karebmai. Anyi Yulius bira yin doun nang seratus baryi asi arungnamuryok, er wekamwe yin doun nang buluna si ara, “Kaisar bisi Kalikoka Milina Nang,” kuramwe. Ara, sun yin doun nang sien nang aryi er Yulius ab er milibmai yin doun nang ab asi ato eboka arukmai. “Er Paulus ab yuk tabwe debmai nang ab asi bobindoka Kaisar kurande weik atei Roma asi bobindarur,” eboka arukmai.

²Ato eboka arukmou ura, nunda weik co ngun-ngun wengbinmoubwe. A co ngun-ngun ara atei si Adramitium aryi kuboka Asia mutuk co ngun-ngun dararyangan atei yuk-yuk asi binkwamou co ngun-ngun asi wekmoubwe. Sirya wekmoubwe ura, nunda Kaisarea atei aryi anaboka mekwan deici banmoubwe. Banmabwe ura, nun kwit Aristarkhus bira Makedonia mutuk atei si Tesalonika ateinyi nun ab tonkwa banmoubwe.

³Banmabuburyi, mabmoubwe ani, berekwe ura, Sidon atei dararbinmoubwe. Dararbinmoubwe ura, sun yin doun nang arungnanyi si Yulius bira er Paulus bisi er kanya namin kuramwe deyok aryi, erci Paulus bisi ato ebmou. “Kanci, kan kwityabwe akatei kuramingnyi nang ati, ‘Ni ataranici tok karebniting,’ tenebminyi ura, kanci sunsi ur dirbirum,” ebmou.

⁴Ura, dirbinmoubwe ani, sirya dibdenmoubwe ura, nunda co ngun-ngun tubto wekoka abuburyi, Sidon atei aryi anaboka ilila mekwan deici tubto banmoubwe. Banmabu bok, kumwe ara nun uw deiboka banmoubwe tam aryi kuboka mikibanun yanmou. Ati, sun co ngun-ngun kalingna nang aryi, “Kumwe mikib kum donmar tam bindoka yibinkwayeb,” tenen kalukdongobmai uca, nunda me dumdum si Siprus bisiboka kumwe mikib kum tam asi yibinmoubwe.

⁵Sirya bisiryibinmoubwe ura, ilila mekwan noutam asi banmoubwe. Ara, Kilikia mutuk tam kuboka ab, Pamfilia mutuk tam kuboka ab mekwan deici banmoubwe. A ilila mekwan noutam aryi banmoubwe ani, Likia mutuk atei si Mira dararbinmoubwe.

⁶Ura, a weik co ngun-ngun asi takmoubwe ura, er yin doun nang arungnanyi biryi eibmou co ngun-ngun yuk dinyi asi wekmoubwe. A weik co ngun-ngun ara Aleksandria atei aryi kuboka yanganmou ani, Italea mutuk binkwamwe asi nun wekmoubwe.

⁷Ura, kumwe aryi nun baramoubwe tam aryi mikibanun yanmou akiryi, nunda nimalyok-nimalyok banmoubwe. Nimalyok-nimalyok baramoubwe uca, uki ilinto bisibmou. Baramoubwe ani, co ngun-ngun dararyangan atei si Knidus dam binmoubwe. Kumwe mikibanun donmou akiryi, nunci akatei asi dararbinman kum kubmoubwe. Ura, nunci weik me dumdum si Kreta youkwa tam bisiboka kumwe mikib kum donmou tam asi yibinmoubwe. Yibanmaburyok, me akwe dam atei si Salmone kanimbindoka abuburyi Kreta asi youkwa tam yibinmoubwe.

⁸Weik me dumdum Kreta katum dam nimalyok-nimalyok yibanmoubwe ani, co ngun-ngun dararban ai si, “Dararyangan teleb ai,” dararbinmoubwe. A dararyangan ai ara atei si Lasea dam dararbaramnyi.

⁹Nunda akatei aryi uki weik kunmoubwe ani, nun Yahudi yala nang aryi yina kum yiramib uki tum si, “Malyi Kun Dinyi Kilina,” uki tum bisibmou. A uki tum sirya bisibmaci ura, ibalya ara weik dorande akiryi, ilila mekwan deici bana ara, “Obsicei,” teneramnyi. A deyok aryi, er Paulus biryi, “Ilila mekwan deici bibyei,” tenen sun weik co ngun-ngun kalingna nang asi ato ebmou.

¹⁰“Ni kwityabwe, ibalya ara weikanun dobkwamar ati, nunda anaboka ilila mekwan deici bibyei. Mekwan deici banmabyi ura, ibalya weik dobci uca, co ngun-ngun asi tolobcei. Tolobmaci ura, co ngun-ngun umbura bon dinyi ara me umbura wekoka wanikminiksicei. Tonda, nunda co ngun-ngun bukoka baramib nang ababyi ibalya aryi obsicei. A deyok aryi, niryi sunsi, ‘Ilila mekwan deici bibyei,’ ebmasin,” ebmou.

¹¹Er Paulus biryi ato ebmou bok, er co ngun-ngun kalingna sienyi ab er co ngun-ngun damnyi ab aryi, “Anabdobkwayeb,” ebmai. Ura, sun yin doun nang arungnamunyi Yulius biryi er Paulus biryi ebmou uram ara malyi kibminikoka sun a co ngun-ngun kalingna nang aryi ebmarei to asi kekebmou ci, “Ur anabdobkwayeb,” ebmou.

¹²Ura, nun kunmoubwe dararyangan ai ara ibalya don talak asi kuramwe ba, dararyangana kikib kum kuramwe. A deyok aryi, ton nang aryi, “Anabdobibyei,” ebmoubwe bok, yuk nang ilinto aryi, “Anabkwayeb,” ebmai. Ati, sunci ato tenebmai. “Me dumdum si Kreta aryi kuboka Feniks atei bibyi ura, ibalya don li dibde buktibyi,” tenebmai. A co ngun-ngun dararyangan atei si Feniks ara, me dumdum Kreta asi kitingbantam katum kuboka doramnyi atei.

¹³Ura, kumwe ara mitikanun me youkwa tam aryi doboka yanganmou bok, sun co ngun-ngun kalingna nang aryi, “Ukuryok loubsir ati, anabkwayeb,” tenebmai. Tenebmai ura, sunci co ngun-ngun darardongon keil asi bowelebmai. Sirya bowelebmai ura, nunci anaboka ilila mekwan deici banmoubwe. Kitingbantam kuboka banmoubwe ani, me dumdum si Kreta bisiboka yibanmoubwe.

¹⁴Uki mitikanun yibanmoubwe ura, ibalya dobkalibmou. Ara, ibalya si, “Me Utam Kan Yaletam Kan Dorande Kumwe,” aryi weikanun dobmou cok, bubatikde yanmou. Ara, me dumdum Kreta tam aryi yanmou ibalya ara weik dobmou.

¹⁵Ibalya weikanun dobmou uca, mekwan kwatib-kwatib eboka, nun co ngun-ngun asi obmou. Ura, nunci, “Co ngun-ngun asi tamubdeiboka ibalya yangan tam asi bobinkwayeb,” tenen ukubdenmoubwe. Uca, ibalya yanganmou tam asi tamubdeibman kum kubmasou ura, nunci, “Ibalya mikib aryi co ngun-ngun bobisurur” tenen bisik sekman kum ati, taklobmoubwe.

¹⁶Ba, banmoubwe ani, mitik me dumdum si Kauda bisiboka ibalya mikib kum tam yibinmoubwe. Yibinmaburyok, nun bukmoubwe weik co ngun-ngun ara lemdaron co ngun-ngun mitik-mitik co ngun-ngun aryi weik co ngun-ngun asi bokilibmou. Bokilibmou bok, kumwe aryi mikibanun donmou uca, nun lemdaron co ngun-ngun asi bobinkou. Bobinkou bok, nunci lemdaron co ngun-ngun mitik dinyi asi erebdeiboka nun bukmoubwe weik co ngun-ngun deici deibdenmoubwe. Bok, me ilinto kwatib-kwatib erongmou aryi, mitik co ngun-ngun ara min dobman kum to kubmasou. Ura, tubto ukuramoubwe uca, lemdaron co ngun-ngun asi dobtaleboka weik co ngun-ngun deici diboka deibmoubwe.

¹⁷Ura, lemdaron co ngun-ngun dobweleboka diboka deibmoubwe ura, nunci, “Me kwatib-kwatib ena weik aryi weik co ngun-ngun er yuk daksaksicei,” tenen nunci co ngun-ngun asi tabwe biribdongoboka aknaboka libmoubwe. A sirya ura, nunci, “Ibalya aryi Libia mutuk otam boyasici ura, ilila mekwan umbura me wininga erebdob ai kwebtelebibyei,” tenebmoubwe. Tenebmoubwe uca, sun co ngun-ngun kalingna nang aryi weik aling ara kumwe aryi co ngun-ngun bobana aling asi loboka yuryanmai. Loboka yuryanmai ura, nunci, “Ibalya bisik sekman kum ati, da bobisurur,” tenen taklobokmoubwe ba, co ngun-ngun er yuk ibalyi aryi borkengmasou.

¹⁸A borkengmasou bok, mabmoubwe ani, berekwe ura, ibalya ara weiktoto tuba donmou ati, co ngun-ngun umbura bona aling ya nirya asi doboka me dongobmoubwe. Ara, “Co ngun-ngun tolobcei,” tenen nunci ikin dinyi nirya asi doboka me dongobmoubwe.

¹⁹Ura, a uki tum ababyi tubto mabmoubwe ani, berekwe ura, ibalya weik tuba donmou bok, sun co ngun-ngun kalingna nang aryi, “Co ngun-ngun ikin tuba ati, tolobcei,” tenen sunci co ngun-ngun umbura ingwelen co ara co ngun-ngun bobana aling birina co asi kweboka me dongobmai. Ara, sunci a ikin-ikin co ara sun taruk aryi dobtaleboka me dongobmai.

²⁰Ura, ibalya weikanun tuba dormururamwe ba, uki-uki ilinto mabisibmou. A ibalya ilinto doramwe talak ara, nunci kiting ababyi kurya ababyi asing ton kum eiriramoubwe. Ato kuransou deyok aryi, nunci, “Lebdankwamib,” tenen kanya ara ton kum tenebmou, erda nirya taklobmoubwe.

²¹Ura, uki ilinto bisibmou ba, nunda weik co ngun-ngun umbura bukmoubwe nang ara yina ton kum yibmoubwe. Yina ton kum yibmabuburyi, bukamoubwe asi, er Paulus biryi tikoka sun yuk nang asi ato ebmou. “Ni kwityabwe, sunci ni ebmasise to kekeanindaute ura, me dumdum si Kreta aryi kum anabdobmatibyi. Ura, nun boamoubwe dinyi ab co ngun-ngun asi bobana dinyi ab ara waningminingna kum kubmatibyi.

²²Bok, ukuryok akiryi niryi sunsi ton ebkwinsin ara, sun kanya katabum erdongordana teleb. Nun wekoubwe weik co ngun-ngun ababyi daksakwamar bok, nun kankan aryi ninyi tentok ababyi ton kum dibkwamab ati ebman.

²³Ambutum mabmoubwe lukunda aryi Er Imtamnyi ni molonunyi biryi Er uram eryuryangananyi ton nisi bokdonokmo. Ba, imtam aryi yuryandoka ni Er Imtamnyi Uram diboka kunununyi dam yandoka tikmou.

²⁴Ni dam yandoka tikmou ura, Er Uram eryuryangananyi biryi nisi ato ebmano. ‘Paulus o, kanda ilil kanya bon mem. Weik sienyi si Kaisar biryi kan deyok asi lilibkwankir ati, kan ukuryok kum dibkwandim. Er Imtamnyi biryi Paulus kansi lebkwankiriryi, Erci sun kan ab tonkwa bandarur nang ababyi bico tenen nisintum lebdeikwansir.’ Imtam aryi kuboka uram eryuryangananyi biryi ato ebmanou.

²⁵A deyok aryi, niryi sunsi, ‘Sun kanya katabum erdongordana teleb,’ ebmasin. ‘Er Imtamnyi biryi nisi ebmanir to diboka kunubkwamasir,’ tenen niryi sunsi, ‘Ilil kuna mem,’ ebsin.

²⁶Ibalya aryi co ngun-ngun asi bobanmasici ani, mitik me dumdum asi bobinkwamasir,” eboka er Paulus biryi sun co ngun-ngun umbura wekamnyi nang kanya asi katabum ebdeibmou.

²⁷Ura, ibalya ara co ngun-ngun asi cabdonoknin bobanmasou ani, ilila mekwan si Adria mekwan bordeirirbinmasou. Ura, uki empat belas baryi tum aryi bordeirirbanmasou. Ura, lukunda dukduk en aryi sun co ngun-ngun kalingna nang aryi, “Ei, tukwe kib ai sirya boyasir darib?” ebdanmai.

²⁸Ura, sunci kiklina tabwe biribmai keil asi doboka me umbura donokoka, “Me umbong weik do? Me wininga damtoto do?” tenen kiklibdenmai. Kiklibdenmai uca, mekwan umbong ara empat puluh meter kubmou asi bikmai. Ura, mitikanun bai ani, tubto kiklibdenmai uca, umbong ara tiga puluh meter kubmou asi bikmai.

²⁹Ura, sunci, “Co ngun-ngun ara ola banmariryi, keil ai kwebtelebibyei,” tenen, “Darabdongobkwayeb,” tenen sunci darardeirina keil dumbaryi asi dobkwetebmai. Ara, co ngun-ngun dongtam tikoka sunci tabwe birikmai darardeirina keil dumbaryi asi dobkwetebmai. Dobkwetebmai ura, sunci, “Minola berekdur,” tenen dibde bunmai.

³⁰Ura, sun co ngun-ngun kalingna nang aryi, “Lebdankwayeb,” tenen kebum eboka co ngun-ngun aryi sakwetebdenmai. Ara, sunci co ngun-ngun menekoka ban tam bindoka abiryi, yuk darardeirina keil asi dorkweteninto kubmai cok, sunci aibminikmai. Ara, sunci, “Lebdandobtibyi,” tenen lemdana co ngun-ngun mitika asi dobkwetebmai.

³¹Lemdana co ngun-ngun asi dobkwetebmai bok, er Paulus biryi sun yin doun nang arungnamunyi ab sun yin doun nang ab asi ato ebmou. “Sun co ngun-ngun kalingna nang ara nun ab tonkwa kum buktibyi ura, sun nirya ara kum lebdankwandaute,” ebmou.

³²Er Paulus biryi ato ebmou ba, sun yin doun nang aryi, “Co ngun-ngun kalingna nang bindobingnyei,” tenen lemdaron co ngun-ngun asi birikamwe tabwe asi sekdongobmai uca, lemdaron co ngun-ngun asi ibalya aryi caboka me aryi bobinmou.

³³Ura, berekwamou ci, im ki likmou ura, er Paulus biryi sun co ngun-ngun umbura wekamnyi nang nirya asi ato ebmou. “Sunci yina doboka yibdarur. Uki empat belas baryi kubde yanamoubwe bok, sun nirya ara ilil kubsou ba, yina utotoa ton kum yirandarur.

³⁴A deyok aryi, niryi ebdaraboka ato ebmasin. Sunci, ‘Lebdankwayeb,’ tenen yina mitikanun yibdarur. Nun nirya ara nundamnyi lebdandoka tukwe kib binkwamib ati ato ebman. Lemdaronmamunyi ura, dilaka mitik ababyi ton kum sakwamasir. Sun kisok otong tentok ababyi ton kum leksakwamasir,” ebmou.

³⁵Er Paulus biryi ato ebmou ura, erci roti doboka aburyi, Er Imtamnyi si weik eboka molobmou. Ara, sun co ngun-ngun wekamnyi nang nirya aryi kekenmai ba, erci molobmou. Sirya molobmou ura, er Paulus biryi roti toboka yibmou.

³⁶Er Paulus bira minob yuma yibmou ura, sun yuk wekmai nang nirya aryi asing eibmai ci, sun kanya darabum ebdongobmou uca, sunbabyi yina mitikanun yibmai.

³⁷A weik co ngun-ngun wekamoubwe nang ara dua ratus tujuh puluh enam baryi nang wekamoubwe.

³⁸Ura, a wekamoubwe nang nirya yibmabu ba, sirya boubmasou ura, sun co ngun-ngun kalingna nang aryi, “Co ngun-ngun caknam kibkwayeb,” tenen sunci co ngun-ngun umbura bobaramoubwe gandum asi doboka me umbura dongobmai.

³⁹Sirya berekwe ura, sun co ngun-ngun kalingna nang aryi dinmai uca, tukwe kib asi asing eibmai. Eibmai ci, sunci, “A eibmab mutuk si ara a mutuk,” tenen ara kum bikmai. A mutuk ara sun kum bikmai cok, sunci mekwan lumun asi asing eibmai. Eibmai ci, sunci, “Co ngun-ngun ara mekwan lumun katum dam asi bobitibyi uca, co ngun-ngun dararbitibyi,” tenen uram dodeibmai.

⁴⁰Ati, sunci darardeirina keil birikmai tabwe asi sekmai uca, co ngun-ngun darardeirina keil asi mekwan umbong wekmou. Ura, sunci, “Co ngun-ngun kalukwayeb,” tenen kalurdongona asi darardongon tabwe birikamnyi asi sekdongobmai. Sirya sekdongobmai ura, sunci, “Kumwe aryi me katum dam bobinkwansurur,” tenen sunci kumwe aryi co ngun-ngun bobana aling mitika biribwelebmai. Akaling ara co ngun-ngun menekoka ban tam tikamwe co ingwelena asi tengeboka biribwelebmai. Biribwelebmai ura, kumwe aryi bobaransou ba, me katum tam banmoubwe.

⁴¹Kumwe aryi bobaransou ba, co ngun-ngun ara me katum damtoto kuramwe me wininga dam kwebtelebmou. Co ngun-ngun urasintam asi me wininga kwebtelebmou akiryi luluboka bobinman kum kubmou. Ura, co ngun-ngun amwetam ara me lontik-lontik ebmou akiryi tolobdonokoka daksakmou.

⁴²Ura, sun yin doun nang aryi sun tabwe debmai nang ati, “Me kekoka bindobingnyei,” tenen, “Obkwayeb,” ebdanmai.

⁴³Ebdanmai bok, sun yin doun nang arungnamunyi biryi sun tenen dinyi asi bisik sekoka, “Obmunyei,” eboka arukmou. Ara, “Er Paulus bisi obingnyei,” tenen erci ato eboka arukmou. Arukmou cok, erci sun co ngun-ngun wekamnyi nang asi ato ebmou. “Co ngun-ngun aryi sakwetebibyi ura, sun me kengna bingna nang ara minob me kekeboka abmun ci, me katum dam minob bindarur.

⁴⁴Ura, sunda me kengna walwal nang ara co ngun-ngun abilinga kum dakdob co lase kum talebdobmunyi ura, co deici bukoka me katum dam bindarur,” ebmou. Ura, ato kuboka abuburyi, nun co ngun-ngun wekamoubwe nang nirya ara nundamnyi lebdandoka tukwe kib ai bindobmoubwe.