Read Futuna-Aniwa Kisah Para Rasul 28 Bible Online

Kisah Para Rasul 28 - Futuna-Aniwa bible

Kisah Para Rasul 28

¹Ura, nun nirya ara nundamnyi lebdanmabuburyi me katum dam binmoubwe ura, ninyi aryi nunsi, “Me dumdum mutuk si Malta dam yanmarum,” ebmasei asi kekebmoubwe.

²Sun me dumdum atei kuramnyi nang aryi nunti, “Nun kwityabwe,” tenen kibdobmasei. Mo cebkalibmou ba, arum kubmasou ura, sun Malta nang aryi uk sekoka nunsi iknibmasei.

³Ura, er Paulus biryi co buluboka uk dongonmou uca, uk co kankan aryi kwatima maamwe asi co ab labtaleboka dongobmou uca, uk tin aryi anabmou. Anabmou ci, a kwatima aryi er Paulus taruk asi si tobdongobmou asi lobkabman kum kubmou.

⁴Ura, sun me dumdum atei kuramnyi nang aryi asing eibmai ci, sunci, “Ei, anyi Paulus bira ninyi onanyi kurur darib?” ebdanmai. Ebdanmai cok, sunci er Paulus biti, “Ibalya aryi lebdanmar bok, kwemdina ner si, ‘Malyi Kun Nang Wenen Ner,’ aryi, ‘Wenebkwan,’ tenen arukmou uca, kwatima aryi ersi si tobmar. ‘Malyi Kun Nang Wenen Ner,’ aryi ersi wenebmar ati, dibkwamar,” ebmai.

⁵Ato ebdanmai bok, er Paulus biryi er taruk bolong-bolong ebdongobmou uca, kwatima sakoka uk wekmou. Kwatima aryi er Paulus bisi si tobdongobmou bok, er Paulus bira teleb akwe kubmou ba, mitik u ababyi ton kum yibmou.

⁶Ura, sun Malta nang aryi asing dinmai uca, “Kwatima si tobmou ai ara nebci ura, dibkwamar do?” tenen dibde bukmai bok, er Paulus bira teleb akwe kubmou. Teleb akwe kubmou ati, sun tenen kanya dangubmou ci, sunci er Paulus biti, “Ei, anyi bira ninyi sun du kurur,” tenebmai.

⁷Nun kunmoubwe mutuk dam bukamwe mutuk ara ninyi si Publius mutuk bukamwe. Anyi Publius bira sun Malta nang asi kalingnamwe sienyi kuramwe. Anyi biryi nunsi du dongobmasou ura, nunda er ab tonkwa uki winiryi kubmoubwe.

⁸Nun a kubmoubwe talak ara, Publius er nai bira uk aruma yun taleamwe ba, dororamwe. Tonda, ining dei batukna yaramwe. Ba, man sokon mabmou asi er Paulus biryi dirbinmou. Dirbinmou ci, er Paulus biryi Er Imtamnyi bisi molobmou ura, erci, “Er Imtamnyi biryi kwetebte,” tenen er taruk asi lakoka Publius er nai deici asi deibdongobmou ba, Er Imtamnyi biryi ersi kwetebmou.

⁹Kwetebmou ura, sun a me dumdum atei kuramnyi nang u yiramwe nang nirya aryi, “Nunbabyi kwetebsute,” tenen er Paulus dam yanmai. Yanmai ura, er Paulus biryi sun nirya asi kweteramwe.

¹⁰Ura, sunci nunti, “Nun naiyabwe,” tenen bona ilinto muna karebmasei. Ura, kunmoubwe ani, nunci, “Anabdobkwayeb,” tenebmoubwe ura, yuk co ngun-ngun wekoka anabdobkoubwe. Anabdobkoubwe bok, sunci nunti, “Bisik noutam atari ba, yibkwaming,” tenen dinyi asi yina utotoa nirya boboka bodongoryanmasei.

¹¹Ura, nunda me dumdum si Malta asi wala winiryi kuramoubwe ani, co ngun-ngun wekoka anabdobmoubwe. Nun wekmoubwe weik co ngun-ngun ara Aleksandria atei aryi yanamwe co ngun-ngun asi wengbinmoubwe. A co ngun-ngun si ara, “Kwalengna nang Kastor ab Poluks ab,” eboka doamnyi co ngun-ngun. A co ngun-ngun ara ibalya li doamwe ba, me dumdum atei Malta dararyangan ai asi darardeiriyanamnyi ani, ibalya li sirya bisibmou ati, Roma atei tam binkwamwe asi wengbinmoubwe.

¹²Anabmoubwe ura, mekwan deici banmoubwe ani, Sirakusa atei dararbinmoubwe ura, nunda akatei asi uki winiryi mabmoubwe.

¹³Akatei aryi anaboka ilila mekwan deici tubto banmoubwe ani, co ngun-ngun dararyangan atei si Regium binmoubwe. Ura, a bindoka mabmoubwe ani, berekwe ura, kumwe ara dabura mutuk aryi kuboka yanganmou. Kumwe aryi nun co ngun-ngun asi dongtam bokekdongobmasou ba, nunda Putioli atei minola binmoubwe. Ara, uki bitinyok mekwan deici banmoubwe ani, Putioli dararyangan ai binmoubwe.

¹⁴Binmoubwe ura, nunda akatei kuramnyi dib tenen nang asi eibmoubwe. Ura, sunci nunsi du dongobmasei ba, sun ab tonkwa uki tabaryi kunmoubwe. Kunmoubwe ani, nunda tubto co ngun-ngun wekoka anabdobmoubwe ura, Roma atei tam banmoubwe.

¹⁵Ura, sun Roma atei kuramnyi dib tenen nang aryi nunti, “Yanganmang,” en uram kekebmai ura, sunci, “Bisik noutam kibdobkwayeb,” tenen yanganmai. Bisik weik yanganmai ani, ton nang ara pasar dengna keta si, “Apius,” yandoka nun ab ebdanmoubwe. Ton, yuk nang ababyi bisik weik yanganmai ani, atei si, “Ur Yangan Nang Man Ai Winiryi,” eramnyi ai asi yandoka nun ab ebdanmoubwe. Sun Roma atei kuramnyi dib tenen nang yanganmai asi er Paulus biryi asing eibmou ura, erci Er Imtamnyi bisi, “Ei nun Nai,” ebmou ba, er kanya katabum ebdongobmou.

¹⁶Iya weik atei Roma asi sirya binmoubwe ura, er Paulus bira wenen ai asi wekoka kum kuramwe. Erda, sun Kaisar arungna uram eblikniramnyi sien nang aryi, “Teleb,” ebmai ura, er Paulus bira yuk ai wekoka kuramwe. Er Paulus bira er yuk kuramwe bok, yin dounanyi tentok aryi ersi tuba-tuba kalingnamwe.

¹⁷Lukunda winiryi mabmou ani, er Paulus biryi sun Roma atei kuramnyi Yahudi yala nang sien nang asi, “Bulubkwayeb,” eboka nabmou. Ba, sirya bulubmai ura, er Paulus biryi sunsi ato ebmou, “Ni kwityabwe e, sun Yerusalem atei kuraming Yahudi yala nang aryi nisi tatab-tatab ebmanei bok, niryi nun Yahudi yala nang asi malyi ton kum kubse. Tonda, nun aibweyabwe aryi, ‘Ato-ato kubdarur,’ eboka etereransei dinyi ababyi ni ton kum yan yanibse. Malyi kuna ton kum kubmase asi, nira Yerusalem atei kunmase bok, sun Yahudi yala nang aryi nisi taleboka sun Kaisar milin nang taruk dam karebmanei.

¹⁸Karebmanei ura, sun Kaisar milin nang aryi ni deyok ati lilibdenmanei uca, sunci ni malyi deyok ton kum eibmai. Nira, ‘Weneboka obmanto,’ tenen dinyi ton kum kubmase ati, sun Kaisar milin nang aryi niti, ‘Lebdobkwayeb,’ tenebmanei.

¹⁹Ato tenebmanei bok, sun Yahudi yala nang aryi niti, ‘Lebdobmunyei,’ ebmai. Sunci niti, ‘Lebdobmunyei,’ ebmanei ati, niryi, ‘Yuk bisik da ton kum kubkwanir,’ tenen, ‘Weik sienyi si Kaisar biryi ni deyok lilina teleb,’ eboka molobmase. Ura, niryi, ‘Nun Yahudi yala nang asi tatab-tatab ebkwan,’ tenen kum yanmase ara sun biknindarur.

²⁰A deyok aryi, niryi, ‘Tonkwa ebdandoka uram sisikwayeb,’ eboka molobmasin. Nun Israel yala nang aryi dibde bunubnyi bisi dibde bunun deyok aryi, a besi tabwe aryi debmanei,” ebmou.

²¹Er Paulus biryi sunsi ato ebmou ba, sun Yahudi yala nang aryi uram doboka ersi ato ebmai. “Nun kwityabwe Yudea mutuk kuraming Yahudi yala nang aryi kan deyok ati kerek sengna ton kum deibmasing. Tonda, Yudea mutuk kuraming ninyi tentok ababyi kan deyok ati uram ton kum eryanmai. Ara, kanti, ‘Malinyi,’ ebde yangananyi ton kum ebde yanganmai.

²²Erda, nunci kan dib tenena ati, ‘Kekebtibyi,’ tenebmab. Kan kwityabwe neik uram etereraming nang ati sun dantam-dantam kuramingnyi nang aryi, ‘Nun li,’ eraming ati kekebmoubwe. A deyok aryi, nunci kansi, ‘Kan dib tenena lak kibsurum,’ eboka molobmakib,” ebmai.

²³Molobmai ura, sun Yahudi yala nang ab er Paulus ab aryi, “Yuk uki tum aryi uram tubto sisikwayeb,” ebdanmai. Ura, uram sisikwamai uki tum berekwe ura, Yahudi yala nang ninyi ilinto er Paulus kuramwe ai dam yanmai. Yanmai ura, er Paulus biryi belerukna kobdob aryi kuboka lukunda ababyi nirya sunsi liliboka eterebmou cok, erci Er Imtamnyi biryi Weik Sienyi kurur ci, ninyi kalingsurur deyok ati eboka eterebmou. Ara, erci sun Yahudi yala nang asi, “Nun Du Yesus bisi dib tenebdarur,” eboka Er Yesus deyok eterebmou. Eterebmou cok, er Paulus biryi Musa Uram sekamwe to ab, sun Er Imtamnyi Uram ebdeibmaci to lak etereramnyi nang kerek sekamnyi uram ab aryi nukmou ci, “Er Yesus bira nun dibde bunubnyi,” eboka lak kibmou.

²⁴Eterenmou ba, ton nang aryi er eterena asi dib tenebmai bok, yuk nang aryi dib kum tenebmai.

²⁵Ura, sun Yahudi yala nang aryi sun mamun lulubdanmai ci, er Paulus kuramwe ai asi deibloboka bindobmai. Ara, er Paulus biryi sunsi, “Sun yuk yala nang ababyi Er Imtamnyi biryi lebkwande,” ebmou ura, sun Yahudi yala nang aryi lulubdandoka er kuramwe ai asi deiblobmai. Kum deiblobmai bok, er Paulus biryi sunsi ato ebmou, “Er Imtamnyi Kanya Roh Kudus aryi sun aibweyabwe ati ebmou uram ara diboka kikiman uram asi ebmou. Ara, Erci Er Uram ebdeibmaca bobaramunyi si Yesaya deici aryi sunsi wenebmou uram ati ebman.

²⁶Ara, Erci sunsi ato eamwe, ‘Kanci a nang asi bindoka ato ebdum, “Sunci tuba-tuba kekebdenkwandum bok, sun kekebkwandum uram asi sunci kum bikwandum. Sunci diboka asing dibdenkwandum bok, sun dibdenkwandum dinyi asi sunci kum eibkwandum,” ebdum.

²⁷A nang kanya ara kat kurur akiryi, “Bingdona nun li,” teneraming ati ato ebman. “Kekena nun li,” tenen sunci sun amol asi kiningdaraming. “Asing eirina nun li,” tenen sunci sun asing lilirdaraming. “Dib en uram bikdobibiryi, Er Imtamnyi bisi tamuboka binkwayeb,” tenena ara sun kanya dam aryi kum teneirdenung. Tonda, “Er Imtamnyi biryi nunda malyi nang asi teleb kubdeibsute,” tenena ara sunci kanya kum teneirdenung.’ (Yesaya 6:9-10) Ato eboka Er Imtamnyi Kanya Roh Kudus aryi sun aibweyabwe asi wenebmou.

²⁸Ati, Yahudi yala nang sun aibweyabwe aryi Er Imtamnyi Uram ati, ‘Kekena nun li,’ teneramnyi deyok aryi, niryi sunsi uram ton lak ebkwinsin. Er Imtamnyi biryi, ‘Sun yuk yala nang ababyi lebkwan,’ tenen erci, ‘Sun yuk yala nang asi lemsina uram lak eterebde bindarur,’ eboka arukmou. Sun yuk yala nang ara a uram asi diboka kekebkwaming ati ebman,” ebmou.

²⁹Er Paulus biryi ato ebmou ba, sun Yahudi yala nang ara sun mamun lulubdandoka er Paulus kuramwe ai deibloboka binsekdobmai.

³⁰Ura, er Paulus bira er kuramwe ai asi kuramwe bok, kwalina bitinyi bisibmou. Ara, erci er ai damnyi bisi ai dengna kareramuryi, erda akai asi iya kuramwe. A kuramwe ba, ninyi ilinto aryi ersi diryangaramnyi ba, erci sun nirya asi du dongoboka-du dongoboka kimnamwe.

³¹Ato kuramuryok, er Paulus biryi ilil kum asa aryi Er Imtamnyi biryi Weik Sienyi kurur ci, ninyi kalingsurur deyok ati lak eboka, “Dib tenebdarur,” eramwe. Tonda, ninyi tentok ababyi Paulus bisi uram kum kilikdeibmou bok, erci, “Nun Du Yesus Kristus bira iya Weik Sienyi kuboka kalingmurusurur,” eboka etereramwe.