Read Futuna-Aniwa Kisah Para Rasul 3 Bible Online

Kisah Para Rasul 3 - Futuna-Aniwa bible

Kisah Para Rasul 3

¹Kuramnyi ani, uki tentok tum aryi er Petrus ab Yohanes ab Bait Allah ai ara Er Imtamnyi ninyi dama deirin ai dam banmarei. Ara, kiting yalekabwe ba, sun Israel yala nang nirya aryi Er Imtamnyi bisi moloramnyi kiting yakna kubmou bok, Bait Allah ai asi welebinmarei.

²Banmarei bok, ninyi tentok ara yan deneamwe bok, deiaminyi a bukmou. Anyi bira er yuk yibinman kum kuramwe deyok aryi, yuk nang aryi bobaraminyi kuramwe. Sun dam kuramnyi nang ara sun kwit bisi boboka uki tuba-tuba Bait Allah ai dam bobaramnyi. Ara, erci sun bisirbaramnyi nang asi, “Co bok karebnurum,” eboka moloronkwandura tenen ati, sunci ersi boboka bublan dam si, “Teleb Bublan,” dam burdeirirbaramnyi to kuboka burdeirirbinmai.

³Ura, “Teleb Bublan,” dam buramunyi biryi er Petrus ab Yohanes ab Bait Allah ai dam wengbankwandei asi asing eibmou ba, erci sunsi, “Ni naiyabwe, co bok ton karebnururum,” eboka molobmou.

⁴Molobmou bok, sunci ersi dinmarei cok, er Petrus biryi ersi, “Kanci nunsi disurum!” ebmou.

⁵Ebmou ba, er yan deneamunyi biryi, “Co bok karebkwiniring,” teneboka sunsi dinmou.

⁶Dinmou bok, er Petrus biryi ersi ato ebmou, “Co bok utotoa kum bobman asi, ni dam kubmar to kansi karebkwinkin. Ara, Er Yesus Kristus bira er Nazaret ateinyi si deib aryi niryi kansi, ‘Tikoka yibarum,’ ebmakin,” ebmou.

⁷Ato ebmou cok, er Petrus biryi er yan deneamunyi bisi taruk siriktam taleboka ersi tikeibmou. Tikeibmou ba, er yan nirya mikib kubmou.

⁸Uca, erci sakaboka tikokmou ura, o bina a yana kimou. Ura, erci er Petrus ab Yohanes ab tonkwa Bait Allah ai dam wengbanmai cok, erci kilkil weik kuboka sunukoka Er Imtamnyi si weik ebnin binmou.

⁹Erda Er Imtamnyi si weik ebde yibarkiringmunyi bisi ninyi nirya aryi asing eibmai.

¹⁰Asing eibmai cok, sunci, “‘Teleb Bublan,’ dam bukoka co bok moloramunyi yibarkiringmar,” tenen bikmai ba, sunci, “Naie, dindarur, Er Imtamnyi biryi ersi kwetebmar,” ebdanmai.

¹¹Ura, er kwetebmunyi biryi er Petrus ab Yohanes ab tonkwa tuba kunmai bok, ninyi nirya aryi, “Naie,” teneboka sun dam buluryanmai. Ara, Bait Allah ai dam doamnyi ai weik ai si, “Salomo biryi doamwe ai,” wengyandoka bulubmai. Akai ara abilinga imna kum uca, duma dem deibloamnyi ai wengyandoka bulubmai.

¹²Bulubmai asi er Petrus biryi eibmou ba, erci sunsi ato ebmou. “Ni kwityabwe Israel yala nang o. Unato ati, sunci, ‘Naie,’ tenebmarum do? Nun anyi bisi kwetebmanim ara nunbaramnyi mikib biriman aryi kwetebmanim ati, tenebmarum do? Ato tenen kum. Nunda Er Imtamnyi bisi diboka dirniliranim deyok aryi, kwetebmanim ati, tenebmarum do? Ato tenen kum.

¹³Erda Er Imtamnyi bira nun aibweyabwe Abraham ab, Ishak ab, Yakub ab moloraminyi biryi Er arungnanyi Yesus si weik erebmou cok, anyi bisi kwetebmar. Anyi Yesus bisi sunci taleboka bobinmandau ura, sun Roma nang sienyi Pilatus biryi, ‘Anyi lobdeibkun,’ tenebmou bok, sunci Ersi, ‘Anyi nun li,’ ebmandau.

¹⁴Anyi Yesus bira Er Imtamnyi biryi wibmounyi kuboka Er Imtamnyi Uram kunuramnyi kuramwe. Sunci Anyi biti, ‘Nun li,’ teneboka ninyi onanyi biti, ‘Anyi bisi lobdeibsurum,’ eboka molobmandau se!

¹⁵Ato kuboka sunci Er Kam Kurdeirin Deyoknyi bisi obmandau se! Sunci Ersi obmandau bok, Er Imtamnyi biryi ersi kam bukeibmou. Er Yesus bisi diboka kam bukeibmou ati, ebmanim. Nun asing eibmoubwe to lak ebmasinim.

¹⁶Ati, anyi yan deneamunyi biryi Er Yesus bisi dib tenebmar ati, sun eibmarum ilil tenen dinyi kubmar. Ara, Er Yesus si deib aryi er yan mikib yanmar. Anyi biryi Er Yesus bisi dib tenebmou deyok aryi, sun nirya asing eibmarum ba, Er Yesus biryi ersi teleb kubdeibmar.

¹⁷Ati, ukuryok, ni kwityabwe o, kekebnindarur. Sun ab sun sien nang ab walwal kuboka a malyi dinyi kubmandau ati, ni bikman.

¹⁸Er Imtamnyi bira a dinyi minob bingnamunyi biryi Er uram ebdeibmaci to lak etereramnyi nang biriman aryi lak eransou to, ukuboka kunubmou. Ara, ‘Er Imtamnyi biryi bokdonokwansiranyi ninyi Lemsinanyi bisi mambul kubdeibkwaming,’ eramnyi uram kunubkwamwe ati, ato kubmou ati ebman.

¹⁹Ati, ukuryok sunci sun, ‘Malyi kubkwan,’ tenendarur dinyi takloboka Er Imtamnyi kanya asi teleb kurdeirin dinyi akwe teneibde ukubdarur. Ukubmun cok, sunci, ‘Er Imtamnyi biryi nun malyi kuramoubwe dinyi kilibsute,’ tenen Er uram kekeboka tamuryandarur.

²⁰Ara, ‘Er Imtamnyi biryi Erci minob wibmou ninyi Lemsinanyi bira Yesus bisi bokweteboka nun kanya mikib kubdeibkwansir,’ tenen tamuryandarur.

²¹Nun Du Yesus bira imtam welebinmunyi imtam kubkwandur. Ara, Er Imtamnyi biryi utotoa nirya minob kuamwe to teleb kum kubdeibde bok, nun Du Yesus imtam kubkwandur. A yankwansir talak ara Er Imtamnyi biryi wibmou nabi-nabi nang aryi minob aryi kuboka eramnyi.

²²Er Musa biryi nun aibweyabwe asi ato ebmou. ‘Er Imtamnyi bira sun kwityabwe kankan aryi wiboka nitonyi Er uram ebdeibmaca bobananyi tikeibkwansir. Anyi biryi sunsi ebkwansir to sunci diboka kekebdarur.

²³Unanyi-unaner aryi anyi Er Imtamnyi Uram ebdeibmaca bobananyi bisi kum kekebkwanci ura, anyi-aner ara nun Israel yala nang kankan aryi bai yakdonokoka obkabokwanung,’ ebmou. (Ulangan 18:15, 16, 19)

²⁴Er Musa biryi ato ebmou ura, kuramnyi ani, nabi-nabi nang nirya ara er Samuel kuramwe talak aryi kuboka sun aminda kuramnyi nang ababyi, ‘A talak yankwansir,’ ati lak eramnyi.

²⁵Ura, nabi-nabi nang biriman aryi ebdeibmou to ara Erci sunti ebdeibmou. Ara, Er Imtamnyi biryi sun aibweyabwe asi mururdeirin uram karebmou to, Erci sunbabyi a uram asi karebsou. Erci er Abraham bisi ebdeibmou uram ara, ‘Kan deibkwandim yala nang biriman aryi Ni Er Imtamnyi biryi sun im dangna tukwe dangna yala nang nirya asi kisal dakwan,’ ebdeibmou. (Kejadian 22:18; 26:4)

²⁶Ati, Er Imtamnyi biryi Er arungnanyi Yesus bisi tikeiboka Erci Ersi sun dam yuma aryi bokwetebmou. Ara, sunci sun malyi dinyi yuk-yuk taklobmun bok, nun Du Yesus biryi sunsi teleb kubdeibkwansir ati, Er Imtamnyi biryi Ersi sun dam sirya bokwetebsou.” Ato eboka er Petrus biryi sun bulubmai nang asi eterebmou.