Read Futuna-Aniwa Kisah Para Rasul 4 Bible Online

Kisah Para Rasul 4 - Futuna-Aniwa bible

Kisah Para Rasul 4

¹Er Petrus ab Yohanes ab aryi sun bulubmai nang asi ato enmarei bok, sun Er Imtamnyi kan ninyi kan noutam kuboka antanirdeirin sien nang ab, Bait Allah ai kalingna deyoknyi ab, sun Saduki nang ab tonkwa sun dam yanmai.

²A nang ara yu kanya boboka sun dam yanmai. Ara, er Petrus ab Yohanes ab aryi sun bulubmai nang asi, “Er Yesus bira kam bukokmou ati, sun diamingnyi nang neiktoto kam bukokwaming,” eboka eterebmarei deyok aryi, sun kanya yu kubmou.

³Yanmai ura, sunci er Petrus ab Yohanes ab asi taleboka sun malyi kun nang wenen ai asi bobinmai. Lukunda sirya kubmou ati, sunci, “Akai asi mabmaringnyi ani, ambutum belerukna kobdob berekci ura, a nang ara sun Yahudi yala nang asi uram sengkwetena nang asi bobinkwamib,” tenen bobinmai.

⁴Bobinmai bok, er Petrus ab Yohanes ab aryi eterebmarei uram asi kekebmai nang ilinto dib tenebkalibmai. Uca, sun Er Yesus bisi dib tenen nang ara ninyi lima ribu baryi kuramnyi.

⁵Mabmai ani, belerukna kobdob berekwe ura, sun Yahudi yala nang asi uram sengkwetena nang bulubmai. Ara, sun sien nang ab, sun deyok lilin nang ab, tonda sun Yerusalem atei aryi kuboka er Musa kerek sekamwe uram etereramnyi nang ab nirya bulubmai.

⁶Bulubmai ura, sunci Er Imtamnyi kan ninyi kan noutam kuboka antanirdeirin sienyi si Hanas ab, er yala nang Kayafas ab, Yohanes ab, Aleksander ab, tonda er yala nang yuk nang ab tonkwa uram sisingmai.

⁷Ura, sunci er Petrus ab Yohanes ab asi naboka, “Noutam tikdurum,” ebmai cok, sunci sunsi, “Unato mikib biriman aryi, unato si biriman aryi sunci a yan deneamunyi bisi kwetebmarurumwe do?” eboka asibdenmai.

⁸Ato eboka asibdenmai ba, er Petrus biryi er kanya dam asi Er Imtamnyi Kanya Roh Kudus langkibmou bok, sunsi ato ebmou. “Ni naiyabwe o, nun Yahudi yala nang sien nang ab, nun deyok lilin nang ab, ni ebkwinsin uram asi kekebdarur.

⁹Sunci ukuryok lilibmarum deyok ara nunci teleb dinyi kuboka yibanman kumnyi bisi kwetebmanumwe ati, lilibmarum asi kekebman.

¹⁰Lilibmarum ati, sun a bulubmarum nang nirya ab, ton sun Israel yala nang nirya ab aryi ni lak ebkwinsin uram asi kekena teleb. Ara, Er Imtamnyi biryi wibmou ninyi Lemsinanyi Yesus bira Nazaret ateinyi si biriman aryi anyi bisi kwetebmanumwe ati ebman. Ara, sunci co lase deici likniboka bing dakmandaunyi si biriman ara Er Imtamnyi biryi kam bukeibmounyi si biriman aryi kwetebmanumwe ura, a yan deneamunyi teleb kuboka sun urasintam a tikmar ati, asing eibmarum.

¹¹Anyi Yesus biti sunda ai don nang aryi, ‘Bai donongna keil,’ tenebmarum bok, Er Imtamnyi biryi Ersi wiboka, ‘Iya teleb keil,’ teneboka erebdeibmou. [1]

¹²Nun Du Yesus biryok ninyi lebsute. Yuknyi si biriman aryi lebdobman kum. Erda Er Imtamnyi biryi, ‘Er Yesus si biriman aryok ninyi lebtinyi,’ tenen Erci sun im dangna tukwe dangna nang nirya asi Er Yesus si akwe karebsou.” Ato eboka er Petrus biryi ebmou.

¹³Ura, er Petrus ab Yohanes ab ilil kum asa aryi ato ebmarei ura, sun Yahudi yala nang uram sengkwetena nang aryi, “A nang ara eterena lilina kum kuboka ur nang kuraming,” tenen bikmai cok, sunci “Naie,” tenebmai. Ara, sunci, “A nang ara Er Yesus ab tonkwa kuramnyi nang,” tenen bikmai.

¹⁴Ato tenen bikmai asi, sunci er yan deneamunyi bira kwetebmareinyi bisi asing eibmai ati, sunci uram doboka ebman kum kubmai.

¹⁵Uram doboka ebman kum kubmai cok, sunci er Petrus ab Yohanes ab asi, “Nun uram sisingna dam aryi anaboka baitam dibde bukdurum,” ebmai ura, sun mamun uram sisikdanmai.

¹⁶Uram sisikdanmai cok, sunci, “A nang asi una kubkwayeb do? A nang aryi ilil tenen dinyi kiknibmarei ara sun Yerusalem atei nang nirya aryi bikmang. A dinyi lak kubmar ati, nunci, ‘Tola ati ebmarurum,’ ebman kum.

¹⁷Ato ebman kum asi, ‘Ninyi nirya aryi a deyok ati, kekebingnyei,’ tenen, nunci a nang asi, ‘Er Yesus si ara yuk nang tentok ababyi lak ebmunyei,’ ebkwayeb,” eboka sisikmai.

¹⁸Ato eboka uram sisikmai ura, sunci er Petrus ab Yohanes ab asi naboka, “Er Yesus si siboka eterebmunyei. A dinyi diboka taklobdarur,” ebmai.

¹⁹Ebmai bok, er Petrus ab Yohanes ab aryi uram doboka ato ebmarei. “Er Imtamnyi biryi ebdeibsou uram kekebkwanim do? Sunci nunsi ebdeibmarum uram asi kekebkwanim do? Dan dinyi ukuboka nunci Er Imtamnyi biryi, ‘Kikib,’ tenesurur dinyi kunubkwanim tenebmarum do? Sunci nunsi, ‘A si siboka eterebmunyei,’ ebmasurum bok, nunci sun takubdeibmasurum uram kum kekebkwanim ati ebman.

²⁰Nun asing eibmoubwe dinyi ab nun kekebmoubwe dinyi ab ati, ‘Lak kum ebkwanim,’ tenebmatinimnyi ababyi, lak ebtinimnyi,” ebmarei.

²¹Er Petrus ab Yohanes ab ato ebmarei ura, sun Yahudi yala nang asi uram sengkwetena nang aryi, “Mem,” en uram ebtabakoka abiryi, “Ur birurum,” eboka sunsi lobdeibmai. Ara, er Petrus ab Yohanes ab aryi malyi deyok kum eibmai ati, “A nang asi una kuboka wenebkwayeb do?” tenen kum bikmai. Ara, ninyi nirya aryi, “Yan deneamunyi bisi kwetebmou,” tenen Er Imtamnyi si weik ebmai ati, sun Yahudi yala nang uram sengkwetena nang aryi, “Er Petrus ab Yohanes ab asi wenebibyi ura, ninyi nirya aryi nunsi yu kubkwansing,” tenen ilil kanya bobmai.

²²Er Petrus ab Yohanes ab aryi kwetebmareinyi bira kwalina empat puluh baryi bisibmunyi kuramwe ba, a ilil tenen dinyi ersi kubmou.

²³Ura, er Petrus ab Yohanes ab asi sirya lobdeibmai ura, sunci sun kwityabwe dib tenen nang dam binmarei. Binmarei ura, sunci sun kwityabwe asi, “Sun Er Imtamnyi kan ninyi kan noutam kuboka antanirdeirin deyok nang ab sun deyok lilin nang ab aryi ato-ato ebmasing,” eboka lak ebmarei.

²⁴Lak ebmarei ba, sun kwityabwe kekebmai cok, sunci antaniboka sun uram erebdeiboka Er Imtamnyi bisi molobmai. Ara, sunci, “Nun Nai Imtamnyi o, Kanda im dangna tukwe dangna mekwan ababyi kikniamumnyi kurum. Kan utotoa nirya kikniamumnyi kurum.

²⁵Kanda Kan Kanya Roh Kudus biriman aryi nun aibwe Daud bisi ebdeibmumunyi bisi nabkib. Kan arungnamumnyi Daud biryi ato ebmou, ‘Unato ati, sun Israel yala kum nang yu weik kubmai do? Unato ati, sun yuk yala nang aryi marmun talyi yibmai do?

²⁶Sun im dangna tukwe dangna weik sien nang kiknibminikdanmai. Sun sien nang aryi buluboka ebdanmai. Ara, “Er Imtamnyi ab Erci wiboka Bokwetebmounyi ab asi obkwayeb,” tenen bulubmai,’ ebmou. (Mazmur 2:1-2)

²⁷Nai Imtamnyi o, nun aibwe Daud biryi ebmou to, dib kunubmou. Ara, er sienyi Herodes ab, ton er sienyi Pontius Pilatus ab, sun Israel yala kum nang ab, ton sun Israel yala nang ab akatei kuboka antaniboka bulubmai. Ara, Kan wibmumwe Arungnanyi si Yesus bira Kanci tikeibmoumnyi biti, ‘Obkwayeb,’ tenen marmun yibmai.

²⁸Marmun yibmai asi, Kanda mikibnyi biryi minob teneibmumwe to kunubkwamnyi ati, ato kubmai.

²⁹Ati, ukuryok, Nai Imtamnyi, a nang aryi nunsi, ‘Mambul kubdeibsitibyi,’ ebmasing asi Kanci bikmarim. Tonda, nunda Kan arungna nang aryi ilil kum kuboka Kan uram ebkwamib ati, Kanci katabum kanya kareboka milibsurum.

³⁰Ara, Kanci Kan taruk ninikmin ba, Kanci Kan wibmumwe Arungnanyi Yesus si biriman aryi ninyi kwetebmin cok, ilil tenen dinyi kiknibdum,” eboka molobmai.

³¹Ato eboka molobmai ura, sun bulubmai dam ara lulukmou ba, sun nirya asi Er Imtamnyi Kanya Roh Kudus aryi langkibmou. Langkibmou bok, sun kanya katabum ebmou bok, sunci Er Imtamnyi Uram lak eramnyi.

³²Sun dib tenen nang nirya ara kanya tentok boramnyi. Sun nirya ara sun bona ati, “Ni dinyi ni dinyi,” tenena kum kuramnyi. Erda, sunci sun kubmaci dinyi asi bokeiboka mamun karerdaramnyi.

³³Karerdaramnyi ba, sun Teleb Uram deyok kouboka eteren nang aryi ilil weik tenen dinyi kikniboka, “Nun Du Yesus kam bukokmou,” eboka lak eramnyi. Ba, Er Imtamnyi biryi sun dib tenen nang nirya asi kisal dangdoramwe.

³⁴Sun kankan aryi ninyi tentok ara, “Ton atabmanir,” enanyi kum kuramwe. Sun kankan aryi kuboka wa deyok nang ara sun wa dekoka sun dororamnyi co bok asi sun Teleb Uram deyok kouboka eteren nang dam boboka dama deiriramnyi. Sun ai dam nang ababyi neiktoto sun ai dekoka sun dororamnyi co bok asi sun Teleb Uram deyok kouboka eteren nang dam boboka dama deiriramnyi. Deiriramnyi ura, ninyi nirya ara sun atanmanto bongdeiriramnyi.

³⁵

³⁶A talak ara ninyi tentok si Yusuf kuramwe. Anyi bisi sun Teleb Uram deyok kouboka eteren nang aryi uruma si doboka, “Barnabas,” eramnyi. A si ara nun uram aryi danguboka, “Ninyi kanya teleb kurdeirinanyi,” eramnyi. Anyi bira Lewi yalanyi kuramuryok Siprus mutuk deiamunyi kuramwe. Anyi bira wa deyoknyi biryi er wa dekmou ci, er dobdobmou co bok asi sun Teleb Uram deyok kouboka eteren nang dam boboka dama deibmou.