Read Futuna-Aniwa Kisah Para Rasul 5 Bible Online

Kisah Para Rasul 5 - Futuna-Aniwa bible

Kisah Para Rasul 5

¹A talak aryi ninyi tentok si Ananias ab er ner Safira kurandei. A nang bitinyi ara sunbabyi sun wa ton yuk nang ati ebmarei ura, co bok dobdobmarei.

²Dobdobmarei ura, er Ananias biryi co bok ton dinyi kunusa dobmou ura, ton dinyi boboka sun Teleb Uram deyok kouboka eteren nang asi karebmou. Ara, ton dinyi kunusa dobmou asi er ner bikmou.

³Er Ananias biryi karerbinmou ura, er Petrus biryi ersi ato ebmou, “Se Ananias, unato ati isa sienyi si Iblis kan kanya asi wekmakir do? Kanci co bok ton dinyi kunusa dobmarim ati ebman. Ati, kanci unato ati, ‘Niryi Er Imtamnyi Kanya Roh Kudus asing kubdeibkwan,’ tenebmomwe do?

⁴Kanci kan wa yuk nang asi kum dekmumwe talak ara kan wa kuramwe. Ani, sirya dekmumwe ura, kan dobdobmumwe co bok ara kan dinyi kibmakou. Ati, unato ati kanci, ‘Ton dinyi kunusa dobkwan,’ tenebmumwe do? Ato kuboka kanci iya malyi to kubmarim. Ara, kanci, ‘Ninyi asing kubdeibkwan,’ kum tenebmumwe. Erda, ‘Er Imtamnyi bisi asing kubdeibkwan,’ tenebmumwe ati iya malyi to kubmarim,” ebmou.

⁵Ura, er Ananias bira er Petrus biryi ebmou to kekebmou ba, tukwe deici sakoka dibmou. Ura, sun er Ananias dibmou deyok kekebmai nang nirya ilil weik kubmou.

⁶Dibmou ura, sun kam nang yandoka er Ananias bisi aling akuboka tukwe dongorbinmai.

⁷Kiting winiryi bisibmou ura, Ananias ner ara er akenyi dibmou asi bingna kum cok, yanmou.

⁸Yanmou bok, er Petrus biryi ersi, “Safira, a wa dengna karebmasungwe co bok a kunum karebmasungwe do kum do?” Asibdenmou uca, er Safira biryi tola ati, “Nai, a kunum,” ebmou.

⁹Ebmou ura, er Petrus biryi ersi, “Unato ati sunci, ‘Er Imtamnyi Kanya Roh Kudus asing kubdeibkwanim,’ ebdanmarurumwe do? Kan kekerum. Kan akenyi tukwe dongorbinmang nang ara bublan dam yanganmang. A nang ara kanbabyi tukwe dongorbinkwinking,” ebmou.

¹⁰Er Petrus biryi ato ebmou bok, Ananias ner ababyi er Petrus urasintam aryi sakoka dibmou. Dibwe ura, sun kam nang wengyandoka abiryi, a ner dibmou asi asing eibmai ura, sunci ersi boboka er akenyi dongoabyi lingkwa dam asi tukwe dongorbinmai.

¹¹Ura, sun buluboka Er Imtamnyi Uram kekeramnyi nang ton sun yuk nang aryi a deyok ati kekebmai ci, ilil weik kubmou.

¹²Sun ninyi kanya ilil weik kunmou bok, sun Teleb Uram deyok kouboka eteren nang aryi ilil tenen dinyi ilinto kikniramnyi. Ara, sunci, “Sun ninyi aryi Er Imtamnyi bisi dib tenebkwaming,” tenen, “Naie,” tenen dinyi ilinto kikniramnyi. Kikniramiryok, sun Er Imtamnyi Uram dib tenen nang nirya ara susuk akwe lelebdandoka weik ai si, “Salomo biryi doamwe ai,” buluboka kuramnyi. Akai ara abilinga imna kum uca, duma dem deibloamnyi ai asi buluboka kuramnyi.

¹³Kuramnyi bok, sun yuk nang ilil aryi sun ab urubdanman kum kuramnyi. Urubdanman kum kuramiryok, sunci sun Er Imtamnyi Uram dib tenen nang ati kisal dangnamnyi.

¹⁴Ura, ninyi ilinto ara sal babyi ner babyi, Er Imtamnyi bisi dib tenebkalibmai uca, sun Er Imtamnyi bisi dib tenen nang tabangdongoramnyi.

¹⁵Sun Teleb Uram eteren deyok nang aryi ilil tenen dinyi kikniramnyi ati, sun ninyi aryi sun u yiramwe nang ab sun mikib kum nang ab asi man sokon deici boboka bisik iririkna dam asi burdeiramnyi. Ara, sunci, “Er Petrus yibaci ba, er kiting ula ababyi nunsi bol libsici ba, kekdobkwayeb,” tenen er Petrus bisi dibde buramnyi.

¹⁶Ara, Yerusalem dam-dam doramnyi atei aryi kuboka ninyi yubwa-yubwa yandoka sun Teleb Uram eteren deyok nang dam asi buluryangaramnyi. Bulubmai cok, sunci sun u yin nang ab ton sun isa wekamwe nang ab asi boyanmai. Boyanmai ura, sun nirya asi kwetebmai.

¹⁷Sun Teleb Uram eteren deyok nang aryi ninyi kwetebmai ati, Er Imtamnyi kan ninyi kan noutam kuboka antanirdeirin sienyi ab er miliramnyi nang ara sun Saduki nang ab sun kanya dam aryi yu weik kubmou.

¹⁸Yu weik kubmou aryi sunci sun Teleb Uram deyok kouboka eteren nang asi talebmai cok, ninyi wenen ai dongorbinmai.

¹⁹Dongobmai ura, lukunda kibmou ura, Er Imtamnyi biryi Er uram eryuryangananyi tentok asi bokwetebmou. Bokwetebmou ura, anyi bira ninyi wenen ai bindoka bublan kukeiboka sun Teleb Uram eteren deyok nang asi baitam bobinmou. Bobinmou ura, erci sunsi ato ebmou.

²⁰“A nang, sunci Bait Allah ai ara Er Imtamnyi biti ninyi dama deirin ai dam bindoka a kam kuna deyok uram eterebdarur,” ebmou.

²¹Ura, belerukna kobdob berekmou ba, sunci a uram kunuboka Bait Allah ai dam bindoka eterebmai. Eterenmai ba, sun Er Imtamnyi kan ninyi kan noutam kuboka antanirdeirin sienyi ab er miliramnyi nang ab yanmai. Yanmai ura, sunci sun Israel yala nang uram sengkwetena nang ab sun Israel yala nang sien nang ab asi nabmai ura, uram sisingmai. Uram sisingmai cok, sunci sun arungna nang asi, “A Teleb Uram eteren deyok nang asi boyandarur,” ebmai.

²²Ebmai ura, sun arungna nang aryi ninyi wenen ai bindoka dinmai uca, a nang asi kum eibmai. Ura, sunci tamuryandoka ato ebmai.

²³“Naiyabwe, nunda ninyi wenen ai binmab ura, bublan diboka tirikdongobmou asi asing eibmab. Tonda, sun ninyi wenen ai kalingna nang ara bublan asi kalikmang asi asing eibmab. Ura, bublan kukeiboka wekmab uca, ninyi ton kum eibmab,” ebmai.

²⁴Ato ebmai ba, sun Bait Allah ai kalingnamnyi yin doun nang sienyi ab sun Er Imtamnyi kan ninyi kan noutam kuboka antanirdeirin deyok nang ab sun kanya aryi, “Nonge, una kubmar do?” teneboka sun kanya kankana kubmou.

²⁵Kankana kubmou bok, ninyi tentok aryi sun dam yandoka erci sunsi, “Naiyabwe kekendarur, sunci ninyi wenen ai dongobdau nang ara Bait Allah ai dam kuboka ninyi asi eterenmang,” ebmou.

²⁶Ebmou ba, sun yin doun nang sienyi ab er arungnamwe yin doun nang ab bindoka sun Teleb Uram eteren deyok nang asi borbinmai. Ara, “Ninyi aryi keil doboka nunsi obsingnyei,” tenen ilil kubmou ati, mikib asa kum boyanmai.

²⁷Sirya boyanmai ura, sunci sun Teleb Uram eteren deyok nang asi sun Israel yala nang asi uram sengkwetena nang dam tingdeiriryanmai. Ara, sun Er Imtamnyi kan ninyi kan noutam kuboka antanirdeirin sienyi Imam Besar biryi asiboka sun deyok lilibkou ati, tingdeiriryanmai.

²⁸Tingdeiriryanmai ura, Imam Besar biryi sunsi ato ebmou, “A nang se, unato ati, nunci, ‘Mem,’ ebmasoubwe dinyi asi dakbisibmarum do? Ara, nunci sunsi, ‘Anyi Yesus si siboka eterena mem,’ ebmasoubwe bok, sunci tataboka eterendarur. Sunci eterendarur aryi sun Yerusalem atei nang nirya a deyok akwe erdaraming. Ara, sunci nunti, ‘Er Yesus dibmoua asi sunci malyi kubdau,’ tenen tatab-tatab eransurum ati, sunci eterendarur,” ebmou.

²⁹Er Imtamnyi kan ninyi kan noutam kuboka antanirdeirin sienyi biryi ato ebmou ba, er Petrus ab er kwityabwe ab aryi ersi ato ebmai, “Nunci Er Imtamnyi biryi ebmaci to kunuboka sun ninyi aryi ebmangnyi to barwe tam kimna teleb.

³⁰Nun Nai Imtamnyi bira nun aibweyabwe aryi moloraminyi biryi Er Yesus bisi kam bukeibmou. Anyi bira sunci co lase likniboka obmandaunyi dibmou asi Er Imtamnyi biryi kam bukeibmou.

³¹Bukeibmou ura, Er Imtamnyi biryi Ersi erebdeiboka Lemna Deyok Sienyi tikeibwe. Ara, sun Israel yala nang aryi sun malyi dinyi takoka Er Imtamnyi kanya asi teleb kubdeibkwaming ati, Erci sun malyi kun dinyi kilibkwande.

³²Nunda a dinyi ara dib kubmou dinyi asi asing eibmoubwe ati lak ebmab. Tonda, Er Imtamnyi Kanya Roh Kudus ara Er Imtamnyi biryi nunda Ersi dib tenen nang asi karebmasou Kanya ababyi a dinyi dib eboka lak kimdur,” ebmai.

³³Ebmai ura, sun a uram kekebmai sien nang aryi sun kanya dam aryi yu weik kubmou ci, “A nang asi obkwayeb,” teneboka uram sisingmai.

³⁴Uram sisingmai bok, ninyi tentok Farisinyi si Gamaliel biryi uram ton ebmou. Anyi bira Musa kerek sengna etereramunyi kuramuryok, sun Israel yala nang nirya aryi kisal dangdaminyi kuramwe. Anyi biryi, “A nang asi baitam bobinabmum ba, uram ton ebkun ati,” ebmou.

³⁵Uca, baitam bobinmai ura, Gamaliel biryi sunsi ato ebmou. “Ni kwityabwe Israel yala nang kekebnindarur. Sunci, ‘A nang asi una kubkwayeb,’ tenen diboka teneibdarur.

³⁶Minob talak aryi ninyi tentok si Teudas biryi, ‘Nira sienyi,’ eboka erdamnyi erebdeibdanmou. Erebdeibdanmou ura, ninyi empat ratus baryi ersi milinmai ani, yuk nang aryi ersi obmai ura, er miliramnyi nang yuk-yuk binsekdobmai.

³⁷Ura, a mutuk nang si sekmai talak aryi neiktoto dinyi anabmou. Ara, Galilea mutuknyi si Yudas biryi erdamnyi erebdeibdanmou ura, erci ninyi ilinto asi bokwebminikmou. Ura, yuk nang aryi ersi obmai ura, er milinmai nang neiktoto yuk-yuk binsekdobmai.

³⁸A deyok aryi, niryi sunsi ato ebkwinsin, sunci a nang asi taklobmun ci, malyi kubmunyei. A nang aryi tenen dinyi ab sun ukuraming dinyi ab ara ninyi aryok kurdeirin dinyi kubci ura, a dinyi kum dankwande.

³⁹Ba, a dinyi ara Er Imtamnyi biryi kurdeirin dinyi kubci ura, sunci kum daneibman kum. Ati, sunci, ‘Er Imtamnyi ab obdabibyei,’ tenen a nang asi ur taklobdarur.” Er Gamaliel biryi ato ebmou ba, sun uram sisingmai nang aryi er uram asi kekebmai.

⁴⁰Ara, sunci sun Teleb Uram deyok kouboka eteren nang ara tabwe debmai nang asi naboka sunci sunsi, “Er Yesus si aryi eterena mem,” ebmai ura, tabwe lobdeiboka taklobmai.

⁴¹Ura, sun eteren deyok nang ara sun kanya kilkil kuboka sun Yahudi yala nang sien nang dam aryi binsekmai. Ara, sunci, “Nun Du Yesus biti alyi kubdeibmasing ara nun kanya teleb kubmasir,” tenen binsekmai.

⁴²Ura, uki nirya Bait Allah ai dam wengbindoka sun ninyi yuk-yuk ai ton wengbindoka sunci tanglona kum etereboka Er ninyi Lemsurutnyi si Yesus uram Teleb Uram lak eramnyi.