Read Futuna-Aniwa Kisah Para Rasul 7 Bible Online

Kisah Para Rasul 7 - Futuna-Aniwa bible

Kisah Para Rasul 7

¹Ura, Er Imtamnyi kan ninyi kan noutam kuboka antanirdeirin sienyi Imam Besar biryi er Stefanus bisi ato eboka asibmou. “A nang aryi tatab-tatab ebmakin malyi deyok ara kanci dib kubumwe do kum do?” eboka asibmou.

²Asibmou ba, er Stefanus biryi erbaramnyi libdandoka ato ebmou, “Ni kwityabwe ab ni naiyabwe ab, sunci ni ebkwinsin uram kekebnindarur. Nun aibwe Abraham bira Haran mutuk bina kum kuramuryok, Mesopotamia mutuk tuba kuramwe bok, nun Nai Imtamnyi bira Er si weik enubnyi biryi Erbaramnyi lak kibdandoka nun aibwe ab ebdanmarei.

³Ebdanmarei ba, Er Imtamnyi biryi nun aibwe bisi ato ebmou, ‘Abraham, kanda kan mutuk takloboka kan yala nang asi takbiminyi ura, yuk mutuk ara Niryi kansi eterebkwansin mutuk birum,’ ebmou. (Kejadian 12:1)

⁴Er Imtamnyi biryi ato eboka arukmou ba, er Abraham biryi sun Kasdim nang mutuk si Mesopotamia aryi anaboka Haran mutuk bina kuramwe. Bina kuramwe ani, nun aibwe er nai dibmou ura, Er Imtamnyi biryi nun aibwe bisi a mutuk ara nun ukuryok tuba kuramib mutuk bobinmou.

⁵Bobinmou bok, Er Imtamnyi biryi nun aibwe bisi mitik mutuk mitik wa ababyi kum karebmou. Kum karebmou bok, Er Imtamnyi biryi nun aibwe bisi ato ebdeibmou, ‘Aminda aryi kanci deibminyi mi aryi odei-odei binkwaming nang asi Niryi a mutuk karebkwan.’ (Kejadian 17:8) Er Imtamnyi biryi ato ebdeibmou bok, nun aibwe Abraham mi kumnyi tuba kuramwe.

⁶Ebmou cok, Er Imtamnyi biryi nun aibwe bisi ato ebmou, ‘Kanci yal dakwandim nang ara yuk mutuk yuryibindoka tingyangana nang ato o kubkwaming. O mutuk tuba kubingiryok, sunda o mutuk nang asi arungna nang kubkwaming. Kubkwaming ba, kwalina empat ratus baryi bisibde bok, sun o mutuk nang aryi sunsi mambul weik kubdeibkwaming.

⁷A kan mabwe arukoka mambul weik kubdeibkwaming nang ara Nira Imtamnyi biryi dekoka mambul weik kubdeibkwan. A sirya ura, kan mabwe ara o mutuk aryi anaboka abingiryi, a mutuk yangnyi ura, Nira Imtamnyi si weik ebkwaning.’ (Kejadian 15:13-14)

⁸Er Imtamnyi biryi nun aibwe Abraham bisi ato ebmou cok, Erci ersi ato ebdeibmou. ‘Sal nirya asi den bama sekwandarur. Ara, sunci, “Er Imtamnyi biryi nunsi Er mabwe kibmasir,” tenen den bama sekwandarur.’ Ato eboka Er Imtamnyi biryi nun aibwe Abraham bisi ebdeibmou. Ato kuboka er Abraham biryi er mi Ishak deibmou. Deibmou ura, uki inbaryi kubmou ba, er Abraham biryi er Ishak bisi den bama sekmou. Kuramnyi ani, er Ishak biryi er mi Yakub deibmou. Kuramnyi ani, er Yakub biryi nun aibwe kisok nang mabwe amolbaryi deibmou.

⁹Er Yakub biryi nun aibwe kisok nang asi deibmou ura, sun kanya aryi sun weit Yusuf bisi yu weik kuramwe. Kuramwe uca, sunci sun weit asi taleboka ninyi ati dekmai ura, Mesir mutuk bobinmai. Bobinmai bok, Er Imtamnyi biryi miliboka er Yusuf ab tonkwa kurandei.

¹⁰Kurandei ba, sun ninyi aryi er Yusuf bisi mambul kurdeiriramnyi bok, Er Imtamnyi biryi ersi tuba-tuba lebnin baramwe. Ura, Er Imtamnyi biryi er Yusuf bisi miliramwe ati, sun Mesir nang weik sienyi si Firaun biryi erti, ‘Anyi bira diboka bingnanyi bica, ni kanya teleb kurdeirinanyi,’ tenebmou. Tenebmou ati, er Firaun biryi er Yusuf bisi tikeibmou. Ara, er Firaun biryi er Yusuf bisi, ‘Kanci ni si deib aryi sun Mesir nang asi kalikoka arukdum,’ eboka erci er Yusuf bisi tikeibmou. Tikeibmou cok, er Firaun biryi er Yusuf bisi ato ebtabakmou, ‘Kanci ni ai arungna nang nirya kalikoka arukdum,’ ebmou.

¹¹Kuramnyi ani, kwaning weik atabkalibmou. Ara, Mesir mutuk nirya ab nun mutuk Kanaan ababyi kwaning weik ataramwe uca, ninyi nirya mambul weik kuramnyi. Nun aibwe kisok nang ara Kanaan mutuk kuramnyi bok, yina ababyi kum danaramwe.

¹²Kum danaramwe bok, ninyi aryi er Yakub bisi ato ebmai, ‘Mutuk Mesir aryi gandum du tuba kubmar,’ ebmai. Kekebmou ba, er Yakub biryi nun aibwe kisok asi, ‘Ni mabwe o, sunci anaboka Mesir mutuk bimunyi ura, gandum du deksindarur,’ ebmou. Ura, nun aibwe kisok nang anaboka Mesir mutuk gandum du dengbinmai ani, tamuryanmai.

¹³Ani, liki bitinyi dinyi dengbinmai ura, er Yusuf biryi er duweityabwe asi, ‘Nira Yusuf,’ eboka erbaramnyi lak kibdanmou. Ura, sun Mesir nang weik sienyi Firaun bibabyi er Yusuf yala bikmou.

¹⁴Er Yusuf bira erdamnyi lak kibdanmou ura, erci, ‘Ni nai Yakub bisi bimunyi ura, er ab er mabwe silib nirya ab ara ninyi tujuh puluh lima baryi nirya ni dam yanung,’ ebmou.

¹⁵Ebmou ura, er Yakub ab er mabwe silib ab Kanaan mutuk aryi kuboka Mesir mutuk yuryibina kuramnyi. Kuramnyi ani, er Yakub sirya dibmou. Ura, er mabwe nun aibwe kisok nang ababyi Mesir mutuk kuramnyi ani, dibmai.

¹⁶Er Yakub sirya dibmou ura, er tukwi ara Kanaan mutuk bobindoka Sikhem atei dam asi keil umbura dongobmai. A dongobmai keil dam ara minob ura nun aibwe Abraham biryi dekamwe. Ara, erci sun Sikhem atei kuramnyi Hemor mabwe asi dengna weik dinyi si perak kareboka a keil dam minob dekamwe.

¹⁷Nun aibwe kisok nang dibmai ura, kuramnyi ani, Er Imtamnyi biryi, ‘Niryi er Abraham bisi diboka ebdeianse to, Niryi er yal dakamwe nang asi mutuk Kanaan karebkwan,’ tenebmou. Tenebmuryok, Erci a dinyi kunubkwamwe talak dam kubmou bok, sun Israel yala nang Mesir mutuk tuba kuramiryok, mi yal dakoka baramnyi uca, ninyi mitik kum kuramnyi.

¹⁸Kuramnyi ani, ninyi tentoknyi bira er Yusuf biti walwalnyi bisi tikeibmai ura, erci sun Mesir nang asi kalikoka arungnamwe.

¹⁹A weik sienyi bira amuma eramuryok, nun aibweyabwe asi malyi kubdeibmou. Ara, erci ato eboka arukmou, ‘Sun ukuryok deirin mabwe dibkwaming ati, bai donokdarur,’ eboka arukmou.

²⁰A kuramnyi talak aryi, er Musa bisi deibmarei. Er Musa bira nong urasin iya teleb mi kuamwe. Kuramwe bok, er nai ab er kwin ab ersi bai kum donokmarei. Erda, wala winiryi bisiamwe bok, er nai er kwin ab tonkwa kuramiryok, sunci er Musa bisi mum diniboka kalingnandei.

²¹Kalingnandei ani, sun mi asi baitam deirirbinmarei. Deirirbinmarei ura, sun Mesir nang weik sienyi er nebnyi aryi a mi eibmou. Eibmou ura, erci er Musa bisi er mi kibdobmou.

²²Kibdobmou ura, er Musa nebmou ura, sun Mesir nang aryi sun bikdob dinyi nirya er Musa bisi etereramnyi. Er Musa bira uram sisingna bingnamunyi ton ukuna deyoknyi kuramwe.

²³Ura, kwalina empat puluh baryi sirya bisibmou ura, er Musa biryi er kanya dam aryi, ‘Ni yala nang ara sun Israel yala nang asi dirbinkun,’ tenebmou.

²⁴Dirbinmou ura, Mesir nang tentok aryi Israel yala nang tentok asi malyi kuboka obmou asi erci asing eibmou. Asing eibmou ba, er Musa biryi lebmou cok, er Mesirnyi bira mambul kubdeibmunyi bisi dekmou ci, dib obmou.

²⁵Ura, Musa er kanya dam aryi, ‘Er Imtamnyi biryi ni biriman aryi sun Israel yala nang lebkwande ati, ni kwityabwe bikwaning.’ Ato tenebmou bok, sun Israel yala nang aryi a dinyi bingna kum kubmai.

²⁶Mabmai ani, berekwe ura, er kwityabwe Israel yala nang bitinyi ordanmarei asi asing eibmou. Asing eibmou ba, er Musa biryi, ‘Antanibdeibkun,’ teneboka ato ebmou, ‘Ni kwityabwe, sun nang susuk ordana mem se!’

²⁷Ebmou ba, er kwit bisi malyi kubdeibmunyi biryi, ‘Se, unanyi biryi kansi nun sienyi ab wise uram esin deyoknyi ab tikeibmakir do?’ eboka er Musa bisi dokdonokmou.

²⁸Ebmou cok, erci, ‘Kan ambutum aryi Mesir nang obmumwe to, ukuryok nisi, “Obkun,” tenebmanirim do?’ ebmou. (Keluaran 2:14)

²⁹Ebmou ba, er Musa ilil kuboka bindobmou. Ara, mutuk si Midian bina tingyangananyi kuramwe. Kuramuryok, ner doboka ani, erci mi bitinyi deibmou.

³⁰Ura, kwalina empat puluh baryi sirya bisibmou ani, er Musa Sinai mutuk kon dam ninyi kum kuramnyi mutuk kunmou. Kunmou ba, Er Imtamnyi Uram eryuryangananyi biryi erbaramnyi lak kibdandoka er Musa ab ebdanmarei. Ara, tiling co dam ara uk anmou dam aryi Erci Erbaramnyi lak kibdanmou.

³¹Er Musa biryi asing eibmou cok, ‘Naie, diblilibtinyi,’ teneboka damtoto yanmou ba, Er Imtamnyi biryi ersi ato ebmou.

³²‘Nira Imtamnyi bira kan aibweyabwe Abraham ab, Isyak ab, Yakub ab aryi moloraneinyi kunun,’ ebmou. Er Musa biryi a uram kekebmou ura, ilil weik kuboka er asing dina ilil kubmou.

³³Ilil kubmou bok, Er Imtamnyi biryi ersi ato ebmou, ‘Kan tikmarim ai ara mem ai kubmar ati, kan yan karuk lobdeibdum ati ebman,’ ebmou. (Keluaran 3:5-6)

³⁴Ebmou cok, Er Imtamnyi biryi er Musa bisi ato ebmou, ‘Ni mabwe Israel yala nang ara Mesir mutuk kuraming bok, ninyi aryi sunsi malyi kurdeiriraming asi Niryi diboka asing eiriranse. Tonda, sunci, “Nun kanya mambul weik,” en uram asi Niryi kekeranse. Ati, Niryi, “Ni mabwe asi lebkwansin,” tenen yuryanman. Ati, ukuryok kekebnurum, Niryi kansi Mesir mutuk bokdonokwinkin ati ebman,’ ebmou. (Keluaran 3:7-8)

³⁵Ato eboka Er Imtamnyi biryi er Musa bisi bokdonokmou. Ara, sun Israel yala nang aryi ersi, ‘Unanyi biryi kansi sienyi ab uram wise en deyoknyi tikeibmakir do?’ eamnyi. (Keluaran 2:14) Ato eboka dokdonokamnyi bok, Er Imtamnyi biryi ersi sienyi ab ninyi lemsinanyi ab tikeiboka bokdonokmou. Ara, Er Imtamnyi biryi Er uram eryuryangananyi bira tiling co aryi kuboka lak kibdanmunyi biriman aryi er Musa bisi tikeiboka bokdonokmou.

³⁶Ura, anyi Musa biryi mutuk Mesir bindoka sun Israel yala nang asi lebmou ci, mutuk Mesir aryi kuboka bobinmou. Ara, mutuk Mesir dam aryi ilil tenen dinyi kikniboka aburyi, mekwan si Bi mekwan dam aryi ilil tenen dinyi kikniboka aburyi, tonda ilim mutuk ara ninyi kum kuraming mutuk dam aryi ilil tenen dinyi kikniramwe. Ara, kwalina empat puluh baryi asi ninyi kum kuraming mutuk aryi kuramnyi ba, er Musa biryi ilil tenen dinyi kikniboka sunsi bobinmou.

³⁷Anyi Musa biryi sun Israel yala nang asi ato ebmou, ‘Er Imtamnyi biryi Er uram ebdeibmaca bobananyi bisi sunti tikeibkwansir. Ara, sun kwityabwe kankan aryi kuboka nitonyi bisi tikeibkwansir,’ ebmou. (Ulangan 18:15)

³⁸Anyi Musa bira Er Imtamnyi kan sun ilim mutuk aryi bulubmai nang kan kuboka ninyi bun kuramwe. Ara, Er Imtamnyi Uram eryuryangananyi bira mutuk kon Sinai aryi kuboka ersi uram ebdeibmou ura, er Musa biryi er uram nun aibweyabwe asi ebmurubmou. Anyi Musa bisi Er Imtamnyi Uram kam kurdeirin uram ebdeibmou.

³⁹Ebdeibmou bok, nun aibweyabwe aryi er Musa bisi kum kekeramiryok, sunci sun kanya dam aryi, ‘Mesir mutuk tamuboka bitibyi,’ teneramnyi.

⁴⁰Ato teneramiryok, sunci er Harun bisi ato ebmai, ‘Kanci nunsi menekoka bobinkwansing molon dinyi kiknibdeibsurum. Anyi Musa bira nunsi mutuk Mesir aryi kuboka boyanansunyi bisi una kubmar do? nun walwal,’ ebmai. (Keluaran 32:1,23)

⁴¹Ato ebmai talak aryi sunci sapi mi asi kikniboka sun dama deiboka kwemdina molobmai. Sirya kiknibmai ura, sun kanya kilkil kubmou.

⁴²Kubmou bok, Er Imtamnyi biryi, ‘Ni li,’ teneboka sunsi taklobmou. Taklobmou cok, Er Imtamnyi biryi ‘Sun kanya aryi kwemdina molobkwaming,’ teneramwe ba, sun Israel yala nang aryi sun imtam aryi kuboka kurya ati, ‘Nun kwemdina molon dinyi,’ tenen moloramnyi. Ara, sun Er Imtamnyi Uram ebdeibmaci to lak etereramnyi nang aryi kerek sengna umbura sekmai to, kuramwe. Er Imtamnyi biryi ato ebmou, ‘Sun Israel yala nang se, sunda kwalina empat puluh baryi asi ilim mutuk aryi kurandau bok, domba ton sapi ton asi oboka dama deiriranindau bok, Nisi dama kum deiriranindau.

⁴³Keis ol ai molon ai borandau bok, Ni molon ai asi kum borandau, erda kwemdina si Molokh molon ai borandau. Tonda, kurya kwemdina si Refan borandau sun kiknin dinyi asi molobkwamib tenen borandau. A deyok aryi, Niryi sunsi dam kum mutuk si Babel deici tam yakdonokwansin,’ ebmou. (Amos 5:25-27)

⁴⁴Ato eboka Er Imtamnyi Uram ermururamnyi nang aryi kerek sengna umbura sekmai. Keis ol ai si Kemah Suci ai ara Er Imtamnyi biryi Erbaramnyi lak kimdaramwe ai ara nun aibweyabwe aryi dobmai. Ara, ilim mutuk kuramnyi bok, Er Imtamnyi biryi er Musa bisi kiklina etereboka, ‘A asing eibmarim kiklina ato kiknibdarur,’ ebdeibmou ura, nun aibweyabwe aryi Er Imtamnyi biryi Erbaramnyi lak kimdaramwe aling ai asi dobmai.

⁴⁵Akaling ai ara nun aibweyabwe asi sun aibweyabwe aryi kuboka dobdobmai ura, Kanaan mutuk boyanmai. Ara, er Yosua biryi sunsi menengnamwe bok, Er Imtamnyi biryi sun yuk yala nang asi yangdonongnamwe bok, Kanaan mutuk wengbinmai ba, akaling ai bowengyanmai. Bowengyanmai ani, er sienyi Daud kalingnamwe ba, akaling ai ara Er Imtamnyi biryi Erbaramnyi lak kimdaramwe ai tuba kuamwe.

⁴⁶Anyi Daud bira Er Imtamnyi biryi, ‘Ni kanya teleb kurdeirinanyi,’ teneramunyi kuramwe. Kuramuryok, erci, ‘Er Imtamnyi bira nun aibwe Yakub moloramunyi bisi molon ai dobtinyi,’ tenebmou.

⁴⁷Teneramwe ura, er mi Salomo biryi Er Imtamnyi bisi molon ai dobmou.

⁴⁸Dobmou bok, ninyi aryi kiknin ai ara Er Imtamnyi bun sokon kum kurur ati ebman. Er Imtamnyi Uram ebdeibmaca bobananyi biryi a deyok ati ato eteresurur.

⁴⁹Er Imtamnyi biryi ato ebmar, ‘Im dangna ara Ni bunun sokon kurur. Tukwe dangna ara Ni yan deirin sokon kurur. Ati, unato ai dobmamunyi ura, Nisi kikib kubte do? Isin sebkwan ati, unato ai Nisi kikib kubte do? A dinyi nirya ara Niryok kiknibmase ati ebman.’ (Yesaya 66:1-2) Ato eboka Er Imtamnyi biryi eteresurur,” ebmou.

⁵⁰Ebmou cok, er Stefanus biryi er kekenmai nang ara sun Yahudi yala nang asi uram sengkwetena nang asi ato ebmou.

⁵¹“Sun Er Imtamnyi Uram kekena, ‘Nun li,’ tenen nang se. Sunci Er Imtamnyi Kanya Roh Kudus asi iya dongdonongdarur. Sun aibweyabwe kuramnyi to, sunbabyi neiktoto kundarur.

⁵²Sun aibweyabwe aryi sun Er Imtamnyi Uram ebdeibmaci to lak etereramnyi nang nirya ati, ‘Obtibyi,’ tenen domyangaramnyi. Tonda, sun, ‘Er Iya Telebnyi yankwande,’ eramnyi nang asi oramnyi. Ura, ukuryok ara sunci Er yankwamwe Iya Telebnyi bisi kikibmandau ci, ninyi on nang kibmandau.

⁵³Sunda Er Imtamnyi ebdeibsou uram eryuryangan nang biriman aryi dobdobmandau bok, sunci a uram asi kekena kum kurandum,” Stefanus biryi ebmou.

⁵⁴Er Stefanus biryi ato ebmou bok, sun Yahudi yala nang uram sengkwetena nang ara sun kanya yu weik kubmou.

⁵⁵Yu weik kubmou bok, er Stefanus bira Er Imtamnyi Kanya Roh Kudus langkibmounyi biryi imtam dibwelebmou. Dibwelebmou cok, erci Er Imtamnyi milil ab Er imtam welebinmounyi Yesus bira Er Imtamnyi siriktam tikmounyi ab asi asing eibmou.

⁵⁶Asing eibmou ba, erci ato ebmou, “Naie, imtam umbura dinyi asing eibman. Ninyi Daunyi bisi asing eibman. Erda Er Imtamnyi siriktam tingdur ati ebman,” ebmou.

⁵⁷Er Stefanus biryi ato ebmou bok, sun Israel yala nang asi uram sengkwetena nang aryi, “A uram kekena nun li,” tenen uram weik doboka sun o kinikmai. Ura, sun nirya aryi er Stefanus dam cung binmai.

⁵⁸Ura, sunci ersi taleboka ai aryi kuboka yakdonokmai cok, keil aryi yongobdongobnin banmai. Sun tatab-tatab ebmai nang aryi er Stefanus bisi keil aryi kum yongobdongobnin banmai cok, sunci sun alib ongon aling kwiribloboka kamnyi tentok si Saulus bisi, “Nun alib ongon aling asi kaliksurum,” eboka deiblobmai.

⁵⁹Ura, sunci er Stefanus bisi keil aryi yongobdongobmai bok, er Stefanus biryi naboka, “Yesus ni Du, ni dibkun ati, Kanci ni kanya dobnurum!” ebmou.

⁶⁰Ebmou cok, er Stefanus biryi er kutam ikoka uram weikanun eboka, “Nai o, a nang ara nisi malyi kuboka obmaning bok, Kanci sun malyi kun dinyi kilibdum.” Ato eboka er Stefanus dibmou.