Read Futuna-Aniwa Kisah Para Rasul 8 Bible Online

Kisah Para Rasul 8 - Futuna-Aniwa bible

Kisah Para Rasul 8

¹Er Stefanus dibmou bok, er Saulus bibabyi neik dam tikoka, “Anyi bisi obmang ara teleb,” tenebmou. A talak aryi sun ninyi aryi sun Yerusalem atei aryi kuboka dib tenen nang ati, “Ingkirikoka obtibyi,” tenen diboka domyanganmai. Uca, sun Er Imtamnyi bisi dib tenen nang nirya ara dantam-dantam binsekoka Yudea mutuk ton Galilea mutuk ton binsekmai. Binsekmai bok, sun Teleb Uram deyok kouboka eteren nang ara Yerusalem atei tuba kuramnyi.

²Ba, er Stefanus dibmou tukwi ara Er Imtamnyi bisi boukwe kuramnyi nang mikbaryi aryi boboka keil umbura dongobmai. Dongobmai ba, sunci, “Nun nai dibmar se,” eboka engena weik engebmai.

³Engena weik engenmai bok, er Saulus biryi sun dib tenen nang asi mambul weik kurdeiriramwe. Ara, erci sun ai yuk-yuk wengbindoka sal ab nerabwe ab taleboka ninyi wenen ai asi bodongorbinmou.

⁴Bodongorbaramwe bok, sun dantam-dantam binsekmai nang aryi yibindoka Er Imtamnyi Uram Teleb Uram etererbaramnyi.

⁵Er Filipus bibabyi Yerusalem atei aryi binamuryok, Samaria atei yanmou ura, erci sun Samaria atei nang asi Er Imtamnyi biryi wibmou ninyi Lemsurutnyi biti lak etereramwe.

⁶Etereramuryok, ilil tenen dinyi kikniramwe bok, sun Samaria atei nang nirya aryi er Filipus biryi etereramwe uram dib tenebmai.

⁷Ara, er Filipus biryi sun isa wekamwe nang asi kweteramwe ba, isa ara uram weik doboka anabindobmai. Tonda, sun yibinman kum nang ab ton sun yan camdiramnyi nang ab asi erci kweteramwe.

⁸Kweteramwe uca, sun akatei nang sun kanya teleb kubmou.

⁹A talak ara ninyi tentok si Simon Samaria atei aryi kuramwe. Anyi bira kwemdina si siboka ilil tenen dinyi kikniramwe. Kikniramuryok, erci, “Nira mikib weiknyi kunun,” eramwe uca, sun Samaria nang nirya aryi ilil kuboka, “Naie talinyi,” teneramnyi.

¹⁰Ara, sun ur nang ab sun weik nang ababyi er Simon bisi dib teneramiryok, sunci uram weik doboka “Anyi bira Er Imtamnyi mikib weik kikninanyi kurur,” eramnyi.

¹¹Ura, anyi biryi kwemdina si siboka ilil tenen dinyi kikniramwe uca, ninyi nirya aryi, “Naie talinyi,” teneboka ersi miliramnyi.

¹²Miliramnyi uca, er Filipus biryi Teleb Uram etereboka sunsi, “Ninyi nirya aryi Er Imtamnyi biryi arungsurur to milina teleb,” ebmou. Ebmou cok, erci sunsi Er Yesus bira Er Imtamnyi wibmou ninyi Lemsurutnyi si lak eterebmou. Eterebmou ura, sun Samaria nang aryi er Filipus uram dib tenebmai ura, erci sunsi me dongobmou. Ara, sal babyi nerabwe ababyi erci me dongobmou.

¹³Ura, er Simon bibabyi Teleb Uram dib tenebmou ura, er Filipus biryi Simon bibabyi me dongobmou. Me dongobmou ura, Simon bira Filipus ab tonkwa iya kuboka erci Filipus biryi kikniramwe dinyi ara Er Imtamnyi si weik kurdeirin dinyi ab ilil weik tenen dinyi ab asi liliboka dinmou. Dinmou ba, erbabyi, “Naie talinyi,” tenebmou.

¹⁴Kunmai ani, sun Yerusalem atei kuramnyi Teleb Uram deyok kouboka eteren nang aryi a kuramnyi to deyok kekebmai. Ara, ninyi aryi sunsi, “Sun Samaria nang aryi Er Imtamnyi Uram dobdobmang,” ebmai. Kekebmai ba, sun Teleb Uram deyok kouboka eteren nang aryi er Petrus ab Yohanes asi, “Samaria atei bindoka dibdurum,” eboka bokdonokmai.

¹⁵Sirya binmarei ura, sunci Er Imtamnyi bisi, “Nai Imtamnyi, Kanci a nang asi Kan Kanya Roh Kudus karebdum,” eboka molobmilibmarei.

¹⁶A tum ara Er Imtamnyi biryi Er Kanya Roh Kudus sun Samaria nang asi minob kum karebmou ati, er Petrus ab Yohanes ab aryi ato eboka molobmilibmarei. Er Filipus biryi sunsi nun Du Yesus si deib aryi me dongobmou bok, Er Imtamnyi Kanya Roh Kudus sun dam kabul yuryanmou.

¹⁷Molobmilibmarei ura, sunci sun taruk asi sun Samaria nang deici tam deibmarei bok, Er Imtamnyi Kanya Roh Kudus sun Samaria nang kanya dam wekmou.

¹⁸Ura, er Simon biryi a dinyi asi asing eibmou ba, erci Petrus ab Yohanes ab asi, “Dengna karebkwinsin,” ebmou.

¹⁹Ara, erci sunsi, “Sunci nibabyi a mikib karebnururum ba, niryi unanyi-unaner deici tam ni taruk deibmanyi ura, anyi-aner aryi ni taruk biriman Er Imtamnyi Kanya Roh Kudus dobdobte,” eboka molobmou.

²⁰Molobmou ba, Petrus biryi ersi, “Kan ab kan co bok ab iya waningminingna teleb se. Kanci, ‘Er Imtamnyi karena ati, “Co bok aryi dektinyi,” tenebmarim ati, se,’ ebmakin.

²¹Kan kanya ara udikum kum kurankir bok, kanda Er Imtamnyi bisi diboka kum milirandim ati, Er Imtamnyi biryi Er mikib kansi kum karebkwankir.

²²Ati, kanci a malyi tenebmarim dinyi takloboka Er Imtamnyi bisi, ‘Ni malyi teneran dinyi ara Kanci kilibnurum,’ eboka molobdum.

²³Kan kanya ara mita sik weik dabmakir ba, kan malyi dinyi kansi diboka talekurur ati eibmakin,” ebmou.

²⁴Er Petrus biryi ato eboka kerebmou ba, er Simon biryi, “Sunci Er Imtamnyi bisi molobmilibnururum. Sunci nisi submanurum uram kum kunubkwanir ati molobmilibnururum.” Ato eboka er Simon biryi Petrus ab Yohanes ab asi molobmou.

²⁵Ura, Petrus ab Yohanes ab aryi Er Imtamnyi Uram asi lak eterebmarei ura, sunci anaboka Yerusalem atei tamuboka binmarei. Tamuboka banmarei cok, sunci Samaria mutuk aryi kuboka mitik atei yibindoka Teleb Uram eterebde baramnyi.

²⁶Ura, Er Imtamnyi Uram eryuryangananyi biryi Filipus bisi ato ebmou. “Filipus, kanda anaboka me youkwa tam birum. Ara, Yerusalem atei aryi kuboka Gaza atei yurbaraming bisik asi birum. A bisik ara lo bisik ati ebmakin,” ebmou.

²⁷Ebmou ura, Filipus biryi anaboka Er Imtamnyi Uram eryuryangananyi nukmou bisik yurbanmou. Yurbanmou cok, erci Etiopia mutuk sienyi tentok asi asing eibmou. Anyi bira Etiopia mutuk sien ner si Kandake er taleramwe co bok nirya asi kalingnamunyi kuramwe. Kuramuryok, erci Er Imtamnyi si weik ebkwamwe ati, Yerusalem yanmou ura, tamurbanmou.

²⁸Tamurbanmou ba, er kereta ara kuda aryi bobaramwe dinyi deici bukmou ci, erci Er Imtamnyi Uram ebdeibmaca bobaramunyi si Yesaya biryi kerek sekamwe to nungmou.

²⁹Nungmou bok, Er Imtamnyi Kanya Roh Kudus aryi Filipus bisi, “Kanda a kereta deici bukmaranyi dam birum,” ebmou.

³⁰Ebmou ura, Filipus er dam binmou ura, anyi bira nabi Yesaya biryi kerek sekamwe to nungmou asi kekebmou. Kekebmou cok, Filipus biryi ersi, “Nai, kanci nungmarim deyok asi diboka bikmarim do?” eboka asibdenmou.

³¹Asibmou ba, anyi biryi, “Ni diboka kum bikman. Ara, ninyi aryi nisi eterenina kum aryi, ni a nungman uram deyok ara kum bikman,” ebmou. Ebmou cok, erci Filipus bisi, “Ni kwit, ni dam buryandoka eterebnurum,” ebmou.

³²Anyi biryi nungmou uram ara er Yesaya biryi ato kuboka sekamwe, “Ninyi aryi on dam bobanmang domba ara bimna kum kurande to, Anyi bibabyi neiktoto kubmou. Tonda, mitik domba ara ninyi aryi otong sekingnyi domba ara bimna kum kurande to, Anyi bibabyi neiktoto kubmou. Ara, ninyi aryi Anyi bisi obkwamai ba, Erci uram ton kum doboka, ‘Ni li,’ kum ebmou.

³³Ninyi aryi Ersi luknubdeibmai cok, Ersi kikib kum to kubyi. Anyi bira ninyi aryi oboka kum daneibyi ati, Er yala nirya kum dandobwe,” sekamwe. (Yesaya 53:7-8)

³⁴Nungmou ura, er Etiopia sienyi biryi Filipus bisi, “Ni kwit, kanci nisi eterebnurum. Ara, unanyi biti nabi Yesaya ato kerek sekamwe do? Ara, er Yesaya biryi erdamnyi ati kerek sekdanmou do? Yuknyi biti kerek sekmou do?”

³⁵Asibmou ba, er Filipus biryi ersi eterebkalibmou. Ara, a lilinmarei uram aryi kuboka erci Etiopia sienyi bisi Er Yesus bisi lak kiboka Teleb Uram eterebmou.

³⁶Uram sisikde banmarei ani, me ton eibmarei ura, sienyi biryi, “Me a kubmar ati, kanci nisi me dongobnutum tenebman ati, ur do mem do?” asibdenmou.

³⁷Asibmou ba, Filipus biryi uram doboka ersi ato ebmou, “Nai, kanci Er Imtamnyi bisi diboka dib tenebminyi ura, ur me dongobkwinkin,” ebmou. Ebmou ba, Etiopia sienyi biryi ato ebmou, “Er Yesus Kristus bira Er Imtamnyi Mi kurur ati, dib tenenun ati, kanci nisi me dongobnurum,” ebmou.

³⁸Ebmou cok, er kereta bonanyi bisi, “A tikwayeb,” eboka, Filipus ab sienyi ab kereta deici aryi sakweteboka me burukoka tingbinmarei ura, er Filipus biryi Etiopia sienyi bisi me dongobmou.

³⁹Me umbura aryi anamyangarei uca, Filipus lukdandoka kum dandobmou. Ara, Er Imtamnyi Kanya Roh Kudus aryi ersi boboka yuk mutuk bobinmou. Bobinmou ba, Etiopia sienyi er kanya kilkil kuboka er mutuk bindobmou.

⁴⁰Ba, er Filipus bira Er Imtamnyi Kanya Roh Kudus aryi Asdod atei bobinmou. Ura, akatei aryi kuboka a mutuk doramnyi atei nirya bindoka Teleb Uram eterebde banmou ani, Kaisarea atei yanmou.