Read Futuna-Aniwa Roma 10 Bible Online

Roma 10 - Futuna-Aniwa bible

Roma 10

¹Ni kwityabwe. Ni yala nang Israel yala nang ilinto ara nun Du Yesus biti dib kum tenenung ati niryi sunti bico tenenun cok, “Er Imtamnyi biryi lebdeibte se,” tenen diboka molormilibde banun.

²Ni yala nang Israel yala nang ara busul kanya boboka, “Er Imtamnyi Uram kunubde binkwayeb,” tenen kuraming ati ebman. Ato tenen kuramingiryok, sunci Er Imtamnyi biryi lak kimsurur dib en uram diboka kum bingnung ati ebman.

³Ati, sunci, “Er Imtamnyi biryi kisal dakoka malyi kun nang asi muna dororur,” tenen kum bingnaming. Erda, sunci, “Nunci Er Imtamnyi biryi arungdeirisin uram kunubibyi uca, Er Imtamnyi biryi nunsi dobdobkwansir,” tenen teneraming. Ato tenen ukurderamingiryok, sunci Er Imtamnyi biryi, “Ni mabwe nermabwe,” eboka dorosina uram ati, “Nun li,” tenen dongdonongnaming.

⁴Nun Du Kristus yuryandoka sirya lebdeibmasou ati nunci Er Imtamnyi arungdeirisin uram kunubde barantibyi deici aryi Er Imtamnyi biryi nunsi tuba kum dobdobkwansir. Erda, nun Du Yesus biryi lebdeibmasou uca, nun Nai Imtamnyi biryi sun nun Du Yesus bisi dib teneramingnyi nang nirya ati, “Ni mabwe nermabwe,” tenen dorosurur ati ebman.

⁵Er Imtamnyi arungdeirisin uram kununa deici aryi Er Imtamnyi biryi nunsi kum dorosurur. Nun aibwe Musa biryi a deyok ati ato eboka kerek sekeibmou. “Unanyi-unaner ara a arungdeirisin uram nirya diboka kunurantingnyi uca, a nang ara kam kun dinyi dobdobting,” sekeibmou. (Imamat 18:5)

⁶Ba, Er Imtamnyi biryi nun Du Yesus bisi dib tenena deici aryi dorosurur. Ati, Er Imtamnyi biryi nunsi dib tenena deici aryi sirya dobdobmasou ati, nunci ato eboka lak eramib. “Sunci sun kanya dam aryi, ‘Unanyi biryi imtam welebte uca, nun Du Yesus Kristus lemsina uram esurutnyi bisi nun dam boyuryansute do?’ tenebmunyei.”

⁷Tonda, sunci, “Unanyi biryi ilila mutuk kon amwetam asi yurbite uca, nun Du Yesus Kristus lemsina uram esurutnyi bisi kam kubdeibsute uca, nun dam boweleyasute do?” tenebmunyei.

⁸Ba, nunda Er Imtamnyi biryi dobdobmasou nang ara ato eboka lak enub. “Er Imtamnyi biryi lemsina uram ara nun dam kusurur. Er Imtamnyi biryi a uram karebmasou uca, nunci a uram asi silalum deici eramibiryok, nun kanya dam aryi teneiriramib.” Ati, nunci a uram ara nun Du Yesus bisi dib tenen uram ati, “Dib en uram akwe,” eboka lak eramib.

⁹Ati, sunci, “Yesus bira Iya Erebdobnyi kurur,” lak ebmun ci, “Er Imtamnyi biryi nun Du Yesus dibmou asi kam bukeibmou,” tenen dib tenebmunyi uca, Er Imtamnyi biryi sunsi lebdeibkwansir.

¹⁰Nunci nun kanya dam aryi nun Du Yesus bisi dib tenebibyi uca, Er Imtamnyi biryi nunti, “Ni mabwe nermabwe,” tenen dosurur ati ato ebman. Tonda, nunci ninyi urasintam aryi nun Du Yesus deyok ati dib en uram lak ebibyi uca, Er Imtamnyi biryi nunsi lebdeibkwansir. [1]

¹¹Ara, Er Imtamnyi Uram umbura aryi a deyok ati esurur to ara dib en uram akwe kurur. “Unanyi-unaner ara Anyi bisi dib tenebmangnyi asi Er Imtamnyi biryi alyi kum kibdeibkwansir.” (Mazmur 28:16)

¹²Ati, sun Yahudi yala nang kankan dib tenen nang ababyi, sun Yahudi yala kum nang kankan dib tenen nang ababyi, Er Imtamnyi biryi alyi kum kibdeibkwansir. Sun Yahudi yala nang ton, sun Yahudi yala kum nang ton, ara yuk-yuk kum kurur ati ebman. Nun Nai bira Iya Erebdobnyi kurur cok, nunda im dangna tukwe dangna nang nirya asi arungdeirisur ci, Erci sun Ersi namnamingnyi nang nirya asi langdeiboka kisal dangsurur.

¹³Er Imtamnyi Uram ara a deyok ati ato eboka eteresurur. “Unanyi-unaner ara Er Iya Erebdobnyi si namnamingnyi uca, Er Imtamnyi biryi lebdeibkwansir.” (Yoel 2:32)

¹⁴Ati, sun dib tenen kum nang aryi Er Imtamnyi si nabkwaming do? Ato tenen kum. Tonda, Er Imtamnyi Uram keken kum nang aryi Ersi dib tenebkwaming do? Ato tenen kum. Tonda, Teleb Uram eterebde ban nang Teleb Uram kum eterebting uca, sunci Er Imtamnyi Uram kekebting do? Ato tenen kum.

¹⁵Tonda, Er Imtamnyi biryi “Dib en uram lak ebdarur,” kum ebte uca, sun dib en uram lak en nang aryi dib en uram lak ebkwanting do? Ato tenen kum. Er Imtamnyi Uram umbura aryi a deyok ati ato esurur, “Sun Teleb Uram bobde yangan nang ara Teleb Uram bobde yangangnyi ba, sun uram keken nang kanya ara kilkil weik kurande.” (Yesaya 52:7)

¹⁶Ba, sun Israel yala nang ara Teleb Uram kekebmai cok, sun kankan aryi ninyi nirya ara a uram kum dobdobmai. Ati, nabi Yesaya biryi ebmou to, sirya kunubmou. Ara, Yesaya biryi ato ebmou, “Nai Iya Erebdobnyi, nun lak eramib dib en uram asi unanyi-unaner aryi dib tenebmai do?” ebmou. (Yesaya 53:1a)

¹⁷Ati, lemsina uram kekeramib deici aryi nun dib tenen dinyi doronub. Tonda, nun Du Yesus Kristus uram Teleb Uram biriman aryi nunci lemsina uram kekenub.

¹⁸Ati, niryi asirdena ton asibdenkwan. Sun Israel yala nang ara lemsina uram amol kum kekebmai darib? Ato tenen kum. Lemsina uram sirya kekeramiryok, sunci, “Nun li,” tenen dokdonokmai ati ebman. Er Imtamnyi Uram umbura aryi a deyok ati ato ebmou, “Dib en uram ara im dangna tukwe dangna nang nirya aryi kekebmai. Mutuk sirya kobdob dam kuramingnyi nang ababyi a uram sirya kekebmai,” ebmou.

¹⁹Ura, niryi asirdena ton tuba asibdenkwan. Sun Israel yala nang ara a uram sirya kekeramiryok, sunci a uram deyok asi diboka kum bikmai darib? Ato tenen kum. Sun Israel yala nang ara lemsina uram deyok bikmai cok, sunci a uram asi dokdonokmai. Nun aibwe Musa biryi sun Israel yala nang ati ato ebmou. “Nira Imtamnyi biryi karebnyi uca, yuk yala nang ara lemsina uram bikwaming ati, sunda yu kanya boboka, ‘Se,’ tenebkwandum. Niryi karebnyi uca, sun dib en uram ati walwal kuramnyi nang ara dib en uram bikwaming ati, sun kanya tin kubkwansir,” ebmou. (Ulangan 32:21)

²⁰Tonda, nabi Yesaya biryi ilil kuna kum kanya boboka a deyok ato-ato ebmou. “Nun Nai Imtamnyi biryi ato ebmou, ‘Sun Nisi kum ingkiringnaning nang ara Nisi dobdobkwaning. Sun Nisi kum moloraning nang asi Niryi Nidamnyi lak kibdeibdankwan,’” ebmou.

²¹Ba, sun Israel yala nang ati Erci ato ebmou. “Niryi, ‘Ni dam yandarur,’ eboka tuba-tuba namnanse bok, A nang ara kat kanya boramingiryok, Ni uram ati, ‘Kununa nun li,’ tenen Ni dam kum yanganung,” ebmou. (Yesaya 65:1-2)