Read Futuna-Aniwa Roma 11 Bible Online

Roma 11 - Futuna-Aniwa bible

Roma 11

¹Ura, niryi asirdena uram ton asibdenkwan. Nun Nai Imtamnyi biryi sun Israel yala nang ati, “Ni mabwe nermabwe,” tenen minob dobdobmou ani, ukuryok aryi, “Ni li,” tenen dokdonokmar darib? Ato tenen kum. Er Imtamnyi biryi nun kankan aryi ninyi ilinto asi dokdonokmou cok, yuk nang asi tuba dorosurur ati ebman. Ni Paulus bibabyi Israel yala nang kunun asi Er Imtamnyi boukwe dam kunanyi tuba kunun. Abraham bira ni aibwe kisok kurur ba, nira Israel mi Benyamin yalanyi kunun.

²Er Imtamnyi biryi, “Ni mabwe nermabwe kibdeibkwan,” tenen minob wibdeibsou nang asi ukuryok kum dokdonokmasir ati ebman. Er Imtamnyi Uram umbura aryi nabi Elia biti eteresurur to kum bikmarum do? Nabi Elia biryi, “Sun Israel yala nang nirya aryi Er Imtamnyi bisi taklobmang se,” tenebmou cok, erci Er Imtamnyi urasintam aryi sun Israel yala nang ati ato eboka tatab-tatab ebmou.

³“Nai Iya Erebdobnyi, sun Israel yala nang ara Kansi takloboka Kan kunubkwandim dinyi ebdeibmaci to lak etereramnyi nang asi sirya obkiribmang. Tonda, Kanda Imtamnyi bisi dama deirin dam keil lamna dam nirya asi dakmang. Sun Kan uram minob bikoka ermururamoubwe nang kankan aryi ni tikwe kam tuba kubman. Yuk nang nirya asi sirya obkiribmang ani, sunci nibabyi ati, ‘Obkwayeb,’ tenen domkiringmaning.” (1 Raja 19:10, 14)

⁴Nabi Elia biryi ato ebmou bok, Er Imtamnyi biryi uram dekeiboka ato ebmou. “Sun Israel yala nang kankan aryi ninyi yana yubwa aryi Nisi taklobmanei bok, Niryi karebmase uca, ninyi tujuh ribu baryi Nisi tuba milinunung. A nang ara kutam ingdongona kum uca kwemdina si Baal kum milinung,” ebmou. (1 Raja 19:10, 18)

⁵Ura, ukuryok ababyi neiktoto sun Israel yala nang kankan aryi ninyi yana yubwa aryi Er Imtamnyi biryi lemsina uram dib kum tenenung cok, ton nang aryi Er Imtamnyi Uram dib tuba tenenub. A nang ara nun Nai Imtamnyi biryi, “Ni mabwe nermabwe,” tenen wibdeibsou uca, lotok miningna nang ato kuboka Er Imtamnyi bisi tuba milinub.

⁶Er Imtamnyi biryi ninyi wimdeirisurur ara nunci teleb dinyi kunuramibyi deici aryi wimdeirisur do? Ato tenen kum. Erda, nun Nai biryi, “Ni mabwe nermabwe,” tenesurur deici aryi muna wimdeirisurur. Nun teleb dinyi kunuramibyi deici aryi wibdeibsute uca, Erci, “Ni mabwe nermabwe,” tenena deici aryi muna kum wibdeibsute.

⁷Ati, nunci una ebkwayeb do? Sun Israel yala nang kankan aryi ninyi ilinto aryi busul kanya boboka, “Nunci teleb dinyi kunubibyi uca, Er Imtamnyi biryi nunsi dobdobsute,” tenen ingkiringnamnyi bok, Er Imtamnyi biryi sunsi kum dobdobmou. Erda, Er Imtamnyi karebmou uca, a nang kanya kat kibmou uca, Er Imtamnyi lemsina uram dib kum teneramnyi. Ba, sun Israel yala nang kankan ton nang asi Er Imtamnyi biryi dobdobmou. A nang ara Er Imtamnyi biryi minob wibdeibsou nang ati Er Imtamnyi biryi, “Ni mabwe nermabwe,” tenen muna dobdobmou.

⁸Ara, Er Imtamnyi Uram umbura aryi sun kat kanya bon nang ati eteresurur to sirya kunubmou. “Er Imtamnyi biryi karebmou uca, a nang ara wi mana bon kanya boramingiryok, dib en uram diboka kum bingnung. A nang ara asing boramingiryok, asing kun nang ato kunung. A nang ara amol boramingiryok, amol kiningna nang ato kunung. Minob aryi kuboka ato kuramnyi ani, ukuryok ababyi kat kanya tuba bonung.” (Ulangan 29:4)

⁹Tonda, nun aibwe Daud biryi a nang ati ato ebmou. “A nang ara kilkil kanya boboka kwalibde baraming asi Kanda Imtamnyi biryi lukdandoka wenena teleb. A nang aryi mangkau kanya boraming asi Kanci sakeiboka wenen dinyi kikiman karebtum.

¹⁰A nang ara asing boraming asi Kanci asing kubdeibtum. A nang ara yuk tingna nang kuraming asi Kanci sunsi yuk nang aryi arukmangnyi tok ikin wa iraming nang ato iya kibdeibtum.” (Mazmur 69:21-22)

¹¹Ati, niryi asirdena tubto asibdenkwinsin, sun Israel yala nang kankan aryi ninyi yana yubwa aryi nun Du Yesus uram Teleb Uram dib kum teneraming ati, Er Imtamnyi biryi sunsi tamuboka kum dobdobte do? Ato tenen kum. A kat kanya bon nang ababyi Er Imtamnyi biryi tamuboka dobdobte. Sun Israel yala nang aryi kat kanya boboka Er Imtamnyi biti, “Nun li,” teneramnyi deyok aryi, Er Imtamnyi biryi a nang asi tiya tanglorandiryok, sun yuk yala nang ara Er Imtamnyi Uram walwal kuramnyi nang asi lebdeibde barur ati ebman. Ara, sun Israel yala nang aryi lungdana kanya boboka, “Sun yuk yala nang lebdeibde barur se,” tenen, “Nunbabyi neiktoto lebdeibsute,” tenebkwaming ati Er Imtamnyi biryi sun yuk yala nang asi lebdeibde barur.

¹²Sun Israel yala nang kankan aryi ninyi yana yubwa aryi Er Imtamnyi bisi taklobmai uca, Er Imtamnyi biryi sun Israel yala nang asi tiya tanglorandiryok, sun im dangna tukwe dangna aryi kuboka yuk yala nang asi langdeiboka kisal dangnande. Ura, sun Israel yala nang kankan aryi ninyi yana yubwa aryi danguboka Er Imtamnyi lemsina uram tubto dib tenebingnyi uca, Er Imtamnyi biryi sun Israel yala nang asi langdeiboka kisal daktabakdiryi, sun yuk yala nang ababyi langdeiboka kisal daktabakwande.

¹³Ura, ni Paulus biryi sunda Israel yala kum nang asi uram ton ebkwinsin. Er Imtamnyi biryi, “Sun yuk yala nang asi Teleb Uram eterebde birum,” eboka takubdeibnou ati, niryi a wa asi busul kuboka kunubde banun.

¹⁴Ati, niryi sunda yuk yala nang asi nun Du Yesus uram Teleb Uram eterebde banun cok, niryi, “Ni yala nang Israel yala nang aryi ni wa ibde banun to asing eibingnyi uca, sunbabyi nun Du Yesus bisi milibting,” tenen Teleb Uram eterebde banun. Ati, ni yala nang lungdana kanya boboka, “Nunbabyi neiktoto Er Imtamnyi biryi lemsin dinyi dobdobtibyi, se,” tenebkwaming ati, niryi sun yuk yala nang asi Teleb Uram eterebde banun.

¹⁵Er Imtamnyi biryi sun Israel yala nang asi tiya dokdonokmou cok, Erci ilil tenen dinyi kikniboka sunda yuk yala nang ab antanibdeibdanmarum ati ebman. Ura, Er Imtamnyi biryi aminda aryi sun Israel yala nang kankan aryi yana yubwa nang asi, “Ni mabwe nermabwe,” tenen tubto dobdobkwande ara tabakoka iya ilil tenen dinyi kubkwande. A dinyi ara din nang asi kam burdeirin dinyi ato kubkwande.

¹⁶Roti yuma kiknin dinyi ara Er Imtamnyi bisi dama deiriraming ati, Er Imtamnyi biryi a roti ati, “Teleb dinyi,” tenerande uca, neik talbalin dinyi aryi doboka aminda aryi kiknibkwaming roti nirya ababyi Er Imtamnyi urasintam aryi teleb dinyi kurur. Tonda, co deyok ara teleb akwe kubci uca, co te yuk-yuk ababyi teleb akwe kubkwande. Ara, sun Israel yala nang aibweyabwe Er Imtamnyi bisi dam kun nang kuramnyi deyok aryi, Er Imtamnyi biryi sun yal dangna nang dib tenen kum nang ababyi, “Ni dam kun nang,” tenerur.

¹⁷Ura, ukuryok ara Er Imtamnyi biryi Israel yala nang ilinto asi dokdonokmar. Ara, nun Nai biryi zaitun co te mikbaryi bulakeiboka sekmou ci, bai donokmar. Zaitun co te diba ati ato kum ebman. Erda, sun Israel yala nang ati kebdeiboka ato ebman. Ura, sunda yuk yala nang Er Imtamnyi Uram walwal kurandau nang ara teleb co zaitun co te kum kurandau. Erda, bai kurande malyi co aryi kuboka co te ato kurandau. Ato kurandau bok, Er Imtamnyi biryi sunsi touboka teleb co zaitun co nong deyok dam asi makdongobmasir. Zaitun co te yuk co te kankan aryi makdongobmasir uca, zaitun co deyok tam aryi kuboka teleb co yung biriman aryi du mouriransir.

¹⁸Ura, sunci sundamnyi erebdandoka, “Nunda diboka teleb co te ato kunub,” ebmunyei. Tonda, sunci sun Israel yala nang ati, “Co te bulakeiboka bai donokmar,” tenen ina ngilikmunyei. Sun Israel yala nang ara Er Imtamnyi biryi kisal dangsin dinyi sunsi likniboka kareransing deyok aryi, co nong ato nang kunung. Ba, sunda yuk yala nang ara Er Imtamnyi biryi kisal dangsin dinyi likniboka dororandum ati, co te ato nang kurandum. Ati, sunda co te ato nang aryi co nong ato kun nang ati malyi ebmunyei. Co te ara co deyok borande do? Ato tenen kum. Erda, co deyok ab co nong ab ara co te asi borande.

¹⁹Ura, sunci nisi ato ebnindate. “Er Imtamnyi biryi co te yuma dinyi bulakeiboka sekmar ara nunda yuk yala nang asi aminda aryi co nong dam makdongobkwansou ati bulakeiboka sekmar.”

²⁰Sunci diboka ebmarum bok, ererdan kanya bobmunyei. Sun Israel yala nang ara nun Du Yesus bisi dib kum teneramnyi deyok aryi, Er Imtamnyi biryi sunsi bulakeiboka sekmar. Ba, Er Imtamnyi biryi karebsou uca, sunda yuk yala nang ara katabum eboka nun Du Yesus bisi dib tenerandum. Ati, sunci ererdan kanya bobmunyei. Erda, “Nunbabyi neiktoto bulakeiboka seksicei,” tenen ilil kanya bobdarur.

²¹Sun Israel yala nang ara zaitun co te diba ato kuramiryok, Er Imtamnyi bisi taklobmai asi Er Imtamnyi biryi kum lebdeibmou. Ati, sunda zaitun nong dam makdongobmasou co te ato kurandum cok, Er Imtamnyi bisi taklobtum uca, Er Imtamnyi biryi sunsi lebdeibsute do? Ato tenen kum.

²²Nun Nai Imtamnyi bira ninyi dosurutnyi bibabyi malyi kun dinyi diboka wenesurutnyi bibabyi kurur ati sunci tenebdarur. Sun Israel yala nang aryi Ersi taklobmai asi Er Imtamnyi biryi diba ati wenebmou. Ba, sunda yuk yala nang ara asi Er Imtamnyi biryi muna dobdobmasou. Ati, sunci tanglona kum uca Er Imtamnyi bisi dib tenebmunyi uca, Er Imtamnyi biryi sunsi tanglona kum uca dorosurur. Ato kum kubdate ura, Er Imtamnyi biryi ya sektaleboka sunbabyi neiktoto bai donoksute.

²³Ura, sun Israel yala nang ara dib kum teneramnyi ani, tubto dib tenebingnyi uca, Er Imtamnyi biryi sunbabyi co nong tam asi tamuboka makdongobkwande. Nun Nai Imtamnyi bira iya mikibnyi kurur ati, Erci sun Ersi taklobmai nang asi Er dam kun nang tamuboka kibdeibkwande ati mikib kurur ati ebman.

²⁴Sunda yuk yala nang ara bai kankan aryi kuboka malyi co zaitun co te ato kurandau asi Er Imtamnyi biryi sunsi doboka atei dam kurande teleb zaitun co nong asi makdongobmasou. Ura, sun Israel yala nang ara atei dam kurande teleb co zaitun co te ato kuramnyi asi Er Imtamnyi biryi a co te asi teleb co nong tamuboka kum makdongobkwande do? Ato tenen kum. Erda, Erci a co te asi tabakoka diblilibdiryok, diboka makdongobkwande ati ebman.

²⁵Ni kwityabwe dib tenen nang. Niryi sunti, “Ererdan kanya bobingnyei,” tenen Er Imtamnyi biryi sun Israel yala nang ati teleb teneramwe dinyi asi lak kibdeibkwinsin. A dinyi ara minob lak kum kuramwe dinyi ati sunci diboka bikdarur. Sun Israel yala nang kankan aryi ninyi ilinto ara kat kanya boboka Er Imtamnyi bisi tangloramnyi ani, ukuryok tuba tangloraming. Ani, sun yuk yala nang Er Imtamnyi Uram walwal kuramnyi nang nirya aryi Er Imtamnyi boukwe dam nirya yankwaming ani, Er Imtamnyi biryi sun Israel yala nang tamuboka dobdobkwande ati ebman.

²⁶Ato kuboka Er Imtamnyi biryi sun Israel yala nang nirya asi lebdeibkwande. Ara, Er Imtamnyi Uram umbura aryi esurur to, kunubkwande. “Ninyi lebkwansiranyi bira Sion atei aryi kuboka yankwansir. Erci karebci uca, sun Yakub yala nang ara Er Imtamnyi urasintam aryi malyi kun dinyi tuba kum kubkwaming.” (Yesaya 59:20-21)

²⁷“Tonda, Nira Imtamnyi biryi a nang ab tonkwa te murubdongobdamibiryok, Niryi sun malyi kun dinyi nirya kilibkwan.” (Yeremia 31:33-34)

²⁸Sun Israel yala nang ara nun Du Yesus uram Teleb Uram tuba bai donongnaming ati, nun Nai Imtamnyi biryi sunti, “Mar ordana nang ato tuba kunung,” tenerur. Teleb Uram bai donokmai uca, sunda yuk yala nang aryi lemsin dinyi dororandum ati ebman. Ba, Er Imtamnyi biryi sun Israel yala nang aibweyabwe asi wibdeibmou deyok aryi, Erci sun Israel yala nang kankan dib tenen kum nang ababyi bico tuba tenerur.

²⁹Er Imtamnyi biryi sun Israel yala nang asi kisal dangna dinyi minob karebmou ani, Erci sunti, “Taklobkwan,” tenena kum kurur. Tonda, Erci sun Israel yala nang asi, “Ni mabwe nermabwe kubdarur,” eboka nabmou ani, Erci sunti, “Deiblobkwan,” tenena kum kurur.

³⁰Sunda yuk yala nang ara minob uca Er Imtamnyi Uram kum kunurandau bok, Er Imtamnyi biryi sunsi bico tenen lebdeibmasou. Ara, sun Israel yala nang aryi Er Imtamnyi Uram ati, “Kununa nun li,” teneramnyi deyok aryi, Er Imtamnyi biryi sunda yuk yala nang asi bico tenen lebdeibmasou.

³¹Ura, ukuryok ara sun Israel yala nang ababyi neiktoto Er Imtamnyi Uram ati, “Kununa nun li,” teneraming uca, Er Imtamnyi biryi sunsi bico tenen lebdeibkwande. Ara, nun Nai biryi sunda yuk yala nang asi bico tenen lebdeibmasou to, Erci sun Israel yala nang ababyi neiktoto bico tenen lebdeibkwande ati ebman.

³²Ati, Er Imtamnyi biryi sun Israel yala nang babyi, sun Israel yala kum nang ababyi, “Er Imtamnyi Uram ati kununa kum nang kuraming,” eboka lak esurur. Ara, Erci ninyi nirya asi bico tenebkwansir ati, Erci ato eboka lak esurur.

³³Naie, nun Nai Imtamnyi bira langdeiboka bikdob dinyi tenen kunurutnyi kurur. Nun Nai biryi bingna dinyi ara iya erebdobtoto kurur. Nun Nai biryi teleb tenerur to ara ninyi kanya aryi ingkirikoka bikdobman kum. Nun Nai biryi kunurur dinyi ababyi ilila weik kurur ati, ninyi aryi diboka bikdobman kum kurur.

³⁴Ninyi tentok ababyi Er Imtamnyi tenen kanya bingdur do? Ato tenen kum. Ninyi tentok ababyi Er Imtamnyi bisi, “Ato-ato kubdum,” erur do? Ato tenen kum. (Yesaya 40:13)

³⁵Ninyi tentok ababyi Er Imtamnyi bisi muna karebmou do? Ato tenen kum. Ninyi tentok ababyi Er Imtamnyi bisi, “Niryi kansi karebmakise ati kanci dengna karebnurum,” ebkwande do? Ato tenen kum. (Ayub 35:7)

³⁶Nun Nai bira utotoa nirya asi kiknina deyoknyi kurur. Tonda, nun Nai mikib biriman aryi im ton tukwe ton nirya tuba kurur. Tonda, nun Nai si weik ena ati utotoa nirya kurur. Ati, nunci tanglona kum uca nun Nai si weik ena teleb. Amin.