Read Futuna-Aniwa Roma 14 Bible Online

Roma 14 - Futuna-Aniwa bible

Roma 14

¹Ni kwityabwe. Sunda dib tenen nang kankan asi ton dib tenen nang ara ilil kuna kum kanya kum boraming asi sunda ilil kuna kum kanya bon nang aryi dobdobdarur. Ati, sunci, “A nang ara ilil kuna kum kanya kum boraming ati nunci bitabdeibkwayeb,” tenen dobdobmunyei. Erda, sunci lulurdana kum uca, a nang ati, “Nun kwityabwe,” tenen dobdobdarur.

²Nunda dib tenen nang kankan aryi ton nang ara ilil kuna kum kanya boboka ato teneraming. “Yina-yina utotoa asi ur yibkwayeb.” Ba, dib tenen nang yuk nang ara ilil kuna kum kanya bona kum uca, “Sapi tub yuk bisam tub yibibyei,” tenerdaramingiryi, buna akwe yiraming.

³Ura, sun, “Yina-yina utotoa dinyi ur yibkwayeb,” tenen nang ara sun, “Yina ton dinyi ara mem-mema tuba kusurur ati yibibyei,” tenen nang asi ina ngilikingnyei. Ba, sun, “Mem-mema yibibyei,” tenen nang ara sun yina utotoa yiramingnyi nang ati, “Malyi kun nang,” tenebingnyei. Nun Nai Imtamnyi biryi nunda dib tenen nang nirya asi dobdobmasou ati, nunci nun mamun ati, “Malyi kun nang,” tenen kerebdabibyei.

⁴Er Imtamnyi bira nunda dib tenen nang nirya ati arungdeirisurutnyi kurur ati, Er bitikwe nun kerebdeibsutinyi kurur. Nun nirya ara nun Nai biti arungna nang akwe kunub ati, nunci nun mamun ati kerebdabibyei. Nun Nai bitikwe nunda er wa arungna nang ati, “Teleb kuboka wa iraming,” tenen kisal dansurutnyi kurur. Tonda, nun Nai bitikwe, “Malyi wa iraming,” tenen bitardeirisurutnyi kurur ati ebman. Er Imtamnyi biryi, “Yuk nang aryi ni arungnina nang asi wenebingnyi bok, niryi sunsi tikeibkwan,” tenen Er arungna nang asi tikeibkwande ati mikib kurur ati ebman.

⁵Ura, ton dib tenen nang ara sun kanya dam aryi ato tenenung. “Musa biryi arukdeibmasou to, nunci uki si Sabat tum ton mem uki tum taruk louboka bun tum yuk-yuk ababyi tuba diblilibkwanub.” Ba, dib tenen nang yuk nang ara ato tenenung. “Musa biryi arukdeibmasou to, mem uki tum yuk-yuk tuba kum kusurur ati, nunci tuba kum diblilibkwayeb.” Ni kwityabwe. Sunci a deyok ati lulubdamunyei. Erda, sun yuk-yuk ara sun kanya dam aryi, “Nun Nai kanya asi diboka teleb kubdeibtinyi,” tenen bikdandarur.

⁶Sun taruk louboka bun tum yuk-yuk asi dirlilin nang ara, “Er Imtamnyi kanya teleb kubdeibkwayeb,” tenen diblilibde baraming. Ba, yuk dib tenen nang ara a mem uki tum yuk-yuk dirlilina kum kuramingiryok, sunbabyi neiktoto, “Er Imtamnyi kanya teleb kubdeibkwayeb,” tenen ato kuraming. Tonda, sun sapi tub yuk bisam tub yiraming nang ara, “Er Imtamnyi kanya teleb kubdeibkwayeb,” tenen yiraming. Ara, sunci Er Imtamnyi si weik eramingiryi, yiraming ati ato ebman. Ba, yuk dib tenen nang aryi sapi tub yuk bisam tub kum yiramingiryi, sunbabyi neiktoto, “Er Imtamnyi kanya teleb kubdeibkwayeb,” tenen Er Imtamnyi bisi, “Ei nun nai,” eramingiryi, ato kuraming.

⁷Nunda dib tenen nang ara, “Nun mining kanya teleb kubdeibdankwayeb,” tenena kam kuramib. Tonda, nun dibkwamib ababyi ara, “Nun mining kanya teleb kubdeibdankwayeb,” tenen kum dibkwamib.

⁸Ara, nun kam kuramibyi ababyi, dibde baramibyi ababyi nunci, “Nun Nai Imtamnyi kanya teleb kubdeibkwayeb,” tenena akwe kunub. Ati, nun kam kuramibyi ababyi dibde baramibyi ababyi nunda Er Imtamnyi biti arungna nang kunub ati ebman.

⁹Ati, nunda Er Imtamnyi biti arungna nang kibkwamoubwe ati, nun Du Yesus biryi dibmou ani, kam tubto bukokmou. Ara, Erda nunda kam kun nang ab din nang ab arukdeibkwansiranyi kubkwansou ati, nun Du Yesus dibmou ani, kam tubto bukokmou.

¹⁰Nun Du biryi nun arungdeirisurutnyi kurur ati, sunci unato ati sun dib tenen nang yuk nang ati, “Malyi nang,” tenen kererdarandum do? Unato ati sunci sun duweityabwe dib tenen nang yuk nang asi ina ngilirandum do? Er Imtamnyi bitikwe nun malyi deyok lilisurutnyi kurur ati, nun nirya ara Er erebdob sokon urasintam aryi tikeibyi asi Erci nun kuramibyi to lilibkwansir.

¹¹Er Imtamnyi Uram umbura aryi a deyok ati ato esurur. “Nira Imtamnyi iya kam kununyi biryi diboka kunubkwan uram ton ebkwinsin. Sun im dangna tukwe dangna nang nirya ara sun kutam ikdongoboka Ni si weik ebkwaning. Ninyi nirya ara, ‘Er Imtamnyi bitikwe molobde banub,’ eboka lak kibkwaning.” (Yesaya 49:18; 45:23) Ato eboka Er Imtamnyi biryi minob lak kibdeibsou.

¹²Ati, nun Nai Imtamnyi biryi nun deyok yuk-yuk lilibdeibkwansir ati, nun nirya yuk-yuk aryi Er Imtamnyi bisi, “Ato-ato kuboka kan kanya teleb kurdeiriranse,” ebkwanub. Tonda, nun yuk-yuk aryi nun Nai biti, “Ato-ato kuboka manmaliramoubwe,” ebkwanub.

¹³Ati, sunci sun mamun ati, “Malyi nang,” eboka kererdana ati taklobdarur. Erda, sunci sun kanya dam aryi ato tenen kunubdarur. “Alib tenen dinyi lulubdabibyi uca, nunda dib tenen nang aryi nundamnyi asi talyi ati bisik sekdabibyei se,” tenen kunubdarur.

¹⁴Ni Paulus bira nun Du Yesus dam kunanyi kunun cok, niryi, “Yina-yina nirya kankan asi mem-mema ton diboka kum kusurur,” tenenun. Ba, dib tenen nang yuk nang ton ara, “Yina kankan ton dinyi ara mem-mema dinyi tuba kurur,” teneraming. A nang ara mem-mema ati, “Er Imtamnyi urasintam aryi malyi yina kurur ati nunci yibibyei,” teneramingiryi, kum yiraming.

¹⁵Sunda yina utotoa yirandum nang aryi sun duweityabwe, “Mem-mema yibibyei,” tenerdaramingnyi nang asi mambul kibdeibmunyei. Ati, sun tonkwa yiramun ci, sunbabyi “Mem-mema,” tenen dinyi yibmunyei. Ba, sunci mem-mema yin kum nang urasintam aryi mem-mema dinyi yibdate ura, sunci sun kwityabwe ati boukwe tuba kum kibdate. Ati, sunci mem-mema yibdate ura, sunci, “Nun Du Kristus biryi Er weityabwe mem-mema yin kum nang ababyi lebkwamwe ati dibmou,” tenen dinyi luba kubdate. Ato kubdate uca, sun duweityabwe mem-mema yin kum nang aryi sun dib tenen dinyi taklobting.

¹⁶Ura, sunci, “Yina-yina utotoa ur yibkwayeb,” tenen dib tenerandum asi yuk nang aryi sunti tatab-tatab ebsingnyei. Ara, “Mem-mema yiraming biriman aryi sun ilil kuna kum kanya bona kum nang asi malyi kimdeiriraming,” eboka tatab-tatab ebsingnyei.

¹⁷Er Imtamnyi biryi, “Nira Iya Weik Sienyi amwetam bun nang kibmun ci, Ni uram kunubde bindarur,” eboka namsurur ara “A yina yibdarur, o yina yina mem,” ena kum namsurur. Erda, sun Er Imtamnyi amwetam bun nang ara Er Imtamnyi urasintam aryi teleb dinyi kunubde baraming. Tonda, yuk nang ab tonkwa antanirdeirirdaraming. Tonda, Er Imtamnyi Kanya Roh Kudus biriman aryi kilkil kanya boraming.

¹⁸Ati, sun ato kuboka nun Du Yesus Kristus Uram kunubde baramingnyi nang ati Er Imtamnyi biryi, “Ni mabwe nermabwe,” tenen dosurur. Tonda, ninyi yuk nang ababyi sun ato kun nang ati, “Teleb kun nang,” tenebkwansing.

¹⁹Ati, nunci busul kuboka, “Yuk nang ab antanibdeibdankwayeb,” tenen ingkirikwayeb. Tonda, nunci, “Dib tenen nang yuk nang kanya asi katabum ebdeibdankwayeb,” tenen ingkirikwayeb.

²⁰Sunci mem-mema yina deyok ati sun duweityabwe dib tenen dinyi asi kum daneibmunyei. Nunda dib tenen nang aryi yina-yina nirya asi ur yinub cok, nunci nundamnyi kalikdandoka, “Nun kwityabwe dib tenen dinyi sakeibibyei,” tenebkwanub. Ara, Er Imtamnyi biryi sun kanya dam aryi dib tenen dinyi karebmou ati sunci sakeibdamunyei. Ati, sunci sun kwityabwe mem-mema yin kum nang urasintam aryi mem-mema yibmunyei.

²¹Ati, sunci, “Bisam tub ur yibkwayeb,” tenebmunyi bok, yuk dib tenen nang aryi, “Mem,” tenebingnyi ba, sunci sundamnyi kalikdamun ci, bisam tub yibmunyei. Tonda, sunci, “Anggur du yung ur yibkwayeb,” tenebmunyi bok, sun kwityabwe dib tenen nang aryi, “Mem,” teneramingnyi ba, sunci sun kwityabwe urasintam aryi anggur du yung yibmunyei. Tonda, sun kwityabwe dib tenena ati sangdeirin dinyi yuk dinyi ababyi sunci ukubmunyei.

²²Ati, sunci, “Mem-mema ababyi ur yibkwayeb,” tenebmunyi uca, sunci ato eboka Er Imtamnyi urasintam aryi lak kimna teleb. “Sun mem-mema yin kum nang urasintam aryi mem-mema yibingnyei,” tenen ato ebman. Sun, “Ur dinyi kunubde baramoubwe ababyi nunci nundamnyi kalikdandoka yuk nang asi kum sakeibmoubwe,” tenen bingdamingnyi nang ara Er Imtamnyi biryi kisal dangna nang kunung ati ebman.

²³Ba, sun, “Mem-mema yibibyei,” eramingnyi bok, yiramingnyi nang ati Er Imtamnyi biryi, “Bintinin kanya borandim ati, manmalin dinyi kurandim ci,” eboka sirya tatab-tatab ebmar. Ara, a nang aryi sun kanya dam aryi bintiniramingiryok yiraming ati, Er Imtamnyi biryi sunsi tatab-tatab ebmar. Ara, dib tenena kum uca yiraming ati, malyi dinyi kunuraming. Dib tenena kum uca bintinin kanya deici aryi kunubde baramibyi dinyi nirya ara Er Imtamnyi urasintam aryi malyi dinyi kurur ati ebman.