Read Futuna-Aniwa Roma 15 Bible Online

Roma 15 - Futuna-Aniwa bible

Roma 15

¹Nun kwityabwe dib tenen nang kankan asi ton nang ara dib tenena ati ilil kuna kum kanya kum boraming bok, nunda ilil kuna kum kanya boramibyi nang aryi a nang ati, “Dib en uram bita kum bingnung ati manmalibmang se,” tenebibyei. Erda, nunci a nang ababyi, “Nun kwityabwe dib tenen nang,” tenen dobdobkwayeb. Ati, nunci, “Nun mining kanya akwe teleb kubdeibdatibyi,” tenebdabibyei.

²Nunda dib tenen nang nirya ara dib tenen nang yuk nang teleb kubdeibkwanub. Ara, “Nun kwityabwe dib tenena tabakoka mikib kibte,” tenen nunci dib tenen nang yuk nang kanya asi teleb kubdeibdankwayeb.

³Nun Du Kristus bibabyi, “Ni mining kanya aryi teleb tenebmanyi tok kunubde binkwan,” tenena kum kuramwe. Erda, Erci, “Ni Nai Imtamnyi biryi teleb tenenurur to, kunubde binkwan,” tenen kuramwe. Ati, nunbabyi neiktoto nun mining kanya teleb tenebmabyi tok kunubibyei. Er Imtamnyi Uram umbura aryi nun Du Yesus biti ato erur. “Ninyi aryi kanda Imtamnyi bisi ina ngilikmaking cok, nira kan arungnaninyi bibabyi sintum ina ngilikmaning,” ebmou.

⁴Sun minob talak kuramnyi nang ara nunda aminda kubde bankwamoubwe nang ati, “Eterebtibyi,” tenen Er Imtamnyi Uram nirya asi ebmuruboka kerek sekansei. Ara, sunci, “A dib en uram biriman aryi sun kanya katabum ebtabakci uca, Er Imtamnyi kunubkwande dinyi dibde bukting,” tenen a uram nirya kerek sekdeiansei. Tonda, sunci, “Ninyi aryi malyi kibdeibingnyi ababyi, sunci tanglona kum uca dib tenebingnyi uca, dibde bukting,” tenen a uram yuk-yuk nirya asi nunti kerek sekansei.

⁵Nun Nai Imtamnyi bira nunda dib tenen nang kanya katabum erdeirisurutnyi kurur. Tonda, ninyi aryi malyi kibdeibsingnyi ababyi nun Nai biryi karebde basurur uca, nunda tanglona kum uca dib tenenub. Ura, nun Nai biryi karebsici uca, sunda dib tenen nang aryi neik kanya boboka antanibdeibdankwandum. Ara, sunda nun Du Yesus Kristus bisi milirandum ati, sun mamun antanirdeirirdan kanya bobdarur.

⁶Uca, ato kuboka neik kanya boramun ci, sunci antaniboka nun Du Yesus Kristus Er Nai Imtamnyi si weik ebkwandum.

⁷Ati, sunci sun mamun dobdobdandarur. Nun Du Kristus biryi sunsi dobdobmasou to, sunbabyi sun mamun dorona teleb. Ato kuramunyi uca, ninyi aryi asing eiboka Er Imtamnyi si weik ebkwaming.

⁸Nun Du Kristus bira, “Er Imtamnyi biryi dib en uram kunubde binkwan,” tenen sun Yahudi yala nang asi teleb kubdeibmou ati ebmasin. Ati, Er Imtamnyi biryi nun aibweyabwe minob kuramnyi nang asi ebdeibmou to kunubkwamwe ati nun Du Yesus biryi sun Yahudi yala nang asi teleb kubdeibmou.

⁹Tonda, sun Yahudi yala kum nang ababyi, “Er Imtamnyi biryi nunbabyi bico tenesurur,” eboka Er Imtamnyi si weik ebkwamai ati, nun Du Yesus biryi Er Imtamnyi Uram kunubde baramwe. Er Imtamnyi Uram umbura ara nun Du Yesus biti ato esurur. “A deyok aryi, niryi Kanda Imtamnyi si weik ebkwan. Sun Yahudi yala kum nang kankan aryi kubniryi, niryi Kan si weik eboka mot sebkwankin.” (2 Samuel 22:50)

¹⁰Tonda, Er Imtamnyi Uram umbura aryi yuk tam ara ato esurur, “Sunda Yahudi yala kum nang ababyi kilkil kanya bobdarur. Ara, sun Yahudi yala nang ab tonkwa kilkil kanya antaniboka bobdarur.” (Ulangan 32:43a)

¹¹Tonda, Er Imtamnyi Uram umbura aryi yuk tam ara ato esurur, “Sunda Yahudi yala kum kuramunyi nang nirya aryi Er Imtamnyi si weik ebdarur. Sun im dangna tukwe dangna kuramunyi yala nang nirya aryi Er Imtamnyi urasintam aryi mot sebdarur.” (Mazmur 117:1)

¹²Tonda, nabi Yesaya biryi minob ura nun Du Yesus biti ato eboka lak kibmou, “Nun aibwe Isai yalanyi bira wa doboka iya weik sienyi kibkwande. Anyi bira sun im dangna tukwe dangna kuramingnyi yala nirya asi arukdeibdiryok, kalikwande. Sun Yahudi kum yala nang ababyi Ersi dibde bukwaming.” (Yesaya 11:10)

¹³Ura, ni kwityabwe. Nun Nai Imtamnyi nun dibde bunubnyi biryi sunda Ersi dib tenen nang asi kilkil dinyi ab antanirdeirirdan dinyi ab langdeiboka karesina teleb. Uca, Er Imtamnyi Kanya Roh Kudus aryi mikib karebsici uca, sunci iya katabum kanya boboka Er Imtamnyi kunubkwansir dinyi dibde bukwandum.

¹⁴Ni kwityabwe dib tenen nang. Sun nirya ara yuk nang asi langdeiboka teleb kurdeirirandum ati ni dib tenesunun. Tonda, sun nirya ara dib en uram sunglona kum uca bingnandum. Tonda, sun nirya ara, “Ato-ato kunubde binkwayeb,” eboka sun mamun asi etererdana ati bingnandum ati tenesunun.

¹⁵Ato tenesunun cok, niryi ilil kum asa aryi kuboka deyok ton ati sunsi kerek sekeibmasin. Ara, niryi, “A dinyi kum bikmang ati eterebkwan,” tenen kum kerek sekeibmasin. Erda, “A dinyi sirya bikmang asi tamuboka teneibting,” tenen kerek sekeibmasin. Er Imtamnyi biryi niti, “Ni mi,” tenen nisi takeibnou ati, niryi sunsi a deyok ati eboka kerek sekeibmasin.

¹⁶Ara, Er Imtamnyi biryi nisi takubdeibnou uca, niryi sun Yahudi yala kum nang asi bindoka nun Du Yesus Kristus uram Teleb Uram lak eterebde baranse ani, ukuryok tuba eterebde banun. Nira Er Imtamnyi kan ninyi kan noutam kuboka antanirdeirinanyi bitonyi kunun cok, niryi sun Yahudi yala kum nang ati, “Sunbabyi sundamnyi Er Imtamnyi bisi dama deibdamun ci, Er Imtamnyi Uram asi kunubde bindarur,” eboka namnun. Ara, “Er Imtamnyi Kanya Roh Kudus aryi sun kanya yuk-yuk asi kilibdobsici uca, Er Imtamnyi biryi sunti, ‘Ni mabwe nermabwe,’ tenen dobkwansir,” eboka nabde banun.

¹⁷Ati, nira nun Nai Imtamnyi biti dama deirinanyi bitonyi wa ibde banun cok, niryi nun Du Yesus Kristus si weik ebde banun.

¹⁸Ati, niryi ilil kum asa aryi kanya bonun ci, nun Du Yesus biryi ni wa ibde banun biriman aryi kunubde barur dinyi akwe lak ebde banun. Yuk dinyi ati ni kum ebkwan. Ati, nun Du Yesus biryi karebmou uca, sun Yahudi yala kum nang ababyi Er Imtamnyi Uram kunubde banung ati ni lak ebman. Ara, niryi eterebde ban dinyi ton niryi wa ibde banun dinyi biriman aryi sun Yahudi yala kum nang ababyi Er Imtamnyi Uram kunubde banung.

¹⁹Tonda, Er Imtamnyi Kanya Roh Kudus aryi karebnou uca, niryi ilil tenen dinyi amuma-amuma kikniranse uca, sun Yahudi yala kum nang aryi dib tenenung. Ara, Yerusalem atei aryi kuboka im dangna tukwe dangna mutuk ilinto yibinkirikoka Ilirikum mutuk ababyi yibinmasiryok, niryi sunglona kum uca nun Du Yesus Kristus uram Teleb Uram eterebde baranse.

²⁰Niryi ato kuboka wa ibde baranse ara ato teneranse. “Sun nun Du Yesus Kristus biti walwal nang atikwe Teleb Uram lak ebtinyi.” Ara, “Yuk nang aryi deyok kouboka Teleb Uram sirya eterebmangnyi mutuk ati eterebtabakde binyei,” teneranse.

²¹Er Imtamnyi Uram umbura aryi a deyok ati ato esurur. “Sun Er Imtamnyi Uram ati walwal nang ara asing erekoka eibkwaming. Sun Teleb Uram ati keken kum nang ara dib en uram bikdobkwaming.” (Yesaya 52:15b)

²²Ati, niryi sun Er Imtamnyi Uram walwal nang bindoka Teleb Uram etereranse ati, niryi sunda Roma nang ati minob kum yanmasise. Sunda Teleb Uram sirya kekebmandau ati, niryi sun dam minola kum yanmase ati ebman.

²³Ura, niryi a mutuk nirya yibinkirikoka sun walwal nang asi nun Du Yesus uram Teleb Uram sirya eterebde baranse ani, niryi sunbabyi diryankwan ati ebman. Ara, kwalina mikbaryi kwalibde baransiryok, niryi sunda Roma atei aryi kuboka dib tenen nang ati, “Dirbitinyi,” teneransiryok, sun dam kum dirbinmase. Ba, aminda aryi sun dam yankwan ati tenebman.

²⁴Ati, niryi Spanyol mutuk bana kum uca, Roma atei yankwan ati ebman. Ura, ni ab sun ab tonkwa kuramibyi ura, niryi Spanyol mutuk binkwan ati, niryi sunti “Bisik kona ton karebnindarur,” eboka molobkwansin.

²⁵Ba, ni ukuryok binkun atei ara Yerusalem atei dirbinkun. Ara, sun Yerusalem atei aryi kuboka dib tenen nang asi dibnilibkwan ati akatei binkun.

²⁶Ara, sun Makedonia mutuk ton Akhaya mutuk kuboka dib tenen nang ara, “Yerusalem atei ara atan nang ilinto kunung,” kekebmai uca, sunci co bok bulubdeiboka “Sun Yerusalem atei kuboka dib tenen nang ati karebdum,” ebdeibmaning.

²⁷Ati, a nang ara sun mining kanya aryi kuboka, “Sun Yerusalem nang ara atan kunung ati nunci dibnilibkwayeb,” tenen co bok bulubdeiboka karebmang. Arungna uram biriman aryi kum karebmang. Erda, sun kanya bico deyok aryi, karebmang. Ura, sun Yahudi yala kum nang ara sun Yahudi yala nang asi ato kuboka dirniliraming ara iya kikib dinyi kurur ati ebman. Sun Yahudi yala nang ara Er Imtamnyi biryi kisal dakoka lemsin dinyi minob dororamnyi ani, sun Yahudi yala kum nang asi aminda aryi dorormilinung. Ani, ukuryok ara sun Yahudi yala kum nang aryi ninyi atan kunurdeirin dinyi dobdobmai ati, sunci a dinyi likniboka sun Yahudi yala nang kankan ataranci nang asi tamurkarena teleb.

²⁸Ati, sun Makedonia mutuk ton Akhaya mutuk kuboka dib tenen nang ara co bok bulubdeiboka ni taruk dam deibmaning. Ati, niryi Yerusalem atei bindoka a co bok nirya asi sun akatei aryi kuboka dib tenen nang asi karebkwan. Ani, Yerusalem atei aryi kuboka niryi Spanyol mutuk bana kum uca, sunda Roma atei kuboka dib tenen nang asi diryankwan.

²⁹Ura, niryi sunda Roma atei nang yanyi ura, nun Du Yesus Kristus biryi ni biriman aryi sunsi kisal dangna dinyi langdeiboka karebkwansir ati ebman.

³⁰Ati, ni kwityabwe dib tenen nang. Niryi sunsi ebdarab eboka uram ton ebdeibkwinsin. Sunda nun Du Yesus Kristus dam kun nang kurandum ati, sunci niti molormilibnindarur. Tonda, Er Imtamnyi Kanya Roh Kudus aryi karebmou uca, sunci boukwe weik kimdarandum ati, sunci niti molormilibnindarur.

³¹Sun Yudea mutuk aryi kuboka dib tenen kum nang ara niti marmun yiboka, “Obtibyi,” teneraning. Ati, sunci Er Imtamnyi bisi, “Nai, nun kwit Paulus bisi lebdum,” eboka molormilibnindarur. Tonda, “Sun Yerusalem atei kuboka dib tenen nang ara kilkil kanya bobingiryok, sun Yahudi yala kum nang aryi co bok bulubdeibmai asi dobdobting,” tenen molormilibdarur.

³²Ati, sunci ato kuboka niti molormilibnumuyi uca, niryi kilkil kanya boboka sun dam diryankwan. Ara, nun Nai Imtamnyi biryi niti, “Teleb,” tenebnici uca, ni sun dam diryankwan. Sirya yanyi obura, sun kanya ab ni kanya ababyi katabum ebtabakwansir ati ebman.

³³Nun Nai Imtamnyi antanirdeirisurutnyi biryi sun nirya ab tonkwa kuna teleb. Amin.