Read Futuna-Aniwa Roma 16 Bible Online

Roma 16 - Futuna-Aniwa bible

Roma 16

¹Ura, ni kwityabwe, dib tenen ner si Febe ati uram ton ebkwinsin. A ner ara teleb wa irur cok, sun Kengkrea atei kuboka buluraming dib tenen nang asi dirnilirur. Ati, sunci erti, “Nun malner dib tenen ner,” tenen dobdobdarur ati molobmasin.

²Ati, nun malner sun dam yangaci ura, sunci erti, “Nun Du milin ner,” tenen ersi diboka dobdobdarur. Nunda nun Du Yesus dam kun nang kunub ati, nunci teleb kuboka yuk nang asi du dongona kikib. Ati, sunci nun malner asi diboka kibdobmun ci, er molobmaci tok karebdarur. Nun malner ara ninyi ilinto dirniliramuryi, nibabyi dirniliranou ati, sunci erbabyi neiktoto dibnilibdarur.

³Ura, Priskila ab er akenyi Akwila ab asi niryi, “Teleb,” ebmasin. A nang bitinyi ara ni ab tonkwa wa iramaburyok, nun Du Yesus Kristus uram Teleb Uram lak etereramoubwe.

⁴A nang bitinyi ara, “Ninyi aryi nunsi obsitingnyi ababyi nunci nun Du Yesus uram Teleb Uram lak eterebmilibkwayeb,” tenen nisi diboka wa irmiliranirei. Ati, niryi sunti, “Ei ni nai, ni nong,” tenenun. Tonda, sun Yahudi yala kum nang kankan asi dib tenen nang nirya ababyi a nang bitinyi ati, “Ei nun nai, ei nun kwin,” tenenung.

⁵Tonda, sun kankan dib tenen nang ton nang ara Priskila ab er akenyi Akwila ai bulurandum asi niryi, “Teleb,” ebmasin. Tonda, ni kwit boukwe weik kununyi si Epenetus bisi sunci uram ebmuruboka, “Teleb,” ebdeibdarur. Nunda minob ura Asia mutuk yandoka Teleb Uram eterebmoubwe ba, nun kwit Epenetus biryi deyok kouboka nun Du Yesus Kristus bisi dib tenebmou ani, Asia mutuk nang yuk nang ababyi aminda aryi dib tenebkalibmai.

⁶Tonda, Maria bibabyi, “Teleb,” ebdeibdarur. A ner ara busul kuboka sunti dibniliboka wa irmiliransou ani, ukuryok ababyi wa irmilisurur ati ato ebman.

⁷Nun kwit Andronikus ab nun malner Yunias ab asi sunci, “Teleb,” ebdarur. Ni Paulus bira Yahudi yalanyi kunun to, a nang ababyi Yahudi yala nang kururung. A nang ara deyok kouboka nun Du Yesus bisi dib tenebmarei ani, nira aminda aryi dib tenebmase. Sun nun Du Yesus uram Teleb Uram deyok kouboka eterebde bana nang ara a nang ati, “Iya teleb kun nang,” teneraming. Ninyi aryi nisi taleboka ninyi wenen ai dongobmanei ura, a nang ababyi ni ab tonkwa ninyi wenen ai buramoubwe.

⁸Nun kwit Ampliatus bisi, “Nun Du dam kurutnyi,” tenen boukwe weik kunun cok, niryi erti, “Ni kwit, teleb,” ebman.

⁹Tonda, nun kwit Urbanus bibabyi, “Teleb,” ebman. Erda nun ab tonkwa wa iboka nun Du Yesus Kristus uram Teleb Uram eterenanyi kurur. Tonda, nun kwit boukwe weik kununyi si Stakhis bibabyi, “Teleb,” ebman.

¹⁰Tonda, Apeles bisi, “Teleb,” ebdarur. Anyi bira tanglona kum uca nun Du Yesus Kristus bisi milirutnyi kurur. Tonda, Aristobulus mabwe silib asi, “Teleb,” ebdarur.

¹¹Tonda, Herodion bisi, “Teleb,” ebman. Anyi ab ni ab neik yala nang ara Yahudi yala nang kununum ati ato ebman. Tonda, Narkisus mabwe silib kankan kuboka ton nang ara nun Du Yesus dam kun nang kunung asi, “Teleb,” ebman.

¹²Trifena ab Trifosa ab asi, “Teleb,” ebmasin. A nerabwe ara busul kuboka nun Du Yesus wa irmilin nerabwe kururung. Tonda, nun malner boukwe weik kunun ner si Persis bisi, “Teleb,” ebmakin. A ner ara busul kuboka nun Du Yesus wa irmiliramwe ner kurur.

¹³Tonda, Rufus bisi niryi, “Teleb,” ebman. Nun Du biryi wibdeiboka teleb wa takubdeibmunyi biti ato ebman. Tonda, Rufus er kwin ababyi, “Teleb,” ebman. A ner ara niryi, “Ni kwin,” tenenun asi niryi, “Teleb,” ebman.

¹⁴Tonda, niryi nun kwityabwe Asinkritus ab, Flegon ab, Hermes ab, Patrobas ab, Hermas ab, sun ab tonkwa kuramingnyi dib tenen nang yuk nang ab asi, “Teleb,” ebmasin.

¹⁵Tonda, nun kwit Filologus ab nun malner Yulia ab asi, “Teleb,” ebman. Nun kwit Nereus ab, er malner ab asi, “Teleb,” ebman. Tonda, Olimpas bibabyi, “Teleb,” ebman. Tonda, a nang ab tonkwa kuraming nang ababyi Er Imtamnyi dam kun nang kuraming ati niryi sun nirya asi, “Teleb,” ebmasin.

¹⁶Nunda dib tenen nang aryi tonkwa buluboka, “Nun kwityabwe dib tenen nang,” tenen nun mamun irirdaramib to, sunci, “Nun kwityabwe,” tenen sun mamun iribdandarur. Nun Du Kristus dib tenen nang ara yuk atei yuk atei nirya aryi buluramingnyi nang asi sunda Roma atei aryi kuboka dib tenen nang ati, “Teleb,” ebmasing.

¹⁷Ura, ni kwityabwe. Ton nang ara, “Sun dib tenen nang neik kanya bobingnyei,” tenen sun dib tenen nang bongminingnaming. Sunci a nang ati, “Bokminiksingnyei,” tenen diboka kisibdobdarur. Niryi uram ebdarab eboka sunsi ato ebdeibmasin. A nang ara sun nun Du Yesus biti dib tenen nang ati, “Sun dib tenena asi taklobting,” tenen ninyi bowaningminingnaming. A nang aryi etereraming uram ara tola uram kurur ci, sunci dobdobmandau dib en uram eterena ati bisik sengnande. Ati, sunci a nang asi kisibdobdarur.

¹⁸Sun ato kuboka tola uram eterebingiryok ninyi bongminingna nang ara nun Du Yesus Kristus wa irmilin nang diboka kum kunung. Erda, sunci sun mining kanya dam aryi anaranci malyi kun dinyi akwe kunung. A nang ara kisal dakoka ninyi kanya teleb kimdeirin uram eramingiryok, sunci eraming uram ara dib en uram kuma. Ato kuboka ninyi tangdeirin uram eboka sunci sun mangkau kanya bon nang kanya asi bowaningminingnaming.

¹⁹Ura, sunda Roma atei aryi kuboka dib tenen nang ara tanglona kum uca nun Du Yesus erdeirisin uram kunurandum. Ninyi nirya aryi sunti, “Nun Du uram kunuraming,” tenen bingsunung. Nibabyi neiktoto, “Nun Du uram kunuraming,” tenen bingsunun deyok aryi, ni kanya kilkil weik kunurur. Ato ebman cok, niryi sunsi bitardeirisin uram ton tabakoka ebdeibkwinsin. Sunci bikdob dinyi bingna nang ato kurandum ci, teleb dinyi diboka kunubdarur. Tonda, sunci namin kanya boramun ci, malyi kun dinyi kubmunyei.

²⁰Ura, nun Nai Imtamnyi ninyi antanirdeirisurutnyi biryi karebsici uca, sunci isa sienyi Iblis bisi minola muna kibdongobmun ci, sun yan amwetam aryi yanibdaraboka kum daneibkwandum. Nun Du Yesus biryi kisal dakoka sun ab tonkwa kuna teleb.

²¹Ura, ni wa irmilinurutnyi Timotius biryi sunsi, “Teleb,” ebmasir. Tonda, Lukius ab, Yason ab, Sosipater bibabyi sunsi, “Teleb,” ebmasing. A nang ara ni yala Yahudi yala nang kunung.

²²Tonda, nun kwit Tertius bibabyi sunda Roma nang ati, “Nun Du Kristus dam kun nang,” tenen sunsi, “Teleb,” ebmasir. Ni Paulus bira a kerek sengna deyoknyi kubman ba, nun kwit Tertius biryi ni ebdeibmasin to nirya kerek sekdeibmasir.

²³Nun kwit Gayus bibabyi sunsi, “Teleb,” ebmasir. Gayus bira nisi du dongobnou ati, nira er ai kunun. Nun kwit biryi du dongorande ati, sun akatei kuboka dib tenen nang nirya yandoka er ai kuboka tonkwa buluraming. Tonda, Erastus bira weik atei kalingna nang wa irmilinanyi biryi sunsi, “Teleb,” ebmasir. Tonda, nun kwit dib tenenanyi Kwartus bibabyi sunsi, “Teleb,” ebmasir.

²⁴Nun Du Yesus Kristus bira kisal dakoka sun ab tonkwa kuna teleb. Amin.

²⁵Ura, nunci nun Nai Imtamnyi si weik ebkwayeb. Nun Nai bira iya mikibnyi kurur ati, Erci sun dib tenena ati katabum erdeirisina ati mikib kurur. Ara, niryi eteresunun to, ara nun Du Yesus Kristus uram Teleb Uram lak eteresunun to, nun Nai biryi sunsi katabum erdeirisina ati mikib kurur. Tonda, nun Nai Imtamnyi biryi er teleb tenesurur to ukuryok lak kibdeibsou to, Er Imtamnyi biryi sunsi katabum erdeirisina ati mikib. Nun aibweyabwe minob kuramnyi nang ara kwalina seratus baryi yubwa-yubwa kwalibde baramiryok, sunci Er Imtamnyi biryi teleb tenesurur to kum bingnamnyi. Kum bingnamnyi ani, nun Nai biryi er teleb tenesurur uram lak kibdeibsou. Ara, Er Imtamnyi Uram ebdeibmaci to lak etereramnyi nang aryi kerek sekmai uram deib aryi Erci ato eboka lak kibdeibsou. “Nira Imtamnyi iya kam kurutnyi biryi sun im dangna tukwe dangna nang nirya asi ato eboka arukdeibmasin, ‘Sun nirya ara nisi dib tenebnumun ci, Ni uram kunubdarur,’ ebmasin,” eboka kibdeibsou. Nun Nai Imtamnyi bikwa iya bikdob dinyi bingdur(...)