Read Futuna-Aniwa Roma 2 Bible Online

Roma 2 - Futuna-Aniwa bible

Roma 2

¹Ura, sunda yuk nang asi, “Malyi dinyi akwe kuraming,” eboka wenerandum nang se. Er Imtamnyi biryi sunbabyi diba ati wenebkwansir ati ebman. Sunbabyi neiktoto malyi dinyi kunurandum ati, sunci, “Nunbabyi Er Imtamnyi urasintam aryi malyi dinyi kunuramib,” tenen sundamnyi wenerdana teleb. Sunbabyi Er Imtamnyi Uram diboka kum kunurandum ati ato ebman.

²Er Imtamnyi biryi sun malyi kun dinyi yuk-yuk kunuramingnyi nang asi wenebkwande ara diboka lilibdiryok, wenebkwande ati nun bingnub.

³Ura, sunbabyi tukwetam nang kuramun cok, sunbabyi malyi kun dinyi kuramun cok, unato ati sunci sundamnyi erebdeibdamun ci, yuk nang asi, “Malyi dinyi kurandum se!” eboka wenerandum do? Ati, sunci, “Nunda malyi kun dinyi kunubde banub asi Er Imtamnyi biryi diboka kum wenebkwansir,” tenerandum do? Er Imtamnyi biryi sunbabyi diboka lilibsiryok, wenebkwansir ati ebman.

⁴Ura, Er Imtamnyi biryi bico tenen deyok aryi, sunsi minola kum wenesurur ati sunci kum bikmarum do? Er Imtamnyi biryi, “Sun malyi tenen dinyi takloboka Ni uram kunubting,” tenen minola kum wenesurur bok, sunci, “Nun li,” tenen nun Nai langdeiboka teleb kimdeirisurutnyi bisi ina ngilingnandum do? Nun Nai bira nun malyi kun dinyi ati, “Ni li,” tenesurur ci, Erci, “Sun malyi kun dinyi taklobting,” tenen dibde burur cok, sunsi minola kum wenesurur.

⁵Sun kanya ara kat weik kuransir ba, sunbabyi, “Nun malyi tenen dinyi takloboka Er Imtamnyi Uram kununa ara nun li,” tenerandum ati, sunci malyi kun dinyi tabaknin-tabaknin kunurandum ati, Er Imtamnyi biryi sunsi weik wenena kareboka wenebkwansir. Ara, Er Imtamnyi biryi malyi dinyi wenena kikib laktoto karebkwande uki tum berekci ura, Erci sunbabyi wenena kikib kareboka wenebkwansir.

⁶Ninyi yuk-yuk aryi malyi dinyi kum teleb dinyi kum kunuramibyi tok, Er Imtamnyi biryi nunsi wenen dinyi kum kisal dangna dinyi kum karebkwansir.

⁷Sun tanglona kum uca, “Er Imtamnyi biryi nunsi erebdeiboka iya kam kun dinyi karebsute,” tenen ingkiringnamingnyi nang asi nun Nai biryi iya kam kun dinyi karebkwande.

⁸Ba, sundamnyi ererdeirirdaramingnyi nang ton sun dib en uram bai donokoka malyi kun nang asi Er Imtamnyi biryi yu weik kuboka weik wenena karebkwansir.

⁹Sun malyi dinyi kuramingnyi nang nirya asi Er Imtamnyi biryi weneboka mambul weik dinyi karebkwansir. Ara, sun Yahudi yala nang kankan aryi malyi kun nang asi deyok kouboka wenebkalibsici ura, sun Yahudi yala kum nang kankan aryi malyi kun nang ababyi wenebkwansir.

¹⁰Ura, sun teleb dinyi kunuramingnyi nang asi nun Nai biryi erebdeiboka antanirdeirin dinyi karebkwansir. Ara, sun Yahudi yala nang kankan aryi teleb dinyi kunun nang asi deyok kouboka kisal dakalibkwande ura, sun Yahudi yala kum nang kankan aryi teleb dinyi kunun nang asi aminda kisal dakwansir.

¹¹Nun Nai Imtamnyi biryi, “A yala nang dobdobkwan, o yala nang donokwan,” tenena kum kurur ati ato ebman.

¹²Sun Yahudi yala kum nang ara Er Imtamnyi biryi, “Ukubdarur-Ukuna mem,” en uram kum kekeramiryok, Er Imtamnyi urasintam aryi malyi dinyi kunung. A nang nirya ara a uram Musa biryi ebmurubmou uram ati walwal kunung cok, weik wenena dobdobkwaming. Ba, sun Yahudi yala nang ara Musa Uram kekeboka bingnung cok, sunbabyi Er Imtamnyi urasintam aryi malyi dinyi kunung. A nang ara Musa Uram yan yaniramnyi deyok aryi, sunbabyi weik wenena dobdobkwaming.

¹³Sun Musa Uram asi amol dem aryi keken nang ati Er Imtamnyi biryi, “Ni mabwe nermabwe dobdobkwan,” kum tenesurur. Erda, sun, “Ukubdarur-Ukuna mem,” en uram kekeboka diboka kununung nang ati Er Imtamnyi biryi, “Ni mabwe nermabwe dobdobkwan,” tenesurur.

¹⁴Sun Yahudi kum yala nang ara, “Ukubdarur-Ukuna mem,” en uram Musa biryi ebmurubmou uram asi minob kum kekeramiryok, sun kankan aryi ton nang ara teleb dinyi kunubde baraming. Ati, sunci sun kanya dam aryi, “Ato kuna ara teleb, ato kuna ara malyi to,” tenen bingdaramingiryok, kunubde baraming.

¹⁵A nang ara Er Imtamnyi biryi, “Ukubdarur-Ukuna mem,” en uram kum kekeramnyi bok, Er Imtamnyi biryi ato en uram asi sun kanya dam aryi diboka lak kimdur. Ati, sunci sun kanya dam aryi, “Ato kuna ara teleb dinyi, ato kuna ara malyi dinyi,” bingnung. Ati, sun Musa Uram asi bingna kum nang aryi malyi dinyi kunubingnyi uca, sunci sun kanya dam aryi, “Malyi dinyi kunubmab se,” tenen bingdanung. Tonda, sunci teleb dinyi kunubingnyi uca, sunci sun kanya dam aryi, “Teleb dinyi kunubmab,” tenen bingdanung.

¹⁶Ura, nun Nai Imtamnyi biryi takubdeibmou uca, nun Du Yesus Kristus biryi ninyi kanya aryi kuboka malyi tenen dinyi ton teleb tenen dinyi ton nirya lilibkwansir. Ara, lak kimdeirin tenen dinyi ton inirdeirirdan tenen dinyi ababyi Erci liliboka lak kibdeibkwansir. A dinyi nirya lilibkwansir uki tum berekci uca, nun Du Yesus biryi sun malyi kun nang asi wenebdiryok, Erci sun Er Imtamnyi Uram kunun nang asi kisal dangkwansir. Niryi eterebde banun Teleb Uram aryi ato eboka lak eteresurur to, nun Du Yesus bira ninyi kanya lilibkwandanyi yamuryankwande ati ebman.

¹⁷Ura, nun kankan kuboka Yahudi yala nang ati uram ton ebkun. Sunci sundamnyi ati, “Nunda Yahudi yala nang kunub,” erdaramun ci, “Musa Uram udikum deirinub,” erdarandum. Erdaramun cok, sunci sundamnyi erebdeibdandoka, “Nunda Er Imtamnyi Uram kununub ati Er dam kun nang kunub,” erdarandum.

¹⁸Er Imtamnyi biryi teleb tenerur to sun sirya bikmarum. Tonda, sunci, Musa Uram bikmarum ati, sunci a uram deici aryi, “Ato kuna ara teleb, ato kuna ara malyito,” tenen bikmarum.

¹⁹Ati, sunci sun Er Imtamnyi Uram ati walwal nang ati, “Udikum bisik eterebkwayeb,” tenen kunurandum cok, sunci sundamnyi ati, “Nunda dib en uram eterena deyok nang kunub,” tenerdarandum. Tonda, sun kanya kunuk kuramingnyi nang asi sunci Musa Uram etererandum cok, sunci sundamnyi ati, “Nunda bikdob nang kunub ati, sun walwal nang asi berengdeirin uram eterenub,” tenerandum.

²⁰Sunci sundamnyi erebdeibdandoka ato tenerdarandum, “Nunda sun bingna kum nang asi eteren nang kunub.” Tonda, “Nunda wise kanya bon kum nang asi eteren nang kunub.” Ati, sunci, “Ukubdarur-Ukuna mem,” en uram ara bikdob uram dib en uram kerek sengna liliboka bingnandum ati, sunci sundamnyi ati, “Nunda bikdob nang kunub,” tenen ererdeirirdarandum.

²¹Ura, kekebdarur. Sunci yuk nang asi, “Ukubdarur-Ukuna mem,” en uram etererandum ati, sunci sundamnyi ababyi etererdarandum do? Ato tenen kum. Ati, sunci, “Yuk nang dinyi ukula dobdobmunyei,” eboka eterebmunyi ati, sunbabyi neiktoto a uram kunuramun cok, yuk nang dinyi kum dobdobmarum do? Ato tenen kum.

²²Tonda, sunci, “Yuk nang ner talyi yobmunyei,” eboka etereramunyi ati, sunbabyi neiktoto a uram kunuramun ci, yuk nang ner kum yobmarum do? Ato tenen kum. Tonda, sunci, “Kwemdina dinyi molobmunyei,” eboka eterebmunyi ati, sunbabyi neiktoto a uram kunurandum do? Ato tenen kum. Sunci kwemdina molon ai dinyi ukula dobdobmarum ati niryi ato ebman.

²³Tonda, sunci, “Nunda Er Imtamnyi biryi, ‘Ukubdarur-Ukuna mem,’ en uram bingnub,” eboka sundamnyi ererdeirirdarandum ati, sunci Er Imtamnyi Uram diboka kunurandum do yan yanirandum do? Sunbabyi “Ukubdarur-Ukuna mem,” en uram yan yanirandum ati, Er Imtamnyi bisi ina ngilingnandum ati ebman.

²⁴Er Imtamnyi Uram umbura aryi sunti ato eboka lak kimdur. “Sunda Er Imtamnyi Uram bingna nang aryi Er Imtamnyi urasintam aryi malyi kunurandum deyok aryi, sun Yahudi yala kum nang ara Er Imtamnyi Uram walwal nang aryi asing eiriransingnyi uca, Er Imtamnyi biti, ‘Nun li,’ tenen ina ngilingnaming.” (Yesaya 52:5b)

²⁵Sunda Yahudi yala nang ara den bama sengsina nang kurandum. Sunci, “Ukubdarur-Ukuna mem,” en uram diboka kunubdate ura, den bama sengsina sunti teleb kubdeibmasute. Ba, sunci “Ukubdarur-Ukuna mem,” en uram diboka kum kunurandum ati, sunci den bama sengna kum nang ato kibdanmarum.

²⁶Ba, sun Yahudi yala kum nang ara den bama sengna kum nang kuramingiryok, Er Imtamnyi Uram kunuramingnyi uca, Er Imtamnyi biryi a nang ati, “Ni mabwe nermabwe,” tenerur.

²⁷Ato kuboka sun Yahudi yala kum nang aryi sunda Yahudi yala nang asi, “Malyito kurandau se,” eboka kerebkwansing. Sunda Yahudi yala nang ara den bama sengsina nang kurandum cok, “Ukubdarur-Ukuna mem,” eboka kerek sengna diboka bingnandum cok, sunci kununa kum uca a uram yan yanirandum ati ato ebman. Ba, sun Yahudi yala kum nang ara den bama sengna kum nang kuramingiryok, “Ukubdarur-Ukuna mem,” en uram kunuraming ati ebman.

²⁸Ati, unato nang ara diboka Er Imtamnyi mabwe nermabwe kunung do? Unato nang ara diboka Yahudi yala nang kunung do? Unato nang ara den bama sengna nang diboka kunung do? Sun ninyi taruk aryi den bama sengna nang ara Er Imtamnyi mabwe diboka kunung do? Ato tenen kum.

²⁹Erda, sun kanya dam Er Imtamnyi Uram diboka teneibde kunun nang ara diboka Er Imtamnyi mabwe nermabwe kunung. Sun ato kun nang kanya ara danguboka Er Imtamnyi Uram kununung. Ara, “Ukubdarur-Ukuna mem,” eboka kerek sengna kununa deib aryi Er Imtamnyi mabwe nermabwe kum kunung. Erda, Er Imtamnyi Kanya Roh Kudus aryi sun kanya dam aryi wa ibci uca, du mourande. Sun ato kun nang ati tukwetam nang aryi kisal dangsina kum kunung. Erda, Er Imtamnyi biryi kisal dangnansir.