Read Futuna-Aniwa Roma 9 Bible Online

Roma 9 - Futuna-Aniwa bible

Roma 9

¹Ni yala nang Israel yala nang kankan kuraming ninyi yana yubwa ara nun Du Yesus Kristus bisi dib kum teneraming asi ni Paulus biryi sunti bico weik tenenun ati ebman. Tola kuma. Nira nun Du Yesus dam kunanyi kunun ci, dib en uram akwe ebman. Er Imtamnyi Kanya Roh Kudus ara ni kanya dam aryi dib en dinyi lak kimnurur ba, niryi, “Tola kuma, niryi ni yala nang asi bico tenenun,” tenen bingdanun.

²Ni yala nang Israel yala nang ara nun Du Yesus bisi dib kum tenenung ati ni kanya ara tanglona kum uca mambul weik kuranir ati ebman.

³Ati, niryi, “Er Imtamnyi biryi ni duweityabwe asi weneboka bai donoksekcei,” tenenun. Ati, niryi bico weik deyok aryi, ato tenerdanun. “Nira Kristus dam kunanyi kunun bok, Er Imtamnyi biryi nisi suboka ur bai donoknute uca, nira Kristus dam tuba kum kurantinyi. Bok, Er Imtamnyi biryi ni yala nang asi bai donokcei. Erda, Erci sunbabyi nun Du Yesus bisi dib tenen dinyi kareboka lebdeibte,” tenenun.

⁴Ni yala nang ara sun Israel yala nang ati ato ebman. Er Imtamnyi biryi, “Ni mabwe nermabwe,” tenen sun Israel yala nang asi minob dobdobmou. Tonda, Er Imtamnyi bira iya mikibnyi kuboka Erdamnyi sun Israel yala nang asi minob lak kimdeirirdaramwe. Ni yala nang Israel yala nang asi Er Imtamnyi biryi, “Nira Imtamnyi ab murubdeibkwayeb,” en uram yuk-yuk kareramwe. Tonda, “Ukubdarur-Ukuna mem,” en uram Erci Musa biriman aryi sunsi minob kareramwe. Tonda, Erci sun Israel yala nang asi takubdeibmou cok, Erci sunsi, “Er Imtamnyi bisi ninyi dama deirin ai bimunyi ura, sunci ato-ato kuboka Ni si weik ebdarur,” minob ebdeibmou. Tonda, Er Imtamnyi biryi sun Israel yala nang asi, “Ato kuboka kisal dakwansin,” eboka erdeiriramwe uram yuk-yuk kareramwe. A dinyi nirya asi dororamiryok, sunci nun Du Yesus bisi dib kum tenenung ati ni se tenen kanya bonun.

⁵Ni yala nang Israel yala nang nun aibweyabwe ara Er Imtamnyi bisi dib tenen nang Abraham ab, Ishak ab, Yakub ab, Yakub er mabwe ab kuramnyi. Odei-odei yal dakde baramnyi ani, nun Du Yesus Kristus ninyi kibdandoka Israel yala kuramunyi bisi deibmai. Nun Du bira utotoa nirya bisibkaboka Er Iya Erebdobnyi kurur ati ebman. Ninyi nirya ara tuba-tuba Er si weik ena teleb. Amin.

⁶Ura, Er Imtamnyi biryi nunda Israel yala nang asi minob dobdobmasou ani, nun kankan aryi ninyi yana yubwa ara nun Du Yesus bisi dib kum tenenung. Ati, nunci, “Er Imtamnyi biryi ebdeibsou ani, kum kunubmou ati Er Uram ara talyi uram akwe kurur,” ebtibyi do? Ato tenen kum. Nun nirya ara Israel yala nang kunub cok, nun kankan aryi ninyi ilinto aryi Er Imtamnyi bisi diboka kum miliraming deyok aryi, nun nirya ara Israel yala nang kobdob kum kunub. Ati, nunci, “Er Imtamnyi biryi Er Uram biriman aryi ebdeibsou bok, kum kunubdeibsou,” tenebibyei.

⁷Ura, “Sun Israel yala nang nirya ara nun aibwe Abraham biryi yal dangnansou mabwe nermabwe kunung ati, sun nirya ara Er Imtamnyi dam kun nang kunung,” ebtibyi do? Ato tenen kum. Er Imtamnyi biryi Abraham bisi minob ato ebmou, “Kan mi Ishak ab er yal dakwande mabwe nermabwe ab atikwe Niryi, ‘Ni kwit Abraham yala nang diboka kunung,’ eboka nabkwansin,” ebmou. (Kejadian 21:12)

⁸Ati, nun aibwe Abraham biryi yal dakmou mabwe nermabwe nirya ara Er Imtamnyi mabwe nermabwe kum kunung. Erda, Er Imtamnyi biryi wibdeiboka, “Kisal dakwan,” eboka ebdeibsou nang atikwe Er Imtamnyi biryi, “Ni mabwe nermabwe,” tenerur.

⁹Ara, nun aibwe Abraham biryi Ishak bisi kum deibmou bok, Er Imtamnyi biryi ersi ato eboka ebdeibmou. “Kan ner Sara ara mundu boboka mi deibkwande. Mi sirya deibmaci ani, Niryi kansi, ‘Ato-ato kubkwande uki tum Ni tubto yandoka kan ab tubto ebdankwanim,’ ebmakin uki tum berekci ura, tubto ebdankwanim.” (Kejadian 18:10, 14)

¹⁰“Abraham ab Sara ab deibmarei mabwe akwe ato kurandei,” tenebibyei. Erda, Abraham mi Ishak ab er ner Ribka ab aryi deibmarei mabwe neiktoto kurandei ati ebman. A mabwe bitinyi ara nun aibwe Ishak er mabwe kurandei cok, tonyi bira Er Imtamnyi dam kunanyi kuramwe bok, yuknyi bira Er Imtamnyi dam kunanyi kum kuramwe.

¹¹Ishak ner Ribka biryi er mabwe bitinyi asi kum deibmou bok, Er Imtamnyi biryi ersi ato eboka lak ebmou. “Kanci deibkwandim mi dunyi bira er weit er wa irmilirandanyi kubkwande,” ebmou. (Kejadian 25:23) Ara, Er Imtamnyi biryi, “Anyi bisi wibdeibkwan, onyi bisi taklobkwan,” tenen dinyi kunubkwamwe ati Erci a dinyi minob lak ebmou. Ara, a mabwe bitinyi asi kum deibmarei bok, sunci teleb dinyi babyi malyi kun dinyi ababyi kum kunubmarei bok, Erci, “Anyi bisi wibdeibkwan, onyi bisi dokdonokwan,” minob lak ebmou. Ara, ninyi aryi teleb kunubde ban dinyi deib aryi Er Imtamnyi nunsi kum dorosurur. Erda, Er Imtamnyi ninyi namdeirirutnyi biryi teleb tenesurur deib aryi Erci nunsi dorosurur.

¹²

¹³Ara, Er Imtamnyi Uram umbura aryi a deyok ati kerek sekmou to kuramwe. “Nira Imtamnyi biryi Yakub biti boukwe weik kunun cok, Esau bisi bimsa yaringnun.” (Maleakhi 1:2-3)

¹⁴Ati, nunci una to dinyi ebtibyi do? Er Imtamnyi biryi ato kuboka, “Anyi bisi wibdeibkwan, onyi bisi taklobkwan,” tenesurur ati, nunci Erti, “Kikib kum dinyi kunusurur,” ebtibyi do? Ato tenen kum.

¹⁵Er Imtamnyi bira Musa bisi ato eboka lak ebmou. “Ni ninyi bico tenenun cok, Niryi teleb tenenun to wimdeiriranyi nang ati bico tenebkwan. Tonda, Ni ninyi boukwe weik kununyi kunun cok, Niryi teleb tenenun to wimdeiriranyi nang ati boukwe kibkwan.” (Keluaran 33:19) A deyok aryi, nunci Er Imtamnyi biti, “Kikib kum dinyi kunusur,” ebibyei.

¹⁶Ati, Er Imtamnyi bira ninyi lemsurur ara ninyi aryi, “Teleb dinyi kunubtibyi,” tenen dinyi deici aryi kum lemsurur. Tonda, ninyi aryi teleb dinyi kunubting deici ababyi Erci ninyi kum lemsurur. Erda, Er Imtamnyi bico tenen dinyi deici aryi Erci ninyi lemsurur.

¹⁷Er Imtamnyi Uram umbura aryi kerek sekamwe to, Er Imtamnyi biryi Mesir nang kalingnamwe weik sienyi si Firaun biti ato ebmou. “Nira Imtamnyi biryi kansi erebdeibmakise ara Niryi Ni mikib lak kibdeiboka kansi wenebkwanse ati erebdeibmakise. Niryi Ni mikib lak kibdeiboka kansi wenebkinyi uca, sun im dangna tukwe dangna nang nirya aryi Nira Imtamnyi si weik ebkwaning.” (Keluaran 9:16) A uram deib aryi nunci, “Er Imtamnyi biryi teleb tenerur to, Erci ninyi bico tenerur kum, ninyi kanya kat kimdeirirur kum,” tenen bingnub.

¹⁸

¹⁹Ura, sun kankan aryi tonyi biryi niti ato eboka asibdenkwanute. “Er Imtamnyi biryi Erci teleb tenen dinyi bisik sengna kum uca kunubde barur ati, ninyi tentok ababyi Er tenen dinyi bisik sekman kum kunub. Ati, Er Imtamnyi biryi teleb tenerur to ninyi kanya kat kimdeirirur ati, una deyok aryi Erci a nang asi tatab-tatab eboka wenerur do?”

²⁰Ato ebdate bok, niryi sunsi ato ebkwinsin. Nunda tukwetam nang akwe kunub ati, nunci Er Imtamnyi bisi, “Kan una kubmarim do?” ena ara kikib kum kubsute. Er Imtamnyi bira nunsi kiknibdeibsounyi kurur ati, nunci Ersi, “Unato ati Kanci nunsi ato-ato kuboka kiknibmasirim do?” eboka asibdetibyi do? Ato tenen kum.

²¹Tukwe moyok kiknin nang ara tukwe doboka teleb moyok kum malyi moyok kum kikniraming. Ara, tukwe moyok kiknin nang aryi teleb teneramingnyi tok, sunci weik kwalina uki tum aryi talebkwaming moyok kum talyi moyok kum kikniraming. Ura, Er Imtamnyi bibabyi neiktoto kurur. Erci teleb tenebmaci tok, ton nang asi wimdeirirur cok, yuk nang asi tanglorur.

²²Er Imtamnyi bira, “Malyi kun dinyi wenebkwan ati lak kibdeibkwan,” tenerur cok, “Ni mikib lak kibdeibkwan,” tenerur. Ato tenerur cok, Erci namin kanya boboka sun malyi kun nang ara Erci, “Wenebkwan,” tenen nang asi minola kum weneramwe. Sun iya kum danein dinyi kikiman dinyi dobdobkwamingnyi nang ati ato ebman.

²³Tonda, Er Imtamnyi biryi, “Ni bico tenen nang asi Ni mikib weik asi langdeiboka lak kibdeibkwan,” tenen Erci sun kat kanya bon nang minola kum weneramwe. Er Imtamnyi biryi Er bico tenen nang asi minob wibdeibmou ara, “Aminda aryi erebdeibkwan,” tenen kiknirminingnamwe.

²⁴Ara, nun Nai biryi, “Ni dam yandarur,” eboka nunda dib tenen nang nabmasou ara sun Yahudi yala nang kankan aryi nabmasou ci, sun im dangna tukwe dangna aryi kuboka yuk yala nang kankan ababyi nabmou. Ara, Erci nun nirya ati, “Erebdeibkwan,” tenesurur.

²⁵A dinyi ati Er Imtamnyi aminda kunubkwamwe dinyi ermuruna bobaramunyi si Hosea biryi minob ura ato ebmou. “Nira Imtamnyi biryi Ni dam kun kum nang ati, ‘Ni dam kun nang,’ eboka si nabkwan. Tonda, Niryi boukwe kum kimnanse nang ati, ‘Ni boukwe weik kun nang,’ eboka si nabkwan.” (Hosea 2:22)

²⁶Ebmou cok, Hosea biryi ato eboka ebmurubmou. “Er Imtamnyi biryi a nang ati, ‘Sunda Ni dam kun nang kum kurandum,’ minob eramwe. Eramwe ani, Erci a nang neik nang ati, ‘Sunda Er Imtamnyi Iya Kam kurutnyi dam kuboka mabwe nermabwe kurandum,’ ebkwande.” (Hosea 1:10)

²⁷Ura, Er Imtamnyi aminda kunubkwamwe dinyi ermuruna bobaramunyi yuknyi si Yesaya biryi uram doboka ato ebmou. “Sun Israel yala nang ara ilila mekwan katum dam kurande me winingna ato ninyi ilinto kunung asi, sun kankan aryi ninyi ilinto wenen dinyi dobdobkwaming bok, Er Imtamnyi biryi a nang kankan aryi kuboka ninyi mitik akwe wibdeiboka lebkwande.

²⁸Er Imtamnyi biryi sun im dangna tukwe dangna nang asi wenebkwande ati, Erci sunsi minola aryi diba ati wenebkwande.” (Yesaya 10:22-23)

²⁹Ura, Yesaya biryi ato kum ebmou cok, erci ato ebmou. “Er Imtamnyi Iya Mikibnyi biryi nunsi wenebmasou cok, bico tuba tenebmasou uca, ninyi nirya kum obkiribmasou. Nun Nai biryi nun kankan aryi ton nang kum lebte uca, nunda Sodom atei nang ara Er Imtamnyi biryi weneboka obkiribmou nang ato kibmatibyi. Tonda, Gomora atei nang ato kibmatibyi.” (Yesaya 1:9)

³⁰Ati, nunci una ebkwayeb do? Sun Er Imtamnyi Uram walwal nang ara, “Er Imtamnyi biryi nunsi dobdobsute,” tenen kum kuramnyi bok, Er Imtamnyi biryi sunti, “Ni mabwe nermabwe,” tenen dobdobmasou ati ebman. Ara, dib tenena deici aryi Er Imtamnyi biryi sunsi dobdobmou.

³¹Ba, sun Israel yala nang ara, “‘Ukubdarur-Ukuna mem,’ en uram kunubibyi uca, Er Imtamnyi biryi nunsi dobdobsute,” tenen ingkiringnamnyi bok, Er Imtamnyi biryi sunsi kum dobdobmou.

³²Unato ati Er Imtamnyi biryi sun Israel yala nang asi kum dobdobmou do? Ara, sunci, “Nun yuk aryi busul kuboka, ‘Ukubdarur-Ukuna mem,’ en uram kunubtibyi uca, Er Imtamnyi biryi nunsi dobdobsute,” tenen ingkiringnamnyi deyok aryi, Er Imtamnyi sunsi kum dobdobmou. Ati, sunci nun Du Yesus biti, “Nun li,” tenen dokdonokmai ati, sunci yan dum dukoka sangna keil deici aryi sakmang nang ato kibmai.

³³Ara, Er Imtamnyi Uram umbura aryi a deyok ati ebmou to sirya kunubmou. “Nira Imtamnyi bira Sion atei aryi yan dum dungna keil atonyi tikeibkwan. Ara, ninyi sangdeirin keil atonyi ton tikeibkwan. Uca, ninyi ilinto ara a keil deici aryi sakwaming. Ba, unanyi-unaner ara anyi bisi dib tenebingnyi uca, alyi kum kubkwaming.” (Yesaya 8:14; 28:16)