Read Futuna-Aniwa 1Korintus 10 Bible Online

1Korintus 10 - Futuna-Aniwa bible

1Korintus 10

¹Ura, ni kwityabwe, nun aibweyabwe minob kubde baramnyi nang ara Er Imtamnyi biryi lemna dinyi dobdobmai ani, Er Imtamnyi Uram kunubmurubde kum baramnyi uca, Er Imtamnyi biryi sunsi wenebde baramwe. Er Imtamnyi biryi nun aibweyabwe wenebde baramnyi deyok aryi, niryi nidamnyi ati, “Niryi Er Imtamnyi Uram diboka kum kunubmurubde barantinyi uca, Er Imtamnyi biryi nibabyi wenebnicei,” ebdanman. Ati, ni kwityabwe, niryi, “Nun aibweyabwe minob kuramnyi to walwal kubsicei,” tenen eterebkwinsin. Ara, nun Nai Imtamnyi biryi nun aibweyabwe Israel yala nang mutuk Mesir kuramnyi asi lebdeibmou ura, Erci sunsi taruk taleboka bobaramwe. Ara, nun Nai biryi menengbaramwe duwa biriman aryi nun aibweyabwe nirya asi bobindoka kalingnamwe. Bobindoka kalingnamuryi, Er Imtamnyi biryi ilila mekwan me bokeiboka cebdeibmou uca, nun aibweyabwe ab sun mabwe silib ababyi nirya aryi ilila mekwan bis kourbinmai.

²Nun aibweyabwe nirya asi Er Imtamnyi biryi Musa biriman aryi lebdeibmou deyok aryi, a nang nirya ara Musa si deici aryi me dongon nang ato kibmai uca, Musa miliramnyi nang kibmai ati ebman. Ara, Musa biryi sunsi lebdeiboka bobaramwe ba, nun aibweyabwe nirya ara menengbaramwe duwa asi miliramiryi, ilila mekwan me kourbinmai.

³Ura, nun aibweyabwe ara ninyi kun kum mutuk kuramiryi, sun nirya ara neik yina akwa yiramiryi, imtam aryi kuboka yina yiramnyi.

⁴Tonda, a nang nirya ara neik me akwe yiramiryi, Er Imtamnyi biryi kareramwe me yiramnyi. A me ara Er Imtamnyi biryi kareramwe keil aryi kuboka anaramwe. A keil ara nun Du Yesus Kristus kuramuryi, nun aibweyabwe asi tuba-tuba miliramwe ati ebman.

⁵Nun aibweyabwe ab sun mabwe silib nirya ab ara Er Imtamnyi biryi kareramwe me ab yin dinyi ab yiramnyi bok, nun Nai Imtamnyi biryi a nang kankan asi ninyi ilinto ati, “Ni li,” teneramwe. Ara, nun aibweyabwe ilinto aryi Er Imtamnyi urasintam aryi malyi kuramnyi deyok aryi, Er Imtamnyi biryi sunti, “Nun li,” teneramuryi, diboka weneramwe. Diboka weneramwe uca, a nang ara dibsekde baramnyi uca, sun nong ara ninyi kun kum mutuk aryi kuboka bisik ai noutam aryi dantam-dantam kuboka saksekmai.

⁶Ura, nun aibweyabwe kuramnyi to ara nunda ukuryok kubde baramib nang aryi diboka teneibibiryok, “Nunbabyi neik dinyi ukuboka malyi kun dinyi kubibyei,” tenebkwayeb. Ati, nun aibweyabwe aryi, “Malyi dinyi yuk-yuk kunubtibyi,” tenen kunubde baramnyi to, nunbabyi neiktoto ukubibyei.

⁷Nun aibweyabwe kankan asi ton nang ara kwemdina molon nang kuramnyi ati, sunci, “Nunbabyi neiktoto kwemdina molon nang kibibyei,” tenen kalikdandarur. Er Imtamnyi Uram umbura aryi nun aibweyabwe malyi kuramnyi deyok ati ato eboka kerek sekeibmou. “Sun Israel yala nang ara, ‘Yina yibkwayeb, me yibkwayeb,’ tenen bukmai. Sirya yibmai ani, sunci tikokmai ura, mot seboka kwemdina molobmai.”

⁸Tonda, nun aibweyabwe kankan asi ton nang ara talyi ati yordaramnyi ati, nunci, “Nunbabyi neiktoto talyi yobdabibyei,” tenena teleb. Uki tentok tum aryi berekmou ura, ninyi yubwa-yubwa yuryibina welebina ilinto aryi talyi yobdanmai ba, Er Imtamnyi biryi weneboka ninyi dua puluh tiga ribu baryi obmou.

⁹Nun aibweyabwe kankan asi ton nang ara, “Malyi kun dinyi kunubde baramibyi uca, Er Imtamnyi biryi nunsi minola kum wenebkwansir,” tenen ukurderamiryi malyi dinyi ukuramnyi. Ura, Er Imtamnyi biryi, “Wenebkwan,” tenen arukdeibmou uca, yu kwatima ilinto aryi yandoka si tobmai uca, ninyi ilinto dibsekmai. Ati, ni kwityabwe, sunci, “Nunbabyi neiktoto nun Du Yesus Kristus urasintam aryi malyi dinyi kubibyi uca, nun Du Yesus biryi nunsi wenebsicei,” tenen sundamnyi kalikdandarur

¹⁰Tonda, nun aibweyabwe kankan aryi ton nang ara, “Er Imtamnyi biryi tikeibmou uca kalingnansing nang uram tuba kum kekebkwayeb,” eramnyi. Ura, nun Nai Imtamnyi biryi, “Wenebkwan,” tenen arukdeibmou uca, Er Uram eryuryangan nang kankan asi tonyi biryi imtam aryi kuboka yuryanmou ura, a nang nirya asi obsekmou. Ati, ni kwityabwe, sunci, “Nunbabyi neiktoto ato malyi kun dinyi kubibyei,” tenen kalikdandarur.

¹¹Nun aibweyabwe aryi wenen dinyi dororamnyi ara nunda ukuryok kubde banub nang aryi diboka teneibkwayeb. Ara, “Nunbabyi neiktoto malyi dinyi kunubtibyi uca, neiktoto wenen dinyi dobdobibyei,” tenebkwayeb. Ati, Er Imtamnyi Uram umbura aryi nun aibweyabwe kuramnyi to nirya asi kerek sekeibmai ara nunda sirya kobdob talak aryi kubde baramib nang ati, “Malyi dinyi kum kunubting,” tenen kerek sekeibmai.

¹²Ati, ni kwityabwe, sunci sundamnyi ati, “Malyi tenen dinyi nun kanya dam anabsici ababyi nunci malyi kun dinyi katabum eboka bisik sekwayeb,” tenebdamunyi ababyi, sunci sundamnyi kalikdandarur. “Sun, ‘Katabum eboka Er Imtamnyi bisi milinub,’ tenerdan nang ababyi sundamnyi kalikdandoka malyi dinyi dobdobingnyei,” tenen ato ebman.

¹³Ura, “Kanbabyi malyi dinyi dobdobdum,” tenen dinyi ara sun kanya dam yuk-yuk asi weksici ababyi sunci ilil kanya bobmunyei. Ato tenen dinyi ara yuk nang kanya ababyi wengdur ati ebman. Ati, sunci, “Malyi tenen dinyi ara bisik sekmanto kum dinyi ni kanya wekmanir se,” ebmunyei. Tonda, nun Nai Imtamnyi bira Erci ebdeibmou to diboka kunurutnyi biryi sunsi milibkwansir. Ati, nun Nai biryi, “Ato-ato kubmunyi ura, malyi kun dinyi muna kibdongobkwandum,” eboka sunsi lak eterebkwansir. Ati, Er Imtamnyi biryi lak eterebsici dinyi kunubmunyi uca, sunci katabum kanya boboka malyi kun dinyi bisik sekdarur.

¹⁴Ni kwityabwe. Er Imtamnyi biryi sun kwemdina molon nang asi wenerur deyok aryi, sunci, “Kwemdina dinyi molobibyei,” tenen kwemdina molon dinyi kisibdobdarur.

¹⁵Sunda bikdob nang kurandum deyok aryi, sunci ni ebmasin uram ati, “Bikdob en uram ebmasir do kum do?” tenen lilibmun ci, wibdeibdarur.

¹⁶Nunda dib tenen nang ara, “Nun Du biryi nunti dibmasou,” tenen roti toboka yiramibiryi, co du yung yiramib. Ara, nunci nun Nai Imtamnyi bisi, “Ei nun Nai,” ebibiryi, moyok doboka co du yung yiramib. Ara, nunci co du yiramib ara, “Nun Du Er ining diksakmou ara nunda Er dam kun nang ati diksakmasou,” tenen yiramib. Tonda, nunci roti toboka yiramib ara, “Nun Du Erdamnyi karebdandoka dibmou ara nunda Er dam kun nang ati dibmasou,” tenen yiramib.

¹⁷Nunda dib tenen nang nirya ara nun Du Yesus ab tonkwa antanibdeibsou nang kunub deyok aryi, nun Du Yesus ab tonkwa nong tentok ato kunub. Ara, nun nirya ara ninyi ilinto kunub bok, nong tentok ato kunub. A deyok aryi, nunci, “Nunda dib tenen nang yuk-yuk kunub bok, nunda nun Du Yesus biriman aryi nong tentok ato kunub,” tenen roti tentok akwe toboka tonkwa yiramib.

¹⁸Ni kwityabwe, Sunci, “Sun Israel yala nang ara Musa Uram tuba kunubde baraming nang aryi una kuboka Er Imtamnyi bisi dama deiriraming do?” tenebdarur. Sun Israel yala nang ara Er Imtamnyi bisi dama deiriraming ba, sunci dama asi sengnaming ura, dama sekdoba ton dinyi Er Imtamnyi bisi deiriramingiryi, dama sekdoba yuk dinyi asi yiraming ati ebman. Ara, sunci, “Nunda Er Imtamnyi dam kun nang kunub,” tenen sunci Er Imtamnyi bisi dama deirin dinyi sekdoba ton yiraming.

¹⁹Ura, sun kwemdina molon dinyi asi dama deiboka dama sekdoba yiraming nang ara ato dinyi kuramingiryi, sundamnyi kwemdina molon dinyi dam kun nang kimdaramingiryi. Ati, niryi, “Kwemdina molon dinyi ara mikib dinyi kurur,” tenen ato ebman do? Ato tenen kum. Tonda, niryi, “Kwemdina molon dinyi asi dama deirin dinyi ara mikib dinyi,” tenen ato ebman do?

²⁰Ato tenen kum. Kwemdina molon dinyi ab kwemdina dinyi asi dama deirin dinyi ab ara talyi dinyi akwe kurur ati ebman. Ba, sun kwemdina molon nang aryi dama deiriraming ara Er Imtamnyi bisi dama kum deiriraming. Erda, isa asi dama deiriraming. Ba, sunda Korintus nang ara nun Du Yesus dam kun nang kurandum deyok aryi, niryi sunti, “Isa dam kun nang kibdangnyei,” tenen, “Yuk nang aryi kwemdina molon dinyi asi dama deibmangnyi dama sekdoba asi yibingnyei,” tenesunun.

²¹Sunda nun Du Yesus dam kun nang kurandum deyok aryi, sunci sundamnyi isa dam kun nang kibdamunyei. Sunci nun Du Yesus Er tub ab ining ab yirandum deyok aryi, sunci isa asi yangabde deirirban dinyi aryi yibmunyei.

²²Ba, nunda dib tenen nang ara, “Nun Du biryi yu weik kibsute ara malyi,” tenebtibiryok, kwemdina molon dinyi asi dama deiboka yibtibyi do? Ato tenen kum. Tonda, nunci, “Kwemdina dinyi asi dama deiboka yibtibyi uca, Er Imtamnyi biryi nunsi kum wenebsute,” tenebtibyi do? Ato tenen kum. Nunci nundamnyi ati, “Nunda mikib nang kunub ati Er Imtamnyi bisi bisik sektibyi uca, muna kibtibyi,” tenebtibyi do? Ato tenen kum.

²³Nunda dib tenen nang ara tabwe lobdeibsou nang kunub deyok aryi, nunci nun kanya dam aryi teleb tenebmabyi dinyi du moun dinyi asi ur kunurantibyi. Ato ebman bok, nun tenebmabyi dinyi utotoa nirya ara du moun dinyi kum kurur ati, nunci ato dinyi kunubibyei. Du moun kum dinyi kunubmatibyi uca, nunsi teleb kum kubdeibmasute. Tonda, nun tenebmabyi dinyi utotoa nirya ara nun kwityabwe dib tenen dinyi asi katabum erdeirin dinyi kum kurur.

²⁴Nunda dib tenen nang ara tabwe lobdeibsou nang kunub cok, nunci, “Nundamnyi teleb kibdeibdankwayeb,” tenen kubibyei. Erda, “Nun kwityabwe yuk nang asi teleb kubdeibkwayeb,” tenen kunubde binkwanub.

²⁵Ati, sunci, “Dengtamurdan dam bindoka bisam tub dekwayeb,” tenebmun ci, sunci bisam tub ur dekdarur. Ara, “A bisam tub ara kwemdina molon dinyi asi dama deibmang do kum do?” tenen kum asibdemun ci, sunci ur dekoka yibdarur.

²⁶Er Imtamnyi Uram umbura aryi ato eboka sekeiamnyi. “Nun Nai Imtamnyi biryi im dangna tukwe dangna nirya kikniamwe deyok aryi, utotoa nirya Er dinyi kurur.” (Mazmur 24:1) A deyok aryi, sunci, “Bisam tuba nirya ababyi Er Imtamnyi dinyi kurur,” tenen bisam tub ur dekyibdarur.

²⁷Tonda, dib tenen kum nang aryi, “Yina tonkwa yibkwayeb,” eboka sunsi du dongobmasingnyi ura, sunci sun yangabsingnyi yina nirya asi ur yibdarur. Ara, “A yina asi kwemdina asi dama deibmang do kum do?” eboka asirdena mem. Erda, sunci, “Ur do mem do?” tenen asirden dinyi kum asibdemun ci, a yina asi ur yibdarur.

²⁸Ba, tonyi biryi, “A yina ara kwemdina asi deibmang yina kubmar,” eboka lak ebsici uca, sunci a yina yibmunyei. Ara, “Nunci yibtibyi uca, nun kwit lak ebmaranyi bibabyi miliboka yibci uca, nunci ersi malyi kibdeibtibyi,” tenen sunci a yina yibmunyei. Ara, sun kwit biryi sirya yibte uca, erci er kanya dam aryi, “Kwemdina dama deirin dinyi yibman ara kwemdina molonanyi bitonyi kibdanman se,” tenebte ati ato ebman.

²⁹Ura, sunci sun kanya dam aryi, “Kwemdina asi dama deirin dinyi ababyi ur yinmanuba,” tenen bingdamun bok, sun kwit dib tenenanyi biryi sunsi, “A yina ara kwemdina asi deibmang yina kubmar,” eboka lak ebsici ura, sunci a yina asi yibmunyei. Ara, anyi biryi er kanya dam aryi, “Mem,” tenerur deyok aryi sunci a yina yibmunyei. Ba, sunci sun kanya dam aryi, “A dinyi ara mem dinyi kuma,” tenen bikmun ba, sun, “A dinyi ara mem dinyi,” tenen nang aryi sunti, “Manmalibmang se,” tenebsingnyei. Sunda tabwe lobdeibsou nang kundarur deyok aryi, yuk nang aryi dibliliboka, “Manmalibmang se,” tenebsingnyei.

³⁰Ura, nunci, “Yina yibkub,” tenen Er Imtamnyi bisi, “Kanci a yina asi karebmasirim ati, ei nun Nai,” ebibyi asi yuk nang aryi, “Kwemdina asi dama deirin yina yibmarum ati manmalibmarim se,” eboka tatab-tatab ebsingnyei.

³¹Ati, nunci, “Yina yibkub,” tenebibyi ababyi, “Me yibkub,” tenebtibyi ababyi, “Yuk dinyi-yuk dinyi kubkwayeb,” tenebibyi ababyi, nunci, “Yuk nang aryi, ‘Er Imtamnyi bira Iya Erebdobnyi kurur,’ tenen bikwaming ati, nunci Er Imtamnyi biryi teleb tenesurur to kunubde binkwayeb,” tenen kubkwayeb.

³²Ura, sunci, “Ninyi nirya ara nun Du Yesus bisi milibting,” tenen sunci sundamnyi kalikdamun ci, yuk nang aryi, “Mem,” tenen dinyi kubmunyei. Ara, “Sun Yahudi yala nang ababyi, sun Yahudi yala kum nang ababyi, nun Du bisi milibting,” teneramun ci, sundamnyi kalikdandarur. Tonda, “Sun dib tenen nang ababyi nun Du bisi tanglona kum uca milibting,” teneramun ci, sundamnyi kalikdandarur. Ara, sunci yuk nang aryi, “Mem,” tenen dinyi kurandum asi a nang ababyi miliboka kubingnyi ura, a nang ara, “Malyi dinyi kubmab se,” tenen sundamnyi lukoka obdankwaming. A deyok aryi sunci sundamnyi kalikdamun ci, yuk nang aryi, “Mem,” tenen dinyi kubmunyei ati ebman.

³³Ni Paulus bira, “Yuk nang aryi Er Imtamnyi lemsin dinyi dobdobting,” tenena akwe kunun cok, niryi tanglona kum uca ninyi nirya asi teleb kibdeibde banun. Ati, niryi, “Nidamnyi asi teleb kibdeibdankwan,” tenen kum kunun. Erda, “Yuk nang asi teleb kibdeibkwan,” tenena akwe kunun. Ara, niryi, “Yuk nang asi teleb kibdeibnyi uca, sunci Er Imtamnyi biryi lemsin dinyi dobdobting,” tenen kubde banun. Ura, niryi ato tenen kunubde banun to, sunbabyi neiktoto sun yuk nang asi teleb kibdeibdarur.