Read Futuna-Aniwa 1Korintus 13 Bible Online

1Korintus 13 - Futuna-Aniwa bible

1Korintus 13

¹Yuk nang asi boukwe kimna ara iya bikdob dinyi kurur ati ebman. Ati, nunci boukwe kimna kum uca, sun im dangna tukwe dangna nang aryi uram yuk-yuk nirya asi bikoka danguboka erantibiryok, nunci talyi uram en nang akwe kurantibyi. Tonda, nunci yuk nang asi boukwe kimna kum uca, Er Imtamnyi Uram eryuryangan nang aryi sisingnaming uram bikoka danguboka erantibyi ababyi, nunda talyi uram en nang akwe kurantibyi. Lonceng kum nyeng-nyeng erande dinyi yuk dinyi kum ara lilim weik lak erande bok, uram diboka kum erande deyok aryi, ninyi aryi, “Una ebmar do?” tenen kankana kuraming. Sun boukwe kimna kum uca sun kwityabwe aryi bingna kum uram sisingnamingnyi nang ababyi, neiktoto talyi dinyi akwe eraming ati ebman.

²Tonda, nunci yuk nang asi boukwe kum kimnantibiryok, Er Imtamnyi ebdeibmaci uram nirya bikoka ninyi urasintam aryi bobarantibiryok, nunda talyi uram en nang ato akwe kurantibyi. Tonda, nunci yuk nang asi boukwe kum kimnantibiryok, dib en uram bikdob dinyi nirya liliboka bingnantibyi uca, nunda talyi uram en nang ato akwe kurantibyi. Tonda, nunci boukwe weik kimna kum uca, katabum eboka dib tenerantibyi uca, nunda talyi nang ato akwe kurantibyi. Ara, nunci dib tenena mikib weik biriman aryi mutuk kon asi, “Kisibdoboka yuk mutuk bina bukdobdum,” ebtibyi uca, mutuk kon kisibdoboka yuk mutuk bina bukdobmote ababyi, nunda yuk nang asi boukwe kimna kum nang kurantibyi deyok aryi, talyi nang ato akwe kurantibyi.

³Tonda, nunci yuk nang asi boukwe kimna kum uca, nun taleramibyi bona bon dinyi nirya doboka sun bona bon kum nang asi karebtibyi ababyi, nunda talyi nang akwe kurantibyi. Tonda, nunci boukwe kimna kum uca, “Ninyi aryi domkiriksingnyi aryi nisi taleboka uk dam ur donoksiting,” tenerantibyi ababyi, ato tenen kun dinyi ara nunsi teleb kum kubdeibsute.

⁴Ninyi boukwe kimnantibyi ara ninyi aryi nunsi mambul kimdeirisingnyi ababyi namin kanya borantibyi. Tonda, ninyi boukwe kimnantibyi ara yuk nang ati teleb kurdeirirantibyi. Sun boukwe weik kimna nang ara yu kanya boboka yuk nang ati, “Sun bi yuk teleb dinyi dororaming to, nun bi yuk dobdobtibyi se,” tenen kanya kum bonung. Tonda, boukwe kimna nang ara, “Nunda iya teleb nang kunub,” eboka sundamnyi ererdeirirdana kum kuraming. Tonda, a nang ara, “Nunda yuk nang asi bisibkaboka iya teleb nang kunub,” tenerdana kum kuraming.

⁵Boukwe kimna nang ara yuk nang asi uram kum yariraming. Tonda, “Ni dinyi akwe ingkirikwan,” tenerdana kum kuraming. Boukwe kimna nang ara yu dinyi minola kum teneraming. Yuk nang aryi malyi kun dinyi asi sunci sun kanya dam aryi tuba-tuba kum teneiriraming.

⁶Boukwe kimna nang ara, “Malyi kun dinyi ara nun kanya teleb kimdeirisurur, tenena kum kuraming,” teneraming. Erda, “Dib dinyi akwe nun kanya teleb kimdeirisurur,” teneraming.

⁷Boukwe kimna nang ara yuk nang ati, “Malyi dinyi kurantingnyi ababyi nunci alyi kibdongobibyei,” teneraming. A nang ara yuk nang ati, “Tola uram kum eraming,” teneramingiryi, sun kanya asi deiriraming. Sun boukwe kimna nang ara yuk nang ati, “Teleb dinyi ukubkwaming,” teneibde tuba-tuba dibde buraming. Mambul dinyi sun dam yangaci ababyi, sun boukwe weik kimnaming nang ara tanglona kum uca boukwe kimnaming.

⁸Boukwe kimna dinyi ara sunglona kum uca iya kubkwande. Ba, “Er Imtamnyi biryi aminda aryi ato-ato kubkwande,” ermuruna ara tiya dinyi akwe kurur. Tonda, Er Imtamnyi Kanya Roh Kudus biriman aryi ninyi aryi bikman kum uram yuk-yuk asi lak ena ababyi tiya dinyi akwe kurande. Tonda, dib en uram bikdob dinyi bingna ababyi tiya dinyi akwe kurur. A ebmasin dinyi nirya ara kum dankwande bok, boukwe kimna dinyi ara iya kubkwande.

⁹Nunda tukwetam tuba kuramib nang ara ton dinyi bingnub cok, yuk dinyi bingna kum kuramib. Tonda, nunci Er Imtamnyi ebdeibmaci dinyi ninyi urasintam aryi bobaramiryok, ton dinyi bikoka bobaramibiryok, yuk dinyi asi bingna kum kunub ati ninyi urasintam aryi bobana kum kuramib.

¹⁰Ura, aminda kubde binkwayeb talak ara Er Imtamnyi biryi karebsici uca, sunglon dinyi nirya asi kum dankwande. Erda, sunglon kum dinyi akwe iya kubkwande.

¹¹Niryi kiklina uram ton doboka kiklibdeibkwinsin. Nunda minob ura mitik mabwe kuramaburyok, mitik mabwe uram akwe eboka sisingnamoubwe. Tonda, mitik mabwe tenen dinyi akwe teneramoubwe. Ani, nunda sirya nebdobmoubwe uca, nunci mitik mabwe uram takloboka nebdobingnyi nang uram akwe eboka sisingnamib. Tonda, mitik mabwe kubde baramoubwe to ababyi taklobmoubwe ura, nebdobingnyi nang kubde baramingnyi to akwe kunubde baramib.

¹²Ukuryok kubde baramib ara sunglona kum tuba kum kuramib deyok aryi, dib en uram anmalakoka bingna kum kuramib. Erda, kimil aryi asing diraming nang ara dib dinyi anmalakoka kum diraming to, nunbabyi dib dinyi anmalakoka asing kum eiriramib. Erda, mekwan kukiya ato dinyi akwe asing eiriramib. Ani, aminda aryi sunglon dinyi tuba kum dankwande ati, nunci anmalakoka dib dinyi asing eibkwayeb. Ukuryok kubde baramib ara mitik-mitik akwe bingnamibyi ani, aminda aryi langdeiboka bikdobkwayeb. Ara, nun Nai Imtamnyi biryi nunsi langdeiboka bingsurur to, nunbabyi dib dinyi nirya asi langdeiboka bikdobwayeb.

¹³Ati, imtam aryi kuboka karesin mikib dinyi yuk-yuk ara tiya dinyi akwe kurande ani, aminda aryi kum dankwande. Ba, iya kubkwande dinyi ara winiryi kurur: Dib tenen dinyi ton, dibde bun dinyi ton, boukwe kimna dinyi ton iya kubkwaming. Ba, a dinyi nirya asi bisibkaboka iya bikdob dinyi ara boukwe kimna dinyi kurur.