Read Futuna-Aniwa 1Korintus 14 Bible Online

1Korintus 14 - Futuna-Aniwa bible

1Korintus 14

¹Ati, ni kwityabwe, sunci, “Boukwe weik kibdankwayeb,” tenen sunci sun mamun boukwe weik kibdandarur. Boukwe weik kibdamun cok, sunci, “Sun dib tenen nang yuk nang asi katabum ebdeibkwayeb ati, Er Imtamnyi Kanya Roh Kudus aryi nunsi Er wa irmilina ati mikib dinyi ton karebsute,” tenen busul kuboka ingkirikdarur. Ura, sunci Er Imtamnyi wa irmilina ati mikib dinyi yuk-yuk asi ur ingkirikdatiryok, sunci, “Er Imtamnyi biryi aminda aryi kubkwande dinyi asi bikoka ermururantibyi,” tenen nunukaboka ingkirikdarur.

²Er Imtamnyi Kanya Roh Kudus aryi karebde barur uca, dib tenen nang ton nang ara ilila uram yuk nang aryi bingna kum uram deib aryi sisingnaming. A nang ara ilila uram deib aryi uram eraming asi Er Imtamnyi bitikwa bingdur. Ara, ato en uram deib aryi uram sisingnaming ara Er Imtamnyi bitikwe ab uram sisingnaming. Yuk nang aryi ato en uram kum bingnung. Sun ilila uram deib aryi sisingnamingnyi nang ara Er Imtamnyi Kanya Roh Kudus biriman aryi minob lak kum kuanci dinyi ilinto bikoka ebtingiryok, yuk nang asi laktoto kum eraming. Yuk nang aryi bikman kum uram deib aryi ilila uram sisingnamingiryok, yuk nang asi katabum kum erdeiriraming. A deyok aryi, niryi sunti ato ebmasin. Ilila uram ara yuk nang aryi bingna kum uram deib aryi uram sisingna ara teleb dinyi kurur bok, sunci, “Ilila uram deib aryi uram sisiktibyi,” tenen iya nunukaboka ingkirikmunyei.

³Ba, sun Er Imtamnyi biryi ebdeibmaci uram bikoka lak eteren nang ara yuk nang aryi bingnaming uram deib aryi eramingiryok, Er Imtamnyi Uram ermururaming. Uca, sun a uram kekeramingnyi nang kanya kankana kum kurur. Erda, a lak ena uram biriman aryi sun dib tenen kanya ara tabakoka katabum ebkwande. Tonda, a lak ena uram biriman aryi sun kanya ara tabakoka teleb kibkwande.

⁴Ba, sun ilila uram deib aryi eramingnyi nang ara yuk nang aryi bingna kum uram deib aryi eraming deyok aryi, yuk nang kanya asi katabum kum erdeiriraming. Erda, sun mining kanya akwe katabum erdeiriraming. Ba, “Er Imtamnyi biryi ato-ato kubkwande,” ermurun nang ara tukwe nang aryi bingnung uram deib aryi ermururaming deyok aryi sun mining kanya akwe katabum kum erdeiriraming. Erda, sun bulubmangnyi dib tenen nang kanya nirya asi katabum erdeiriraming.

⁵Ni kwityabwe, Er Imtamnyi Kanya Roh Kudus aryi karebsute uca, sun nirya ara ilila uram deib aryi uram sisingnandate. Ato ebman cok, niryi iya nunukaboka tenesunun to ebkwinsin. Er Imtamnyi Kanya Roh Kudus aryi karebsute uca, sun nirya ara, “Er Imtamnyi biryi aminda aryi ato-ato kubkwande,” eboka ermuruna teleb. Ara, tukwe nang aryi bingnung uram deib aryi Er Imtamnyi Uram ermuruna teleb. Ato kun dinyi ara nunukoka ingkiringna dinyi kurur ati ebman. Ilila uram deib aryi erandinyi bira teleb dinyi kurande bok, ninyi bingnaming uram deib aryi lak erandinyi bira bisibkaboka iya teleb dinyi kunurande. Ba, ilila uram deib aryi erandinyi bira, “Ato-ato ebmasin,” eboka uram danguboka lak ebte uca, erbabyi sun er uram keken nang kanya katabum ebdeibkwante.

⁶Ura, ni kwityabwe dib tenen nang. Niryi sun urasintam aryi yandoka ilila uram deib aryi uram ebtinyi uca, ato en uram ara sunti teleb kubdeibsute do? Ato tenen kum. Sunci ilila uram ati walwal kurandate deyok, ato en uram ara sunti teleb kum kubdeibsute. Ba, niryi lak uram deib aryi, “Dib en uram ton eterebkwinsin,” eboka lak eterebtabaksitinyi uca, a uram ara sunti teleb kubdeibsute. Tonda, niryi lak uram deib aryi, “Aminda aryi ato-ato kuboka kunubkwande,” en uram kum, bikdob uram kum, minob lak kum kuanci uram kum eterebsitinyi uca, a uram ara sunti teleb kubdeibsute.

⁷Niryi tukwetam dinyi kankan asi isin neb-neb en kum dinyi dobniryok, kiklina uram ton ebkwinsin. Ara, tukwetam nang aryi bilul on dinyi doboka kiklibkwansin. Ara, bilul on dinyi si kecapi ara lilim yuk-yuk kum ebte uca, erda lilim tentok akwe ebte uca, nunci, “A mot semar,” tenen, “O mot semar,” tenen biktibyi do? Ato tenen kum. Tonda, isin u ebdongon bilul si seruling ababyi neiktoto lilim yuk-yuk kum ebte uca, nunci, “A mot semar,” tenen, “O mot semar,” tenen biktibyi do? Ato tenen kum.

⁸Tonda, buena si sangkakala ara lilim yuk-yuk kum ebte uca, sun yin doun nang aryi, “Unato ati sangkakala dobmang do?” tenen bikting do? Ara, “Mar ordankwayeb ati sangkakala dobmang do kum do?” tenen sun yin doun nang kanya ara kankana kubte.

⁹Ura, nunda dib tenen nang ababyi neiktoto kunub. Nunda ilila uram deib aryi uram ebtibyi uca, yuk nang aryi, “Ato-ato eboka eterebmasing,” tenen bikting do? Ato tenen kum. Ninyi tentok ababyi nun uram kum biksiting deyok aryi, nunci talyi ati ebtibyi.

¹⁰Im dangna tukwe dangna nang yala yuk-yuk ara uram yuk-yuk eboka sisingnamingiryok, sun mining uram kekeramingiryok, “Ato-ato ebmang,” tenen bingdaraming.

¹¹Ura, niryi yuk yala nang uram kum bingnantinyi uca, ni walwal uram deib aryi uram sisingnandinyi bira niti, “Yuk mutuk aryi kuboka yangananyi kurur ati walwal uram erur,” tenebnute. Tonda, niryi walwal uram deib aryi sisingmanirinyi biti, “Yuk mutuknyi kurur ati walwal uram erur,” tenebtinyi.

¹²Ati, sunbabyi neiktoto yuk nang aryi bingna kum uram deib aryi eterebdamunyei. Erda, yuk nang aryi bingnaming uram deib aryi eterebdandarur. Sunci, “Er Imtamnyi Kanya Roh Kudus karebsute uca, Er wa irmilina ati mikib dinyi yuk-yuk dobdobtibyi,” tenen busul kuboka ingkiringnandum deyok aryi, sunci, “Dib tenen nang yuk nang kanya asi katabum ebdeibkwayeb ati mikib dinyi dobdobtibyi,” tenen ingkirikdarur.

¹³Ati, sun kankan kuboka tukwe nang bingna kum uram deib aryi uram eramingnyi nang ara, “Lak uram deib aryi eterebtinyi,” eboka Er Imtamnyi bisi molona teleb. Ara, “Nai, Kanci mikib dinyi karebniminyi uca, niryi Kan uram asi danguboka lak eterebtinyi,” eboka molona teleb.

¹⁴Ura, nunci Roh Kudus aryi karebsici ilila uram deib aryi eboka Er Imtamnyi bisi si weik eboka molobtibyi ara nun mining dib tenen kanya dam dem aryi kuboka molobtibyi. Ba, yuk nang ara nun molobtibyi tok kekebtingiryok, nun molobtibyi deyok bingna kum kuranting deyok aryi, nun molona deib aryi dib tenen nang yuk nang kanya asi katabum kum ebdeibtibyi. Ato kubtibyi uca, nunci bikdob tenen dinyi kum kunubtibyi.

¹⁵Ati, nunci una kubkwayeb do? Niryi ilila uram yuk nang aryi bingna kum uram ebniryok, ni mining dib tenen kanya biriman aryi Er Imtamnyi bisi molobkwan. Ba, niryi nisintum bikdob kanya bobniryok, lak uram deib aryi molobkwan. Tonda, niryi ilila uram yuk nang aryi bingna kum uram ebniryok, ni mining dib tenen kanya biriman aryi Er Imtamnyi si weik eboka mot sebkwan. Ba, niryi nisintum bikdob kanya bobniryok, lak uram deib aryi Er Imtamnyi si weik eboka mot sebkwan.

¹⁶Ura, sunci sun dib tenen kanya aryi ilila uram deib aryi Er Imtamnyi bisi, “Ei nun Nai,” ebdate uca, sun uram kekeransingnyi nang ara a uram ati walwal kuranting. Walwal kuranting deyok aryi, a nang ara una kuboka, “Amin, dib sirik,” ebting do?

¹⁷Ara, sunci ilila uram deib aryi Er Imtamnyi bisi diboka, “Ei nun Nai,” ebdate bok, sun dib tenen nang yuk nang ara a uram kum bikting deyok aryi, sun uram ara sun kwityabwe sun kanya asi katabum kum ebdeibte.

¹⁸Sunda Korintus nang ara ilila uram yuk-yuk deib aryi erandum bok, ni Paulus bira sunsi bisibkaboka ilila uram yuk-yuk ilinto asi bingnun. A ilila uram yuk-yuk asi bingnun deyok aryi, niryi nun Nai Imtamnyi bisi, “Ei nun Nai,” enun.

¹⁹Ilila uram yuk-yuk asi bingnun cok, ni ab dib tenen nang yuk nang ab tonkwa bulubmabyi ura, niryi ato uram deib aryi kum eterenun. Ati, niryi, “Yuk nang aryi bingna kum uram deib aryi seribu kata kum ebkwan,” tenen kunun. Erda, niryi, “Dib tenen nang yuk nang asi lima kata akwe eterebtinyi bok, lak uram deib akwe eterebtinyi,” tenen kunun.

²⁰Ni kwityabwe dib tenen nang. Sunci mitik mabwe tenen dinyi taklobmun ci, nebdob nang tenen kanya bobdarur. Tonda, mitik mabwe kanya ato bobmun ci, malyi kun dinyi kisibdobdarur.

²¹Er Imtamnyi Uram umbura aryi ato eboka minob kerek sekeiamnyi. “Er Imtamnyi biryi, ‘Ni dam kuramnyi nang asi wenebkwan,’ tenen ato ebmou. ‘Niryi arukdeibnyi uca, yuk mutuk nang aryi yandoka sun mining uram ara Ni dam kuramnyi nang aryi bingna kum uram deib aryi ebkwaming. Nira Imtamnyi biryi Ni dam kuramnyi nang asi uram tuba ebkwan bok, sunci Ni uram kum kekebkwaning se.’” Ara, Er Imtamnyi Uram umbura aryi kerek sekeiamnyi to, sun Er Imtamnyi dam kuramnyi nang aryi yuk uram ara sun bingna kum uram deib aryi eterena uram kum kekeramnyi. Ato kuboka sun dib tenen nang aryi ilila uram ara tukwe nang aryi bingna kum uram eramunyi ura, sun uram keken nang aryi, “Una ebmang do?” tenen kum bikoka sun uram kum kekebkwaming.

²²Ura, ni kwityabwe, ilila uram deib aryi Er Imtamnyi Uram enub ara, “Sun dib tenen nang eterebkwayeb,” tenen enub. Erda, “Sun dib tenen kum nang eterebkwayeb,” tenen enub. Ara, “Sun dib tenen kum nang aryi ilila uram kekebingiryok, sunci, ‘Er Imtamnyi biryi wenebkwansir,’ tenen bikting,” tenen ilila uram enub. Ba, nunci, “Sun dib tenen nang ara, ‘Er Imtamnyi biryi kisal dakwansir,’ tenen bikting,” tenebibiryi, ilila uram kum enub. Bok, “Er Imtamnyi biryi ato-ato kubkwande,” en uram ara yukto kurur. Ato en uram ara, “Sun dib tenen kum nang eterebkwayeb,” tenen kum enub. Erda, “Sun dib tenen nang eterebkwayeb,” tenen lak ebkwanub. Ara, sun dib tenen nang aryi, “Er Imtamnyi biryi kisal dakwansir,” tenen bikwaming ati nunci lak en uram deib aryi, “Er Imtamnyi biryi ato-ato kubkwande,” enub.

²³Ura, nunda dib tenen nang nirya bulubtibyi ura, nun nirya ara Roh Kudus aryi karebsici to ilila uram yuk-yuk ebtibyi uca, ato dinyi ara teleb dinyi kubte do? Ato tenen kum. Dib tenen nang ton nang ara a ilila uram yuk-yuk ati walwal kuraming deyok aryi, sunci sunti, “Walina talen nang aca,” tenebkwanting. Tonda, dib tenen kum nang aryi yandoka ilila uram kekebting uca, sunci sunti, “Lub kanya bon nang aca,” tenen ebdankwaming.

²⁴Ba, nunda dib tenen nang nirya bulubmabyi ura, nun nirya aryi lak ena uram deib aryi, “Er Imtamnyi biryi ato-ato eboka lak ebdeibmasir,” ena teleb. Ura, dib tenen kumnyi wengyate ura, erci a uram deyok anmalakoka bikdobkwante. Ara, Er Imtamnyi Uram bingna kumnyi wengyate ura, erbabyi a uram anmalakoka bikdobkwante. Ara, dib tenen kumnyi biryi a lak ena uram kekebte uca, “Nira malinyi kunun,” tenen bikdobkwante. Tonda, erci, “Ni malyi kun dinyi kum taklobnyi ura, sun dib tenen nang nirya aryi ni malyi deyok lilibkwaming,” tenen bikdobkwante.

²⁵Tonda, nunci Er Imtamnyi Uram lak en uram deici aryi ebmurubibyi uca, ninyi kanya dam aryi malyi tenen dinyi inirdeirirdaraming ababyi lak kimsurur. Uca, sun dib tenen kum nang ababyi, “Malyi dinyi kuramoubwe se,” tenen sundamnyi luknubdongoboka Er Imtamnyi si weik ebkwaming. Er Imtamnyi si weik ebkwamingiryok, a nang ababyi nunda dib tenen nang ati, “Er Imtamnyi sun ab tonkwa diboka kubmarum,” eboka lak ebkwansing.

²⁶Ati, ni kwityabwe dib tenen nang. Nun una ebtibyi do? Sun dib tenen nang buluramunyi ura, ton nang ara Er Imtamnyi bisi erebdeiboka mot sebkwaming. Yuk nang ara dib en uram eterena uram eterebkwaming. Yuk nang ara Roh Kudus aryi sun kanya dam aryi anmalakoka etererur dinyi asi kekeramingiryi, sunci a dinyi ara minob ura lak kum kuanci dinyi ebmuruboka ninyi urasintam aryi lak eterebkwaming. Yuk nang ara ilila uram yuk nang aryi bingna kum uram deici aryi sisikwaming. Tonda, yuk nang ara ilila uram dangubingiryok, nun mining uram bingnamib uram deici aryi lak eterebkwaming. A dinyi yuk-yuk nirya ara, “Sun dib tenen nang bulubmangnyi nang nirya asi sun kanya asi katabum ebdeibtibyi,” tenen kunubde binkwanub.

²⁷Ura, sun kankan ton nang ara, “Ilila uram deici aryi sisiktibyi,” eransingnyi uca, sunci ato ebdarur. “Ninyi bitinyi kum winiryi kum ilila uram deici aryi sisikmangnyi ura, ilila uram sisingna asi taklobkwayeb.” Ebmun cok, sunci ato ebtabakdarur, “Ilila uram deici aryi ebmun cok, neik tum ebmunyei. Erda, tonyi ebde tonyi ebde bindarur.” Tonda, sunci ato ebdarur. “Ilila uram deyok bingnanyi biryi ilila uram danguboka lak kum ebsute ura, sunci nunsi ilila uram ebsumunyei.”

²⁸Ilila uram bikoka danguboka ebkwandanyi kum kubte ura, sun ilila uram deib aryi sisingnaming nang ara uram kilikwanung. Ara, a nang aryi sun kanya dam aryi Er Imtamnyi bisi ilila uram deib aryi ur ebting. Bok, a nang ara dib tenen nang urasintam aryi kubingiryok, ilila uram lak ebingnyei.

²⁹Ura, sunda dib tenen nang buluramun cok, sun Er Imtamnyi Uram ebdeibmaca eteren nang ababyi Er Imtamnyi Uram lak ebkwanung. Ara, Er Imtamnyi Uram ermurun nang bitinyi kum winiryi kum lak ebkwanung. Lak ebingnyi ba, sun uram keken nang aryi diboka liliboka, “A uram ara dib en uram do kum do?” tenebkwanung.

³⁰Ura, Er Imtamnyi Kanya Roh Kudus aryi dib tenenanyi ur bukmarinyi tonyi bisi er kanya dam aryi anmalakoka eterebtiryok, “Kanci ato-ato eboka minob lak kum kuamwe dinyi asi lak kibdum,” ebte ura, anyi biryi tikoka Er Imtamnyi Kanya aryi eterebmaci tok ur eterebkwandur. Ara, uram enanyi yumanyi biryi er uram takoka anyi bisi sokon loubkwandur. Sokon loubte ura, er kwit bira, “Roh Kudus aryi anmalakoka eterebmanir dinyi asi lak kibkwan,” tenen tikokdiryok, Er Imtamnyi Kanya Roh Kudus aryi er kanya dam aryi eterebmaci dinyi asi lak kibkwandur.

³¹Ara, sunda, “Er Imtamnyi biryi aminda aryi ato-ato dinyi kunubkwande,” eboka ermurun nang nirya ara tonyi ebde tonyi ebde baramun cok, Er Imtamnyi Uram ur ermurubdarur. Ato kubmun cok, sunci sun bulubmangnyi dib tenen nang kanya asi katabum ebdeibmun ci, dib en uram eterebkwandum.

³²Sun “Er Imtamnyi biryi aminda aryi ato-ato dinyi kunubkwande,” eboka ermurun nang ara walina talena deici aryi Er Imtamnyi Uram kum ermururaming. Erda, sunci sundamnyi kalikdandoka, “Er Imtamnyi Uram deib aryi ato-ato ebkwayeb,” tenen bikdandoka Er Imtamnyi Uram ermururaming ati ebman.

³³Nun Nai Imtamnyi bira walina talen dinyi ton ninyi kanya kankana kurdeirin dinyi yuk dinyi ati, “Ni li,” tenerur. Ba, nun Nai biryi teleb tenesurur dinyi ara, “Antanibdeibdandoka kubting,” tenesurur. A deyok aryi, niryi, “Sun Er Imtamnyi Uram ermurun nang ara sundamnyi kalikdandoka, ‘Ato-ato ebkwayeb,’ teneraming,” ati ebmasin. Ura, ni kwityabwe, sun dantam-dantam nirya aryi kuboka buluramingnyi dib tenen nang aryi kunubde baraming to lak ebkwinsin.

³⁴Sun dib tenen nang tonkwa buluramingnyi ura, sun nerabwe ara uram kilikwanung. Ara, “Sun nerabwe ara sun bulubmangnyi nang urasintam aryi uram ton lak eterebingnyei,” tenen deyok aryi, “Uram kilikting,” ebmasin. Erda, Er Imtamnyi Uram umbura aryi esurur to, “Sun nerabwe ara sundamnyi luknubdongobdandoka sun akenyi uram kekebkwanung.”

³⁵Ura, nerabwe ara Er Imtamnyi Uram ati, “Diboka biktibyi,” tenen kubting ura, sunci sun akenyi asi, “Eterebnurum,” eboka molobting. Ara, sun ai umbura bukting ba, sun akenyi bisi, “Dib en uram eterebnurum,” eboka molobting. Ba, nerabwe ara sun dib tenen nang bulubmangnyi kankan asi uram eterebingnyei. Ato kun dinyi ara ukubman kum dinyi kubte.

³⁶Sun dantam-dantam nirya bulubmangnyi dib tenen nang ara ato-ato dinyi kuboka kunubde baraming bok, sunda Korintus atei aryi kuboka dib tenen nang atikwe ato kuboka kum kunurandum se. Ati, niryi sunsi asirdena ton asibdenkwinsin. Sunci sundamnyi erebdeibdandoka, “Nunda Er Imtamnyi Uram deyok nang kunub,” tenerdarandum darib? Tonda, sunci, “Nun tikwe Er Imtamnyi Uram dobdobmoubwe,” tenerdarandum darib?

³⁷Niryi sunsi, “Ato-ato kunubde bindarur,” eboka kerek sekeibmasin ara ni yuk aryi tenen dinyi deici aryi kum kerek sekeibmasin. Erda, nun Du Yesus bira nun Arungdeirisurutnyi biryi arukdeibsou to akwe lak eboka kerek sekeibmasin. Ati, sun kankan asi, “Nunda Er Imtamnyi Uram ebdeibmaci to lak etereramnyi nang kunub,” tenebdating nang ara niryi sunsi arukdeibmasin uram ati, “Nun Du Uram diboka kubmar,” eboka lak ebting. Tonda, sun kankan asi, “Nunda imtam dinyi ati bikdob nang kunub,” tenebdating nang ababyi, “Nun Du biryi arukdeibmasou to diboka ebmurubmar,” eboka lak ebniting.

³⁸Niryi sunsi nun Du Yesus biryi arukdeibmasou uram asi ebmuruboka lak ebmasin. Ba, sun kankan asi ton nang ara a uram ati, “Nun Du biryi arungdeirisina uram kuma,” ebting. Sun ato dinyi ebingnyi nang ara Er Imtamnyi Uram diboka kum bingnung ati, nunci a nang aryi ebingnyi uram kum kekebkwayeb. Ati, sunbabyi a nang ati, “Er Imtamnyi Uram diboka kum bingnung,” tenen bikmun ci, a nang uram kekebmunyei.

³⁹Ati, ni kwityabwe dib tenen nang. Sunci, “Er Imtamnyi Uram bikoka ebmurubtibyi,” tenen busul kuboka ingkirikdarur. Tonda, sunci sun, “Er Imtamnyi Kanya karebsici uca, ilila uram deib aryi uram sisiktibyi,” tenen nang asi, “Mem,” ebmunyei.

⁴⁰Ato ebman bok, nun Du Yesus biryi arukdeibmasou to, sunbabyi neiktoto tuba-tuba kunubde bindarur. Tonda, sunci ninyi kanya kankana kurdeirin dinyi nirya asi bisik sekmun cok, ton dinyi kunubde ton dinyi kunubde bindarur.