Read Futuna-Aniwa 1Korintus 4 Bible Online

1Korintus 4 - Futuna-Aniwa bible

1Korintus 4

¹Ati, sunci ni Paulus ab Apolos ab ati Kefas ab ati ato tenebsindarur. “A nang ara nun Du Yesus Kristus Er wa irmilin nang kunung,” tenebsindarur. Tonda, “Er Imtamnyi biryi a nang asi Er Uram ebdeibmou uca, sunci Er Imtamnyi biryi minob lak kum kiamwe bikdob uram asi bikoka lak esunung,” tenebsindarur.

²Ura, wa arungdeirinanyi ton er wa irmilin nang asi, “Ato-ato kubdarur,” eboka takubdeibmaci ura, er wa irmilin nang ara tanglona kum uca a takubdeibmaci wa asi kunubkwanung. Ati, Er Imtamnyi biryi neiktoto nunbabyi, “Minob lak kum kianse uram asi lak eterebmurubdarur,” eboka takubdeibsou to, nunda Er wa irmilin nang aryi sulbalyi kuna kum uca a uram asi diboka kunubde binkwanub.

³Nun Du bikwa ni wa arungdeirinunyi kurur ati, Er bitikwa aryi niti, “Niryi takubdeibman wa diboka irur do kum do?” tenen lilirdeirinurutnyi kurur ati ebman. Ba, Sunda Korintus atei nang ton tukwetam nang yuk nang ara ni wa arungdeirin nang kum kurandum ati, sunci niti, “Er Imtamnyi biryi ebdeibmou to diboka wa ibde barur do kum do?” tenen lilibnindate ura, niryi, “Sun yuk da tenenmanunga malya,” tenebsitinyi. Ba, nibabyi nidamnyi asi, “Ato-ato kubdum,” eboka wa arungdeirirdananyi kum kunun ati, niryi nidamnyi ati, “Er Imtamnyi biryi ebdeibnou to diboka eterebde banun do kum do?” tenen kum lilirdanun. Erda, nun Du Yesus bikwa ni wa arungdeirinurutnyi kurur ati, Erci nisi ur lilibdur.

⁴Niryi ni kanya dam aryi, “Malyi dinyi ton kunuranse,” tenen kum bingdanun. Ba, niryi nidamnyi ati ato tenerdanun deib aryi niryi nidamyi ati, “Ni malyi deyok kum kubmanir,” kum tenerdanun. Nun Du Yesus bira nun Arungdeirisurutnyi bitikwa ni wa ibde banun to lilirdeirinurutnyi kurur ati ato ebman. Yuk nang aryi ni kunubde banun dinyi asi lilibnitingnyi ara talyi ati lilibmanitingnyi ati ebman.

⁵Ati, nun Du Yesus biryi ninyi deyok nirya asi lilibdeibkwansir deyok aryi, nunda tukwetam nang aryi nun mamun lilibdabibyei. Ati, nunci, “Er Imtamnyi biryi teleb teneamwe uki tum berekci ura, nun Du Yesus biryi ninyi deyok lilibkwansir,” tenen dibde bukwayeb. Nun Du tamuryankwande uki tum berekci ura, Erci nun nirya asi, “Malyi deyok kubmai do kum do?” tenen diboka lilibkwansir. A berekwande uki tum ara nun Du Yesus biryi kunuk dinyi ton malyi dinyi ninyi aryi inirdeirin dinyi ton nirya asi lak kibdeibkwande. Tonda, ninyi kanya dam yuk-yuk aryi teneramibyi dinyi nirya asi Erci lak kibdeibkwande. A berekwande uki tum ara nun Nai Imtamnyi biryi sun er uram kunubde ban nang asi dekeiboka kisal dakwansir.

⁶Ura, ni kwityabwe, niryi kiklin dinyi doboka nidamnyi ab Apolos ab ati, “Nunda nun Du Yesus Er wa irmilin nang kunub,” eboka kerek sekeibmasin ara sun Korintus atei nang ati, “Bikdobting,” tenen kerek sekeibmasin. Ara, sunbabyi nun kunubde banunum to milibmun ci, sundamnyi luknubdongobdankwandum ati kerek sekeibmasin. Ninyi aryi bikdob en uram eraming ara, “Kerek sengna umbura aryi kerek sekeibmaci dinyi diboka kalingna teleb,” eraming. Ati, nunci sunti, “‘Er Imtamnyi Uram umbura aryi kerek sekeibmou to diboka kalikwayeb,’ tenen bikdobting,” tenesununum. Ara, sunci a kiklibdeibmasin uram deici aryi bikdobdate uca, sunci sundamnyi tuba kum erebdeibdankwandate. Ati, sunci luknubdongordan kanya bobdate ura, sunci nun Du Yesus Er wa irmilin nang ati, “Anyi bisi milibkwayeb, onyi bisi dokdonokwayeb,” tuba kum tenebdate.

⁷Sunda yuk nang asi bisibkaboka iya weik nang kurandum do? Ato tenen kum. Ati, unato ati sunci sundamnyi erebdeibdanmarum do? Tonda, unato ati sunci, “Nunda bona bon nang kunub,” tenen sundamnyi ererdeirirdarandum do? Sunci talerandum dinyi nirya asi Er Imtamnyi biryi sunsi karebmasir ati, sunci sundamnyi erebdeibdamunyei.

⁸Sunci sundamnyi ererdeirirdaramun ci, “Lemsin dinyi utotoa nirya langdeiboka dobdobmoubwe,” tenerdarandum. Tonda, “Er Imtamnyi Kanya Roh Kudus aryi karebde basurur mikib dinyi yuk-yuk langdeiboka dobdobmoubwe,” tenerdarandum. Tonda, sunci sundamnyi erebdeibdandoka, “Nunda nun Du Yesus amwetam bun nang kunub ati, weik sien nang ato sirya kibmoubwe,” tenerdarandum. Ara, nunda Kristus biryi bokdonoksou nang asi outam kibdongobmasurum ci, sunda weik sien nang ato kibdanmarum. Ba, niryi sunti, “Weik sien nang diboka kibmating,” tenesunun. Ara, “Weik sien nang diboka kibmating uca, sunci nunda Teleb Uram eteren nang ababyi nisintum erebdeibmasiting,” tenesunun.

⁹Nunda nun Du Yesus biryi bokdonoksou nang ara weik nang ato kum kunub ati ebman. Erda, Er Imtamnyi biryi teleb tenebsou to, nunda iya outam bun nang ato kunub. Nunda Teleb Uram eterebde ban nang ara tabwe demna nang ato kunub. Tonda, weneboka obmanto nang ato kunub. Ara, Er Imtamnyi Uram eryuryangan nang babyi tukwetam nang babyi nirya aryi asing dinmasing uca, nunda weneboka obmanto nang ato kunub.

¹⁰Nunda nun Du Yesus Kristus bisi wa irmilin nang ara nun Du Yesus uram Teleb Uram eterebde banub deyok aryi, ninyi aryi, “Lub nang aca,” tenesunung. Ba, sunda sundamnyi erebdandoka, “Nun Du Kristus biti bikdob dinyi bingnub,” tenerdarandum. Nunda mitang nang kunub bok, sunda sundamnyi ati, “Nunda mikib nang kunub,” tenerdarandum. Sunda ninyi aryi kisal dangsunung nang kurandum bok, nunda ninyi aryi ina ngilingsunung nang kunub.

¹¹Nunda nun Du Yesus Er wa irmilin nang ara Teleb Uram eterebde baramoubwe ba, kwaning ton me ton ataransou. Ani, ukuryok ababyi kwaning ton me ton ataransir. Nun ongoramib aling ara kwiriblob aling akwe ongoramib. Ninyi aryi, “Teleb Uram nun li,” tenen kulab-kulab eransing. Tonda, man ai sirik ton kum kuransir.

¹²Nunci, “Kwaning atabsicei,” tenen nun taruk aryi ikin wa sirik iramib. Ninyi aryi nunsi sumnansing bok, nunci a nang asi kisal dangnamib. Ninyi aryi, “Obtibyi,” tenen domkiringsunung bok, nunci namin kanya boramibiryi, tanglona kum uca nun Du Yesus biryi takubdeibsou wa kunubde baramib.

¹³Ninyi aryi tola ati tatab-tatab ebsingnyi ababyi, nunci namin uram akwe eboka uram dengdeiriramib. Nunda nun Du Yesus Kristus bokdonoksou nang kunub bok, ninyi nirya ara nunti, “Iya malyi kun nang,” tenen, “Yakdonokwayeb nang,” tenesunung.

¹⁴Ni kwityabwe. Niryi nundamnyi ati, “Outam bun nang kunub,” eboka kerek sekeibmasin ara sunti, “Alyi kibdeibkwan,” tenen kum kerek sekeibmasin. Erda, niryi sunti, “Ni mabwe nermabwe,” tenesunun ati, niryi sunti, “Sundamnyi erebdeibdabingnyei,” tenen kerek sekeibmasin.

¹⁵Ninyi ilinto aryi sunti, “Nun Du Kristus deyok ati eterebkwayeb,” eboka kaliksiting ababyi, ni Paulus tentok ara sun nai bitonyi kunun. Niryi sunsi Teleb Uram yuma kobdob etereranse uca, sunda Kristus dam kun nang kibmandau. A deyok aryi, ni tentok ara sun nai bitonyi kunun. Yuk nang ara sun naiyabwe ato kum kunung.

¹⁶Ati, nira sun ai bitonyi kunun deyok aryi, sunci ni eterebmasin uram asi kekebmun ci, ni kunubde banun to milibde bindarur.

¹⁷Ati, niryi sunti, “Ni kunubde banun to milibniting,” tenen niryi nun kwit Timotius bisi sun dam bokdonokmasise. Ara, “Ni kunubde banun to eterebdum,” eboka nun kwit bisi sun dam bokdonokmase. Timotius bira ni boukwe weik kunun mi atonyi kurur. Erda tanglona kum uca nun Du Yesus Er wa irmilinanyi kurur ati ebman. Nun kwit biryi sun dam yaci ura, erci sunsi tubto eterebsici uca, sunci nira sun nai biti, “Ato-ato kuboka nun Du Yesus Kristus bisi milirur,” tenen tamuboka bikwanurum. Ara, niryi dantam-dantam bindoka sun bulubmangnyi dib tenen nang nirya asi eterebde banun to, nun kwit biryi neik uram aca eboka sunsi eterebkwansir.

¹⁸Ba, sun kankan asi ton nang ara sundamnyi ererdeirirdaraming se. Ara, “Anyi Paulus bira nun dam tubto kum yankwansir,” tenen sundamnyi erebdeibdanmang.

¹⁹Ato teneraming bok, niryi sun dam minola tamuryankwan. Ara, nun Du Yesus biryi bublan kukeibnute uca, minola yankwan. Sirya yanmanyi ura, niryi a erebdeibdanmangnyi nang aryi eraming uram kekebnyi uca, niryi, “Ato-ato eboka sundamnyi ererdeiriraming,” tenen bikdobkwan. Tonda, niryi a nang ab ebdabyi uca, niryi sunti, “Sibambol dem deici aryi Er Imtamnyi mikib dobdobmang do diboka dobdobmang do?” tenen bikdobkwan.

²⁰Er Imtamnyi bira iya weik sienyi kurur ba, nunda Er amwetam kun nang kunub deyok ara nunukoka bingna dinyi ara sibambol dem deici aryi lak en dinyi kum kurur. Erda, a dinyi nunukoka bingna dinyi ara Er Imtamnyi mikib lak kimdeirin dinyi diboka kurur ati ebman.

²¹Ati, sunci una tenebmanurum do? Niryi una kuboka sun dam yankwan do? “Mikib kuboka kerebkwan,” tenen kanya bobniryi, sun dam yankwan do? Boukwe kiboka namin kanya bobniryi, yankwan do?