Read Futuna-Aniwa 1Korintus 6 Bible Online

1Korintus 6 - Futuna-Aniwa bible

1Korintus 6

¹Ni kwityabwe. Sunda dib tenen nang kankan asi ninyi ton nang aryi sun mamun lulurdanmai cok, alyi kuna kum uca sun dib tenen kum nang dam bindoka, “Nun lulurdana deyok lilibsindarur,” eboka moloraming se. A nang ara sun kwityabwe dib tenen nang asi, “Nun lulurdana deyok lilibsindarur,” eboka kum moloraming se. Erda, sun Er Imtamnyi Uram walwal nang bindoka, “Nun lulurdana deyok lilibsindarur,” eraming.

²Sun dib tenen nang aryi ato dinyi ukuna mem. Sun dib tenen nang ara bikdob kanya bonung deyok aryi sun dib tenen nang yuk nang lulurdana deyok lilibkwanung ati ebman. Nun Du yuryangaci ura, nunda dib tenen nang ara sun im dangna tukwe dangna nang aryi kuamingnyi tok nirya lilibkwayeb. Sunci a dinyi kum bikmarum do? Aminda aryi lilibkwayeb deyok nirya ara ikin weik deyok kubkwande bok, nunda dib tenen nang aryi a deyok asi lilibkwayeb. Ba, ukuryok aryi tukwetam kuboka lilirban deyok ara caknam deyok ato kurande ababyi, nunda dib tenen nang aryi ur lilibkwayeb. Ati, nunci, “Nun dib tenen nang ara bikdob kanya bonub deyok aryi, dib tenen nang yuk nang deyok ababyi ur lilibkwayeb,” tenen ur lilibkwayeb.

³Nun Du yuryangaci ura, nunda dib tenen nang aryi sun tukwetam nang aryi kunuamnyi dinyi akwe kum lilibkwayeb. Erda, nunci, “Teleb dinyi kubmai do kum do?” tenen Er Imtamnyi Uram eryuryangan nang kunuamnyi dinyi ababyi lilibkwayeb. Sunci a dinyi kum bikmarum do? Ati, nunda dib tenen nang ara imtam deyok ikin deyok lilirbana ati bingnub deyok aryi, nunci tukwetam deyok ara caknam dinyi lilirbana asi tabakdongoboka bingnub ati ebman.

⁴Ati, sunda dib tenen nang aryi tukwetam dinyi ati sun mamun lulubdate ura, sunci unato ati sun Er Imtamnyi Uram walwal nang dam bindoka, “Nun lulurdana deyok lilibsindarur,” ebdate do? A nang ara sun dib tenen nang aryi kisal dangna nang kum kuraming ati, sunci ato dinyi molobmunyei.

⁵Niryi sunti, “Alyi kibdeibkwan,” tenen ato ebmasin. Ura, unato ati sunci, “Dib tenen kum nang aryi nun lulurdana deyok lilibsiting,” erandum do? Sunda dib tenen nang kankan asi bikdob kanya bon nang ton kum kuraming darib? Sun kankan aryi sun kwityabwe dib tenen nang lulurdana deyok lilina ati bingna nang ton kum kusunung darib?

⁶Unato ati dib tenen nang ton nang aryi, “Dib tenen nang yuk nang aryi nunsi malyi kibdeibmasing,” eboka tatab-tatab ebting do? Unato ati a nang aryi sun dib tenen kum nang urasintam bindoka, “Nun lulurdana deyok lilibsindarur,” eboka molobting do?

⁷Sunda dib tenen nang ara dib tenen kum nang bindoka, “Nun deyok lilibsindarur,” eboka molorandum ara diboka malyi kun dinyi kurandum ati ebman. Dib tenen nang yuk nang aryi sunti malyi kibdeibsingnyi ara malyito kibdeibsingnyi bok, sunda dib tenen nang aryi dib tenen kum nang urasintam aryi tatab-tatab ebdate ara tabakoka iya malyito kubdate. Ati, dib tenenanyi yuknyi biryi sunti malyi kibdeibsute ababyi, sunci, “‘Deyok lilibdarur,’ eboka kum molobkwan,” tenena teleb. Tonda, dib tenenanyi yuknyi biryi sun dinyi ukula dobdobte ababyi, sunci, “Sun dib tenen kum nang urasintam aryi tatab-tatab ena kum kubkwan,” tenena teleb.

⁸Ba, sunda dib tenen nang kurandum cok, malyi kanya bordarandum se. Ara, sunci sun kwityabwe dib tenen nang yuk nang asi tola uram erandum ci, sun bona bon dinyi dobmarum se. Sunci sun kwityabwe dib tenen nang asi malyi kimdeirirandum se.

⁹Ura, sun malyi kun nang ara Er Imtamnyi Iya Weik Sienyi amwetam bun nang kum kibingiryok, Er lemsin dinyi kum dobdobkwaming. Sunci a dinyi kum bikmarum do? Ati, sunci sun malyi kimdeirirdan dinyi taklobdarur ati ebman. Tola uram aryi sunsi bowanikminiksicei. Erda, dib en uram akwe dib tenebdarur. Ati, sun talyi yordan nang ara Er Imtamnyi amwetam bun nang kum kibkwaming. Tonda, sun kwemdina molon nang ababyi Er Imtamnyi amwetam bun nang kum kubkwaming. Tonda, sun yuk nang ner talyi yordan nang ababyi Er Imtamnyi amwetam bun nang kum kibkwaming. Tonda, sun, “Co bok karebniminyi uca, yobkwankin,” en nang ababyi Er Imtamnyi amwetam bun nang kum kibkwaming. Tonda, sal ara sun mamun yordaraming nang ababyi Er Imtamnyi amwetam bun nang kum kibkwaming. Sun ato kuboka malyi dinyi kuramingnyi nang nirya ara Er Iya Weik Sienyi amwetam bun nang kum kibingiryi, Er Imtamnyi lemsin dinyi kum dobdobkwaming.

¹⁰Tonda, sun ukula don nang ton, sun, “Co bok ilinto talebtibyi,” tenen tula kiringna nang ton, sun anggur du yung ilinto yiramingnyi nang ara Er Imtamnyi amwetam bun nang kum kibkwaming. Tonda, sun talakdongoboka malyi uram en nang ton, sun tola uram eboka yuk nang dinyi asi moloboka yirlon nang ababyi neiktoto Er Imtamnyi amwetam kun nang kum kibingiryi, Er lemsin dinyi dorona kum kubkwaming.

¹¹Ura, sunda Korintus atei aryi kurandum dib tenen nang kankan aryi ton nang ara minob ura ato malyi kun dinyi yuk-yuk kunubde barandau. Ani, nun Nai biryi sunsi nabdeibsou uca, sunci sun malyi kun dinyi taklobmandau uca, kilibdob kanya bon nang ato kibmandau. Tonda, sunda kilibdob kanya boboka Er Imtamnyi urasintam aryi teleb dinyi kunurandum nang kibmandau, Tonda, Er Imtamnyi biryi sunti, “Ni mabwe nermabwe, ni urasintam aryi teleb nang,” tenen dobdobmasou. Ara, nun Du Yesus Kristus biryi karebmou uca, Er Imtamnyi biryi Er Kanya Roh Kudus mikib biriman aryi sunsi dobdobmasou.

¹²Sunda dib tenen nang kankan asi ton nang ara ato eboka lak erdaraming. “Nunda tabwe lobdeibsou nang kunub deyok aryi, nunci nun kanya dam aryi malyi dinyi tenebtibyi ababyi, ur kunubde bitibyi.” Ato eraming bok, niryi ato eboka ebkateibman. “Nunci nun kanya dam aryi malyi dinyi tenebtibyi dinyi asi kunubtibyi uca, a dinyi nirya ara nunti teleb kum kubdeibsute.” A nang aryi, “Nun kanya dam aryi malyi dinyi ababyi tenebtibyi dinyi asi ur kunubde bitibyi,” eraming bok, niryi ato eboka ebkateibman. “Nunci nundamnyi kalikdandoka, ‘Yuk dinyi-yuk dinyi utotoa aryi nunsi taleboka tabwe tubto debsicei,’ tenebkwayeb.”

¹³Tonda, ton nang ara ato eboka lak erdaraming, “Nun yina yibmabyi dinyi ara mundu dinyi akwe kurur ati, nunci teleb tenebtibyi tok ur yibtibyi.” Ato eraming bok, niryi ato eboka ebkateibman. “Yina yin dinyi ara tiya dinyi akwe kurande. Er Imtamnyi biryi aminda aryi mundu dinyi ababyi yina yin dinyi ababyi kum daneibkwande.” Ba, ninyi nong ara Er Imtamnyi biryi kiknibmasou. Ara, “Talyi yobdating,” tenen Erci nunsi kum kiknibmasou. Erda, nun Du Arungdeirisurutnyi Yesus Kristus Er Uram milibkwayeb ati kiknibmasou. Tonda, nun Du Arungdeirisurutnyi bira nunsi dibniliboka kalingsurutnyi kubkwande ati Erci nunsi kiknibmasou. Ati, nunci nun nong ab nun kanya ab biriman aryi Er Imtamnyi biryi teleb tenesurur dinyi akwe kubkwayeb.

¹⁴Nun Nai Imtamnyi bira Er mikib deici aryi nun Du Yesus sirya dibmou asi kam bukeibmou. Tonda, Erci nun nong ab nun kanya ababyi kam bukeibkwansir.

¹⁵Nunda dib tenen nang ara nun Du Yesus ab tonkwa nong tentok ato nang kunub ati sun kum bikmarum do? Ati, nunda nun Du Yesus ab tonkwa nong ato nang kunub cok, nunci nun nong asi karebdandoka talyi yon ner yobtibyi do? Ato tenen kum.

¹⁶Talyi yon ner bindoka yobtingnyi nang ara talyi yon ner ab tonkwa tub tentok ato kibdating ati sun kum bikmarum do? Er Imtamnyi Uram umbura aryi a deyok ati ato esurur. “Sal aryi ner ab yobdiryok, sun nang bitinyi antanibdeibdandoka nong tentok ato kibkwanding.” (Kejadian 2:24) Ati, talyi yon ner yobtibyi ababyi, talyi yon ner ab tonkwa nong tentok ato kibdatibyi. A deyok aryi nunci talyi ner yobibyei.

¹⁷Ba, unanyi-unaner ara nun Du Yesus Kristus dam kun nang kibingnyi uca, a nang ara nun Du Yesus ab antanibdeibdandoka Er ab tonkwa neik kanya boraming.

¹⁸Ati, sunci sundamnyi kalikdandoka talyi yon dinyi kisibdobdarur. Unanyi-unaner ara talyi yon dinyi kunubde baraming ara sundamnyi malyi kimdeirirdaraming. Bok, malyi kun dinyi yuk dinyi utotoa nirya asi kunubde baramingiryok, sun mining nong malyi kum kimdeiriraming.

¹⁹Ninyi nong kanya nirya ara Er Imtamnyi Kanya Roh Kudus kurur ai kurur ati sun kum bikmarum do? Er Imtamnyi biryi karebsou uca, sunci Er Imtamnyi Kanya dobdobmandau ati ebman. Ati, sunci, “Nun nong kanya ara nun dinyi,” tenebmunyei. Erda, sunci, “Nun nong kanya ara Er Imtamnyi talesurur dinyi,” tenebdarur.

²⁰Nun Du biryi Erdamnyi karebdanmou ara dengna weik dinyi ato karebmou cok, sunsi dekmasou deyok aryi, sunci, “Er Imtamnyi biryi nun talesurutnyi kurur,” tenebdarur. Ati, sunci sun nong kanya biriman aryi Er Imtamnyi biti, “Nun Nai Erebdobnyi,” tenen Erci teleb tenesurur dinyi kunubde bindarur.