Read Futuna-Aniwa 1Korintus 7 Bible Online

1Korintus 7 - Futuna-Aniwa bible

1Korintus 7

¹Ura, sunci nisi kerek sengna kerek sekeibmanindau ara sal ner dordana deyok ati eboka kerek sengna kerek sekeibmanindau ati niryi a deyok ati uram ton eterebkwinsin. Sun kankan asi ton nang ara ato eraming. “‘Sun ner kum dobkwayeb,’ tenen nang ara teleb dinyi tenen kunuraming.” Tonda, “‘Sal aryi nisi dobnicei,’ tenen nerabwe ara teleb dinyi tenen kunuraming.”

²Diboka eraming bok, sal ner dordana ababyi teleb dinyi kurur ati ebman. Ara, “Sal ner dordana kum kubingnyi uca, talyi yon dinyi utotoa kunubde bingnyei,” tenenun deyok aryi, “Sal ner dordana ara teleb dinyi kurur,” ebmasin. Sal ara ner tentok asi dobkwanung. Tonda, nerabwe ara sal tentok asi dobkwanung.

³Sal ara sun ner dobingnyi ura, “Ni ner yobkwanun,” tenen kunubde binkwanung. Tonda, sun nerabwe neiktoto ara sun akenyi biti, “Ur yobnute,” tenen kunubde binkwanung.

⁴Sun nerabwe ara, “Ni akenyi yobnicei,” tenen kisibdobingnyei. Sun nerabwe nong ara sun akenyi dinyi kurur deyok aryi, ato ebman. Tonda, sun akenyabwe aryi, “Ni mining ner asi kum yobkwan,” tenen kisibdobingnyei. Sun akenyi nong ara sun mining dinyi kum kurur. Erda, sun ner dinyi kurur ati ato ebman.

⁵Sun sal nang yuk aryi, “Ni ner kum yobkwan,” tenebmunyei. Tonda, sun nerabwe yuk aryi, “Ni akenyi yobnicei,” tenebmunyei. Erda, sun nang bitinyi antaniboka, “Yordana ati tiya taklobkwanim,” tenebdengnyi ura, sunci yordan dinyi tiya akwe ur taklobting. Talyi dinyi kubkwandum ati sunci yordan dinyi asi tiya taklobmunyei. Erda, sunci, “Er Imtamnyi bisi diboka molobkwanim ati yordan dinyi tiya taklobkwanim,” tenebdandate ura, sunci yordana dinyi ati tiya taklobdate. Er Imtamnyi bisi diboka moloramunyi talak sirya bisibci ura, sun nang bitinyi ara kisirlona kum uca tamuboka yobdankwandum. Ara, “Ni akenyi biryi erdamnyi kum kalikdate asi isa sienyi si Iblis biryi sakeibte uca, ner talyi yobcei,” tenen er ner aryi er akenyi biti, “Ur yobnute,” tenen kubdur. Tonda, “Ni ner aryi erdamnyi kum kalikdate asi Iblis biryi sakeibte uca, talinyi biryi ni ner talyi yobcei,” tenen er akenyi biryi er ner biti, “Ur yobkwan,” tenen kubdur.

⁶Niryi ato ebmasin bok, niryi, “Sal ara ner dobkwanung,” eboka kum arukdeibmasin. Erda, niryi sunsi, “Sal ner dordan dinyi ara mem kuma,” ebmasin. Ati, “Sal ara ner ur dobkwaming,” ebmasin.

⁷Er Imtamnyi biryi ni Paulus bisi mikib karebnou uca, niryi, “Ner doboka yobtinyi,” tenenanyi kum kunun. Nira atonyi kunun ci, “Ninyi nirya ara ni kuran to miliboka, ‘Ner doboka yobtinyi,’ tenen kum nang kibting,” tenenun. Ato ebman bok, ner don dinyi ababyi teleb, ner don kum dinyi ababyi teleb kurur ati ebman. Nun Nai Imtamnyi biryi mikib yuk-yuk karebsou uca, ton nang aryi, “Ner dobkwan,” tenen ner doraming ba, yuk nang aryi, “Ner dona kumnyi kubmurubkwan,” tenen ner kum doraming.

⁸Ura, ni kwityabwe, ukuryok ara sun ner don kum nang ton sun sulyi nerabwe ton ati uram ton ebkwinsin. Sun ner don kum nang ara, “Aminda ababyi ner kum dobkwan,” tenebting uca, a nang ara ner ur kum dobting. Tonda, sun sal aryi don kum nerabwe ara, “Aminda ababyi sal aryi dobnicei,” tenebting ara teleb dinyi tenebting. Ni Paulus bira ner don kumnyi kunun to, yuk nang ababyi neiktoto sal ner dordan kum nang ur kubting.

⁹Ba, ner don kum nang ara, “Ner doboka yobtinyi se,” tenen sundamnyi kum kalikdatingnyi uca, ner dobkwanung. Ara, “Ner doboka yobtinyi se,” tenen nang aryi ner kum dobting ara malyito kubte. Sun ato tenen nang aryi ner dobting ara bisibkaboka teleb dinyi kubte. Tonda, sal aryi don kum nerabwe ara neiktoto, “Sal aryi doboka yobnute,” tenebting uca, sal dobkwanung. Ara, a nang aryi, “Nun kanya tin bisici uca, talyi yon dinyi kibibyei,” tenen sal ner dobkwanung.

¹⁰Ura, sun ner don nang ton sun sal don nerabwe ton asi niryi ato ebmasin. (Ni Paulus yuk aryi ato eboka kum arukdeibmasin. Erda, nun Du Yesus Erebdobnyi biryi ato eboka arukdeibmasir.) Sun nerabwe ara sun akenyi bisi taklobingnyei.

¹¹Ba, er ner aryi er akenyi bisi sirya taklobte ura, yuk sal aryi a ner asi dobcei. Er akenyi bisi takloanci ner ara sal don kum ner ato kibte kum, er akenyi minob doantinyi dam tamurbiti ura, antanibdobtiring kum. Tonda, sun akenyabwe ara sun ner asi taklobingnyei.

¹²Ura, sun yuk nang ati niryi ato ebmasin. (Ni Paulus yuk aryi ato ebmasin. Nun Du biryi uram kuma.) Er akenyi bira dib tenenanyi kubte ura, er ner ara dib tenen kum ner kubte ura, er akenyi biryi er ner dib tenen kum ner asi taklobcei. Ara, er ner aryi, “Ni akenyi ab tonkwa kubmurubkwanim,” tenebte uca, er akenyi biryi er ner taklobcei.

¹³Tonda, er ner bira dib tenen ner kubte ura, er akenyi bira dib tenen kumnyi kubte ura, er ner aryi er akenyi dib tenen kumnyi bisi taklobcei. Ara, er akenyi biryi, “Ni ner ab tonkwa kubmurubkwanim,” tenebte uca, er ner aryi er akenyi bisi taklobcei.

¹⁴Ara, er ner dib tenen ner kurante ura, er akenyi dib tenenanyi kum kurante ura, Er Imtamnyi biryi er ner dib tenena deib aryi, “A nang bitinyi asi kisal dakwan,” tenen kisal dangnante. Tonda, er akenyi dib tenenanyi kurante ura, er ner dib tenen ner kum kurante ura, Er Imtamnyi biryi er akenyi dib tenena deib aryi, “A nang bitinyi asi kisal dakwan,” tenen kisal dangnante. Ato dinyi ara dib kum kubmate ura, sun nang bitinyi aryi deibmangnyi mabwe nermabwe ababyi Er Imtamnyi biryi kisal dangnung nang kum kubmating ati ebman.

¹⁵Ba, er akenyi dib tenen kumnyi biryi, “Ni ner dib tenen ner kurur deyok aryi, taklobkwan,” tenebte ura, sunci, “Ur taklobdankwandurum,” ebdarur. Tonda, er ner dib tenen kum ner aryi, “Ni akenyi dib tenenanyi kurur deyok aryi, taklobkwan,” tenebte ura, sunci, “Ur taklobdankwandurum,” ebdarur. Ara, “Kum taklobdatiring ura, sun nang bitinyi aryi dib tenena deyok aryi, lulurdana akwe kubdingnyei,” tenen, “Ur taklobdankwandurum,” ebdarur. Er Imtamnyi biryi nunsi nabdeibsou ara, “Neik kanya boboka antaniboka kubkwaming,” tenen nabdeibsou deyok aryi, nunci sun ato kuboka lulurdangnyi nang bitinyi asi, “Ur taklobdankwandurum,” ebkwayeb.

¹⁶Sunda dib tenen nerabwe ara, “Nun akenyi dib tenen kumnyi ab tonkwa tamuboka antanibdeibdanimnyi uca, erbabyi dib tenenanyi kibte,” tenen sun akenyi ab tonkwa tamuboka antanibdeibdandarur. Tonda, sunda dib tenen nang ara, “Ni ner dib tenen kum ner ab antanibdeibdanimnyi uca, erbabyi dib tenenanyi kibte,” tenen sun ner ab tamuboka antanibdeibdandarur. A deyok aryi, niryi, “Er Imtamnyi biryi nunsi nabdeibsou ara antanibdeibdankwayeb ati nabdeibsou,” ebmasin.

¹⁷Ura, niryi, “Ur taklobdatiring,” ebman bok, sun ner don nang ara tanglordana kum uca sun ner ab tonkwa kurmuruna teleb ati ebman. Tonda, sun sal aryi don nerabwe ara tanglordana kum uca sun akenyi ab tonkwa kurmuruna teleb ati ebman. Ara, Er Imtamnyi biryi nun yuk-yuk asi karebmasou to, nunci kunurmuruna teleb. Ara, sun, “Ner kum dobkwan,” tenen nang ara ner dobingnyei. Tonda, sun ner don nang ara sun ner taklobingnyei. Niryi sun dantam-dantam buluramingnyi dib tenen nang ati ato eboka eterenun cok, sunda Korintus atei nang ababyi neiktoto eterebmasin.

¹⁸Ara, sun den bama sengna nang ara nun Du Yesus bisi dib tenen nang kibingnyi ura, sunci, “Den bama sengna kum nang kibkwanub,” tenebingnyei. Tonda, sun den bama sengna kum nang ara nun Du Yesus bisi dib tenen nang kibingnyi ura, “Den bama sengna nang kibkwanub,” tenebingnyei.

¹⁹Den bama sengna dinyi ababyi den bama sengna kum dinyi ababyi ara bikdob dinyi kuma. Den bama sengna dinyi deici aryi Er Imtamnyi biryi nunsi kisal kum dangsurur. Tonda, den bama sengna kum dinyi deici aryi Er Imtamnyi biryi nunsi kisal kum dangsurur. Erda, Er Imtamnyi biryi, “Ni teleb tenesunun to kunubde bindarur,” en uram kunubtibyi uca, Er Imtamnyi biryi nunti, “Ni mabwe nermabwe,” tenen kisal dangsurur.

²⁰Nun yuk wa-yuk wa iramoubwe nang asi Er Imtamnyi biryi, “Nisi milibnindarur,” eboka nabdeibsou bok, nunci, “Nun minob iramoubwe yuk wa-yuk wa asi taklobkwayeb,” tenebibyei. Erda, ukuryok ababyi neik wa akwe irmururamiryi, Er Imtamnyi biryi teleb tenesurur dinyi kunubde binkwayeb.

²¹Er Imtamnyi biryi sunsi nabdeibsou ba, sunda yuk nang aryi ikin wa takurdeiriransei nang kurandau ani, ukuryok tuba yuk nang aryi ikin wa takurdeiriransing nang kurandum do? Ato kuramunyi ba, sunci, “Ninyi aryi nunsi ikin wa tuba takurdeiriransing ababyi, mambul kanya kum bobkwayeb,” tenebdarur. Ara, nun Du Yesus biryi lebdeibsou nang sirya kibmandau deyok aryi, sunci mambul kanya bobmunyei. Ba, sun “Ikin wa ibdarur,” eboka arungdeirisinanyi biryi bico tenen, “Tabwe lobdeibsici uca ur kuraming nang kibdarur,” ebsici uca, sunci, “Ei, ni nai,” eboka ur kuraming nang ur kibdarur.

²²Sun kankan asi ikin wa iramingnyi nang ara nun Du Yesus biryi nabdeibmou uca dib tenen nang kibmai. A deyok aryi, a nang ababyi nun Du Yesus biryi lebdeibmou ba, Er amwetam bun nang kibmai. Ara, yuk nang aryi arukmangnyi tok ikin wa tuba irmururanting ababyi, Er Imtamnyi biryi sunbabyi lebdeibmou ati, tabwe lobdeibmou nang ato kibmai. Ba, sun dib tenen nang kankan asi sun tenebdobmangnyi tok wa in nang ara, “Nun Du Yesus biryi nunsi nabdeibsou uca, nunbabyi Er arungdeirisina uram kunubde ban nang kunub,” tenena teleb.

²³Nun Du Kristus bira Erdamnyi karebdandoka nunda dib tenen nang nirya asi lebdeibmasou. Ara, dengna weik dinyi ato karebmou ci, nun Du Yesus biryi sunbabyi dekeibsou. Sunda nun Du Yesus biryi lebdeibsou nang kibmarum deyok aryi, sunci, “Yuk nang aryi arungdeirin uram kunubde bibyei,” tenebdarur.

²⁴Ati, ni kwityabwe, nun yuk wa-yuk wa iramoubwe to, ukuryok ababyi tanglona kum uca neik wa iboka ibmurubkwayeb. Ara, Er Imtamnyi biryi nunsi kum nabsou bok, yuk wa-yuk wa iramoubwe to, ukuryok ababyi neik wa iboka ibmurubkwayeb. Ara, “Er Imtamnyi biryi teleb tenebsou wa ibmurubkwayeb,” tenen nunci nun minob iramoubwe wa asi Er Imtamnyi urasintam aryi ibmurubkwayeb. Tonda, nun ner doamibyi tok iya dobkwanub. Ba, “Ner kum dobkwayeb,” teneamibyi tok, iya kam kuronkwayeb.

²⁵Ura, ukuryok ara sun kam nerabwe ab ati uram ebkwansin. Nun Du biryi a deyok ati, “Ato-ato kubdarur,” en uram kum ebdeibmasou bok, niryi sunsi, “Ato-ato kubkwayeb,” en uram ton ebkwinsin. Nun Du biryi kisal daknou ba, bokdonoknou deyok aryi, sunci ni ebdeibkwinsin uram ati, “Dib en uram ebmasir,” tenenina teleb.

²⁶Ukuryok kubde baramib talak ara sun dib tenen kum nang aryi nunda nun Du Yesus bisi dib tenen nang ati, “Obtibyi,” tenen domkiringnansing deyok aryi, mambul weik kurdeirisin talak kurur. A deyok aryi, niryi sunda ner don kum nang asi, “Ner don kum nang ur kurmuruna teleb,” ebmasin.

²⁷Ba, sunda sal ner dordanmarumnyi nang asi niryi, “Taklobdandumunyei,” ebmasin. Ba, ner don kum nang asi, “Ner dobmunyei,” ebmasin.

²⁸Ba, sunci, “Ner dobkwan,” tenen kubmunyi ara ur dobdarur. Tonda, kam nerabwe ara, “Sal aryi dobnute,” tenen kubmunyi ara manmalin dinyi kuma. Ba, niryi, “Sal aryi ner dobingnyei,” ebmasin ara “Sal ner dobingnyi ura, sun nang bitinyi ara tabakoka mambul dinyi ilinto dobdobting,” tenen ato ebmasin. Ati, niryi sunti, “Mambul dinyi dobdobingnyei,” tenen, “Sal ner dobmunyei,” ebmasin.

²⁹Ni kwityabwe, uki mitikanun kubmabyi ani, mambul weik dinyi dobdobkwayeb ati ebman. Ati, ukuryok aryi kuboka aminda ababyi sun ner don nang ara, “Mambul dinyi dobdobkwayeb ati nunci tukwetam dinyi udikum deiboka ingkirikibyei,” tenebting. Ara, sun ner don kum nang aryi imtam dinyi udikum deiboka ingkiringnaming to, sun ner don nang ababyi neiktoto imtam dinyi udikum deiboka ingkiringna teleb.

³⁰Tonda, sun engen kanya bon nang ara sun engen kanya bon kum nang kuramingnyi to kuna teleb. Tonda, sun kilkil kanya bon nang ara sun kilkil kanya bon kum nang kuramingnyi to kuna teleb. Tonda, sun bona bon dinyi dekoka boramingnyi nang ara sun bona bon kum nang teneramingnyi kanya ato bona teleb. Ara, sun nirya aryi, “Mambul weik dinyi dobdobkwayeb talak dam kubmar deyok aryi, nunci nundamnyi kiknibminikdandoka imtam dinyi udikum deiboka ingkirikwayeb,” tenen kunubdarur.

³¹Tonda, sun yina yiboka ai doboka tukwetam aryi kuboka tiya dinyi yuk dinyi ababyi kunubde baramingnyi nang ara tukwetam dinyi ati, “Tiya dinyi aca,” tenebtingiryok, udikum deibingnyei. Tukwe tam dinyi ara ukuryok kubde baramib talak aryi asing eiriramibyi dinyi nirya ara tiya dinyi akwe kurur ati ato ebman.

³²Ura, niryi sunti, “‘Tukwetam dinyi ingkirikwayeb,’ tenen mambul kanya bobingnyei,” tenesunun cok, “Ner dobingnyei,” tenesunun. Sun ner don kum nang ara, “Nun Du bisi wa irmilibkwayeb,” tenena akwe kunung. Ara, “Una kubtibyi uca, nun Du Yesus Er kanya teleb kubdeibkwayeb do?” tenena akwe kunung.

³³Ba, sun ner don nang ara yina yin dinyi ton tukwetam dinyi yuk dinyi-yuk dinyi ababyi akwe tenenung. Ara, “Una kubtibyi uca, nun ner kanya asi teleb kubdeibkwayeb do?” tenena akwe ingkiringnung.

³⁴Sun ner don nang aryi udikum deiboka wa iraming dinyi ara bitinyi kurur. Ton wa iraming dinyi ara, “Una kubtibyi uca, nun ner kanya teleb kubdeibkwayeb do?” tenen wa iraming. Tonda, wa iraming dinyi yuk dinyi ara, “Una kubtibyi uca, nun Du Yesus kanya teleb kibdeibkwayeb do?” tenen wa iraming. Ura, sun sal don kum nerabwe ara, “Una kubtibyi uca, nun akenyi kanya teleb kubdeibkwayeb do?” tenen wa kum iraming. Erda, sunci “Una kubtibyi uca, nun Du Yesus kanya teleb kibdeibkwayeb do?” tenena akwe kuraming. Ara, sun sal aryi don kum nerabwe ara, “Nun nong kanya nirya karebdandoka nun Du Yesus wa in dinyi akwe wa irmilibkwayeb,” tenen kuraming. Ba, sun sal don nerabwe ara, “Una kuboka yina dinyi ingkirikwayeb do?” tenen tukwetam dinyi akwe udikum deiboka wa iraming. Ara, “Una kubtibyi uca, nun akenyi kanya teleb kubdeibkwayeb do?” tenena akwe kuraming.

³⁵Niryi sunsi, “Sal ara ner tuba kum dobting,” ebmasin ara, “Aruk-aruk ebdeibkwan,” tenen kum ebdeibmasin. Erda, niryi sunti, “Teleb dinyi dobdobkwaming,” tenen ebdeibmasin. Ara, niryi sunti, “Tukwetam dinyi ati mambul kanya bona kum uca, nun Du Yesus Er wa asi diboka ibmilibting,” ato eboka ebdeibmasin.

³⁶Sun kankan asi tonyi biryi, “Ni dobkwan ner ara sirya nebdobwe deyok aryi, niryi ersi, ‘Niryi kansi minola kum dobkwankin,’ kum ebkwan,” tenebmaci ura, anyi biryi ukurlona kum uca er ner asi ur dobkwande. Ati, erci, “Ner dobkwan,” tenebmaci tok, er ner ur dobdur. Ato kun dinyi ara manmalin dinyi kuma.

³⁷Ba, yuknyi bira er kanya dam yuk aryi diboka tenebmaci ura, “Ni dobtinyi ner ara kum dobkwan,” tenebmaci ura, erci, “Ner kum yobkwan,” tenen erdamnyi diboka kalikdaci ura, anyi biryi ner kum dobci ababyi manmalin dinyi kum kurur.

³⁸Ati, sun kam ner dobmangnyi nang ara teleb dinyi kunuraming. Kunuraming bok, sun kam ner don kum nang ara bisibkaboka iya teleb dinyi kunuraming ati ebman.

³⁹Sun sal don nerabwe ara sun akenyi ab tonkwa iya kubkwanung. Ara, sun akenyi kam tuba kuranci talak er ab tonkwa kubkwanung. Ba, er akenyi dibte ura, er ner ara yuk nang aryi ur dobting. Ara, nun Du Yesus bisi dib teneboka milin nang aryi ersi ur dobting.

⁴⁰Ato ebman cok, niryi, “Sun akenyi sirya dibmangnyi nerabwe ara yuk sal aryi dona kum uca sulyi nerabwe kurmuruna teleb,” tenenun. A dinyi ara, “Bikdob uram kurur,” tenenun. Sulyi nerabwe kubmurubting ura, sunci nun Du Yesus wa irmilina akwe kubting uca, sun kanya ara bisibkaboka kilkil kubte ati tenebman. Nibabyi Er Imtamnyi Kanya Roh Kudus dobdobmasinyi kunun ci, ato eboka ebdeibmasin.