Read Futuna-Aniwa 1Korintus 8 Bible Online

1Korintus 8 - Futuna-Aniwa bible

1Korintus 8

¹Ura, ni kwityabwe, ukuryok ara, “Kwemdina dinyi asi dama deirin yina asi nunda dib tenen nang aryi ur yibkwayeb do kum do?” tenen uram ton ebkwansin. Ba, a deyok ati yuma kobdob ebkwinsin uram ara ato ebkwinsin. Nun nirya ara, “Er Imtamnyi biryi nunsi bingna dinyi lak kibdeibsou,” tenen bingdaramib. Ba, ton nang ara, “Er Imtamnyi biryi nunsi bingna dinyi lak kibdeibsou,” tenerdaramingiryok, sundamnyi ererdeirirdaraming. “Nunda bingna dinyi bingnub,” tenen ererdana dinyi deici aryi nunci yuk nang kanya asi katabum ebdeibmatibyi do? Ato tenen kum. Erda, nun dib tenen nang aryi nun mamun boukwe kimdaramib dinyi deici aryi nunci nun mamun katabum erdeirirdaramib.

²Sun, “Er Imtamnyi biryi nunsi bingna dinyi lak kibdeibsou,” tenerdan nang ara sundamnyi erebdeibdamingnyei. Sun ato tenerdan nang ara bikdob dinyi langdeiboka kum bingnung. Erda, a nang ara deyok kouboka bikdob dinyi bingkaliraming nang kunung ati ebman.

³Ba, sun Er Imtamnyi bisi boukwe weik kimnaming nang ati Er Imtamnyi biryi, “Ni dam kun nang,” tenen bingsurur.

⁴Ati, ni kwityabwe, kwemdina dinyi asi dama deirin yina ati uram ton ebkwinsin. Nunda dib tenen nang aryi ato yina asi ur yibkwayeb do kum do? Nunda dib tenen nang ara kwemdina dinyi ati, “Talyi dinyi aca,” tenen bingnub deyok aryi, nunci kwemdina asi dama deirin yina ur yibkwayeb ati ebman. Nun Nai Imtamnyi tentok ara iya mikibnyi kurur ati nun nirya bingnub. Tonda, kwemdina dinyi ara talyi dinyi akwe kurur ati nun bingnub. A deyok aryi, nunda dib tenen nang ara yina utotoa nirya ur yibkwayeb. Ara, kwemdina dinyi asi dama deibmangnyi yina yibtibyi ababyi ara mem kuma.

⁵Sun Er Imtamnyi Uram walwal nang ara imtam kurande dinyi yuk-yuk ton tukwetam kurande dinyi yuk-yuk ton asi, “Nun naiyabwe, nun molonub nang,” eboka moloraming. Ato dinyi nirya ara kwemdina dinyi yubwa-yubwa kuraming asi sunci, “Nun du, nun kwin,” eboka moloraming. A kwemdina dinyi nirya ara mikib kum kunung. Erda, talyi dinyi akwe kunung bok, ninyi aryi, sunsi, “Nun naiyabwe erebdob nang,” eboka namnaming.

⁶Ato eboka moloraming bok, nunda dib tenen nang ara, “Nun Nai Imtamnyi tentok ara iya mikibnyi kurur,” tenen bingnub. Nun Nai Imtamnyi biryi imtam dinyi tukwetam dinyi nirya asi minob kiknibmou. Tonda, nun Nai biryi nunsi kiknibmasou ara, “Niryi teleb tenebnyi tok kunubde biting,” tenen kiknibmou. Tonda, nun Du Yesus Kristus bibabyi tentok akwe Er Iya Erebdobnyi kurur ati ebman. Nun Du biriman aryi Er Imtamnyi biryi imtam dinyi tukwetam dinyi nirya kiknibmou. Tonda, nun Du Yesus biriman aryi nunda dib tenen nang ara Er Imtamnyi mabwe nermabwe kibmoubwe.

⁷Nunda dib tenen nang kankan kuboka bikdob dinyi bingna nang ara, “Kwemdina dinyi ara talyi dinyi aca,” tenen bingnub. Tonda, nunci, “Kwemdina asi dama deirin yina ara ur yibkwayeb,” tenen bingnub. Ba, dib tenen nang nirya ara ato dinyi diboka kum bingnung. Dib tenen nang ton nang ara minob ura kwemdina dinyi moloramnyi deyok aryi, sunci ukuryok ababyi ato teneraming. “Kwemdina asi dama deirin yina yibtibiryok, nunda kwemdina molon nang ato tamuboka kibdatibiryi, Er Imtamnyi urasintam aryi malyi dinyi kibmatibyi,” teneraming. Ati, a nang ara, “Kwemdina dinyi asi dama deirin yina ara ur yinmanuba,” tenen kum kuraming. Erda, sunci kwemdina dinyi asi dama deirin yina yibting uca, sunci “Malyi dinyi kunubmab se,” tenerdana akwe kubting. A nang ara sun kanya dam, “Malyi dinyi kunubmab se,” tenerdaramingiryi, sun kanya ara katabum kum erande deyok aryi, sunci, “Er Imtamnyi dam bindoka tuba molobibyei,” teneraming.

⁸Ba, Er Imtamnyi biryi nunti, “Ni dam kun nang,” tenen dorosurur ara nunci, “Kwemdina ara talyi dinyi aca,” tenen kwemdina yina asi ur yiramib deici aryi kum dorosurur. Tonda, nunci, “Kwemdina ara mem dinyi,” tenen kwemdina yina asi kum yiramib deici aryi Er Imtamnyi biryi nunsi kum dorosurur. Sun kwemdina yin kum nang asi nunci, “Bikdob dinyi bingna kum nang,” tenebibyei. Tonda, sun kwemdina yiraming nang ati nunci, “Bikdob dinyi bingna nang,” tenebibyei. Er Imtamnyi urasintam aryi a nang nirya ara neiktoto akwe kunung.

⁹Ba, sunda, “Yina yin dinyi utotoa ur yibkwayeb,” tenen bikdob dinyi bingna nang ara kalikdarur. Ati, sunci, “Nun kwityabwe katabum kanya bon kum nang aryi yibmilibmasiting ura, sunci, ‘Manmalibmoubwe se,’ tenebingnyei,” tenen kalikdarur. Ara, sun kwemdina yina asi yin kum nang ara sun kanya dam aryi, “Yina nun li,” teneramingiryok, sun kwityabwe kwemdina yina asi yirandum nang asi miliboka yibmating ura, “Manmalibmoubwe se,” tenebingnyei ati ebman.

¹⁰Sunda dib tenen nang kankan kuboka bikdob dinyi bingnandum nang ara, “Kwemdina dinyi ara talyi dinyi akwe,” tenen bikmarum. Tonda, sunci kwemdina dama deirin ai bindoka kwemdina asi deibmangnyi yina asi yibdate. Ura, sun kwit dib tenenanyi ara bikdob dinyi bingna kumnyi biryi asing eibsute uca, erbabyi yibte. Ara, erci er kanya dam aryi, “Ur do mem do?” tuba tenebtiryok, “Ni kwityabwe dib tenen nang ur yibmang ati nibabyi yibkwan,” tenen yibte.

¹¹Ura, sirya yibte ura, erci aminda aryi, “Kwemdina molonanyi bitonyi tamuboka kibdanman se,” tenen tuba teneibdate uca, er kanya lukoka obdankwante. Ati, sun bikdob dinyi bingna nang aryi, “Nun kwit biryi kwemdina yina yibingiryi manmalibcei,” tenen diboka kum kalikdate uca, sun kwit yibte uca, er kanya lukoka obdankwante. Ara, nun Du Yesus Kristus dibmou ara sun kwit bibabyi lebdeibkwamwe ati dibmou bok, sunci sun kwit bisi kwemdina molonanyi bitonyi tamuboka kibdate ati ebman.

¹²Sunda bikdob dinyi bingna nang aryi sundamnyi kalingdana kum uca sun kwityabwe katabum kanya bon kum nang urasintam aryi kwemdina yina asi yibmunyi uca, sunci nun Du Yesus Kristus urasintam aryi malyi dinyi kubmun ci. Ara, sun kwityabwe katabum kanya bon kum nang aryi sirya yibingnyi uca, “Kwemdina dinyi yibmab se,” tenebingnyi deyok aryi, sunci nun Du Yesus urasintam aryi malyi dinyi kubmun ci.

¹³A deyok aryi, niryi ato tenen kunubde banun. “Kwemdina asi dama deiriraming yina ara ur yibkwan,” tenen bingnun. Ba, niryi, “Kwemdina asi dama deirin yina asi yibniryok, ni kwit dib tenenanyi bisi bowanikminiknyei,” tenen bingnun uca, niryi kwemdina yina utotoa ton kum yibtinyi ati ebman.