Read Futuna-Aniwa 2Korintus 1 Bible Online

2Korintus 1 - Futuna-Aniwa bible

2Korintus 1

¹Ni Paulus ab nun kwit dib tenenanyi Timotius ab aryi sunda Korintus atei kurandum dib tenen nang asi kerek sengna ton kerek sekeibmasinim. Nun Nai Imtamnyi biryi ni Paulus biti teleb tenebnou to, nun Du Kristus Yesus biryi nisi bokdonoknou uca, nira nun Du uram Teleb Uram eterebde banunyi kunun ati ebman. Ati, nunci sunda Korintus atei kurandum nang ara nun Nai Imtamnyi biryi naboka bulubdeibsou nang asi kerek sekeibmasinim. Tonda, a kerek sengna deici nunci sunda Akhaya mutuk nirya kurandum dib tenen nang nirya ababyi nisintum kerek sekeibmasinim.

²Nun Nai Imtamnyi ab nun Du Yesus Kristus ab aryi sunsi kisal dangsina teleb. Tonda, nun Nai ab nun Du ab aryi sunsi antanirdeirisina teleb.

³Nun Nai Imtamnyi bira nun Du Yesus Kristus Er Nai kobdob kurutnyi bira diboka ninyi bico tenesina deyoknyi kurur. A deyok aryi, niryi nun Nai bisi, “Ei, nun Nai,” enun. Tonda, nun Du Er Nai Imtamnyi bira diboka sun mambul dinyi doramingnyi nang kanya asi teleb kurdeirisina deyoknyi kurur. A deyok aryi, niryi nun Nai bisi, “Ei, nun Nai,” enun.

⁴Dib tenen kum nang ara, “Teleb Uram nun li,” tenen nunda dib tenen nang asi malyi kiminingsingnyi ababyi, yuk deyok yuk-yuk deyok aryi mambul kanya boramibyi ababyi, nun Nai Imtamnyi bira nun kanya teleb kubdeibde basurur. Ara, nun Nai biryi nunda mambul kanya bon nang asi teleb kubdeibde basurur ara, “Yuk nang ababyi mambul kanya boraming asi biting ura, sun kanya neiktoto teleb kubdeibting,” tenen nun kanya teleb kubdeibde basurur.

⁵Ara, nun Du Kristus tukwetam tuba kuramwe asi sun dib tenen kum nang aryi Erti, “Obtibyi,” tenen mambul weik kurdeirin dinyi yuk-yuk ilinto asi kareramnyi. Ani, ukuryok ara ninyi aryi nunda nun Du Er milin nang ababyi neiktoto mambul weik kurdeirin dinyi yuk-yuk ilinto asi kareransing uca, nun kanya ara langdeiboka iya mambul kuransir. Ba, nunci nun Du milinub deyok aryi, nun bisibkaboka iya mambul weik kurdeirisin dinyi dororamib to, nunci neiktoto nun Du biriman aryi nun kanya asi teleb kurdeirisin dinyi langdeiboka dororamib. Ara, nun Nai Imtamnyi biryi nun kanya asi teleb kubdeibde basurur ara nun Du biriman aryi teleb kubdeibde basurur ati ebman.

⁶Ura, ninyi aryi nunda Teleb Uram bobaramib nang kanya asi mambul kibdeibsici ababyi, nun kanya teleb kuransir. Ara, nunci sunda nun uram keken nang ati, “Sun kanya teleb kubdeibkwayeb,” tenen nunci, “Ninyi aryi mambul kibdeibsingnyi ababyi, nunda teleb kanya bobmurubkwayeb,” tenenub. Tonda, nunci sunti ato tenesunub. “Sirya kobdob uki tum berekci ura, iya lemdeirisin dinyi dobdobting,” tenen nunci, “Ninyi aryi nunsi malyi kiminingsingnyi ababyi, nun teleb kanya bobmurubkwayeb,” tenunub. Ura, nun Nai Imtamnyi biryi nunda mambul kanya bon nang asi teleb kubdeibsici ababyi, nunda teleb kanya bonub. Ara, nunci sunda nun uram keken nang kanya asi teleb kubdeibkwayeb ati, nun Nai biryi nunda Teleb Uram boban nang kanya asi teleb kubdeibde basurur ati ebman. Nunda malyi kiminingsin dinyi boranim cok, namin kanya tuba boranim. Dib tenen kum nang aryi nunda nun Du Er wa irmilin nang asi mambul kimdeirisunung to, sunbabyi mambul kimdeirisunung. Ba, nunci sun kanya yuk-yuk asi teleb kubdeibibyi uca, sunbabyi “Ninyi aryi(...)

⁷Nunci ninyi aryi malyi kiminingsin dinyi bormururamib to, sunbabyi malyi kiminingsin dinyi bormururandum. Tonda, Er Imtamnyi biryi nun kanya mambul kuransir asi teleb kubdeibde basurur to, Erci sun kanya ababyi neiktoto teleb kubdeibde basurur. Nunci a dinyi tenen bingsunub deyok aryi, nunci sunti, “Tanglona kum uca nun Du bisi milibkwaming,” tenen katabum eboka dibde bunub.

⁸Nun kwityabwe dib tenen nang. Nunda Asia mutuk bina kuramoubwe ba, sun dib tenen kum nang aryi nunsi mambul kurdeirisin dinyi ilinto takurdeiriransei. Nunci sunti, “Nun kuramib to diboka biksiting,” tenen ato ebmasib. Ati, Asia mutuk kuramuryi, nunci bisibkaboka iya mambul kiminingsin dinyi boramuburyi, nunci, “Mambul dinyi tukwetam nang mikib aryi bobman kum dinyi boramib se,” teneramuburyi, “Nunda dibmanto nang kunmab,” tenen kuramoubwe.

⁹Tola uram kuma. Ninyi aryi nunsi mambul weik kimnansei uca, nunci, “Dibmanto nang diboka kunmab,” teneramoubwe. A mambul dinyi nirya boramoubwe ara nun Nai Imtamnyi biryi nunti minob teleb teneansou tok boramoubwe. Ara, nun Nai Imtamnyi biryi nunti, “Iya mambul dinyi ur bobting,” teneansou. Ara, nunci, “Er Imtamnyi mikib tentok aryok nunsi lebdeibkwansute,” tenen bikwamoubwe ati, Er Imtamnyi biryi nunti bisibkaboka mambul dinyi karebsou. Nun Nai Imtamnyi bira iya mikibnyi kurur ci, sun din nang ababyi kam bukeibsute. Ati, ninyi aryi nunda dib tenen nang mambul weik kibsingnyi ababyi, nun Nai biryi nunsi diboka lebdeibsute ati ebman.

¹⁰Ura, nun dibmanto nang ato kuramoubwe asi nun Nai Iya Mikibnyi biryi diboka lebdeibmasou. Tonda, ukuryok ababyi aminda ababyi nun Nai biryi nunsi lebdeibde basurur. Ati, nunci nun Nai tentok ati, “Lebmurubde binkwansir,” tenen dibde bunub.

¹¹Ara, sunci nunda Teleb Uram boban nang ati, “Wa irmilibkwayeb,” tenen molormilisumunyi ba, nun Nai biryi nunsi tuba lebdeibde binkwansir. Ura, ninyi ilinto aryi nunti molormiliransing ba, nun Nai biryi kisal dakoka lebdeibde basici uca, ninyi ilinto aryi, “Nun molona sirya kunubmar,” tenen Er Imtamnyi bisi, “Ei nun Nai,” ebkwaming.

¹²Nun kwityabwe, nun Nai Imtamnyi biryi karebmasou uca, ni ab, ni ab tonkwa kunub nang ab, ara tola dinyi tenena kum kunub ci, “Nun kanya dam aryi malyi tenen dinyi inibdeibdandoka ninyi urasintam aryi uram ulubyang dakwayeb,” tenena kum kunub ci, nunci ninyi nirya asi teleb kimdeirinub. Tonda, nunci nunukeiboka sunda Korintus atei nang asi teleb kimdeiriransoubwe ani, ukuryok ababyi teleb kimdeirisunub. Nunci nun kanya dam aryi, “Malyi dinyi ton kum kuramoubwe,” tenen bingdanub ci, nunci kilkil kanya boboka, “Ninyi urasintam aryi malyi dinyi ton kum kuramoubwe,” eboka lak enub. Ura, nunci tukwetam nang aryi bikdob tenen dinyi deib aryi malyi dinyi kunubde kum banub. Erda, Er Imtamnyi biryi nunsi kisal dakoka dobdobmasou to, nunci nun Nai uram deib aryi teleb dinyi kubde banub.

¹³Nunci sunda Korintus nang asi kerek sekeibmasoubwe kerek sengna yuk-yuk deib aryi nunci lak en uram akwe eboka kerek sekeibmasoubwe. Ara, ikin uram ara sunci nukde binmanto kum uram ton bikmanto kum uram ton eboka kum kerek sekeibmasoubwe. Erda, lak bikmanto dinyi akwe kerek sekeibmasoubwe. A deyok aryi, niryi sunti, “Uram ulubyang dangna kum kunub,” ebmasin. Ura, niryi sunti, “Niryi kerek sengnun uram deyok diboka bikniting,” tenesunun.

¹⁴Ara, nun kerek sekeibmasoubwe uram deyok ati sunci ton dinyi bikdobmarum cok, yuk dinyi diboka kum bikmarum. A deyok aryi, niryi sunti, “Niryi kerek sengnun uram diboka bikdobting,” tenesunun. Sunci nun kunubde baramib to asi aminda aryi diboka biksumunyi ura, sunci nunti, “Dib en uram akwe eransoubwe,” eboka kisal dakwansurum. Ura, nunbabyi sunda Korintus nang asi kisal dakwansib. Ara, nun Du Yesus tamuryankwande uki tum berekci ura, nunci sunti, “Dib en uram diboka dobdobmai,” eboka kisal dakwansib.

¹⁵Ati, niryi sunti, “Ni kwityabwe nisi dib tenesunung nang,” teneransise deyok aryi, niryi sunti, “Liki bitinyi dirbinkwan,” teneransise. Ati, niryi ato tenebmase. “Makedonia mutuk kum binkwan cok, niryi sun Korintus atei kuboka dib tenen nang asi dirbinkwan. Ura, Korintus atei aryi anaboka Makedonia mutuk bindoka kubmanyi ani, Korintus atei tubto binkwan.” Ato tenebmase. Tonda, “Sun Korintus nang aryi niti, ‘Nun kwit, da birum,’ eboka bisik kona dobminikoka karebkwaning ba, niryi Korintus atei aryi anaboka Yudea mutuk binkwan,” tenebmase. Ati, niryi sunda Korintus atei aryi kuboka dib tenen nang ati, “Liki bitinyi dirbindoka niryi sun kanya teleb kubdeibkwan,” teneranse. Ato teneransiryok, niryi sunsi liki bitinyi kum diryanmasise. Erda, yuma liki akwe diryanmasise ani, aminda aryi kum diryanmasise.

¹⁶

¹⁷Ni kwityabwe. Niryi sunti, “Liki bitinyi diryankwansin,” teneransise ara talyi ati teneransise ati tenebmanurum do? Ato tenen kum. Erda, niryi, “Liki bitinyi diryankwan,” tenen ebmasise ara diboka ebmasise. Niryi ni kanya yuk aryi tenen dinyi deici aryi, “ato-ato kubkwan,” tenena kum kunun. Erda, Er Imtamnyi Kanya Roh Kudus aryi eterebnici tok deib aryi, “Ato-ato kubkwan,” tenenun. Uca, niryi, “Ato-ato dinyi diboka kunubkwan,” ebmanyi ura, niryi minola, “Ato-ato dinyi diboka kunubkwan en uram kum kunubkwan,” ena kum kurantinyi.

¹⁸Nun Nai Imtamnyi bira Er Uram diboka kunurutnyi kurur to, nunci sunsi lak eterenub uram ababyi dib en uram akwe kurur. Ati nunci, “Ato-ato dinyi ara dib kurur,” eramibyi ura, “A dinyi ara dib kum kurur,” ena kum kunub.

¹⁹Nun Du Yesus Kristus bira Er Imtamnyi Mi kurur ci, Erda Er Imtamnyi Uram diboka kunurutnyi kurur ati ebman. Nun Du bira ni Paulus ab Silas ab Timotius ab aryi sunsi lak etereramabunyi biti ato ebman. Nun Du bira tola enanyi kum kurur deyok aryi, nunbabyi tola uram ton kum etereransoubwe. Nunci, “Ato-ato dinyi ara dib kurur,” eramoubwe ura, nunci, “A dinyi ara dib kum kurur,” kum eramoubwe. Erda, nunci nun Du biriman aryi dib en uram akwe etereransoubwe.

²⁰Nun Nai Imtamnyi biryi, “Kisal dakwan,” tenen erdeirisin uram ilinto asi erdeirisurur ara talyi ati kum erdeirisurur. Erda, nun Nai biryi nun Du Kristus biriman aryi a uram yuk-yuk nirya asi kunubde basurur. A deyok aryi, nunci nun Du Kristus biriman aryi, “Amin, Er Imtamnyi biryi Er Uram diboka kunubde basurur,” eramibiryi, nun Nai Imtamnyi si weik enub.

²¹Ura, nun Nai Imtamnyi biryi karebsou uca, nunbabyi sunbabyi nun Du dam kun nang kuramibiryi, katabum eboka dib tenenub. Tonda, nun Nai biryi karebsou uca, nunci Er Imtamnyi Kanya Roh Kudus dobdobmoubwe.

²²Nun Nai biryi Er Imtamnyi Kanya Roh Kudus asi nun kanya dam karebmasou uca, nunci nundamnyi ati, “Nunda Er Imtamnyi amwetam kun nang diboka kunub,” tenen bingnub. Er Imtamnyi biryi Er Imtamnyi Kanya Roh Kudus nun kanya dam karebmasou deib aryi, nunci kankana kanya bona kum uca, “Er Imtamnyi biryi ebdeibsou to diboka kunubkwansir,” tenen bingnub.

²³Ni kwityabwe. Niryi, “Korintus atei liki bitinyi binkwan,” teneransise ani, “Liki bitinyi kum binkwan,” teneransise ara talyi ati kum teneransise ati ebman. Erda, niryi sunti, “Kerena uram ebkarebnyei,” tenen niryi sun dam liki bitinyi kum diryanmasise. Tola kuma. Tola ati ebsitinyi uca, nun Nai Imtamnyi biryi niti, “Tola ati ebmarim se,” eboka ur wenebnute.

²⁴Niryi, “Kerena uram ebkarebnyei,” ebmasin cok, nunda nun Du wa irmilin nang ara sunda dib tenen nang asi arukdeiboka, “Ato-ato kuboka dib tenebdarur,” eboka mambul kum kimdeirinub. Erda, sunbabyi katabum eboka nun Du bisi dib tenerandum deyok aryi, nunbabyi sunbabyi nun Du Er wa irmilin nang tonkwa kunub. Ati, nunbabyi sunbabyi tonkwa wa irmilinub ara sun kanya kilkil kubdeibkwayeb ati wa irmilinub ati ebman.